MIKAH 3

Mikah In Israel Puitute Siat

1Israel uktute ngai un. Dikcangnak a deihtu tuk hi nave uhcin, 2phatnak a huatu le siatnak a deihtu suak lamsang uh ci. Ka mihingte cu a nungcungin, a vun hawk uh ci a, a nguh haw pen a taksa dik sak uh ci. 3Ka mihingte ei khawng uh ci. A vun haw hawkin, a nguh haw na ehtuah ceng uhten beel a, huan tukin sat uh ci. 4Topa i nelah na au tawtok uh hun hengleh tuk laih hi. Mahnaven don nuam tukma hi. Thilpha ngawl na bawl uh hangin na thungetnak uh cu ngai tukma hi.

5Sum piatu tei nelah lemdaihnak um tuk ti thutiamin, sum pia ngawltu tei nelah ngal heng tuk tin mi a thumtu profet ten ka mihingte cu zol khawng haw hi. Hiti bang profet tei nelah Topa in, 6“Profet, na hun can uh bo awndiak zo a, na ni uh tum tuk toh hi. Ka mihingte lam na pialtik uh hangin muhnak nei tukma toh uh ci a, mailam thu hilh ham theihnak nei tukma toh uh ci,” ti hi. 7Mailam thu a hilhtute cu a hilh haw mi a kim ngawl hangin mualpho in um haw tuk hi. Pathian in, a thudot haw a don ngawl hangin a venghawng haw in zakca zetin um haw hi.

8Mahnaven keima ca in, Topa in Israel mite a sualnak haw i hum tih hilhtu tukin hawvang le huham tuah dimtikin, thu dikcang le ngalphatnak pia hi. 9Israel uktute, diknak hua in le thilpha mi thilpha ngawl a cangtiktute, ngai un! 10Pathian i khuapi Jerusalem cu mithahnak le dikngawlnak hum pen sa li uh ci. 11Khuapi uktu bawi ten nawhthuh la in, mi uk haw; thiampi ten sum ngah nuamin, Thukham laibu hilhcian haw a, profet ten sum deihin, mailam thu phuang haw; mahten a venghawng haw in, “Kohtei nelah Topa um hi,” tin ti khawng haw hi. “Keimu humah thilpha ngawl imah heng tukma. Topa cu kohtei nelah um,” ti haw tuk hi.

12Hiti bang na hih uh hangin Zion khua cu lo bangin cek khawng haw tuk hi. Jerusalem khua cu buaksehah cangin, Biakinn umnak mual cu tupi in cang tuk hi.#Jer 26:18;

Currently Selected:

MIKAH 3: NBF1

Highlight

Copy