LUKA 24

Thawhlehnak Thu

(Mt 28:1-10; Mk 16:1-8; Jn 20:1-10)

1Nipi ni zingtungno in, numeite cu a ngallin sa haw mi pak namtui le sathau kengin khan veh haw hi. 2Khan kongkhah suangpek pi honsa in um leng khi mu haw hi. 3Tum vawk ngut haw naven Topa Jesuh i luang cu mu haw ma hi. 4Mahlai ah am sialsual dinleng haw laih takin a el hawah puan ngo silhin, mi pa nih ding leng mu haw hi. 5Numeite cu a lau leita in, lei ah bok thong haw. Mahlai takin a el haw a ding pa nih ten, “Ita mithi lakah a nungmi zei li uh cim? 6Hilai ah umleh ma toh hi. Tholeh zo hi. Galilee a umlaihin, a hilhmi thu khi phawk lehma toh uh cim?#Mt 16:21; 17:22-23; 20:18-19; Mk 8:31; 9:31; 10:33-34; Lk 9:22; 18:31-33; 7‘Mihing Capa cu misual tei khutah piakin um tuk hi. Thinglamteh humah khencihin, ni thum nungten, tholeh tuk hi,’ tih a hilh awng khi,” tin ti haw hi.

8Mahten numei ten ama thucah sate khi phawk kikleh haw in, 9khan pen kikleh haw hi. Hi thu hempoh cu nungzuitu sawm le pa khat le a dang tei lakah hilh haw hi. 10Mah numeite cu Mary Magdalin, Johan le James i nu Mary haw hi. Hite le amu nel um numei dang ten hi thu hempoh cu nungzuitu tei lakah hilh haw hi. 11Mahnaven hi numei tei sonmi thu cu bawlcawmmi hi tin ngaisungin, sang haw ma hi. 12Mahnaven Peter dingvutin, khanah tai ngut hi. A kun thahin khansung a zoh ten a cunnak puan bek mu hi. Thildang imah umma hi. Hi thu cu lamdangsa zetin innlamah kikleh hi.

Emmaus Lamah Hawh

(Mt 16:12-13)

13Mah ni lelengin amu sung pen mihing pa nih cu Jerusalem pen peng salih hawng khawla mi Emmaus khua ah hawh haw hi. 14A pa nih haw in, hiti bang a piangmi thu son ngel li haw hi. 15A son ngel lih laihtak haw in, Jesuh cu amuh neekin hawh langkhat hi. 16Jesuh cu mu haw naven theiciangleh haw ma toh hi. 17Mahten amu lakah hi bangin ti hi, “A hawh thahin, na son ngel lih uhmi i thu him? Ita mitmai thimin thasia uh cim?” tin dong hi. 18A pa khat saw pa in, “Jerusalem ah a hengmi mikhual sung pen nangmah pa khat bek cim nungno in, a piangmi thu a thei kha ngawl,” tin ti hi.

19Jesuh in, “I thula him,” tin dong hi.

“Nazareth mi Jesuh cungcang a piangmi thute,” tin don haw hi, “Hi pa cu profet hi a, Pathian le mi hempoh mai ah a thil tih le a thuhilhnak lamah hu le thawm tuah dim hi, tin ngaihsutmi hi. 20Ka thiampi upate le ngamuktu ten thinglamteh humah that haw hi. 21Amah cu Israel mite luatnak piatu tuk hi tin ka muansan uhmi pa hi. Mah i humah atu-in hi bang a um sawng a ni thumnak hi. 22Keimu ngualcam numei khenkhatte vang khanmualah khawma zetin hawh haw naven, 23A luang amuhleh haw ngawl ten Jesuh cu tholeh zo hi tin, a hilhtu vancungmi tei thu khi keimuh hilh haw hangin lamdangsa mahtak ung hi. 24Keimu sung pen khenkhat cu khanmualah tai ngutin zo haw a, numei tei son bangkekin tawk ngangai haw hi. Jesuh cu na umleh ma toh ngai hi,” tin hilh bet haw hi.

25Jesuh in, amuh tei lakah, “Iti zahta in sil lawlawm uh cim? Profet tei hilh ham mi thu cu muang thei him ma si uh ci? 26Khrih in sunloihnakah a hen theihnak tukin hi hempoh a kul ngangai mi hi ma maw ihim?” 27Jesuh in, amuh tei lakah, Moses i laibu hempoh pepan profet tei ama thu le la a ngat haw mi hempoh khi hilhciang hi.

28A hawhnak tuk khua a hen kuan haw ten, Jesuh cu hawhvawk tuk bangkekin um hem hi. 29Mahnaven pa nih ten, “Nitum awndiak toh, khuathim tuk hi. Keimu lakah camhih bok poh vele,” tin hen haw hi. Jesuh cu amuh tuah cam bok tukin inn sungah tum hi. 30Amu lakah an kuangkilin khung bok a, cangho la in thupha a piak celh ten bot themin, a pa nih haw in pia hi. 31Mahten a mit haw vakin, a mel theiciang ngah hawta hi. Mahnaven Jesuh cu a mitmuh haw in thaamlehta hi. 32Pa nihte cu pa khat le pa khat, “Lampi pen eimuh a otpih lih laih le Lai Thiangtho thu a hilhcian laihin, a lungmu uh mei alh bangkekin kangzuh si mei?” tin son ngel li haw hi. 33Thakhat ding haw in, Jerusalem ah kikleh haw hi. Nungzui sawm le pa khat cu a dang mihon tuah a umlangkhat ten leng cu mu haw hi. 34“Topa cu tholeh zo ngangai hi. Simon lakah hei langkik zo hi,” tin son leilui haw hi.

35Mahpa nihte hei in, lampi a hawh li haw laihin, a piangmi thu late le cangho a bawhthem ceng ten Topa hi tih ciangzetno in, a theihnak haw thu cu a ngualcam tei lakah hilhciang bok haw hi.

Nungzui Tei Lakah Jesuh Lang

(Mt 28:16-20; Mk 16:14-18; Jn 20:19-23; Nung 1:6-8)

36Hi thu a son lih haw laihtakin, phawhkhak ngawl pi in, Topa cu dingsuk lok a, “Noh tei nelah lemdaihnak um tahen,” ti hi.

37Thi-la heng bawlin thinsu mahtak haw hi. 38Mahnaven amuh tei lakah, “Ita lau li uh cim? Ita na lungmu sung uhah aicannak nei uh cim? 39Ka khut, ka ke zo hem un, keimah ngangai ing. Zo teh unna, mah bek ten thei pheng tuk uh ci. Thi-la in, taksa le nguh nei ma hi, mahnaven kei cu nei ing,” ti hi.

40Mahtin a hilh celh ten a khut le kete lakciang hi. 41Mahnaven um zo cuang haw ma laih hi. Lungdam bangsih, amthim bangsihin um haw laihin, “Hilai ah an eih tuk nei uh cim?” tin dong hi. 42Ngasa em minsa pa khat pia haw a, 43amuh pimpem hawah la in, ei hi. 44Amuh tei lakah, “Nohtei lakah ka umlaihin ka hilh lihmi thu cu a hite toh hi: Moses Daan laibu sung a, profet hempoh tei laingatmi sung le Saam laibu sung a, keima thu a ngat haw cu a cangkim khawng kul tuk,” ti hi.

45Mahten a lungmu mit haw honsakin, Lai Thiangtho hilhmi cu thei haw hi. 46Amuh tei lakah, “A ngat haw mi cu hi bangin hi: Khrih cu thuak tuk a, a thih nung ni thumnak ten tholeh tuk hi. 47Mahten Jerusalem pepanin miphun hempoh lakah ama minin sual ngaihthiamnak thu le sihkiknak thu cu tangau in um tuk hi. 48Nohte cu hi thu hempoh a theihpihtu hi uh ci. 49Keimah hihimin ka Pa i tepsa mi cu nohtei humah puak tung hi. Mahnaven humlam hu le thawm cu na hum uhah a hen laklawh Jerusalem pen na ngak un,” tin ti hi.#Nung 1:4;

Jesuh Vankainak

(Mk 16:19-20; Nung 1:9-11)

50Amuhte cu hawhpihin, Jerusalem khuapi pen Bethani khua tian hengin, mahlai pen a khut dangto in thupha muicu piata hi.#Nung 1:9-11; 51Mahti bangin muicu a piak laihin, amu lak pen vanah cawi tohin um hi. 52Amah bia haw a, mah celh ten Jerusalem ah lungdamnak son zawh ngawl tuah kikleh haw hi. 53Mahti bangin a hun le can haw hempoh cu Biakinn sungah lungdam biakpiaknakin mang haw hi.

Currently Selected:

LUKA 24: NBF1

Highlight

Copy