LUKA 23

Pilat Mai Ah Hawhpih Haw

(Mt 27:1-2; Mk 15:1-5; Jn 18:28-38)

1A venghawng haw in, Jesuh cu Pilat mai ah kai haw hi. 2Mahlai pen sual nawn haw in, “Hi pa hin ka mihing uhte lampui sual a hih hangin man ung. Rom kumpipa i lakah siah pia toh pahsuh un, tin ti hi. Mah i humah amah le mah cu Khrih tihmi kumpipa ing, tin ti hi,” tin zuak haw hi.

3Pilat in, “Judah Kumpipa cim?” tin dong hi.

Jesuh in, “Na tihnak bangin hi ing,” tin don hi. 4Pilat in thiampi upate le mi honpi tei lakah, “Hi pa hi a sualnak mu mang,” ti hi.

5Mahnaven a nase dedeuhin, “Ama thuhilhnak hangin Judea peng hempoh ah buainak tuah dimin, Galilee pen a patmi atu-in hilai ah heng toh hi,” tin ti haw hi.

Herod Mai Ah Hawhpih Haw

6Pilat in mah thu a zak ten, “Hi pa hi Galilee mi a maw?” tin dong hi. 7Jesuh cu Herod uknak ngamsungmi hi tih khi Pilat in, a theih ten Herod lakah Jesuh cu kuat hi. Herod cu Jerusalem khua sungah na um ngelcel hi. 8Herod in Jesuh amuh ten a lungdamzet hi. Itahim titale Jesuh i thu cu a zak lelengmi hi a, amuh nuamnak ngeizet zo hi. Jesuh i nalamdang bawl lihmi amu nuam boktu hi. 9Mah hangin Herod in, Jesuh cu thu tampi dong naven Jesuh in kam khatno hei don ma hi. 10Thiampi upate le Daan zilhtute cu mailamah tulin Jesuh khi nase zetin sual nawn haw hi. 11Herod le a ngalkap ten Jesuh cu cekpan bawlnakin mangin zawnsakzet haw hi. Puan mawizet silhtik haw a, Pilat lakah kuat kikleh haw hi. 12Mah ni-in, Herod le Pilat cu ngualcam pha in, suak haw hi. Mahlai ngawlin ngaldunzet haw hi.

Thah Tukin Khencat Haw

(Mt 27:15-26; Mk 15:6-15; Jn 18:39-19:16)

13Pilat in thiampi upate, lampuitu upate le mipite cu samkhawmin, 14amuh tei lakah, “Hi pa hi ka lakah hunpihin mi tampi lampui khial hi tin ti uh ci. Mahnaven hilai ah nangmu mitmuh cikcekin thu umdan dong kan ing a, sual hi na tih uhmi cu a sualnak mu mang hi. 15Herod vangin a sualnak amuh ngawl hangin hilai ah henkikleh hi. Thihnak takin, a bawlmi sualnak imah umma hi 16Mah hangin vat nang inna, hah tung,” ti hi. 17Kaltan Puai bawlsial ten amuh tei ca Pilat in thawngta pa khat hah leleng mek hi.

18Pilat awn a zak haw ten mipi ten, “Amah cu thatin! Barnabas cu hahin!” tin au haw hi. 19Barnabas cu khuapi sungah ngaltho in, buainak a suahpih hangin le mi that a hih hangin thawngah khummi hi. 20Pilat in Jesuh a luattik nuam hangin mipi lakah thuhilhleh hi. 21Mahnaven mipi ten, “Thinglamteh humah thatin hi! Thinglamteh humah thatin hi!” tin au memek haw hi.

22Pilat in, “I sualnak bawl him? Thihnak takin, a bawlmi sualnak mu hihim mang hi. Mah hangin vat nang inna hah tung hi,” tin vei thum tian hilh thuah hi.

23Mahnaven aw neih tawp tuah au haw a, Jesuh cu thah tuk hihim hi, tin au sesem haw hi. A tawpnak ten a aunak haw in nehta hi. 24Mah hangin a ngetnak haw bangin Pilat in Jesuh cu thah tukin khencat hi. 25Mihonpi tei luattik tukin a deih haw mi, ngaltho thubuainak hang le mithahnak hangin thawng khungpa cu Pilat in hah hi. Mahten mi honpi ten amu deih bangin a bawl haw tukin Jesuh cu amu khutah pia hi.

Jesuh That Haw

(Mt 27:32-44; Mk 15:21-32; Jn 19:17-27)

26Jesuh cu hawhpih pepel haw in, lampi ah Sairin mi Simon, amu khua lam pen Jerusalem lam hawh li tawk haw hi. Mahpa cu manin, thinglamteh puatikin Jesuh nung pen zuitik haw hi.

27Mi honpi ten zui dudut haw a, mah sung pen numei khenkhat tel bok haw in, khua ngai in, Jesuh cu kah li haw hi. 28Jesuh in mahte cu nunghekin, “Jerusalem numeite aw keima ca tukin kap nuam li pahsuh un. Nangmuh le na cano tei ca in kap saw un hi. 29Itahim titale, ‘Nucing, naupang nei awng ngawl numei, nauhing awng ngawl numeite le nauno nawitui pia awng viang ngawlmi numei tei ca in izahta bawngpha uh cim!’ tihnak hun hengleh tuk hi. 30Mah hun ten amuh ten, mualsangte aw keimuh hi delhin hi. Mualbawkte aw, kohte dipsukin hi,’ tin au haw tuk hi.#Hos 10:8; Mang 6:16; 31Itahim titale a hingmi thingkung nangawn hi bangin bawl ahi tale, a ko mi thingkung cu iti bangin bawl haw tuk him?” tin ti hi.

32Jesuh tuah thah kawm tukin mi ngilo pa nih hawhpih bok haw hi. 33“Lu nguh,” tihmi mun a hen haw ten thinglamteh humah Jesuh khencih haw hi. Misual pa nih vang khencih bok haw a, misual pa khat cu a vei lamah, pa khat cu a taklamah tak haw hi. 34Jesuh in, “Pa aw, a sualnak haw ngaidamin hi. Amuh ten i bawl ung tih thei duncop haw ma hi” tin au hi.

Jesuh i puancual cu awngbali sawkin, semkeh haw hi.#Saam 22:18; 35Mihonpi ten a zo in, a din leng haw laih takin Judah upa ten Jesuh cu, “Midangte cu pan thei hi. Mahnaven Pathian tenmi Khrih ahi ngai tale amah le mah hei pan cop hen,” tin zawnsak nuihsan thahin, a ti him au haw hi.#Saam 22:7;

36Ngalkapte hei in zawnsak sawlawn bok haw a; a lakah sabittui pia thah tuk hawhin,#Saam 69:21; 37“Judah kumpipa na hi ngai tale nangmah le nangmah panduncopin hi,” tin ti haw hi.

38A lu humah “Hi pa hi Judah kumpipa hi,” tin ngatmi lai khi tak cih haw hi.

39Mahlai ah a khetcih haw mi misual pa nih lak pen a pa khat saw in, nautat bok a, “Nang cu Khrih hi ma cim? Nangmah le keimuh hi panin hi,” tin ti hi.

40Mahnaven a dang pa khat saw in hupin, “Pathian lau ma cim? Hilai ah a venghawng uhin bangtenin thukhen cihmi hung hi. 41Mahnaven oh pa nih cu eimu dehnak bangin a thuak tuk uh phu hung hi. Mahnaven hi pa hi sualnak imah nei ma hi,” tin ti hi. 42Jesuh lakah, “Jesuh, kumpi Topa na hih ten kei hi phawk ngil pahsun maw,” ti hi.

43Jesuh in, a lakah “nangmah thutiam ing. Tuni in, keimah tuah Paradis ah um ngel tuk hung,” tin ti hi.

Jesuh Thihnak

(Mt 27:45-56; Mk 15:33-41; Jn 19:28-30)

44Hi hun cu sunlaih tak nazi sawm le pa nih hawng hi, taklam nazi pa thum tian leihum buppi thimzing tung hi. Ni i vaknak bo in, Biakinn sung a, puanzak cu mun nihin balkek hi. 45Jesuh in, “Pa aw, ka nunnak na khut sungah ap ing hi,” tin ngingzet au in catsuk hi.#Suah 26:31-33; 46Hi thu um dante a mutu ngalkap bawi pa khatin, Pathian thangphat thahin, “Hi pa hi mipha hihim hi” tin ti hi.#Saam 31:5; 47Mahmi cu ngalbawi pa in amuh ten Pathian thangphat hi. “Hi pa hi sualnak nei ngawl mipha hi,” tin ti hi.

48A zo tukin a hung mi honpi ten hi thu umdan amuh haw ten khua ngai le awm cumdunin pinkik haw hi. 49Galilee ngam pen amah zui in, a hungtu numeite le Topa i meltheihte cu khawla thimah dingin zo leng bok haw hi.#Lk 8:2-3;

Jesuh Phum Haw

(Mt 27:57-61; Mk 15:42-47; Jn 19:38-42)

50-51Mahlai ah Judah ngamsung um Arimatia khua mi Josef tihmi pa khat na um hi. Hi pa hi mipha le upat takmi hi in, Pathian Uknak heng tuk a, ngak lengtupa hi. Amah hi thukhentu Khonsil pa khat hi bok naven a thulaitan mi lungkim ngawltu pa khat na hi. 52Hi pa in Pilat lakah hawhngutin, Jesuh i luang cu vui tukin ngen hi. 53Jesuh i luang cu thinglamteh hum pen lasukin, puannemno tuah a tuam celh ten suangkua a luat haw mi khankhuuk sungah vui hi. Mah khan cu man laih ngawlmi khankhuuk a thak hi. 54Hi ni cu ni Nga ni hi in, Sabbath ni pan awn toh hi.

55Galilee pen Jesuh zuitu numei ten Josef cu zui pepel haw hangin khankhuuk vang mu haw hi. Jesuh i luang cu iti bangin koihin um him tihvang mu khawng bok haw hi. 56Mahceng ten innah pinin, a luang noih tuk pak namtui le sathau tuangtim haw hi.

Sabbath ni cu thukham bangin cawlum haw hi.#Suah 20:10; Daan 5:14;

Currently Selected:

LUKA 23: NBF1

Highlight

Copy