SUAHTULNAK 4

Moses Huham Pia

1Moses in, “Israel miten sang ngawlin le ka hilhmi ngai ngawlin, Topa cu na lakah lang ma hi, a ti haw tale, itin kaw ka tih tuk?” tin ti hi.

2Mah hangin Topa in, “Na khutah ikaw na cawi?” tin Moses cu dong hi. “Thiangkhut cawi ing,” tin Moses in ti hi.

3 Topa in, “Lei ah vawkin,” ti a, Moses in, a vawk ten ngulin suak hi. Mah ngul el pen Moses cu tai hi. 4Mahnaven Topa in, “Bawng inna, a mei pen manin hi,” tin Moses cu ti hi. Mah hangin Moses in bawngin, a mat ten thiangkhutin suakleh hi. 5Topa in Moses lakah, “Hihi Israel tei lakah hi bangin bawl inna, a pu le a pa tei Pathian Abraham, Isaak le Jakob tei Pathian cu na lakah lang hi tih a san theihnak haw tukin,” ti hi.

6Pathian in Moses lakah thu hilh lehin, “Na khut cu na angki sungah koihin,” ti hi. A tih bangin Moses in koih hi. A khut a suahleh ten phaak khawngin, vuk bangin a ngo mi meima in, a khut cu dim khawng hi. 7Topa in “Na khut cu na angki sungah koih lehin hi,” ti hi. A tih bangin Moses in koih hi. A khut cu a suahleh ten dam khawngin, a taksa dang bangin suakleh hi. 8Topa in, “A masa sialsiahnak nalamdang bawlmi a sang nuam haw ngawl hei in, a pa nihnak sialsiahnak beek cu sang haw tuk hi. 9Hi sialsiahnak pa nih nungten sang ngawl lengin, na hilhmi vang a ngai kha haw ma tale, Nail ngun pen tui la inna, leiko humah leihin hi. Mah na leih mi tui cu thisanin suak tuk,” ti hi.

10Mahnaven Moses in, “Mah kha ma hi, Topa kei cu hah zazal pahsun. Thuson thiam mi vang hi awng mang, na tawh nung hei ten thuson thiam hi cuang mang hi. Awnkam hei thiam mang, ka awn cuumin, ngawi bok,” ti hi.

11 Topa in, “Mihing muk le kam a piatu cu akua kaw? Akua in kaw bengbul le awn thei ngawlin a bawltu? Akua in kaw khua muh theihnak a pia? Ahimata, akua in kaw mit a cawtik? Topa keimah hi ma ing maw! 12Atu-in, hawh inna! na ot tukmi bawm tung a, hilh tung,” ti hi.

13Mahnaven Moses in, “Mah kha ma hi, Topa, na hehpihnakin, midang pa kha khat hah saw in hi,” tin ti lo hi.

14Mah a hih tak Topa cu Moses humah thinukin, “Levi mi na unau Aaron um hi ma maw? Amah cu awn thiamzet hi a, atu-in nangmah tawk tukin thatui zetin hung li laih hi. 15Amah tuah na otpihdun uh nungten a ot tukmi cu hilhin hi. Na pa nih uhin, na ot tuk uh bawm tung a, na bawl tuk uhmi vang hilh tung hi. 16Aaron cu a otsaktu hi tuk a, mipi tei ca in otsak tuk hi. Nangmah cu ama ca in Pathian bang hi tuk ci a, a ot tukmi hilhtu hi tuk ci. 17Hi thiangkhut hi na khut sungah cawi inna, nalamdang bawlnakin mangin hi,” ti hi.

Izipt Ah Moses Kik

18Moses cu a sungpa, Jethro lakah hawhin, “Ka unaupihte Izipt ngamah nungdam haw laih haw maw, tih zo tukin hahin,” ti hi. Jethro cu a lungkimin, damno na hawhin, ti hi.

19 Topa in Moses cu Midian ngam a umlaihin, “Izipt ngamah kik tohin, nangmah a that nuamtu thi khawng zo haw,” ti hi. 20Mah hangin Moses in, a zi le a capate cu laak humah khungtik a, Izipt ngamah kihpih tukin pui in, Pathian piakmi thiangkhut cu cawi leleng hi.

21 Topa in Moses lakah, “Izipt ngamah pinkik tuk toh na hih hangin, ka bawltikmi nalamdang hempoh cu kumpipa i maiah bawl khawngin hi. Mahnaven kumpipa i lungmu cu khohtik tung a, ka mihingte cu hawhtik tukma hi. 22Topa in, kumpi lakah, ‘Israel cu ka catawntil hi. 23Keimah na biakpiak theihnak tukin ka capa cu hahin, tin hilh naveng hah nuam ma ci. Atu-in, na catawntil that tuk toh ing,’ tin hilhin,” ti hi.#Suah 12:29;

24A camnak mun Izipt lampiah Topa in Moses cu thah tum hi. 25-26Zipporah in suanghiam pa khat la in, a capa i vunceptan hi. Mah suanghiam cu Moses i ke#4:25-26 Moses i ke tihmi hi Moses i zahmawh tihnak hi. tawngkhatikin Zipporah in, “Nang cu vunceptalhnak thisan tultiktu ka pasal hi ci,” ti hi. Mah hangin Topa in Moses i nunnak cu khawihleh hi.

27Mah hunin Topa in Aaron i lakah, “Moses tawk tukin phillawnah hawhin,” ti hi. A tihnak bangin Moses cu tawkin nam hi. 28Moses le Aaron lakahTopa in Izipt ngamah kik tukin a tih laihin, a lakah a hilhmi hempoh le Topa in thasiahhuai a bawlnak le a thupiakmi cu kimno in Aaron hilh khawng hi. 29Moses le Aaron cu Izipt ngamah hawhin, Israel puitute sam khawng haw hi. 30Topa in Moses lak a, a hilhmi thu hempoh cu Aaron in hilh khawng hi. Moses in mipi tei maiah thasiahhuai nalamdang a phunkim bawl hi. 31Mipi ten um haw in, Topa in, bawlsiatnak a thuak haw mu khawng hi tih a zak haw ten a maiah kuunin bia haw hi.

Currently Selected:

SUAHTULNAK 4: NBF1

Highlight

Copy