SUAHTULNAK 3

Pathian In Moses Sam

1Ni khat cu Moses in Midian thiampi, a sungpa Jethro i tuu le keel a cinkhawi laihin, a ngan cu phillawnah hawhpihin, mual thiangtho, Sinai#3:1 Sinai tih cu Horeb mual tih vangin sam haw hi. Atu-in Jebel Musa mual tin sam haw tihmiah heng haw hi. 2Mahlaiah Topa i vancungmi cu sawlcaam kang lak pen lang hi. Moses in sawlcaam cu alh li naven kang tum viang ngawl cu mu hi.#Nung 7:30-34; 3“Lamdangzet si,” “Ita hi sawlcaam hi kang tum ma heng? Nek deuhin zoteh tung,” tin ngaisung hi.

4 Topa in Moses i a neek dedeuh cu amuh ten sawlcaam lak pen, “Moses! Moses!” tin sam hi.

Moses in, “Topa hi laiah um ing,” ti hi.

5Pathian in, “Hu neek toh pahsun. Na kedam duukin, itahim titale na dinnak cu mun thiangtho hi. 6Keimah cu na pu le pa tei Pathian, Abraham, Isaak le Jakob tei Pathian ing,” ti hi. Pathian zoh tuk cu a ngam ngawl hangin, Moses in, a mai hup hi.

7 Topa in, “Izipt ah ka mihing ten bawlsiatnak a thuak haw cu mu zo ing. Sal khawngtu tei khutsung pen luat nuamin, a aunak haw za zo ing. A thuaknak hempoh haw thei ing. 8Mah hangin Izipt mitei khut sung pen a suahtu tuk le mah ngam pen tulin ngampha le ngamzal, khuinawi le khuaitui luannak ngampha munah a henpihtu tukin hungsuk zo ing. Mah ngam cu atu-in Kanaan mi, Hit mi, Amor mi, Periz mi, Hiv mi le Jebus mitei umnak ngam hi. 9Ka mitei aunak aw cu za tatak ing a, Izipt miten iti zahin nuainem haw hum tihvang mu ing. 10Atu-in, nangmah cu Izipt kumpipa i lakah hah tung a, ka mite cu a ngamsung pen puitul thei tuk ci,” ti hi.

11Mahnaven Moses in Pathian lakah, “Izipt ngam pen Israel mi suahtul thei tukin kumpipa lakah hawh tukin, kei hi akua hi ing a?” tin ti hi.

12Pathian in, “Na lakah um tung a, Izipt ngam pen Israel mite na tulpih ten hih mualhum pen keimah bia tuk uh ci. Nangmuh a hahtu Keimah ka hihnak a langtiktu tukin,” ti hi.

13Mahnaven Moses in, “Israel tei lakah hawhin, ‘Na pu le na pa tei Pathian in, na lak uhah hah hi’ ka tih ten, ‘A min akua kaw?’ a ti haw tale itin kaw ka hilh tuk?” tin ti hi.#Suah 6:2-3;

14Pathian in, “Keimah cu Keimah ing,” ti hi. ‘Keimah#3:14 Keimah tih cu Hebru awnin Yahweh tih tuah bangten hi, Topa tin let ung hi ahi mi in nangmu lakah hah hi, tin Israel tei lakah hilhin hi,’ tin Moses lakah hilh hi.#Mang 1:4, 8; 15Israel tei lakah, Topa in, na pu le pa tei Pathian, Abraham, Isaak le Jakob tei Pathian in, na lak uhah hah hi, tin hilhin hi. Hihi a kumkhua in ka min hi tuk hi; mailam khan a, mihing hempoh vangin hiti bang hin sam haw tuk hi. 16Hawh inna, Israel puitute samkhawmin, a lak hawah, Topa, na pu le na pa tei Pathian, Abraham, Isaak le Jakob tei Pathian cu ka lakah langin, hi ti bangin nangmuh hilhtik hi! “Na lak uhah hung zo ing a, Izipt miten na hum uh a, a bawlmi haw cu mu zo ing. 17Bawlsiatnak na thuaknak uh, Izipt ngam pen suah tukin le Kanaan mi, Hit mi, Amor mi, Periz mi, Hiv mi le Jebus mitei umnak ngamah henpih tukin khencat zo ing. Mah ngam cu khuinawi le khuaitui a luannak ngam hi,” tin ti hi.

18Ka mitei lak a, na hilhmi thu cu ngai haw tuk hi. Israel puitute tuah Izipt kumpi lakah hawh loli unna, a lakah, “Topa, Hebru mitei Pathian in keimu nelah phuangdun zo hi. Mah hangin ni thum sung phillawnah hawhin, Topa ka Pathian uh lakah biakpiaknak ka bawl theihnak tuk uhin, hu hah zalin hi,” tin ngen un hi. 19Izipt kumpipa in, a tiklotu tha ngilzet a umma tale hah tukma hi, tih cu thei leng ing. 20Mahnaven Ka ngilnak mang tung a, mulling hah nate tuah Izipt mite cu dantat tung hi. Mahnung ten suahtul tuk hi.

21“Ka mihingte a suahtul haw ten, Izipt mitei maizahnak cotik tung a, khut thacangin tul haw tukma hi.#Suah 12:35-36; 22Israel numei hempoh ten a innnel Izipt mitei lak le a innsung haw a, a um Izipt numei tei lak pen puan, sui, ngun le na manpha ngen haw tuk a, a canu le capa tei humah na manphate tuah thuamdunin, Izipt mitei hauhnak hempoh laksak khawng tuk uh ci,” ti hi.

Currently Selected:

SUAHTULNAK 3: NBF1

Highlight

Copy