AMOS 5

Sikleh Tukin Samnak

1Israel miphunte, nangmu ca in, ka sahsanmi mithi vuinak la hi ngai un:

2Khanglai him Israel cu

caksukta hi,

Tholeh tukma toh hi.

Lei ah lumin,

a phongtotu um haw ma hi.

3Cungnungbel Topa in, Israel ngam sungah, “Khua pa khatin, ngalkap thawng khat kuat hi; mahnaven za khat bek pin kik haw hi. Khua dang pa khatin, za khat kuatin, sawm khat bek pin kik haw tin,” ti hi.

4 Topa in, Israel tei lakah, “Ka nelah kikleh unna, nung tuk uh ci. 5Beersheba bia tukin hawh pahsuh un; Bethel ah vang keimah zei pahsuh un. Gilgal hei ah hawh pahsuh un; a mihingte salah mat tawk haw tuk,” ti hi.

6 Topa i nelah hawh unna, nung tuk uh ci. Na hawh ma uh tale Israel, na hum uhah mei alh bangin, Topa cu heng tuk hi. Bethel mite cu mei in kang tuk a; kuamah in cuhmit thei haw tukma hi. 7Diknak cu dikngawlnakah mangin midang covo zolin, a lonsaktu nohte cu bo tuk uh ci.

8 Topa in, aksite bawl hi,

si luk le

zawlzawngte vang bawlin;

khuathim cu sun ni vakin

bawlin, sun cu zanin cangtik hi.

Tuipi thuanthum tuite

la khawmin,

lei ah a leih suktu,

a min cu Topa hi.#Job 9:9; 38:31;

9Mi ngilte le a ngalnannak munte

siatsuah khawng hi.

10Nohte cu thukhennak zung pen thuman a phuangtu le thudik sontute hua uh ci. 11Mi ca-ngah nuainem uh ci a, mi haksate cilpekin, a an haw laksak uh ci. Mah hangin na sak uhmi suang inn phazet sungah um ngawlin sabit huan sung a, na cin uhmi sabittui in ngah tukma uh ci. 12Na sualnak uh mullinghuai a hih zia le thil sual na bawl uhmi a tam dan cu thei khawng ing. Miphate bawlsia uh ci a, nawhthuh la in, mi ca-ngah le mi haksate cu thukhennak zung pen thumanno in, a thu haw sonsak nuam ma uh ci. 13Mahtibang hun siasuak lai takin thu ngaisung thiam micipte cu dapdenno in um haw!

14Thilpha ngawl bawl ngawlin a dikmi bawl tum un. Mahtibang na bawl uh tale Cungnungbel Topa Pathian cu kohtei nelah um hi, na tih uh bangin um ngangai tuk hi. 15Thilpha ngawl hua unna, thilpha deih un; thukhennak zung pen thudik dinpih un. Josef miphun sung pen a tang calam mi dawmno humah Topa in hehpihnak nei kha tuk hi.

16Cungnungbel Topa in, “Khua sung lampi ah kahnak le taunak um tuk hi. Lobungte samlehin, mi kahsak tukin cialmite tuah mithi kah ngel haw tuk hi. 17Sabit huan hempoh ah lungkhamnak um tuk hi. Bawlsia tuk ka hih hangin hi hempoh cu kim khawng tuk,” ti hi. Topa in hilh zo hi.

18 Topa i ni a ngakhelzet tute na ca uhin lauhuaizet tuk hi. Mah ni cu i nemcuamtik tuk hum? Na ca uhin khuathim ni tuk hi, khuavak ni kha tukma. 19Kiosa lak pen tai in, vompi a tawktu pa bang tuk uh ci. Mahma tale innah pinin, pang a zuh ten ngul i cih tawkmi pa bang tuk uh ci. 20Topa i ni-in, khuavak hunpih ngawlin, khuathim hunpih hi. A thim bikbekmi khuathim hi a, khuavaknak dem hei umma hi.

21 Topa in, biaknak puai na bawl uhte cu hua in, mitkem ing ti hi.#Isa 1:11-14; 22Halkang biakpiaknak le cangho biakpiaknak na piak uhte sang tuk mang hi. 23A nging zetmi na lasak uhte vang cawl toh un; na tingtang tum uhte vang ngai nap ma toh ing, ka bengbing leita zo. 24Thudik cu luitui bangin luang saw henna, dikcangnak cu a kang thei ngawlmi nguntui bangin luang leleng tahen.

25Israel miphunte aw, phillawn lakah kum sawm li sung ka pui laihin biakpiaknak tuk imah ngen mang hi.#Nung 7:42-43; 26Atu cu na Pathian uh le na kumpi uh Sakkuth i zuk le na aksi pathian uh Kaiwan#5:26 Sakkuth, Kaiwan tihmi hi Mesopotamia pathian tei min hi. i zukte na biak uh hangin, 27Damaskas kallam ngamah salin ka kaih ten, na pathian zuk uhte cu na ken khawng uh kul tuk hi, tin Topa in ti hi. A min cu Cungnungbel Pathian hi.

Currently Selected:

AMOS 5: NBF1

Highlight

Copy