AMOS 3
3
1Israel miphunte, Izipt ngam pen na miphun buppi uhin Topa i puitul ten nangmuh i thu a sonmi hi ngai un. 2“Lei hum miphun hempoh lak pen nangmuh bek hi ka theihmi le ka cinkhawi uhmi ci. Mah hei ten sual nawmta laih uh ci; mah hangin dantat tung hi,” tin ti hi.
Thiampi Tei Dehvo
3Hilhdun hamsa ngawlin, mi pa nih munkhatah khualzin ngel thei haw ni maw? 4Kiosa cu sa matmi amu ngawl ahin, tupi sungah ham li a ni maw?
Pawpino cu sa matmi a nei ma ahin, akua sung pen ham li ni maw?
5Thangsiahmi um ngawlin vano awk thei ni maw?
Thang cu a pheltiktu um ngawlin pel thei ni maw?
6Ngaldonak pengkul khua sung pen a tum haw ten khua mite thinsu ngawlin um thei haw ni maw?
Topa i hah ngawlmi khua sungah haksatnak heng ni maw?
7Cungnungbel Topa in, a nadektu profet tei lakah a tumtahmi phuang hihta ngawlin nadek awng ma hi.
8Kiosa in, a thup ten a lau ngawl kua um tuk hum?
Cungnungbel Topa a ot ten a otmi tangau pih ngawlin kua um thei tuk hum?
Samaria Siattawhnak
9Izipt le Ashdod kumpi inn sung a, ummi tei lakah hithu than un. “Samaria elkim mualhumah tawkdun khawm unna, mahlai a, thil sual a bawl haw mi le simsolnak nase zetin, a ummi cu zo un tin ti un.”
10 Topa in, “Hihmi ten a kumpipa i innsung cu sualnak le thisan luannak tuah a lak haw mi nate tuah dimtik haw hi. Midik hihnak lampi hei theileh haw ma toh hi. 11Mah hangin a ngam haw ngal ten kil haw tuk hi. A ngalpannak munte siatsuahin, a kumpipa i inn cu lonsak haw tuk tin,” ti hi.
12 Topa in, “Tuucingpa in kiosa i matmi tuu a zei ten a ke pa nih le a beng bek amuh bangin nunnop zetin, a nungmi Samaria khua mi sung pen pa nih khat bek suakca haw tuk hi. 13Phano in, thu ngai unna,” Jakob i casuante cu ngallinnak thu hilh un, tin, a sangbel Topa ihempoh bawl theitu in ti hi. 14“A sualnak haw hangin Israel ka bawlsia ni ten Bethel a biaklandawhte vang siatsuah khawng tung hi. Biaklandawh kite vang ek tuah lei ah khe tung hi.#2Kum 23:15; 15Khua khal inn le phalbi innte hei hihen siatsuah khawng tung. Sai ho tuah bawlmi innte le innpi dangte vang siatsuah khawng tung tin,” ti hi.
Currently Selected:
AMOS 3: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
