NUNGZUITU 8

1Stefen a thah haw cu Saul vangin a lungkim bok hi.

Saul In Pawlpi Bawlsia

Mah ni pepan Jerusalem a, pawlpite cu nase zetin bawlsiatnak thuak haw hi. Nungzuitu sialngawl, a dang thu umtu hempoh cu Judah ngam le Samaria ngam sungah khenkeh khawng haw hi. 2Stefen cu thu umtu khenkhat ten vui in, nase zetin kah haw hi.

3Mahnaven Saul in pawlpi siatsuah tukin inn khat nung, inn khatah tumin numei, pano tih umngawl thu umtu hempoh cu a inn haw pen dok tulin thawngah khia hi.#Nung; 22:4-5; 26:9-11;

Samaria Ah Thuthangpha Heng

4A khenkhek mi thu umtute cu khua tihkimah hengin, a hennak muntihkim pen Thuthangpha phuang haw hi. 5Filip cu Samaria khuapi ah hawhin, Khrih i thu cu phuang hi. 6Mi honpi ten a thuhilhmi cu phano ngai haw in, nalamdang a bawlmite vang mu haw hi. 7Mi honpi tei sung pen khawhuaite cu nasezet au ngu-ngun thahin tul haw a, zengnat neite, khut le kezawngte hei dam haw hi. 8Mah hangin mah khuapi sungah lungdamnak tampi um hi.

9Mahlai khua ah Simon a tih haw mi pa um hi. Hun ngeithim sung cu a mitzial thiamnakin Samaria mite cu amthongin bawl hi. Keimah hibel ing, tin ngaisung bokin, 10khuapi sung a ummi hempoh a neu, a ngeng ten a thu cu ngai haw hi. Amuh ten, “Amah hi, ‘Huham Ngeng,’ tihmi Pathian i cahnak huham hi,” tin ti haw hi. 11Hun ngeipi sung cu mitzial a thiamnak haw tuah amthongin, a bawl hangin a thu a zuinak haw hi. 12Mahnaven Filip i hilhmi Pathian Uknak Thuthangpha le Jesuh Khrih i thu le la a zak haw ten umin, numei hihen, pano hihen, tuiphum haw hi. 13Simon hei in um bok hi; tuiphumnak a lak celh ten Filip cu zui in, na lamdang le thasiahhuai tampi a bawlmi amuh ten lamdang sa mahtak hi.

14Jerusalem a ummi nungzuitu ten Samaria mite hei in Pathian i awnkam pom bok li haw zo tih a zak haw ten amu lakah Peter le Johan hawhtik haw hi. 15A lak hawah a hen haw ten umtu ten Hawvang Thiangtho a ngah theihnak haw tukin amu ca in thungen haw hi. 16Itahim titale Hawvang Thiangtho cu kuamah i lakah heng ma laih hi; Topa Jesuh min tuah tuiphumnak latu bek hi haw laih hi. 17Peter le Johan ten a hum hawah a khut haw nga in, thu a nget haw ten Hawvang Thiangtho cu ngah haw hi.

18Nungzuitu tei khutsuannak hangin thu umtu tei Hawvang Thiangtho a ngah haw khi Simon in mu hi. Mah hangin Peter le Johan tei lakah, 19“Kei hei in, a hum hawah ka khut ka suan mi hempoh ten Hawvang Thiangtho a ngah theihnak haw tukin hi huham pia bok un,” ti hi.

20Mahnaven Peter in, “Pathian i piakmi laksawng hi sumpai tuah lei thei tung tin na ngaihsut hangin nangmah le na tangka cu siatnakah heng tahen, 21Pathian i muhnakah na lungmu manngawl hangin keimu nadehnak sungah tel ma ci, covo vang nei ma ci. 22Hitih bang thilpha ngawl na ngaihsut sualnak pen sikkik inna, a ngaihthiam theihnak tukin Topa i lakah thungenin hi. 23Itahim titale iksiknak tuah a dimmi le sualnak thawng sungah ata mi hi ci, tih hi mu ing,” ti hi. 24Mahten Simon in Peter le Johan lakah, “Hehpihnakin hi na ot uh mite hi ka humah a hen ngawlnak tukin Pathian nelah thungetsak zazal un hi,” tin ngen hi. 25Pathian awnkamte phuangin, amuh mi le a tawh haw mite a hilh ceng haw ten Peter le Johan cu Jerusalem ah kikleh haw hi. A kihleh lam haw ten Samaria ngamsung khuano tampi ah Thuthangpha cu hilh pepel haw hi.

Filip le Ethiopia Bawi Upa

26 Topa i vancungmi in Filip lakah, “Na van bawl inna, hanglamah Jerusalem pen Gaza hawhnak lampi ah hawhin,” ti hi. Tu hunin mah lampi cu mang haw ma toh hi. 27-28A tihnak bangin Filip cu bawm bawlin hawh hi. Mahlai takin, Ethiopia pa, pa khat amu khua lamah a pin limi tawk hi. Mahpa cu tilngehmi hi a, Ethiopia kumpinu i neihmi sum le pai hempoh a cingkhawitu bawi hi. Amah cu Jerusalem ah Pathian bia tukin hung hi, a cipuhleng tuah a inn lamah a pinmi hi. A cipuhleng hum pen laisial thahin, a sial lihmi cu profet Isaiah laibu hi. 29Hawvang Thiangtho in Filip lakah, “Hawh inna, cipuhleng khi nekin,” ti hi. 30Filip in, zui tulin profet Isaiah lai a sial lih cu za hi. Filip in, “Na sial lihmi cu a sullam thei cim?” tin dong hi.

31Mah bawi in, “Kuamah in, a hilhciang haw ma tale itin theithei tung kaw?” tin don hi. Filip cu, a cipuhleng humah kaito tukin zawm hi. 32A sialmi Lai Thiangtho cu a nuailam a bangin hi:

“Amah cu thah tukin

puimi tuu bangin

hawhpih haw a,

tuuno mul a meh haw ten

a ham ngawl bangin,

awn ngawlin daidenno

in um hi.

33Zotsak nautatnak thuakin,

pantu kuamah nei ma hi:

leihum pen a nunnak

a laksak haw hangin,

a cikhaihmi kuamah

hilh tuk um haw ma hi,”

tin um hi.#Isa 53:7-8;

34Mah bawi in Filip cu, “Hilh hemin! Profet Isaiah i otmi hi a koi thu kaw?” tin dong hi. 35Filip in mah Lai Thiangtho cang pepan Topa Jesuh i Thuthangpha cu hilh khawng hi. 36Hawh ngut haw a, tui umnak mun heng haw hi. Mah bawi in, “Hilai hah tui um. Tuiphum tukin ikaw a khaktu?” tin ti hi. 37Filip in, “Na lungmu hempoh tuah na um tale tuiphum thei tuk poh ci,” ti hi. Mah bawi in, “Um ing, Jesuh Khrih cu Pathian Capa hi tin um ing,” ti hi.

38Mah bawi in, a cipuhleng cu dingtikin, Filip tuah tui sungah tolhsuk haw a, Filip in tuiphumnak pia hi. 39Tuisung pen a thawh haw ten Topa i Hawvangin Filip cu thiakta hi. Mah bawi in Filip cu mu lehma toh hi; mahnaven lungdam zetin, a inn lamah pin hi. 40Filip cu Ashdod ah heng hi. Sisaria ah hawhin, lampi tuan, lam el khua sung hempoh ah Thuthangpha hilh pepel hi.

Currently Selected:

NUNGZUITU 8: NBF1

Highlight

Copy