NUNGZUITU 7

Stefen i Thuhilhmi

1Thiampi Sang in Stefen cu, “Mahtin a tih haw mi khi thu ngangai maw?” tin dong hi.

2Stefen in, “U le naute le nu le pate, ngai hem un! A pu uh Abraham hi Haran ah um tukin a hawh laih ngawlin Mesopotamia pen Pathian i sunloihnak a lakah langin,#Pian 12:1; 3‘Na nampih le na mun le ngam zam inna, ka lak tukmi ngamah hawhin,’ ti hi. 4Mahten ngam pen tulin Haran khua ah um hi. Abraham i thih nungten atu na umnak uh ngamah Pathian in cengtik hi.#Pian 11:31; 12:4; 5Mah ngamah Pathian in hitih bangin thutiam a bawl laihin, Abraham pia ma laih hi; mahnaven a lakah piak tukin thutiamin, hi ngam hi nangmah le na casuan tei tatuk hi, tin ti hi. Pathian in thutiam a bawl laihin, Abraham cu ca nei ma hi.#Pian 12:7; 13:15; 15:18; 17:8; 6Pathian in, a lakah, ‘Na casuante cu ngamdangah um haw tuk hi; mahlai ngamah mitei salin kum za li sung cimnak thuak haw tuk hi.#Pian 15:13-14; 7Mahnaven na a dehsak haw mi miphun tei humah thukhennak nei tung a, mah ngam pen tulin hi ngamah keimah bia haw tuk hi,’ tin ti hi.#Suah 3:12; 8Pathian in Abraham cu vunceptalhnak daan cu a thutepmi melciknak tukin pia hi. Mah hangin Abraham in, a capa Isaak a hin ceng nipi khat ten a vunceptalhleh hi. Isaak in, a capa Jakob i vuncep tansakin, Jakob vangin a capa sawm le pa nih tei vuncep tansak hi. A capa sawm le pa nihte cu a miphun uh cikhaihtu a pu uh cu mi minthangzette haw hi.#Pian 17:10-14; 21:2-4; 25:26; 29:31-35:18;

9“Jakob capa ten a naupa Josef cu iksikin, Izipt tei lakah salin zuak haw hi. Mahnaven Pathian cu ama lakah umin, a haksatnak sung pen himdamno in pui suak hi.#Pian 37:11, 28; 39:2, 21; 10Izipt kumpipa i mai ah a din ten Pathian in Josef cu ziaza mawi le cahnak pia in, Izipt kumpipa in, a ngam buppi humah hihen, a innkua humah hihen uktu bawi dektik hi.#Pian 41:39-41; 11Izipt ngam le Kanaan ngam sungah paampi a tun ten mipi tei ca in haksatnak tampi hengin, a pu le pa uhte vang an ngah thei haw ma hi.#Pian 42:1-2; 12Jakob in Izipt ngamah an um tih a zak ten a capate, a pu le pa uhte cu vei khatnak hawhtik hi. 13A vei nihnak Izipt a hen haw ten a u tei lakah Josef in, amah le mah phuangdunin, Izipt kumpipa in Josef i unaupih hi tin thei ngah hi.#Pian 45:1, 16; 14Mah hangin Josef in, a pa Jakob le a unaupih tei lakah Izipt ngamah vai tukin thucah hi. A venghawng haw in mihing sawm salih le pa nga haw hi.#Pian 45:9-10, 17-18; 46:27; 15Mahten Jakob cu Izipt ngamah hawhin; mahlai pen amah le a cate cu thi haw hi.#Pian 46:1-7; 49:33; 16A luang cu Shekhem ah hawhpihin, Abraham in Hamor miphun tei lak pen tangka in, a leimi khanah vui haw hi.#Pian 23:3-16; 33:19; 50:7-13; Josh 24:32;

17“Pathian in Abraham lakah thu a tepmi a kimnak hun a nai dedeuh ten Izipt ngam a ummi a miphun pih uhte cu tam dedeuh haw hi.#Suah 1:7-8; 18A dawltabel ten Josef i thu a thei ngawltu kumpi pa khatin, Izipt ngam cu uk hi. 19A pu le pa uhte cu zolin, bawlsia hi; a cate vang cu thi hen tin, a inn sung haw pen pualamah vawktik hi.#Suah 1:10-11, 22; 20Mah hun laihin, nauno mawizet Moses hing hi. Moses cu innah ha thum sung phano in cawm haw hi.#Suah 2:2; 21Pualamah a vawk haw ten kumpipa canu in la in, a capa in cang tukin, cingkhawi hi.#Suah 2:3-10; 22Izipt mitei cihnak hempoh a zilh khawng haw hangin a awnkam le a dehnakin mi cuangcung a hihnak khi langtik hi.

23“Moses cu kum sawm li a kim ten a phunpih Israel tei tin nung haw him tih thei nuamin, zo kawkawi hi.#Suah 2:11-15; 24Mahlai takin a phunpih Israel mi pa khat cu Izipt pa i bawlsiat lihmi amuh ten bawmin, Izipt pa cu that hi. 25Pathian in amuh luattiktu tukin mangin ka phunpihte hei in theitum haw tuk, tin ngaisung naven thei haw ma hi. 26A zingten Israel mi pa nih a sualdun li khi mu in, a khen tukin um hi. ‘Unaupihte, ngai hem un! Noh cu miphun khat Israel mi veve uh ci! Itakaw na sualdun lih uh?’ tin ti hi. 27Mahnaven a phunpih a zawnsaktu pa in Moses cu nawmvawkin, akua in kaw kohtei humah uktu le thukhentu tukin a bawl? 28‘Zantak a, Izipt mipa na thah bangin that nuam bok cim?’ tin ti hi. 29Mahmi cu Moses in, a zak ten Izipt ngam pen tai in, Midian ngamah um hi. Mahlai pen capa pa nih nei hi.#Suah 18:3-4;

30“Kum sawm li nungten Sinai Mual el phillawn a, hampa alh sung pen Moses lakah vancungmi pa khat lang hi.#Suah 3:1-10; 31Moses in amuh ten lamdangsa a, zo cangcian tukin hampa alh i elah nek hi. Mahnaven Topa i aw cu zain, 32‘Keimah hi na pu le pa tei Pathian, Abraham, Isaak le Jakob i Pathian ing,” ti hi. Moses cu a thinsu in cantawtokin, a zo hei zo ngam ma hi. 33Topa in, ‘Na kedam dukin, itahim titale na dinnak mun cu mun thiangtho hi! 34Izipt ngam a, ka mihingte a thuaknak haw le a cimkhamnak haw mu ing. A taunak haw za ing a, amuh luattik tukin hung ing. Hungin hi, Izipt ngamah hah tung,’ tin ti hi.

35“Moses cu Israel tei lawl awngmi pa hi. ‘Akua in kaw kohtei humah uktu le thukhentu tukin a bawl?’ tin ti haw hi. Hampa alh sung pen a lakah a langmi vancungmi i bopnak hangin Pathian in Israel mi uktu tukin le luattiktu tukin a hahmi pa hi.#Suah 2:14; 36Izipt ngam pen Israel mite cu suahtulin Izipt ngam, tuipisan le phillawn lakah kum sawm li sung nalamdang le thasiahhuai tampi bawl hi.#Suah 7:3; 14:21; Mipum 14:33; 37Moses cu Israel tei lakah, ‘Pathian in nangmu lakah keimah a hah bangin profet hah tuk a, mahpa cu nangmu miphun sung pen hi tuk hi,’ tin a titu pa hi.#Daan 8:15, 18; 38Amah cu Israel mite phillawnah a um haw laihin, amu lakah a tel lelengtu pa hi; a pu le pa tei lakah um bokin Sinai Mual pen vancungmi i awnkam a sangtu le a lakah a umtu hi; Mahten Pa Pathian i thu nung cu ohtei lakah a hen theihnak tukin a sangtu hi sih hi.#Suah 19:1-20:17; Daan 5:1-33;

39Mahnaven a pu le pa uhten amah cu zui nuam haw ma hi; Amah cu zamin, Izipt ngamah kikleh nuam saw haw hi. 40Mah hangin Aaron lakah, “Lampuitu tukin pathian tampi bawlsakin hi. Izipt ngam pen a puitultu Moses humah i piang hum tih theileh ma toh ung,” tin ti haw hi.#Suah 32:1; 41Mahti bang a hih hangin khuicang mel cuangin, khui milim bawl haw a, dawi biakpiaknak cu khut tuah bawlcopmi i ca in, upatnak puai bawl li haw hi.#Suah 32:2-6; 42Mah hangin Pathian in nunghekin profet tei laibu sung a, ngat bangin van a aksi biatik hi. Mah laibu sungah:

“Israel mite, kum sawm li sung

phillawn ngam ko ah

dawi biakpiaknak

na bawl uhmi khi

keima lakah na bawl uhmi

hi ma hi.

43Na puak uhmi buk cu

Molek pathian tei puanbuk hi.

Na puak uhmi milim cu

na aksi pathian uh

Refan zuk hi.

Amuhte bia tukin

na bawl uhte hi milim hi.

Mah hangin nohte cu

Babilon kallamah,

hawlvawk tung,”

tin um hi.#Amos 5:25-27;

44“A pu le pa uhten Thutiamnak Puanbuk cu ngunphil ngamah nei leleng haw hi. Mah Puanbuk cu Pathian in Moses lakah a langtikmi pungsan bangin sakmi hi.#Suah 25:9, 40; 45Mahnung ten a pu le pa uhten mah puanbuk cu a pu le pa tei lak pen la in, Joshua tuah a hawhnak haw tian hawhpih haw hi. Pathian in mahlai ngam a um miphun hawlvawk sakin, mahlai ngamte cu a luah pepel haw ten puanbuk cu keng pepelin, mahlai ah David khan tianin um hi.#Josh 3:14-17; 46David cu Pathian mai ah mitmai pha ngah a, Jakob Pathian i umnak tuk inn pa khat sa thei tukin Pathian nelah ngen hi.#2Sam 7:1-16; 1Khang 17:1-14; 47Mahnaven inn a satu cu Solomon hi.#1Kum 6:1-38; 2Khang 3:1-17;

48“Mahnaven Cungnungbel Pathian cu mihing tei khut bawlmi innah umma hi; Profet ten hitin son haw hi.

49‘Vancung hi ka khunnak hi a,

leihum cu ka ke sihnak hi,

tin Topa in ti hi.

Kei ca in iti bangin him

na sak tum uh?

Ka um nuamnak mun cu

ilai tawk him?#Isa 66:1-2;

50Hi thil hempoh a bawltu hi

keimah hi ma tang maw?’

tin ti hi.#Isa 66:1-2;

51“Thinlianzet si uh si! Na lungmu uh cu Pathian thei laihngawl tei lungmu hi. Pathian thu ngaihnak tukin na beng uh bul thong si maw? Nangmuh vang cu na pu le pa bangbok leng thong si uh si. Hawvang Thiangtho langpang leleng uh ci!#Isa 63:10; 52Na pu le pa tei bawlsiat ngawlmi profet pa khatno bek um haw ni maw? A dikmi Pathian i Salpa hung tuk hi tin ni dang laih cawngin, a phuangtu Pathian i palai that haw hi. Atu-in mah a dikmi a salpa cu zuakin that uh ci! 53Vancung mitei kenmi Pathian i daan cotu cu nangmuhte hi uh ci; mahnaven mah daan a zui ngawltu cu nangmuh leleng hi uh ci,” tin Stefen in ti hi.

Suang Tuah Stefen Sep Hum Haw

54Khonsil upa ten Stefen i thuson a ngaih haw ten a thinuk leita haw in hacang ngawi san haw hi. 55Mahnaven Stefen cu Hawvang Thiangtho tuah dimin, vanlam a zohto ten Pathian sunloihnak le Pathian taklamah Jesuh a dingleng khi mu hi. 56“Zo hem un! Van cu hongdunin Pathian taklamah mi capa ding leng khi mu ing,” ti hi.

57Khonsil upate cu a beng haw hupin, ngingzet au in, Stefen cu man haw hi. 58Khuapi sung pen kai tulin suang tuah sep haw. A septu ten, a van cu Saul a tih haw mi tangval pa kemtik haw hi. 59Suang tuah a seh lih haw laihin, Stefen in, Topa samin, “Topa, Jesuh, ka Hawvang la zazalin hi!” tin au hi. 60A khukdinin, “Topa, a sualnak haw cu cing leleng pahsun!” tin ngingzet au hi. Mahtin a au ceng ten catsukta hi.

Currently Selected:

NUNGZUITU 7: NBF1

Highlight

Copy