NUNGZUITU 12

Bawlsiatnak Tam Dedeuh

1Hih hunin, kumpi Herod#12:1 Herod: Herod cu Israel ngam venghawng uktu Herod Agrippa pa khatnak Persia ngam hempoh uktu hi. in pawlpi sung a, Khristian khenkhat bawlsia pan hi. 2Johan i unaupih James khi ngalnam tuah thattikin, 3Mahmi in Judah mite lungdamtik tih amuh ten Peter vang mantik hi. Hi hun cu Naman hel ngawl Cangho Puai bawl laihtakin hi. 4Peter vang manin, thawngah khia haw hi; thawnginn cingtu ngalkap bu li um haw a, bu khatah ngalkap pa li ten um haw in, mipi mai ah Peter i thu cu son tukin Herod i tuptahmi hi.#Suah 12:1-27; 5Mah hangin Peter cu thawng sungah khum haw hi, mahnaven ama ca in pawlpi ten Pathian nelah nase zetin thunget sak haw hi.

Thawng Sung Pen Peter Suak

6Herod in, zingten mipi tei mai ah Peter i thuson tung a tih ni zan cu thawnginn cingtu ngalkap pa nih tei laklawhah Peter cu zautik hi. Thik taicin pa nih tuah khihin, thawnginn kongka vang cu zankhua cing khawng haw hi. 7Phawhkhak ngawlin Topa i vancungmi pa khat dingin, a zaunak khan haw cu vaktik khawng hi. Vancungmi in Peter cu a ko pen thingin, “Manlangin tho in!” tin phong hi. Thakhatin Peter i khut pen thik taicin cu cak cawm hi. 8Vancungmi in, “Na taikhap khapin, na kedam bunin,” ti hi. A tihnak bangin Peter in bawl a, vancungmi in, “Na puansilh inna, zui in,” ti hi. 9Peter in, zui in thawnginn pualamah tul haw hi; vancungmi in mahtih bangin a bawl cu thungai ni maw, muhnak nei ol hi tin ngaisung hi. 10Ngalkap tei cinnak kongka pa khatnak cu letvawk ngahin, a pa nihnak vang cu letvawk leleu haw hi. A tawpnak ten khuapi sung tuah a pehdunmi thik kongka ah heng haw hi. Mah kongka cu a mahno hong cawmin, a pa nih haw in, suaktul haw hi. Lampi cu zui haw laih takin thakhat thu in, vancungmi cu thamleh vut a, Peter amah nguakcang tang hi.

11Mahten a hum a thil piangmi cu cangcian zetin thei ngah a, “Atu-in, a piang ngangai mi hi thei zo ing! Herod i thuneihnak sung pen le Judah mitei ka humah a hentik tuk a thuduhsam haw hempoh sung pen a pansuaktu tukin Topa in, a vancungmi tiik na hi si!” tin ti hi.

12Thil a piangmi a theih ngah nungten Johan Marka i nu Mary i innah hawh hi; mahlai ah mi tampi hulawmin thungen li haw hi. 13Peter in, a pualam pen kongka cu kiu in, umlawhnu Roda tihmi in kong hong tukin hawh hi. 14Peter i awn hi tih Roda in, a zak ten a lungdam leita in, kong hei hong man ngawlin, “Inn pualamah Peter ding leng!” tin au hi. 15Amuh ten, “A sil cim maw?” ti haw hi. Mahnaven, thungai vei, tin a tih lo hangin, “Amah cingtu vancungmi hi tuk,” ti leleng haw hi.

16Mah sung hempoh cu Peter in cawl ngawlin kongka cu kiu leleng hi. Dawltabel ten kongka cu hon haw in, Peter a hihlam amuh haw ten lamdangsa mahtak haw hi. 17Peter in, “Mengdenin um un!” tin a khutzapin, Topa in, thawng sung pen a suahtulnak thu khi amu lakah hilh hi. “Hi thu hi James le adang nungzuitu hilh un hi,” tin a tih ceng ten tulin mundangah hawh hi.

18Zinglam khua a vak ten thawnginn cingtu ngalkapte cu buaizet haw hi. “Peter iti bang um nantim?” tin amthong haw hi. 19Peter zei tukin Herod in thupia naven mu haw ma hi. Mah hangin thawnginn cingtu cu a thu haw dongkantikin thah tukin thupia hi. Mah nungten Judah ngam pen Herod cu tulin Sisaria khua ah hun tawkfang sung um hi.

Herod Thi

20Herod cu Taiar le Sidon mitei humah a thinuk leita hi. Mah hangin mah khuate cu Herod tawk tukin ahonin hawh haw hi. A masabelin kumpipa i inn a, hotubel Blastas cu amu lamah tang tukin zawm haw. Mahten Herod lakah hawh haw in lemdaihnak bawl tukin ngen haw hi. Ita mahtin ngen haw him titale a ngam sungmi tei an a ngah haw mi cu Herod kumpipa i ukmi ngamsung pen a ngah haw hangin hi.

21A ni tep haw mi ni-in, Herod kumpipa cu a kumpi thuam tuah a khunnakah khungin, mipi tei lakah thuhilh hi. 22Mahten mipi ten, “Hi bangin a awn litu hi mihing kha ma hi, pathian awnkam si!” tin au haw hi. 23Thakhatin Topa in, vancungmi in Herod cu Pathian cu upatnak a piak ngawl hangin nat sesuakin natik hi. Herod cu nguut in, a sunglam ei khawngin thi hi.

24Pathian thu cu pungin, khang tawto hi.

25Barnabas le Saul cu a nadeh haw tukmi a deh ceng haw hangin Jerusalem pen Johan Marka pui in kikleh haw hi.

Currently Selected:

NUNGZUITU 12: NBF1

Highlight

Copy