NUNGZUITU 11

Peter In Jerusalem Ah Thuthan

1Nungzuite le Judah ngamsung ummi umtu hempoh ten Pathian i thu cu Gentail mite hei in, pom ngah zo haw tih thu za haw hi. 2Peter cu Jerusalem ah a hen ten Gentail mite vunceptalhnak bawl tuk a deihtu ten Peter cu sonsia haw in, 3“Vunceptan ngawl Gentail pa i innah ngiakin, a lak hawah an tianin ei ci,” tin ti haw hi. 4Mahti bang a hih hangin Peter in mah thu le la ah a pattungin thil a piangmi umdan hempoh hilh khawng hi.

5“Joppa khua pen thu ka nget laih takin muhnak nei ing. Van pen puanpekpi bangmi thil pa khat a kil pa li nei khiasuk haw in, ka elno ah khun haw hi. 6A sung phano in ka zoh ten ngamsa le inn ngulh nganhing le bok a vak theimi nganhing le hampa lak a vano mu ing. 7Mahten aw za ing a, ka zakmi aw in, ‘Peter aw, dingin, ngo inna, ei in,’ tin ti hi. 8Mahnaven kei in, ‘Cang thei ma, Topa,! Biaknak lam pen a thiang ngawl le a nawngkai mi an cu ka kam sungah tum awng ma hi,’ tin don ing. 9Mahten van pen aw zaleh ing a, ‘Pathian in thiang hi, a tihsa cu nangin thiangtho ma hi tin ngaisung pahsun,’ ti hi. 10Mahti bangin vei thum tian loli umin, a dawltabel ten vanah la kikleh hawta hi. 11Mahtibang a hih laih takin Sisaria pen a tiik haw mi pa thum khi ka ngiahnak innah heng haw hi. 12Aicannak um ngawlno in, hawh tukin Hawvangin tiik hi. Hi Joppa khua mi a unau uh pa luk, thu umtu ten Sisaria ah zuibok haw in, ka venghawng uhin Kornelias i innah tum ung hi. 13Kornelias in vancungmi hungin a innah a dinnak thu khi hilh hi. Mah vancungmi in Kornelias i lakah, ‘Joppa ah mi hah inna, a min ngai cu Simon Peter a tih haw mipa samtikin hi. 14Amah in thuhilh tuk a, a thuhilhmi i hangin nangmah le na innkua in nunpatnak ngah tuk uh ci,’ ti hi. 15Thuhilh ka pat ten eimu humah Hawvang Thiangtho a hen bangin amu humah Hawvang Thiangtho cu hengbok hi. 16Mahten Topa in, ‘Johan cu tui tuah tuiphumnak pia hi; mahnaven nohte cu Hawvang Thiangtho sungah phum hi tuk uh ci,’ tin, a tihmi phawkleh ing.#Nung 1:5; 17Pathian in ohtei lakah Hawvang Thiangtho laksawng a piak bangbokin, Gentail mitei lakah vang laksawng cu pia bok hi, tih cu a ciang zetmi hi. Itin kaw kei thongpohin, Pathian cu ka kham theih tuk!” tin ti hi.

18Mahmi a zak haw ten a sonsiatnak haw cu cawl haw a, Pathian thangphatin, “Pathian in Gentail mitei lakah vangin sualsikin le nung tukin hun pia bok hi,” tin ti haw hi.

Antiok Pawlpi

19Stefen a thah nung siah bawlsiatnak a um hangin thu umtu khenkhat cu khua hempoh ah khendun khawng haw hi. Mi tampi cu Fonisia, Saipras le Antiok tianah hengin Judah mi lakah Thuthangpha cu hilh haw hi.#Nung 8:1-4; 20Mahnaven thu umtu khenkhat cu Saipras le Sairin khua pen Antiok khua ah hawhin, Topa Jesuh Khrih i Thuthangpha cu Gentail mitei lak hei hilh haw hi. 21Topa i huham cu amu humah umin, mi tampi ten umin, Topa i lamah zuan haw hi.

22Mahmi thu le la cu Jerusalem khua ah hengin Jerusalem pawlpi ten Antiok khua ah Barnabas hah haw hi. 23Barnabas cu Antiok khua a hen ten Pathian i mipi tei lakah thupha a piakdante amuh ten a lungdam zetin, a lungmu hempoh haw tuah Topa umin, muantakmi thu umtu a hih theih hawnak tukin thazaang pia hi. 24Barnabas cu miphazet hi a, Hawvang Thiangtho le upkhonak tuah a dimmi pa hi. Mahten mi tampi cu Topa i lakah pui hi.

25Mahten Barnabas cu Saul zei tukin Tarsas ah hawh hi. 26Saul amuh ten Antiok ah hawhpihin, kum khat sung a pa nih haw in, pawlpi mihingte khi pumkhawm pihin mi tampi zilh haw hi. Thu umtute cu Antiok khua ah, “Khristian” tin a masabel sam haw hi.

27Mah hunin, profet khenkhat cu Jerusalem pen Antiok ah hawh haw hi. 28Amu lak a, profet pa khat Agabas a tih haw mipa cu dingto a, Hawvang i huham tuah awnin, “Leihum khua hempoh ah paampi heng tuk hi,” tin hilhham hi. Mah paampi cu Klaudias i Rom kumpi a deh sungin heng hi.#Nung 21:10; 29Nungzuitu ten a tihtheih tawk ten haw in, Judah ngam a ummi thu umtu unaupihte bopnak pia tukin sonkhawm haw hi. 30A son khawm haw bangin a ngah haw mi tangka cu pawlpi upate piak tukin Barnabas le Saul puatik haw hi.

Currently Selected:

NUNGZUITU 11: NBF1

Highlight

Copy