NUNGZUITU 10

Peter le Kornelias

1Sisaria ngamah Kornelias a tih haw mipa um hi. Amah cu, “Italy Ngalkap honpi,” tihmi Rom ngalkap uktu ngalbawi hi. 2Amah cu Pathian kihcazettu hi; a innkua hawng haw in Pathian a bia lelengtu hi haw a, Judah mi ca-ngahte tampi bawmtu le Pathian nelah catngawl thungen lelengtu hi. 3Vei khat cu taklam nazi pa thum hawngin, muhnak nei a; mah a muhnakah Pathian i vancungmi pa khat a lakah hungin, “Kornelias!” tin, a sam khi za hi.

4Mah vancungmi cu lauthah zetin, Topa? tin don hi.

Vancungmi in, “Pathian lak a, na thungetmi le mi ca-ngah na bopnak humah a lungdamin, na thungetnak cu thei hi. 5Mah hangin Joppa khua a, Simon Peter a tih haw pa sam tukin mi tiikin hi. 6Simon Peter cu Tuipi mawk a ummi savun tuah thil a bawltu Simon i innah cam hi,” tin ti hi. 7Mahten vancungmi cu a hawh ceng ten Kornelias in, a inn a ummi umlawhpa nih le ngalkap pa khat cu sam hi. Ngalkap pa cu biaknak lamah a thathozet le ngeikhei zetmi hi in, amah cingtu lak pen pa khat hi bok hi. 8Thil a piangmi hempoh khi a hilh ceng ten Joppa khua ah hawhtik hi.

9A zingten hawh haw in, Joppa khua a henkuanno haw ten Peter cu suun laihtak hawngin, thungen tukin inn humlamah kaito hi. 10Peter cu a ngilkialin, an ei nuam hi; an a bawl lih haw laihtakin muhnak nei hi. 11Van khi hongin, puanpekpi bang thil pa khat a kil pa li in, lei humah a khiaksuk haw mi cu mu hi. 12A sungah ngamsa a phunkim le bokvak ngamsa le vano a phunkim um haw hi. 13Aw pa khatin, a lakah, “Peter, dingto in hi; ngo inna ei in!” tin ti hi.

14Mahnaven Peter in, “Topa, mah ma hi! A thiang ngawlmi le a nawngkai mi cu ei hihim mang,” ti hi.

15Awnging in, hilh thuah lehin, “Pathian i thiang a tihmi cu thiangtho ngawlin ngaisung pahsun,” ti hi. 16Mahmi cu vei thum tian langin mahnung ten mah thil cu vanah latoleh hi.

17Mah muhnak i sullam cu Peter in, a ngaihsut lih laih takin Kornelias i tiikmite cu Simon umnak innah heng haw a, kongka pualamah ding haw hi. 18“Hilai ah Simon Peter tihmi mikhual um maw?” tin dong haw hi.

19Peter in, a muhmi i sullam a ngaihsut lih laihtakin Hawvangin, “Ngai in, hi mi pa thum ten nangmah zei haw hi! 20Vaithawi inna, hawhin hi; mahten amu lakah na hawh tuk cu lungmu aicang pahsun; keima tiikmi haw hi,” ti hi. 21Mah hangin Peter cu tolhsukin, a zeitu tei lakah, “Na zei uhmi cu keimah ing. I kaw na kin uh?” tin dong hi.

22Amuh ten, “Ngalbawi Kornelias in tiik hi. Amah cu miphazet, Pathian bia mi hi a, Judah tei upat zetmi hi. Na hilh tukmi khi thei hen tin, a innah nangmah pui tukin keimuh tiik hi” tin ti haw hi. 23Peter in mah zan cu ama lakah caam hih tukin zawmin, caam haw hi.

A zingten Peter in vaithawi in, amuhte tuah hawh haw a, Joppa khua a, Khrih thu umtu khenkhatte vang tel bok haw hi. 24A zinglawi ten Sisaria ah hengin Kornelias in, a unaupih le a sawmmi a ngualcamte tuah ngak leng haw hi. 25Peter cu a innah a hen ten Kornelias in muakin, a mai ah kuunin, a kebulah bok hi. 26Mahnaven Peter in dingtik a, “Dingin hi! Kei vang mihing bok ing,” ti hi. 27Inn sungah a tumthahin Peter in, Kornelias cu otpih pepel a, inn sungah mi tampi khungkhawm haw hi. 28Peter in amuh tei lakah, “Eimu biaknak daan bangin titale Judah miten Gentail mite danglen tuk le ngualcam tuk cu kham khawngmi hi tih cu na theih khawng uhmi hi. Mahnaven kuamah mithiang ngawl le nawngkai in ngaihsut tukmi kha ma hi tih khi Pathian in lak zo hi. 29Mah hangin mi hahin, na sam uhten kam khatno hei el ngawlin hung ing. Ita sam uh cim? tihmi hilh un,” ti hi.

30Kornelias in, “Ni thum zo hi, ka innah zanlam nazi pa thum ten thungen ing a, thakhat thu in, a de zetmi puan silhin, mi pa khat ka mai ah ding a, 31‘Kornelias, Pathian in, na thungetnak thei in, mi ca-ngah na bopnak vang melcik khawng hi. 32Joppa ah Simon Peter a tih haw mi pa sam tukin mi hahin hi. Joppa ah tuipi mawk a ummi savun tuah thil bawltu pa Simon i innah cam hi,’ ti hi. 33Mah hangin thakhatin sam ing hi; mahten nangmah vangin hehpihin hung ci. Atu-in Pathian mai ah ka venghawng uhin, um ung a, Topa in hilh tukin a tihmi khi a ngai tukin ngak ung,” ti hi.

Peter i Thuhilhmi

34Peter in panto in, “Pathian in, a kuakua hei hihen a bangtenno in mihingte zo hi, tih khi atu-in thei ing.#Daan 10:17; 35Itih bang miphun hei hihen Pathian lau in, a mai ah thilpha a bawl tale Pathian i pom takmi hi. 36Mi hempoh tei a Topa uh Jesuh Khrih sung pen lemdaihnak Thuthangpha cu Pathian in Israel tei lakah pia hi, tih cu thei uh ci. 37Johan in tuiphumnak piaknak thu a hilh ceng ten Galilee pepan Israel ngamsung khua hempoh ah thil lamdangzet a piangmi hei cu thei khawng uh ci. 38Nazareth mi Jesuh i humah iti bangin Pathian in Hawvang Thiangtho le huham buak him tihvang cu thei khawng uh ci. A lakah Pathian a um hangin khua hempoh ah hawhin, thilpha bawl pepel hi. Satan i khalhsiatmi hempoh damtik khawng hi. 39Israel ngam sungah le Jerusalem pen a bawlmi hempoh a mutu le a theitu tetti cu keimuh hi ung hi. Mahten amah cu thinglamtehah khenin, that haw hi. 40Mahnaven Pathian in thihnak pen tholehtikin, keimu lakah langtik hi. 41Mi hempoh tei lakah hi ngawlin a thutheitu tukin a ten mitei lakah langtik hi. 42Mahten mitei lakah Thuthangpha hilh tukin le amah cu a nungmi le a thi mitei humah thukhentu in, a bawlnak vang a hilhtu tukin tiik hi. 43Profet hempoh ten ama thu cu hilh haw in, amah a umtu hempoh ten a min i cahnak huham i hangin a sualnak haw ngaihdam hi tuk hi, tin ti haw,” ti hi.

44Mahtin Peter i otlih laihtakin, a thuhilhmi a ngaitu hempoh tei humah Hawvang Thiangtho heng hi. 45Joppa pen Peter tuah a hengmi thu umtu Judah mite cu Gentail mitei lakah Pathian in, a laksawng Hawvang Thiangtho buak tih khi amuh haw ten lamdangsa mahtak haw hi. 46Itahim titale mahmi cu awn phun dadang tuah awnin, Pathian i thawmngengnak a thangphat haw khi a zak haw hangin hi. Peter in, 47“Eimuh ten a ngah zo uh bangin hi mite hei in, Hawvang Thiangtho ngah bok haw hi. Tuiphumnak la tukin akua him a kham thei tuk,” tin ti haw hi. 48Mah hangin Jesuh Khrih minin, tuiphum tukin thupia hi. Mahten amu lakah a camhih tukin hen haw hi.

Currently Selected:

NUNGZUITU 10: NBF1

Highlight

Copy