MATTHEW 9

1Gunkuong tungah tuongin tuipi galkai a, ama’ khuo-ah a tung hi.

Jesu in Phalsi Khat Damsah

(Mrk 2:1-12; Luk 5:17-26)

2Tua zaw lien ciengin mi pawlkhat in lupna tunga a lum phalsi khat a zawng uhi. Jesu in a upna uh a mu bepin ama in a pumzawpa kungah, “Ka ta aw; lungmuongin om in, na mawna mai zo hi,” a ci hi. 3Tua ciengin thukham hil siete pawlkhat in, “Tampa in Pasien a gensie hi,” a kici uhi. 4Hinanle Jesu in a ngaisutna uh thei a, “Bang dingin gitlo lungsim ngaisun na hi uh ahei? a ci hi. 5Azieh pen, ‘Na mawnate kimaisah zo hi,’ ci ding le, ‘Tho inlen pei in,’ ci ding koi baizaw ahei? 6Ahi vangin Mihing Tapa in leitungah mawmaisah thei nading thu nei hi, ci note in na thei nadingun,” a ci zaw ciengin ama in phal si mipa kungah, “Tho in, na lupna puo inlen na inn ah pei in,” a ci hi. 7Tuale tua pa tho-in a inn ah a pei hi. 8Mihonpite in tam thu a mu uh ciengin lamdang a sa mama vua, amate in mihingte tunga tam bang thu neina a pie Pasien a phat uhi.

Matthew Kihlatna

(Mrk 12:13-17; Luk 5:27-32)

9Khum mun panin Jesu a pei laitahin siehdonna zum sunga a to Matthew a kici mi khat mu hi; ama kungah, “Ei zui in,” a ci hi. Tuale ama dingto-in a zui pai hi.

10Inn sungah nitah an ne-in a to laitahin siehdongte le mawneite tampi pei-in ama le a nuazuite tawh a toton uhi. 11Pharisee-te in tam thu a mu ciengun amate in a nuazuite kungah, “Bang dinga na siepa un siehdongte le mawneite tawh an neton ahei?” a ci uhi.#Luk 15:1-2 12Ahi vangin ama in tam thu a zah ciengin, “Sievuon a tulmaw pen cidamte hi loin cinate ahi zaw hi. 13Pei unlen, ‘Keima lunggul pen biehpiehna hi loin lainatna hizaw hi,’ a kici khu bang a cinopna ahei, va kan ta un. Azieh pen midihte hlan dinga ang pei ka hi sih a, mawneite hlan dinga ang pei ka hizaw hi,” a ci hi.#Mat 12:7; Hos 6:6

Antanna Thudawhna

(Mrk 2:18-22; Luk 5:33-39)

14Tua ciengin ama kungah John’ nuazuite pei a, “Bang dinga kote le Pharisee-te in an tang zelzel#9:14 dang tang laibute ah “zelzel” ci om lo hi. napi, na nuazuite in tang lo uh ahei?” a ci uhi. 15Jesu in amate kungah, “Zineipa tawh a omton laisie-un mopawi simte a da thei ding uh amah? Amate kung panin zineipa a kilah hun ang tung ding a, tua hun ciengin amate in an a tang ding uhi. 16Koima in puonbeh tha tawh puonlui phaw ngai lo hi, azieh pen a kiphawna puonbeh in puonlui kai-eh ding a, a ehbe zaw ding hi. 17Koima in savun um lui sungah lenggazu tha thal ngai lo hi; a thal khah leh tua lenggazu in savun um phukehin kibuo ding a, savun um zong kisie ding hi; savun um tha sungah lenggazu tha kithalzaw a, tuaci’n a ni-in kisawtkoi thei hi,” a ci hi.

Numeino Khat Kihingsah, Nupi khat Kidamsah

(Mrk 5:21-43; Luk 8:40-56)

18Ama in tam thute amate kungah a gen laitahin thakhatthu-in kikhopna inn#9:18 Gk ah “kikhopna inn” ci om lo hi. uhpa khat va pei-in ama mai ah khupdin a, “Ka tanu tu mama-in si ta; hinanle hing pei inlen a tungah na khut hing nga lacin a hingkia ding hi,” a ci hi. 19Jesu zong ding pai-in a nuazuite tawh ama a zui hi. 20Tua ciengin thakhatthu-in kum sawm le kum ni sung siluong natna vei numei khat a nua lamah pei-in a puontuol mongtep a tham hi. 21Azieh pen a puontuol beh va khoi kha ta leng ka dam ta ding hi,” ci-in a ngaisun hi. 22Jesu zong kinuahei-in tua nu a mu ciengin ama in, “Ka tanu aw, lungmuongin om in; na upna in ang damsah zo ta hi,” a ci hi. Tuale thakhatthu-in numei nu a dam pai hi. 23Ulienpa’ inn ah Jesu a tun ciengin theile tum mite le mihonpi gamlum pialpual a mu ciengin 24ama in, “Kipei ta un; azieh pen numeino a si ahi sih a, a kimu ahi bo hi,” a ci hi. Tuale mihonpite in ama a nuisan uhi. 25Ahi vangin a pulamah mihonpite a kipusuosah zaw ciengin a sungah ama tum a, a khut tawh a kai leh tua numeino a thoto hi. 26Tam thu kigen pen tua gamkuom tengah kizelmang hi.

Jesu in Mittaw Ni Damsah

27Khum panin Jesu a peidawh ciengin mittaw ni in a nua-ah zui-in, “David’ Tapa aw, kote ei khuotuo bo ven!” ci-in nahpi-in a kiko uhi. 28Inn sungah a lut ciengin ama kungah mittaw tegel a pei uhi; tuale Jesu in ama gel kungah, “Tami bawl thei dingin nei um vuoi mah? a ci hi. Ama gel in ama kungah, “Ingheh, Topa” a ci uhi. 29Tua ciengin ama in a mit uh thampieh a, “Na upna uh dung zui-in na tung vuah pieng taheh,” a ci hi. 30Tuale a mit un khuo a mu pai lien hi. Tua ciengin Jesu in ama gel kungah, “Tam thu koima theisah sih gel in,” ci-in khautahin thu a pie hi. 31Ahi vangin ama gel pei-in tua gamkuom tengah ama’ thu a thezah uhi.

Jesu in a Ham theilo Mi Khat Damsah

32Ama gel a pei zaw ciengun dawivei a ham thei lo mi khat ama kungah kipeipi hi. 33Dawi a kinawmang zaw ciengin a ham thei lo mipa a ham thei pai hi; tuale mihonpite in lamdang a sa mama vua, “Israel gam sungah tam bang thu a pieng ngai nai sih hi,” a ci uhi. 34Ahi vangin Pharisee-te in, “Dawimangpa’ vang tawh dawite kinotmang hi bo,” a ci uhi.#9:34 Adang tang laibute ah tami tang om lo hi.#Mat 10:25; 12:24; Mrk 3:22; Luk 11:15

Anlah ding Tam, Nasem ding Tawm

35Tua ciengin khuopite le khuotate zosie-ah Jesu pei kawikawi a, a kikhopna uh innte ah thuhilin, vantung gam tawh kisai lungdamna thute tangko-in natna satna namkim a damsah hi.#Mat 4:23; Mrk 1:39; Luk 4:44 36Ama in mihonpite a mu ciengin a cing om lo tuute bangin cimaw le gimthuohin a om ziehun hepihuoi a sa mama hi.#Gam 27:17; 1Kum 22:17; 2Khg 18:16; Ezk 34:5; Zech 10:2; Mrk 6:34 37Tua ciengin ama in a nuazuite kungah, “Anlah ding tam mama a, ahi vangin nasem ding mi tawm mama hi. 38Tua ahi ziehin ama’ an a la dingin an nei Topa in nasemte ang sawl nadingin thu ngen un,” a ci hi.#Luk 10:2

Currently Selected:

MATTHEW 9: ZBOTF01

Highlight

Copy