MATTHEW 26

Jesu Tha ding Kisawm

(Mrk 14:1-2; Luk 22:1-2; Jhn 11:45-57)

1Jesu in tami thu teng zosie a gen zaw ciengin a nuazuite kungah, 2“Tuzaw ni ni ciengin Peisan Pawi ang tung ding a, singlamte tungah khailia dingin Mihing Tapa kipie ding hi, ci na thei uhi,” a ci hi.

3Tua ciengin Caiaphas a kici siempu lienpen pa’ innpi ah siempu lien pa le mipi upate a kikhawm vua, 4tuale amate in Jesu guh matin tha ding a kikum uhi. 5Ahi vangin amate in, “Mipite lahah buoina ang om kha thei ding ahi ziehin pawi sungin bawl sih vai,” a kici uhi.

Bethany Khuo-ah Sathau Kinu

(Mrk 14:3-9; Jhn 12:1-8)

6Bethany khuo-a miphah#26:6 “miphah” le “phah natna” i cite in natna tuomtuomte zong a gen nuom ahi hi. Simon inn ah Jesu a op laitahin 7a manpha mama alabaster sathau namtui thawl khat tawi-in numei khat ama kungah pei a, sabuoi tungah a to laitahin tua sathau namtui a lu tungah a sungsuh hi. 8Ahi vangin nuazuite in a mu ciengun a lung uh thah a, “Bang dinga tam sathau a hici mawh zah adiei? 9Azieh pen tami sathau kizua leh sum tampi tah kikhawng ding a, tua sum teng mizawngte hawmpieh zaw velei” a ci uhi. 10Ahi vangin Jesu in tami thu thei ahi ziehin amate kungah, “Bang dinga tami numei nu na suhbuoi uh ahei? Ama nu in kei tungah sil hoi khat sem zo hi. 11Azieh pen note tawh mizawngte ang om zing ding ahi a, ahi vangin note tawh kei kang om zing sih ding hi. 12Ka pum tunga tami sathau ei buohna pen ka kivui cienga a bawldan ding a mazil ahi hi. 13A tahtah a kang ci-in, leitung buppi-ah tami lungdamna thu a kigenna muncin tengah tami nu phawna-in a silbawlte kigengen ding hi,” a ci hi.

Jesu Leheh ding Judah Thukim

(Mrk 14:10-11; Luk 22:3-6)

14Tua ciengin siempu liente kungah sawm le nite lahah khat ahi Judah Iscariot a kici mipa pei a, 15“Ke’n ama hing lebawlin no kungah hing pie leng bang nei pie ding vuoi?” a ci hi. Amate in dangka sawmthum ama a pie uhi. 16Khum hun a kipanin ama a lebawl thei nadingin hun lemtang sui a kipan pai hi.

Nuazuite tawh Peisan Pawi An Ne

(Mrk 14:12-21; Luk 22:7-14, 21-23; Jhn 13:21-30)

17Tolsawlo Anlum Pawi ni masa pen ni-in Jesu kungah nuazuite a pei vua, “Peisan Pawi ankuong lui nading hei sungah nang bawlpieh uleng na nuom ei?” a ci uhi. 18Ama in, “Khuopi sunga mi khat kungah pei unlen ama kungah, ‘Siepa in ka hun hing nai ta, na inn ah ka nuazuite tawh Peisan Pawi kang bawl ding hi, ci hi,’ va ci ta un,” a ci hi. 19Tuaci’n Jesu’ gen bangin nuazuite a gamta vua, Peisan Pawi an ding a siem uhi.

20Nitah ciengin ama in sawm le nite#26:20 Adang tang laibute ah “nuazuite” kibelap hi. tawh ankuong a imton hi; 21tuale an a neh laitahun ama in, “A tahtah a kang ci-in, note lahah khat in kei ei leheh ding hi,” a ci hi. 22Tuale amate a da mama vua, ama kungah a banbanin, “Topa, kei hi sam sih vang izaw?” a ci ciet uhi. 23Ama in, “Keima tawh kuong sunga a khut tawh a sawhpa in ei leheh ding hi. 24Ama tungtang thu a kigielsa ma bangin Mihing Tapa pen a pei ding ma hi a, hizongle Mihing Tapa a leheh pa in gimna a thuoh ding hi! Tua mipa ang pieng vet lo hi leh ama adingin hoizaw ding hi,” a ci hi. 25Ama a leheh Judah in, “Siepa kei ka hi amah?”#26:25 Gk “Rabbi” a ci hi. Ama in, “Na ci bang ahi hi,” ci-in a dawng hi.

Topa’ Vumkhawl Pienna

(Mrk 14:22-26; Luk 22:15-20; 1Cor 11:23-26)

26Amate in an a neh laitahun Jesu in khomun lum khat la-in phalsuo-in lungdam a ko zaw ciengin nuazuite pie a, “La unlen ne un; tam pen ka pumpi ahi hi,” a ci hi. 27Tua ciengin ama in hai zong la-in lungdam a ko zaw ciengin amate pie a, “Na unpi-un dawn un; 28azieh pen tami in mi tampi’ mawna a kimaisah nadinga a kibuokhie thuciemna#26:28 Adang tang laibute in “tha” belap hi. tawh kisai ka sisan ahi hi. 29Ke’n kang ci-in, ka Pa’ gam sungah note tawh lenggazu tha ka dawn masangin tam lenggazu ka dawn ngai nawn sih ding hi,” a ci hi.

30Amate in phatna la a sah zaw uh ciengin Olive Muol tungah a pei uhi.

Peter’ Niel ding Kimagen

(Mrk 14:27-31; Luk 22:31-34; Jhn 13:36-38)

31Tua ciengin Jesu in amate kungah, “Note in tu zanin keima ziehin na unpi-un nei taisan ding uhi. Azieh pen,

‘Tuucingpa ka satlia ding a,

tuuhonte a kithethang ding hi,’ ci-in kigiel hi.#Zech 13:7

32Ahi vangin ei kithawsah zaw ciengin no masangah Galilee gam ka na pei ding hi,” a ci hi.#Mat 28:16 33Peter in ama kungah, “Nangma ziehin mi zosie taimang sieng nanle ke’n nang kang taisan ngai vawt sih ding hi,” a ci hi. 34Jesu in ama kungah, “A tahtah a kang ci-in, tu zan mama aah a khuon masangin thumvei tah nei niel ding hi,” a ci hi. 35Peter in ama kungah, “Nangma tawh siton nading hinanle nang kang niel sih ding hi,” a ci hi. Nuazui zosiete in zong tua ma bangin a ci uhi.

Gethsemane ah Jesu in Thungen

(Mrk 14:32-42; Luk 22:39-46)

36Tua ciengin Jesu a nuazuite tawh Gethsemane a kici munah a pei hi; tuale ama in a nuazuite kungah, “Khunah pei-in thu ka nget kalin tanah na to un,” a ci hi. 37Ama in Peter le Zebedee’ tapa ni zawpi a, da le lungkham hun ding a kipan hi. 38Tua ciengin ama in a kung vuah, “Si nading za dong nangawnin ka lung a kham hi; tanah na om unlen ei na ngah un,” a ci hi. 39Tuale bakhat pei lai-in tuolah kiphengpha a, “Ka Pa aw, a pien thei ding leh tami hai tawh ei kipelsah ta’n; ahi vangin kei deina bang hi sih hinlen nangma’ deina bang hizaw heh,” a ci hi. 40Tua ciengin a nuazuite kungah a pei leh amate kimu-a om a mu hi; tuale ama in Peter kungah, “Nai khat sung nangawn ei ngah zo lo na hi uh amah? 41Gimna#26:41 Ahi sihle “z-etna sunga” hun sungah na lut lo nadingun ngahin thungen un; lungsim a lawp vangin tahsa thanem hi,” a ci hi. 42A niveina va peikia-in thu ngen a, “Ka Pa aw, tami hai kei dawn lo-a phamaw ahi vawt leh lah nangma’ deina bang hi taheh,” a ci hi. 43Ama khatvei a peikia leh a mit uh hah zo nawn lo ahi ziehin amate a kimusa ma-in a mu leuleu hi. 44Tuaci’n amate nuasie kia-in a nget ngai teng ma a thumveina a ngen hi. 45Tua ciengin nuazuite kungah ama pei-in a kung vuah, “Kimu-in a khawl hit hiet lai na hi uh amah? En un, Mihing Tapa kilehehin mawnei mite’ khut sungah a kipieh ding hun ang nai ta hi. 46Tho un, pei vai. En un, kei ei leheh ding pa ang nai ta hi,” a ci hi.

Jesu Kilehehna le Kimatna

(Mrk 14:43-50; Luk 22:47-53; Jhn 18:1-11)

47Ama in thu a gen kim laitahin sawm le nite sung panin Judas a tung hi; siempu liente le mipi upate’ sawl ahi namsau le phohbul a tawi mihonpi tawh ama zawhton hi. 48Tuale a leheh pa in amate kungah lim khat pie a, “Kang nap ding pa khu tua pa ahi hi; ama man pai un,” a ci hi. 49Thakhatin Jesu kungah pei a, “Na dam ei, Siepa!” ci-in ama a nam hi. 50Jesu in ama kungah, “Lawm aw, tana na sep ding teng sem meng in,” a ci hi. Tua ciengin amate pei-in Jesu tungah a khut utawh tu-in a man uhi. 51Jesu tawh a omton mite lahah khat in thakhatin a khut tawh a namsau zamin dawh a, siempu lien pa’ silapa a sat leh a bil a bansan hi. 52Tua ciengin Jesu in ama kungah, “Na namsau a pai-ah sietkia in; azieh pen namsau tawite namsau ma tawh si ding hi. 53Ka pa kungah a ngen thei lo nei sa uh amah? A ngen hi leng keima kungah vantung mite legion#26:53 Legion pen Rome-te’ galkap honkhat a cina hi a, Gk awsuo banga kigiel ahi hi. Legion khatah galkap tul guh om hi. sawm le ni val, thakhatin ang sawl zieu ding ahi hi. 54Tua bang hi mawh leh Lai Siengtho in tu-a banga a pien nading a gen pen bangci tangtun thei ta ding ahei?” a ci hi. 55Khum hunin Jesu in mipite kungah, “Guta bulu khat mat banga kei ei man dinga namsau le phohbul tawh hing kuon na hi uh amah? Nisimin biehinnpi sungah to-in thu ka hil laitahin lah nei man zel sih uhi.#Luk 19:47; 21:37 56Hinanle kamsangte’ Lai Siengtho a tangtun nadinga tam bang teng zosie ang pieng ahi hi,” a ci hi. Tua ciengin nuazuite zosie in ama nuasie-in a taimang uhi.

Siempu Lien Pa Mai-ah Jesu

(Mrk 14:53-65; Luk 22:54-55, 63-71; Jhn 18:12-14, 19-24)

57Jesu a mante in thukham hil siete le upate kikhopna inn, siempu lien pa Caiaphas kungah a peipi uhi. 58Peter in siempu lien pa’ inntuol dong a gamla seng lo panin ama a zui hi; ama in a thu tawpna a thei nadingin a sungah lutin a cingte tawh a toton hi. 59Siempu liente le vaihawmte in Jesu a tha thei nadingun ama langkhatah zuou teci a sui vua, 60zuou teci tampi tah a mai-ah a pei vangun amate in a mawna a mu sih uhi. A tawpna ah mi ni a mai-ah a pei vua, 61“Tam mipa in, ‘Pasien’ biehinnpi ka susie zo ding a, ni thum sungin ka lamkia ding hi,’ ci hi,” a ci uhi.#Jhn 2:19 62Siempu lien pa dingin, “Dawn nading na nei sih amah” Na lang khatah a tecipanna uh bang teng ahei?” a ci hi. 63Ahi vangin Jesu ham loin a om hi. Tua ciengin siempu lien pa in ama kungah, “A hingzing Pasien’ mai-ah kang ciemsah hi, Pasien Tapa Messiah#26:63 Ahi sihle “Khris” na mah, ei gen in” a ci hi. 64Jesu in tua pa kungah, “Na cisa ma bang ahi hi. Ahi vangin ke’n kang ci-in,

Tu-a kipanin vanglietna zietlamah

Mihing Tapa to-in,

vana meiilum tung tuongin

ang pei na mu ding uhi,” a ci hi.#Dan 7:13-14

65Tua ciengin siempu lien pa in a puonsilte balkehin, “Pasien tungah a hamkhiel ta hi! Teci dang a kisam nawn amah? En un, tu-in a hamkhielna na za zo uhi. 66Na thukhenna uh bang ahiei?” a ci hi. Amate in, “A si dingin kilawm hi,” a ci uhi.#Siem 24:16 67Tua ciengin amate in a maitang cil phi-in a vuo uhi; tuale kimkhatte in a phebeh vua,#Isa 50:6 68“Nang Messiah#26:68 Ahi sihle “Khris” aw, ei gen vawi, nang ang vuo koi ahiei?” a ci uhi.

Peter in Jesu a Nielna

(Mrk 14:66-72; Luk 22:56-62; Jhn 18:15-18, 25-27)

69Tua laitahin inntuol ah Peter a na to hi. Numei nasem khat ama kungah pei a, “Nang zong Galilee mi Jesu tawh kipawl ngel vete aw,” a ci hi. 70Ahi vangin ama in, “Na thugen theikha vawt sing,” ci-in amate zosie mai-ah kilepin a niel hi. 71Innhlap lam zuonin a pusuo ciengin adang numei nasem khat ma in mu a, a gei-a dingte kungah, “Tam pa Nazareth mi Jesu tawh kipawl ngai ngel ve aw,” a ci hi. 72Ama in, “Tua pa thei ngai vawt sing!” ci-in kitomlaw-in a nielkia hi. 73Tua zaw a sawt loin a gei-a dingte pei-in Peter kungah, “Nang zong amate lahah khat hi lenlon teh, na awsuo-in zong ang kithei ngengngong khu,” a ci uhi. 74Tua ciengin ama le ama kisamsie-in, “Tua pa thei kha kilkel sing!” ci-in a kitomlaw hi. 75Tua ciengin Peter in, “Aa a khuon masangin thumvei nei niel ding hi,” ci-a Jesu thugen a phawhkia hi. Tuale ama pusuohin nahpi tahin a kap hi.

Currently Selected:

MATTHEW 26: ZBOTF01

Highlight

Copy