MATTHEW 22

Mopawi Thugentena

(Luk 14:15-24)

1Jesu in thugentena tawh amate tungah thu genkia a: 2“Vantung gam pen a tapa dinga mopawi bawl kumpipa tawh kigente thei hi. 3Ama in mopawi ankuong im dinga a kicielsate hlan dingin a silate a sawl vangin amate a pei sih uhi. 4Ama in sila dangte sawl leuleu a, ‘A kicielsate kungah tam bangin gen un: En un, ka nitah an min zo hi, ka bawngtangte le ka bawng thau tuituohte kigo zo a, na vannuoi a baisa-in om zo ta hi; mopawi an ne dingin hing pei ta un,’ ci-in a gensah hi. 5Ahi vangin amate in thudon loin pawlkhat in lo kuonsanin, adang pawlkhat in a nasepna vuah a peisan vua, 6a omlai teng in ama’ silate manin bawlsie-in na that uhi. 7Kumpipa zong lungthahin a galkapte sawl a, tua mithatte susie-in a khuopite uh a haltum hi. 8Tua ciengin ama in a silate kungah, ‘Mopawi a baisa-in om a, a kicielte an ne dingin a kilawm nawn sih uhi. 9Tua ahi ziehin lamlienpi ah pei unlen mopawi an ne dingin na mu popo va ciel ta un,’ a ci hi. 10Silate zong lampite ah pei-in a mu zosie uh, hoi tale hoi tasih le a kaikhawm uhi; tuaci’n mopawi bawlna inn sungah pawisim mi a dim hi.

11“Ahi vangin mopawi simte van dingin kumpipa a lut ciengin khum tahah mopuon sil lo pasal khat mu kha a, 12ama kungah, ‘Lawm aw, mopuon sil lopi-in tam sungah ang bangci lut na hei?’ a ci leh ama pa in a gen ding a thei ta sih hi. 13Tua ciengin kumpipa in a nasemte kungah, ‘A khut a keng hen unlen, kaana le hagawina mun ahi pulam khuomiel lahah paimang ta un,’ a ci hi.#Mat 8:12; 25:30; Luk 13:28 14Azieh pen mi tampi a kihlat vangin mi tawmkhat beh kiteel hi,” a ci hi.

Sieh Piehna Thudawhna

(Mrk 12:13-17; Luk 20:19-26)

15Tua ciengin Pharisee-te pei-in a thugenna tawh ama a mawmat thei nadingun thang a sie sawm uhi. 16Tuaci’n amate in ama kungah nuazuite le Herod mite a sawl vua, “Sie aw, nang na thutah a, thuman bangin koima zatah nei loin Pasien’ lampi na hil lam ka thei uhi; azieh pen nang in mi mai-et tuom na nei sih hi. 17Tua ahile kumpipa tunga sieh pieh ding kilawm amah, kilawm lo ahei, ci thu na ngaisutna ei gen in,” a ci uhi. 18Ahi mawh vangin Jesu in a lungsim gitlona uh thei ahi ziehin, “No mihoi kipangte aw, bang dinga nei ze-et uh ahei? 19Sieh dinga kipie sumtang ei lah vawi uh,” a ci hi. Tuale amate in a kungah denarius khat a peipi uhi. 20Tua ciengin amate kungah, “Tami koi’ lim le koi’ min ahiei,” a ci hi. 21Amate in kumpipa’ lim le min ahi hi,” ci-in a dawng uhi. Tuale amate kungah, “Kumpipa’ nate kumpipa tungah na pie unlen, Pasien’ nate Pasien tungah na pie un,” a ci hi. 22Tami thu a zah ciengun amate in lamdang a sa vua, ama nuasie-in a peisan uhi.

Thawkiana Tungtang Thudawhna

(Mrk 12:18-27; Luk 20:27-40)

23Khum ni ma-in ama kungah thawkiana om lo hi, a ci Sadducee-te pei-in thudawhna khat a dong vua,#Sawl 23:8 24“Siepa aw, Moses in, ‘Mi khat ta nei loin a si leh, a sanggampa in tua meigongnu kinunpi-in a sanggam pa adingin ta hinpieh ding hi,’ ci hi.#Thkna 25:5 25Tu-in ko lahah sanggam pasal sagi om hi; a ta pen pa in zi nei napi ta nei loin si a, a zi pen a sanggampa in a ensah hi. 26Tua ma bangin a ni na, a thumna-a kipanin a sagina dongin ta nei loin a si uhi. 27A tawpna ah tua numei zong a si hi. 28Tua ahile amate in a unpi-un tua nu kinunpi kim uh ahi ziehin thawkia hun ciengin a koi pen’ zi ahi ta diei?” a ci uhi.

29Jesus in amate dawng a, “Note in Lai Siengtho thu ahi a, Pasien’ vanglietna ahi zongin thei lo na hi ziehun na ngaisun khiel uhi. 30Azieh pen thawkia hun ciengin vantung mite ma bangin kipi kitenna om lo ding hi. 31Tuale misite thawkiana tawh kisai-in note kunga a gen thute na sim ngai sih uh amah? 32‘Keima in Abraham’ Pasien, Isaac’ Pasien, le Jacob’ Pasien ka hi hi,’ a ci hi. Ama a site’ Pasien ahi sih a, a hingte’ Pasien hi zaw hi,” a ci hi.#Pei 3:6 33Mipite in tami thu a zah ciengun ama’ thuhilna ziehin lamdang a sa uhi.

Thupieh Lienpen

(Mrk 12:28-34; Luk 10:25-28)

34Ama in Sadducee-te gen ding thei loin a sipsah lam Pharisee-te in a zah ciengun a kikaikhawm vua, 35amate lah panin thukhamsie khat in ama a ze-etna-in thu khat a dong hi. 36Siepa aw, thukham sungah bang thupieh lienpen ahei?” a ci hi. 37“Ama in tua pa kungah, ‘Na Topa Pasien na lungtang zosie, na hinna zosie, le na lungsim zosie tawh na it ding hi,’ a ci hi.#Thkna 6:5 38Tami pen a masapen le a lienpen thupieh a hi hi. 39A nina zong a masa tawh kibang hi: ‘Nangma na ki-it bangin na vengte na it ding hi,’ ci ahi hi.#Siem 19:18 40Thukham zosie le kamsangte’ thuhil zosie tami thupieh nite tunga kikhai ahi hi,” a ci hi.#Luk 10:25-28

David’ Tapa Tungtang Thudotna

(Mrk 12:35-37; Luk 20:41-44)

41Pharisee-te a kikhop laitahun Jesu in amate kungah tami thu dong hi: 42Messiah#22:42 Ahi sihle “Khris” bang na ci ngaisut vuoi? Ama koi’ tapa ahiei?” a ci hi. Amate in a kungah, “David’ tapa ahi hi,” a ci uhi. 43Ama in a kung vuah, “Tua ahile bangci bangin David in Hlagau sawlna#22:43 Gk “hlagau sungah” tawh thugenin ama Topa ci-in,

44‘Topa in keima’ Topa tungah thu gen a:

“Na galte na keng nei-ah

ka koi masangsie-in

ka zietlamah na to in,” ci hi,’ ci thei ding ahei?#Late 110:1

45Tua bangin David in ama pen Topa ci ahile bangci bangin ama a tapa hi thei ding ahei?” a ci hi. 46Koima in dawng thei lo a, khum ni-a kipanin koima in ama bangma a dong ngam nawn sih uhi.

Currently Selected:

MATTHEW 22: ZBOTF01

Highlight

Copy