JEREMIAH 20
20
Pashhur in Jeremiah Bawlsie
1Tu-in Jeremiah in a gen tami thute, Topa’ biehinn uhpi pa ahi Immer’ tapa, siempu Pashhur in a za hi. 2Tua ciengin Pashhur in kamsang Jeremiah sat gawp a, Topa’ biehinn sunga Benjamin Tunkot tungnung ah kol a bul hi. 3A zing ciengin Pashhur in Jeremiah a kol a sutpieh ciengin ama kungah Topa in na min pen Pashhur ci-in na phuo loin, “Muncin tengah Zauna” ci-in na phuozaw hi,” a ci hi. 4Azieh pen Topa in tam bangin ci hi: Keima in nang le na guol teng zosie’ zauna ahi dingin nang kang bawl ding hi; tuale nang in na et lai tahin a galte uh’ namsau tawh amate a pua ding uhi. Tuale keima in Babylon kumpipa khut sungah Judah gam zosie ka pie ding hi; ama in sal dingin Babylon ah amate peipi-in namsau tawh a that sieng ding hi. 5Keima in tam khuopi’ hauna zosie, a sui a lam teng zosie, a na manpha zosie le Judah kumpite’ gou teng zosie amate a bulu a galte uh’ khut sungah ka pie ding a, amate in sutin manin Babylon ah a peipi ding uhi. 6Tuale nang, Pashhur le na inn sunga omte zosie Babylon khuo-ah salin na pei ding uhi; khum munah note na si ding vua, zuou kamsanna tawh thu na hil na guol teng zosie tawh khum munah ang kivuiton ding uhi.
Jeremiah in Ama a Bawlsiete Mawsah
7 Topa aw, nang in kei nei sol a,
tuaci’n solin ka om ta hi;
kei sangin nang na hatzaw a,
tuaci’n kei nei zo ta hi.
Sun tungtawnin nuizat nopna-in ei kinei hi;
mi zosie in ei zako uhi.
8Bangzieh ahei cile
ka thugen simin kiko-in,
“Tatsietna le kisietna!”
ci-in ka awng vapuoh ding hi,” a ci hi.
Bangzieh ahei cile
Topa’ kammal ka gen ziehin
sun tungtawnin simmawna le
zapina ka thuohlaw hi.
9Keima in, “A min ka gen sih ding a,
ama’ min ka lo nawn sih ding hi,” ci nanleng zong,
ka lungsim sungah
meikuong bangin a om a, ka gu sung ei zen hi;
ka ki-ip na lamin ka gim a,
lah ka ki-ip zo tuom sih hi.
10Bangzieh ahei cile
mite’ kidap hona tampi ka za a,
“Muncin teng zauhuoi hi!
Ama heh un! Ama heh va vui,” a ci uhi.
Ka lawm itte zosie in ka pua ding ei buh vua,
“Ama kizawl zo kha na va,
eite in ama zo na va vui,
tuaci’n eite in ama tungah
phu la zo na vai,” a kici uhi.
11Ahi vangin galhang pa bangin
kei tawh Topa ang om hi;
tua ziehin ei bawlsiete a kipai ding vua,
ei zo sih ding uhi.
Amate in a muolsuo zawh lo ding ziehun
nahpi tahin maizum ding uhi.
Kumtawnin a mindaina uh
kimangngil ngai lo ding hi.
12Vanglien Topa aw,
nangma in midihte na sittel a,
nangma in mihing’ lungtang le
a lungsim na mu hi;
nangma in amate tunga
na thuhkiana ei musah in,
azieh pen nangma tungah
ka vaite kang ap zo hi.
13 Topa tungah la sa un;
Topa phat un!
Azieh pen ama in
migilote’ khut sung panin
mi cimawte’ hinna a hunkhie hi.
14Ka suo ni samsietin om taheh!
Ka nu in keima ei suosah ni in thupha nga sih taheh!
15Ka pa kungah, “Tapa na nei ta hi,” ci-in thu va ko-in,
ama a lungdamsah pa khu samsietin om taheh.
16Tua mipa pen Topa in
a khuotuo vawt lo,
a lumlet khuopite bang taheh;
ama in zingmawngin
kaana awging za hinlen,
sunkim ciengin zong
patauna awging za taheh.
17Bangzieh ahei cile
ama in naubu sungah ei na that sih hi;
ei na that hi leh ka nu khu ka hankhuh hi pai ngel ding a,
a gil in kumtawnin ei paai den mai ding hiven.
18Gimna tawlna le dana teng sin ding le
zalat muolphona tawh hinkhuo mang ding bep a,
bang dinga naubu sung pana
na suoh kha khelkhel ka hei?#Job 3:1-19
Currently Selected:
JEREMIAH 20: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
