JEREMIAH 18
18
Beelkhengpa le Tungman
1Jeremiah kunga a tung Topa’ kammal tam bang ahi hi: 2“Hing pei in, beelkhengpa’ inn ah peisuh inlen tua munah ka thu kang theisah ding hi,” ei ci hi. 3Tuaci’n beelkheng pa’ inn ah ka peisuh a, tuale a beel khen laitah ka va tuohkha ta hi. 4Ama’ khut sungah tungman tawh a bawl a beel kisie a, tuale ama in hoi a sah bangin beel dang khatin a kheng phakia hi.
5Tua ciengin keima kungah Topa’ thu ang tung hi: 6Israel innkuon aw, tam beelkheng pa bawl bangin no zong hing bawl thei hi lo ka mah? Topa in ci hi. Israel innkuon aw, beelkheng pa’ khut sunga a om tungman bangin note zong keima’ khut sungah na om uhi. 7Keima in hun khat lai-in minam khat ahi sihle kumpi gam khat botzuonin, phelkhie-in ka suhsiet ding tawh kisai-in ka na pulah kha mai thei ding a, 8hizongle ama’ tungtang thu ka pholah ziehin a gitlona panin tua minam ang kihei leh, ka lungsim khelkia-in ama tunga tunsah dinga ka gelsa gimna ka tungsah nawn sih ding hi. 9Tuale keima in adang hun khat lai-in minam khat ahi sihle gam khat’ tungtangthu ah lam ding le suon dingin ka na pulah mai thei ding a, 10hizongle tua minam in ka thu ei ngai nuom loin, ka muna-ah sil hoi lo a bawl leh, ka lungsim khelkia-in ama tunga sil hoi bawl dinga ka gelsa pen khu ka bawl nawn sih ding hi. 11Tua ahi ziehin tu-in Judah mite le Jerusalem-a tengte kungah tam bangin gen in: Topa in tam bangin ci hi: En un, kei pen note tunga sietna tunsah ding gelna a nei beelkheng pa ka hi hi. Tu-in na unpi-un na gitlona panun kiheikia unlen, na omdan ule na gamtatnate uh bawlpha un.
A Lungkhau Israel’ Milim Biehna
12Ahi vangin amate in, “Khum khu a mawhna hi bo! Koma’ gelna bangin om lel va ung, koma khat ciet in ka gitlo lungsim khauna uh ma bangin gamta lel va ung,” a ci uhi.
13Tua ahi ziehin Topa in
tam bangin ci hi:
Minamte lahah dong un:
Koi in tam bang thu za kha ahei?
Ngahnu siengtho Israel in
a mulkinhuoi pen na khat bawl zo hi.
14Lebanon vuakhal in
Sirion#18:14 Cn: Heb “lolai-a” kentawng a nuasie ngai amah?
Muol tung#18:14 Cn: Heb “gamdang” pana ang luong
luitui vot kihkiahte a kang ngai amah?#18:14 Cn: Heb “tuate....a kibotmang amah?”
15Ahi vangin ka mite in
kei ei mangngil zo ta vua,
amate in kisolna tungah
meihal biehnate a hal uhi;
tanglai lampite ahi
amau’ lampite ah
a kipalpua#18:15 Gk Syr g: Heb “amate in amate a kipalpuasah uhi” vua,
a lamlienpi uh zui nawn loin
lampelte a zui uhi.
16Amate in a gam uh a cizat huoi le
mite’ ehneh ho zing dingin a bawl uhi.
Khum gam a kantan mi zosie
ciza-in a lu a pei uhi.
17Nisuona lam huipi bangin
galte mai-ah amate ka thethang ding hi.
A tuosiet ni ciengun amate ka elngat ding a,
ka maingat sih ding hi.
Jeremiah Kisawmsimna
18Tua ciengin amate in, “Hing pei un, Jeremiah sawmsim va vui, azieh pen thu ei hil ding siempu, i thu dawh ding mipil le Pasien’ kammal ei gen ding kamsang i kitasam sih ding uhi. Hing pei un, ama mawsiet vai-in#18:18 Heb “kam tawh ama a sat uhi” a thugen khat mama zong mang sih vai,” ei ci uhi.
19 Topa aw, ka thugen ei ngai inlen,
ka galte’ thugente zong ngai in!
20Sil hoi pen sil hoi lo tawh thuh ding ma amah?
Hizongle amate in
ka si nadingin dum a to uhi.
Amate kung panin na lungthahna
na heimang nading le
amate dinga thuhoi a gen dingin
na mai-a ka din khu ei phawh in.
21Tua ahi ziehin kiel tawh a tate uh
pulsisah inlen, namsau-in sisah sieng in.
A zite uh ta nei loin meigongsah in.
A pasalte uh pul natna tawh si uh hinlen,
a tangvalte uh gal sungah
namsau tawh si uheh.
22Amate tungah thakhatin mi susiete na sawl ciengin,
amau’ inn panin kaana awging kizasah in!
Azieh pen kei ei mat nadingun dum a to vua,
ka kenga ka aw nadingin thang a sie uhi.
23Hinanle Topa aw,
kei tha ei sawmnate uh na thei hi.
Amau’ khielnate maisah sinlen,
na muna panin amau’ mawna phietmang sin.
Na mai-ah amate puasah sieng in;
na lungthah laitah ma-in
amate thuohsah pai in.
Currently Selected:
JEREMIAH 18: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
