JEREMIAH 17
17
Judah’ Mawna le Dan Thuohna
1Sia laikung tawh Judah’ mawna kigiel hi; a lungtang peh tung ule maitam kite tungah suong manpha dawnhiem tawh zihin kigiel a, 2a tate un singna dawng gei cinteng le muolsangte tunga om a maitamte ule a khuom siengthote#17:2 Heb “Asherah nusien” a phawh veve vua, 3gam-awng lai-a muolsang teng tungah zong a phawh veve uhi. Na gam sung zosie vua na bawl uh mawna#17:3 Cn: Heb “mawna ziehin na munsangte uh gal vanlahin kipie ding hi” manh dingin na neisa ule na gou zosie uh galvan lahin ka pie ding hi. 4Noma’ bawlin kang piehsa na gouluo na tan ding vua, tuale keima in na thei ngai lo uh gam khatah na galte uh’ na semin kang koi ding hi, azieh pen keima’ lungthahna khu mei bangin kikuontaw-in#17:4 Khutgiel Theodotion Mss Nite ah: “nangma in na tawkuong a” a kuong zing ding hi.
5 Topa in tam bangin ci hi:
Mi maimaite muongin
cilesa hatna maimai suong a,
Topa kung pana
a lungsim kiheite pen samsiet thuoh ahi uhi.
6Amate senel gama a po
sawlbawh a bang ding vua,
panpina ang pei ciengin a mu kha sih ding uhi.
Koima’ ten lona ci gam ahi
senel gam gawta ah a teng ding uhi.
7 Topa sunga muonna a neite,
a muonna uh Topa ahi sahte thupha nga ahi hi.
8Amate pen tui gei-a kisuon, lui gei-a zunghla
singkung a bang ding uhi.
Amate pen khuo a lum ciengin zau loin,
a nate a hing zing ding hi;
guo a zuh lo kumin zong
amate in khawh sa loin ga a ga zing uhi.#Late 1:3
9Adang na zosiete lahah lungsim khu a kawi pen ahi hi;
kinahsiet mama hi - tua khu koi in thei zo ding ahei?
10Keima Topa in amau’ gamtatna le
amau’ sep thaman zui-a a pie dingin
lungsim ka sittel a,
lungtang zong ka sui hi.#Late 62:12; Kln 2:23
11Thuman lopi tawh hauna a sui mi zosie pen
ama’ tui hi lopi a keuhsah dinga
a op valaa tawh kibang hi;
a khan kimtan ciengin a neisa teng
taan ding a,
a tawpkhahna ah a mot lam uh
a kipholah ding uhi.
12A cila panin a kitawisang,
a minthang mang topha khu
i mun siengtho sung vua om
biehbuhno ahi hi!
13Aw Topa! Israel’ kinepna pa aw!
nangma#17:13 Heb “keima” kung panin a tai mite zosie a maizum ding uhi;
na kung pana a kihei poma
leinei gamah#17:13 Ahi sihle “leisiet ah” a min uh kikhum ding hi,
azieh pen amate in hinna ciatui ahi
Topa a taisan zo ta uhi.
Dihtansahna ding Jeremiah in Thungen
14 Topa aw, ei damsah in,
tua hile kei ka dam ding hi;
ei hundam in, tua hile kei hutdamin
ka om ta ding hi;
bangzieh ahei cile kang phat pa khu
nangma na hi hi.
15Amate in keima kungah,
“Topa’ thu hei-a om ahei?
Tua khu hing tung taheh!” ci-in
ei bangci gen uh ci ei thei in.
16Hinanle na nasepna ah tuucing#17:16 Heb ah a khietna kicien lo hi. hina panin ka taimang sih a,
sietna ni ang tun ding zong lah ka dei tuom sih hi.
Ka nephu panin bang pusuoh ci na thei hi;
tua khu na mai-ah a om hi.
17Ka dipkuot nadingin hing om sin;
gimna hun cienga ka kibuhna na hi hi;
18ei bawlsiete maizumsah inlen,
ahi vangin kei ei maizumsah sin;
amate lungkiesah inlen,
ahi vangin kei ei lungkiesah sin;
amate tungah gimna ni tungsah in;
a za ni kisietna tawh amate susie in!
Sabbath Ni Siengthosah
19 Topa in keima kungah tam bang ci hi: Pei-in, Judah kumpite’ sungtumna le a pusuona uh ahi Mite’ Tunkot le Jerusalem khuo-a tunkotte zosie ah va ding ta’nlen, 20tuale amate kungah tam bangin gen in: Tami tunkot sunga ang lut no Judah kumpite, Judah mi zosie, le Jerusalem-a a tengte zosie aw, Topa’ kammal za un. 21Topa in tam bang ci hi: Na hin nadingun Sabbath ni-in van na puoh lo nading ule Jerusalem tunkotte ah tuate na lutpi lo nadingun kidawm un.#Neh 13:15-22 22Sabbath ni-in na inn panun van khatpopo puo loin, na khatpopo zong sem sih unlen, keima in na pu na pate thu ka piehsa bangin Sabbath ni siengthosah un.#Pei 20:8-10; Thkna 5:12-14 23Hizongle amate in ngai nuom loin a bil ei daw sih uhi; amate in a ngawng uh a khausah vua, thuhilna ngai nuom loin zong a sang nuom sih uhi.
24Ahi vangin ka thu na ngai vua, Sabbath ni-in tam khuopi tunkotte ah bangma van puo loin, Sabbath ni na sienthosah vua, khum ni-in na na sep sih uleh, 25David’ mang topha tunga a to ahi kumpite,#17:25 Cn: Heb “kumpite le uliente” amate le a uliente, Judah mite le Jerusalem-a tengte in sakol leeng le sakol tungah tuongin tam khuopi tunkotte ah ang lut ding uhi; tuale tam khuopi sungah mi a teng zing ta ding hi. 26Judah khuopite le Jerusalem kimvel panin hi tale, Benjamin gam, Shephelah gam, muoltung gam, le Negeb gam panin hi tale Topa’ biehinn ah mite ang pei-in, meihal biehnate le biehpiehnate, an tawh biehnate le panamtuite, le lungdamko biehnate ang peipi ding uhi. 27Ahi vangin Sabbath ni sienthosah ding le Sabbath ni-in Jerusalem tunkotte ah van puo-in lutpi lo ding hi, ci thute ah ka thu na man sih uleh keima in a tunkotte ah mei ka tawkuong ding hi; tua mei in Jerusalem kumpi innte katumin kiphel zo nawn lo ding hi, Topa in ei ci hi.
Currently Selected:
JEREMIAH 17: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
