ၥ မိ 49
49
49
စယၫကူၭအဆၧချဲၩ့လၧခဲၫ့ထုၬလဖၪ.
1စယၫကူၭကိၭအဖိၪခွၫလဖၪတၭ, စံၭဝ့ၫဒၪ, အီၪ ကိၩ့အီၪကီၪ့ဆံၭ. တၭဆၧလၧအမိဘၪနၥံၪ လၧမုနံၩ လဖၪအလးခဲၫ့နီၪ, ယမိဒုၭနဲၪနၥံၪလီၫ.
2အီၪကိၩ့အီၪကီၪ့တၭ ခိၭနၪဆၧ, စယၫကူၭအဖိၪ ခွၫၥံၪဧ့, ခိၭနၪနၥံၪအဖါစအံၫစရ့လၭအလူဆံၭ. 3စရုဘံၫ့ဧ့, နမွဲယဖိၪဝဲၡါ, ယဂဲးယဘၭဒဲယဆၧဆီၪ့ထၪ့အခၪ့ထံၭ, ဆၧလၧအထၪ့ထီၫအထုၬ, ဒဲဆၧအစီၩ့အမၩ့အဒိၪထုၬ, 4လၬထၪ့လၩ့ခုၭဘဲၫထံၫအၥိၭ, နဂ့ၩနဘၪဒံၭအ့ၬ. မွဲနထၪ့လၧနဖါအလးမံၫအဂဲး, တၭနမၩဘၪၥၭလိၪစံၪစၪဆၧ, ထၪ့လၧယလးမံၫဒၩ လီၫ. 5စစံမအၧၫ့, ဒဲစလံဝဲၫမွဲထၧၫ့ဖုဝဲ, အဆၧအုၩ့လၩ့မွဲဆၧမၩအၧၩ့အစူၪဝဲၩ, 6လၧအၡၩလဒီၪ့အဆၧကိၪ့အဖၧၩ့, ယၥၭဧ့, နုၬလဂ့ၩ. လၧအဆၧအီၪကီၪ့အဖၧၩ့, ယလၩယဖၩ့ဧ့, အီၪကီၪ့ လဂ့ၩ. မွဲလၧအၥၭထၪ့အဖၧၩ့နီၪမၩၥံၫၦၡၩ, တၭလၧအလီၩ့အၥၭဒၪဝ့ၫနီၪ ဖ့ၬထ့ၬချီအခၪ့ထီၪ့နီၪ အဂဲး, 7အၥၭထၪ့နီၪမွဲအဘၪဆိၪအၧၩ့ လၧအဆီၪ့ဝ့ၫအဂဲး, တၭအၥၭထၪ့ဆီၪ့ လၧအဒူၩဝ့ၫအဂဲး, ယမိမၩလၩ့မုလၩ့ဖၭဝ့ၫ လၧစယၫကူၭအဖၧၩ့, တၭယမိမၩလၩ့ပၩဝ့ၫ လၧအံၫစရ့လၭအဖၧၩ့လီၫ. 8စယုဒၫဧ့, နဝ့ၫယီၩနထၧၫ့ဖုဝဲမိစံၭထၪ့အၪ့အူၭနၧၩ, နစူၪမိအီၪလၧနဒုၪနဒၩအခိၬလီၩ့, နဖါအဖိၪလဖၪမိကူၭလၩ့အၥၭ လၧနမ့ၬယၫလီၫ. 9စယုဒၫမွဲဆၬလၥၧၫ့အဆံၭလဒုၩ, လၧဆၧအဲၪ့ၥံၫဝ့ၫနီၪနစဲၪ့ထၪ့ခွံၬယူၭ, ယဖိၪခွၫဧ့, ကူၭလၩ့နၥၭ, ခိၬလၩ့ဝ့ၫဘဲၫဆၬလၥၧၫ့အၥိၭ, တၭဘဲၫဆၬလၥၧၫ့မိအၥိၭ, မွဲပလၫမိကိၭဂဲထုၪ့အဝ့ၫ လဂၩလဲၪ. 10စဎွၩအနိၪထိၭဘီၩ့ လစဲၪ့ထၪ့ဘၪ လၧယုဒၫအအီၪ, ၦပၧၩ့ဆၧအနိၪထိၭဘီၩ့, လစဲၪ့ထၪ့ဘၪလၧအခၪ့ဆူၭ, ထီးၡဲလိၫဂဲၫထီၩ့, တၭၦခမျၧးမိအီၪကီၪ့လၧအအီၪ, 11စၧၩ့ထၬကၥ့ၪယီၩ့အဖိၪ လၧစဘံၭမု, ဒဲကၥ့ၪယီၩ့ဆံၭလၧစဘံၭမုဂ့ၩထုၬ, အၪ့ဆူၫဝၭအဆဲၫ့လၧစဘံၭထံၫ, ဒဲအဖၬဘဲၩ့ လၧစဘံၭအမုအၥွံၪဖၧၩ့, 12အမ့ၬဝီၩဝ့ၫလၧစဘံၭထံၫ, တၭအမဲၪဘွၩဝ့ၫ လၧဆၧနူထံၫလီၫ. 13စဇ့ၭဘလၧၫ့မိအီၪ လၧမၫဆမံၭနဲၩ့, တၭဆၧမိကဲၪထၪ့ကဘၩ့ၥန့ၫ, တၭအခဲၫ့မိအီၪဆဲၫဎၩ့လၧစဲဒၧၫ့လီၫ. 14စအံစခၫမွဲကၥ့ၪယီၩ့ လၧအဂဲးဆီၪ့အဘၭဆီၪ့လဒုၩ, ကူၭလၩ့ဝ့ၫလၧၥိၪအဖီၩ့နံၫဖီၩ့ အဘိၩ့ဆၧၩ့, 15မွဲအဒၪဘၪဝ့ၫ လၧဆၧအီၪပွံၭအဂ့ၩ, ဒဲဂၪ့ခိၪမွဲအမုၬ, တၭကူၭလၩ့အခိၬထံၭခိၪ လၧအမိယိၭ ဆၧအဂဲး, တၭကဲၪဎီးဝ့ၫလၧအဖ့ၪအခီၫ့လီၫ. 16စဒၫ့မိစ့ၩရၫ့အၡၩခမျၧးအခွး, ဘဲၫအံၫစရ့လၭအၡၩလဒီၪ့အၥိၭ, 17စဒၫ့မွဲဂူလၧဖၧၩ့ၥၭအနဲၩ့ထံၭလဘီၩ့, ဂူပွ့ၭလၧဖၧၩ့ၥၭအနဲၩ့ထံၭလဘီၩ့, ဖျၭဝ့ၫလၧကၥ့ၪအခၪ့နိးခဲၫ့, တၭၦထူၬဝ့ၫလၩ့ထ့ၬလၧအချိၫ့လီၫ. 18ယယိလါနထိးထဲၩ့တၩ့ထဲၩ့ဆၧအဖၧၩ့ၥၭ, ယဟိဝၩဧ့, 19စဂၭ, ၦလဒီၪ့မိဆၪ့ထဲၩ့အဝ့ၫ, အ့ၪမွဲအဝ့ၫနီၪမိဆၪ့ထဲးအဝ့ၫၥံၪ အခၪ့နိးခဲၫ့လီၫ. 20လၧအၭၡၧၫအဖၧၩ့ အကိၪမိအွံၪ, တၭမိဖ့ၪစဎွၩ အဆၧအွံၪဆၧဆၧၫ့လီၫ. 21စနၭၥလဲၫမွဲခံၫဘၩ့အဂၭဖျ့ၭလဒုၩ, မွဲအချဲၩ့ဒိၪအနိၭလီၫ. 22စယိၥၭမွဲထဲၩ့ၥၪထၪ့အၪတၭ, အထဲၩ့လဖၪထၪ့လၧခိၪဒၧၩ့အလီၩ့, 23ဖျါအကဆါၥံၪမၩဆၫအဝ့ၫဒၪအၥၭ, အဝ့ၫၥံၪခၭဒဲမၩၡၪ့မၩနၭ အဝ့ၫဒၪလီၫ. 24လါနၫ့အဝ့ၫနီၪ အချံၪအီၪခၧၫ့ဒၪဆၧ, တၭအစူၪအစူၪဒူၪအီၪ လၧအဂဲးအဘၭ, လၧစယၫကူၭအဆၧဆီၪ့လဂၩအစူၪ, လၧၦယိၥိၪလဂၩ, အံၫစရ့လၭအလိး, 25လၧနဖါအယွၩ လၧအမိမၩဘိၭမၩဆၧၩ့နၧၩ, ဒဲလၧဆၧၥ့ၪဆၧလူၬ လၧအမိဆိၪဂ့ၩနၧၩ လၧမူၭခိၪ လၧထၭလခီၫ အဆၧဆိၪဂ့ၩလဖၪ. ဆၧအယိၬဖၧၩ့ လၧလၬလခီၫ အဆၧဆိၪဂ့ၩ, နူဒဲဒၧၩ့လး အဆၧဆိၪဂ့ၩလီၫ. 26နဖါအဆၧဆိၪဂ့ၩဒိၪနဲၪ့ ခိၪလီၩ့အဆိၩအကၠၪအဆၧ ဆိၪဂ့ၩလဖၪ, ဆၧစီၩ့ခိၪအဆိၩအကၠၪအဆၧဂ့ၩဆၧဘွၩ, တၭမိအီၪလၧစယိၥၭအခိၪ, ဒဲလၧၦလဂၩလၩ့ဖၭ လၧအထၧၫ့ဖုဝဲၥံၪအဒၩ့ခိၪလီၫ. 27စဘံၪ့ယမံၫ့, ထွံၪမံၩ့လဒုၩမိအဲၪ့ၡၫ့ခွံၬဆၧ, လၧမုဂီၩနီၪအၪ့ဆၧအၪ့ဂူၬန့, ဒဲလၧမုဂၪနီၪ မိအၪ့နၩ့ဖၭဆၧအၪ့ဂူၬန့လီၫ. 28အဝ့ၫၥံၪထီးအလူၬနီၪ မွဲအံၫစရ့လၭအဒီၪ့ လဆံၫနံၫ ဒီၪ့လီၫ. တၭအနီၪမွဲဆၧလၧအဖါချဲၩ့ဆၧ လၧအဝ့ၫၥံၪ တၭ,ဆိၪဂ့ၩဝ့ၫလဂၩ ဘဲၫအဆၧဆိၪဂ့ၩအၥိၭ, လဂၩ ဘဲၫအဆၧဆိၪဂ့ၩအၥိၭနီၪ မွဲအဆိၪဂ့ၩအဝ့ၫၥံၪလီၫ.
စယၫကူၭၥံၫဒဲဘၪဆၧဆၧဘၧၩ့လၩ့အဂဲး.
29တၭအဝ့ၫမၪလူၬအဝ့ၫၥံၪ, စံၭဝ့ၫ, ဆၧမိအီၪက့ၪကီၪ့ ယၧၩလၧယၡၩခမျၧးလီၫ. ခုၪ့လၩ့ဘၧၩ့ခွံၬယၧၩလၧ ယဖါလဖၪအၥိၭ, လၧဆၧဖၧၩ့အီၪဝ့ၫလၧၦဟ့ၥၭဖိၪ, 30စအံဖၧၫ့ အဂၪ့ခိၪအဝၩ့ဖၧၩ့,- ဆၧဖၧၩ့ လၧအအီၪ ဝ့ၫလၧဂၪ့ခိၪအဝၩ့, မၭကပံလၫအဖၧၩ့ လၧအအီၪလၧ မၫမရံၫအမ့ၬယၫ, လၧခးကၫနအၫ့အဖၧၩ့ လၧစအၫ ဘြဟၫ့ဎွ့ၩန့ဝ့ၫ, ဒဲၦဟ့ၥၭဖိၪစအံဖၧၫ့အဂၪ့ခိၪလဝၩ့ 31နီၪဆ့, လၧအဆၧၥွၪခိၪအဆၧဖီၪ့ထၬအဂးဆံၭ.- ၦ ခုၪ့လၩ့ဘၧၩ့ခွံၬစအၫဘြဟၫ့ထီးနီၪ, ဒဲအမၫနးစၫရၫ ဆ့လီၫ. ၦခုၪ့လၩ့ဘၧၩ့ခွံၬစအံစၭထီးနီၪ, ဒဲအမၫနးရ ဘ့ၭကၫဆ့လီၫ. တၭထီးနီၪယခုၪ့လၩ့ဘၧၩ့ခွံၬနးလံ 32အၫဆ့လီၫ.- ဆၧဎွ့ၩဂၪ့ခိၪလဝၩ့အီၪဝ့ၫ လၧဆၧဖၧၩ့ လၧအဖၧၩ့နီၪ လၧစဟ့ၥၭအဖိၪခွၫလဖၪအအီၪလီၫ.
33စယၫကူၭမၪလူၬ အဖိၪခွၫဂီၩ့တၭ, ထုၭထၪ့အခၪ့ လၧအလးမံၫဖၧၩ့နီၪ, ၥံၫဝ့ၫတၭ, ဆၧအီၪက့ၪကီၪ့ဝ့ၫ လၧအဖါလဖၪအၥိၭလီၫ.
Currently Selected:
ၥ မိ 49: pwokyn2
Highlight
Share
Copy
Want to have your highlights saved across all your devices? Sign up or sign in
Pwo Kayin Bible © Bible Society of Myanmar, 1883.
