ၥ မိ 34
34
34
နးဒံနၫဘၪဆၧဖီၪ့ဆီၪ့န့ဝ့ၫ.
1တၭနးလံအၫအဖိၪမုၪ နးဒံနၫလၧအအီၪဖျဲၪန့စယၫ ကူၭအဂးလဂၩနီၪ, လ့ၩအီၪၡီၩ့ၦခးဖိၪ အဖိၪမုၪလဖၪ 2လီၫ.- တၭၦဟံဝဲၭဖိၪ ခးအၦဒိၪစဟၫမီၫ အဖိၪခွၫစၡံ ခံၫ့ဒၪဘၪဝ့ၫနီၪ, မၩန့ဝ့ၫတၭ, မံၫဎုၬဝ့ၫတၭ, မၩဂၭဂီၩ့ 3အလၩအဖၩ့လီၫ.- အၥၭဘုၭထၬ လၧစယၫကူၭအဖိၪ မုၪနးဒံနၫတၭ, အဲၪဖိၪမုၪနီၪတၭ, ချဲၩ့မုၬဆၧလၧဖိၪမုၪ 4နီၪလၧအဘၪအၥၭလီၫ.- တၭစၡံခံၫ့ချဲၩ့ဆၧလၧအ ဖါစဟၫမီၫတၭ, စံၭဝ့ၫဒၪ, မၩန့ၦမုၪယီၩ လၧယမၫအ 5ဂးဘီၪ.- တၭစယၫကူၭနါဂၧၫ့ဝ့ၫ လၧအမၩဘၪၥၭလိၪ အဖိၪမုၪနးဒံနၫလီၫ. အဖိၪခွၫလဖၪ အီၪဝ့ၫဒဲအဆၧ ဖိၪဆၧဎါအဒိၩ့ လၧမံၩ့လၬကျၩတၭ, စယၫကူၭအီၪ လၩ့မါပံၭထီးအဝ့ၫၥံၪ ဂဲၫထဲၩ့ဝ့ၫလီၫ.
6တၭစၡံခံၫ့အဖါစဟၫမီၫ လ့ၩထၪ့ဝ့ၫလၧစယၫကူၭ 7အအီၪ, ဘဲၫၥိၭအမိချဲၩ့ဆၧ လၧအဝ့ၫဒၪလီၫ.- ထီး စယၫကူၭအဖိၪခွၫလဖၪ နါဂၧၫ့ဝ့ၫနီၪ, ဂဲၫထဲၩ့လၧမံၩ့ လၬကျၩတၭ, အၥၭဆၫဒဲအၥၭထၪ့နၭမၬလီၫ. အဂဲး ဘဲၫယီၩမွဲအမံၫဎုၬ စယၫကူၭအဖိၪမုၪတၭ, မၩၦဂၭ ဂီၩ့ဖိၪအဆၧမၩ လၧအံၫစရ့လၭအကျၩလီၫ. တၭမၩ လဂ့ၩဘၪဘဲၫနီၪၥိၭလီၫ.
8တၭစဟၫမီၫချဲၩ့ဆၧလၧအဝ့ၫၥံၪ, စံၭဝ့ၫဒၪ,ယဖိၪ ခွၫစၡံခံၫ့အၥၭ ဘုၭထၬလၧနၥံၪအဖိၪမုၪလီၫ. တၭယ 9အၪ့ကံၩ့နၥံၪဖ့ၪလၫ့အဝ့ၫ လၧအမၫအဂးဆံၭ.- တၭ န့မၫန့ဝၩလၧပကျၩဆံၭ. ဖ့ၪလၫ့ပၧၩလၧနၥံၪအဖိၪမုၪ 10လဖၪတၭ, မၩန့ပဖိၪမုၪလၧနၥံၪအဂးဆံၭ.- နၥံၪမိအီၪ လၧပၥိၭတၭ, ခးယီၩမိအီၪ လၧနၥံၪအမ့ၬယၫလီၫ. အီၪဂုးဝ့ၫအၪ့ခၩဆၧ လၧအဖၧၩ့ယီၩ, ဒဲမၩန့အလးလ 11ဖၪလၧနၥံၪမိအီၪဂုးခၧၫ့ဝ့ၫဆ့လီၫ.- တၭစၡံခံၫ့စံၭၦမုၪ အဖါဒဲအထၧၫ့ဖုဝဲလဖၪ, မွဲအဘၪခိးဘၪတၩ လၧနၥံၪ အမ့ၬၥၪဖၧၩ့ဆံၭ, တၭဆၧလၧနၥံၪစံၭ ယမိဖ့ၪလၫ့ 12လီၫ.- ဆၧအဎွ့ၩဒဲဆၧဖ့ၪလၫ့နီၪ, နၥံၪအ့ၪအၪ့ကံၩ့လၧ ယၧၩအၪလါနၫ့တၭ, ယမိဖ့ၪလၫ့ထီးဒၪနၥံၪ စံၭဆၧ လီၫ. တၭဖ့ၪလၫ့ဖိၪမုၪနီၪ လၧယမၫအဂးဆံၭ.
13စယၫကူၭအဖိၪခွၫလဖၪ စံၭဆၧၫ့စၡံခံၫ့ဒဲအဖါစဟၫ မီၫလၧဆၧအၪ့လီၫအဖၧၩ့တၭ, အဝ့ၫဒၪမၩစံၪစၪဘၪ ၥၭလိၪအဝ့ၫၥံၪအထၧၫ့ဖုဝဲမုၪ နးဒံနၫအကၠီၩ့နီၪ, အဝ့ၫ 14ၥံၪချဲၩ့ဆၧတၭ,- စံၭၦလဖၪနီၪ, ဖ့ၪလၫ့ပထၧၫ့ဖုဝဲမုၪ လၧၦလၧအလဒိၭဘၪ ဆၧကူၭတရံၭနီၪ, ပမၩၥ့ၪအ့ၬ, အဂဲးဘဲၫယီၩ ဆၧနီၪမွဲဆၧဒုၪဒွ့ၪပၧၩ အလးလီၫ. 15မွဲလါနၫ့တၭ, ပမိအုၩ့လၩ့နၥံၪဘဲၫယီၩး နၥံၪအ့ၪကဲၪ ထၪ့ဘဲၫပဝ့ၫအၥိၭ, ကယဲၦခွၫ ဒိၭဆၧကူၭတရံၭကိၭ 16အဂၩဒ့ၭနီၪ,- ပမိဖ့ၪလၫ့ပဖိၪမုၪ လၧနၥံၪအဂးတၭ, ပမိမၩန့နၥံၪ အဖိၪမုၪလၧပဂးတၭ, ပမိအီၪလၧနၥံၪ 17အၥိၭ,ဒဲပမိကဲၪထၪ့ ၦလဆၨၩဎးလီၫ.- အ့ၪမွဲနၥံၪအ့ၪ လခိၭနၪဘၪပလူ လၧနၥံၪမိဒိၭဘၪဆၧကူၭတရံၭတၭ, ပမိမၩန့ခွံၬ ပထၧၫ့ဖုဝဲမုၪတၭ, ပမိလ့ၩဆၧလီၫ.
18တၭအဝ့ၫၥံၪအဆၧချဲၩ့နီၪ ဂ့ၩဝ့ၫလၧစဟၫမီၫ,ဒဲစ 19ဟၫမီၫအဖိၪခွၫ စၡံခံၫ့အမ့ၬယၫလီၫ.- ဖိၪၥၪခွၫနီၪဘဲၫ ၥိၭအမိမၩဆၧလမံၩ့နီၪတၭ, လၥုၭနံၩၥုၭၥၫ့ဘၪတၭ, ဘၪအၥၭလၧစယၫကူၭ အဖိၪမုၪအဂဲးလီၫ. တၭအဝ့ၫ ဒၪနီၪအီၪလၧ အလၩအဖၩ့အၪနဲၪ့ ကယဲအဖါအဂံၪ့ဖိၪ 20ထီးအလူၬဆ့လီၫ.- စဟၫမီၫဒဲအဖိၪခွၫစၡံခံၫ့လ့ၩဝ့ၫ လၧအဒိၩ့တရၫ့တၭ, ချဲၩ့ဆၧလၧၦဒိၩ့ဖိၪလဖၪတၭ, 21စံၭဝ့ၫဒၪ,- ၦလဖၪနီၪအီၪလၧပကျၩမုၬတၭ, မွဲအအီၪ လၧခးဖၧၩ့, ဒဲအၪ့ခၩဆၧလၧအဖၧၩ့ဆံၭး ယိခွါ,ခးယီၩ လဲဝ့ၫလၧအမ့ၬယၫလီၫ. မွဲပန့မၫလၧအဝ့ၫၥံၪအဖိၪမုၪ 22တၭ, ဖ့ၪလၫ့အဝ့ၫၥံၪလၧပဖိၪမုၪဆံၭ.- မွဲလါနၫ့တၭ, ၦလဖၪနီၪ မိအုၩ့လၩ့လၧအမိအီၪလၧပၥိၭ ကဲၪထၪ့ၦ လဆၨၩဎး, မွဲန့ၫလၧဆၧလမံၩ့ယီၩအကၠီၩ့, ကယဲၦခွၫ လၧပကျၩဒိၭဆၧကူၭတရံၭ ဘဲၫအဝ့ၫၥံၪဒိၭဆၧကူၭ 23တရံၭအၥိၭနီၪလီၫ.- တၭအဆၧဖိၪဆၧလံၩ ဒဲအစူၪလး အခၪ့ခိၪ,ဒဲအဆၧဖိၪဆၧဎါအဒိၩ့ ထီးအလူၬနီၪမိကဲၪ ထၪ့ပဆၧ,မွဲအ့ၬဧၪ. န့ၫပအုၩ့လၩ့ လၧအဝ့ၫၥံၪနီၪ 24တၭ,အဝ့ၫၥံၪမိအီၪလၧပၥိၭလီၫ.- ကယဲၦလၧအစဲၪ့ ထၪ့လၧအဒိၩ့အတရၫ့နီၪ, ခိၭနၪစဟၫမီၫ, ဒဲအဖိၪခွၫ စၡံခံၫ့အလူတၭ, ကယဲၦခွၫဒိၭ ဆၧကူၭတရံၭကိၭဂၩ ဒ့ၭ,ၦလၧအစဲၪ့ထၪ့ လၧဒိၩ့အတရၫ့ ထီးအလူၬလီၫ.
25တၭထီးၦဆၫထၪ့ လၧမုၥၧၫ့နံၩလနံၩနီၪ ဆၧမၩအ ၥၭလၧစယၫကူၭ အဖိၪခွၫထၧၫ့ဖုဝဲ လၧနးဒံနၫ စစံမ အၧၫ့ဒဲစလံဝဲၫနံၫဂၩနီၪ, မၩန့နၭလဂၩလဘံၪ့ လဂၩ လဘံၪ့တၭ, လ့ၩနုၬလၧဒိၩ့ဖၧၩ့အီၪ လၧအၥၭဒူၩတၭ, 26မၩၥံၫၦခွၫထီးအလူၬလီၫ.- တၭမၩၥံၫစဟၫမီၫဒဲအဖိၪ ခွၫစၡံခံၫ့လၧနၭအနါတၭ, မၩန့ခွံၬနးဒံနၫ လၧစၡံခံၫ့ 27အဂံၪ့ဖၧၩ့တၭ, စဲၪ့ထၪ့ခွံၬဝ့ၫလီၫ.- စယၫကူၭအဖိၪ ခွၫလဖၪဂဲၫဘၪလၧၦဘၪ ဆၧမၩၥံၫဝ့ၫတၭ, မၩန့အ ဆၧ,လၧၦမၩဘၪၥၭလိၪ အထၧၫ့ဖုဝဲမုၪအကၠီၩ့လီၫ. 28တၭမၩန့အဝ့ၫၥံၪအၥိၪ ဒဲဘ့ၪ,ဒဲချီ, ဒဲအကၥ့ၪယီၩ့,ဒဲ 29ဆၧအီၪလၧဒိၩ့ဖၧၩ့, ဒဲဆၧအီၪလၧဆၧပျၩ့ဖၧၩ့.- ဒဲအ ဆၧဖိၪဆၧလံၩထီးအလူၬ, ဒဲကယဲအဖိၪဒံၩဖိၪၥၪတၭ, ဖီၪ့န့အမၫၥံၪ, ဒဲအၪ့ဂူၬန့အဆၧအီၪ လၧဂံၪ့ဖၧၩ့ထီးအ လူၬလီၫ.
30တၭစယၫကူၭစံၭစစံမအၧၫ့ ဒဲစလံဝဲၫနီၪ,မွဲနၥံၪမၩ ခိမၩဝီၩယၧၩ ထီးယမိနၧၫ့အုၪ လၧၦခးဖိၪ အကျၩ, လၧၦကၫနအၫ့ဖိၪ, ဒဲၦပံရစဲၭဖိၪအကျၩလီၫ. တၭဆၧ လၧယၧၩယီၩ, ယမွဲၡၩဂၩတၭ, အဝ့ၫၥံၪမိအီၪကိၩ့အီၪ ကီၪ့ဝ့ၫထၫ့ဒုၪထၫ့ဒၩယၧၩ ဒဲကျီၪ့ၥံၫယၧၩတၭ, ယမိ ထီၩ့လၧဆၧဂၭဂီၩ့ဂၭစၪ, ယၧၩဒဲယဂံၪ့ဖိၪလီၫ.
31တၭအဝ့ၫၥံၪစံၭဆၧၫ့, မွဲအမိမၩဘၪပထၧၫ့ဖုဝဲမုၪ ဘဲၫၦမဲၩဎွဲၩမုၪ အၥိၭနီၪဆ့ဧၪ.
Currently Selected:
ၥ မိ 34: pwokyn2
Highlight
Share
Copy
Want to have your highlights saved across all your devices? Sign up or sign in
Pwo Kayin Bible © Bible Society of Myanmar, 1883.
