Luk̆a 21

Şira Oxorcaşi Baxşişi

1Yesok eiʒ̆k̆edu, zengini k̆oçepek Oxvames para na k̆orobuman sanduğis para dolot̆k̆oçamt̆esşi kaz̆iru. 2-3Şira do fuk̆ara ar oxorcakti jur abazi na dolot̆k̆oçams z̆iruşi, “Mtinala muşi giʒ̆umert”-ya, “Ham fuk̆ara şirak irişen dido para meçu. 4Hemuşeni ki, zenginepek sanduğis, na gyoskidespe dolot̆k̆oçes, mara oxorcak oskedinuşeni mutxa na uğun mteli komeçu.”

Oçodinuri Simadepe

5Mitxanepek, Oxvames nak̆o mskva kvalepe do nokadepete na omskvanesşi ip̆aramitamt̆es.

6Yesok hentepes, “Heşo ndğalepe ivasen, hak kvas jin kva var doskidasen, mteli geiktasen”-ya uʒ̆u.

7Hentepekti Yesos, “Mamgurapale çkuni, hantepe mundes ivasen? Hantepe var ivaşakis, na oxoboʒ̆onaten simadepe mupe rt̆asen?”-ya do k̆itxes.

8Yesok, “İgurit! Mot moğordurt!”-ya, “Dido k̆oçepek çkimi coxote moxtanen do ‘Ma Xrist̆e bore. Ora komoxtu’-ya dotkvanşk̆ule hentepes mot naonert. 9Lima do tiezdalaşi ambaepe ognatşi mot gaşkurinet̆an. İpti hantepe ivasen, mara ast̆a-xolo var içodasen.”

10Yesok haşo naonu: “Xark̆i xark̆i k̆ala, mapoba mapoba k̆ala ok̆ak̆idasen. 11Zori zelzelepe, sva do sva k̆it̆luği do meok̆limoni zabunobape gamaxtasen. Oşkurinoni dulyape do ʒas gok̆vironi simadepe ivasen.

12Ham dulyapeşen ʒ̆oxle, k̆ç̆opanoren do gonʒ̆orinapanoren. Sinagogepes mekçanoren do cixapes mologoxunanoren, çkimi gurine mapape do valepes goʒ̆ogodginanoren. 13Haşote çkimi noz̆iremi ivaten. 14E do ‘Çku haʒ̆i muç̆o gobiçvat?’-ya do ast̆a-xolo mot nazmonert. 15Hemuşeni ki, ma tkva nena do çkinoba mekçaten. Duşmanepe tkvanis var naxondinanoren do mutu var atkvanoren. 16Nana, baba, cumalepe, mzaxalepe do k̆atape tkvanik ok̆ogit̆alanoren do bazepe goğurinanoren. 17Çkimi coxoş gurine iri-xolo tkva p̆at̆i tolite goʒ̆k̆edanoren. 18Mara, tis na ginçanan ar mt̆va tomatina var gondunasen. 19Mexondinute şuri mogaten.”

Yeruşalimi Muç̆o Geiktasen

20“Yeruşalimis askerepek na gabğes z̆iratşk̆ule giçkit̆an ki, ham noğa na ok̆ixvasen ora mendra va ren. 21Hem oras, Yudeas na skidunanpe germapeşk̆ele imt̆an, noğas na renanpe kogamaxtan; oput̆epes na renanpe noğaşa mot amulurt̆an. 22Hemuşeni ki, hem ndğalepe, na ç̆arunpeşi mteli na ivasen cezaşi ndğalepe renan. 23E çxome hem ndğalepes uxvene na renan do beres na gyubaman oxorcalepes! Hemuşeni ki, hem dobadonas meç̆ireli ndğalepe do ham xalk̆is ğezebi muxtasen. 24Xamite ʒxot̆anoren do mteli xalk̆epeşa ç̆k̆orobaşeni ionanoren, hem milletepeşi ora ipşaşakis Yeruşalimi hentepeşi k̆uçxete izasen.

25Mjoras, tutas do muruʒxepes simadepe ivasen. Kianas zuğaşi do dalgapeşi oğuminute mteli xalk̆epe gak̆virdanoren do doşkurdanoren. 26Kianas na ağodasen mutxanepeş gurine ʒaşi xunelepe z̆anz̆alanoren, k̆oçepe şkurinate ok̆onağuranoren. 27Hem oras K̆oçişskiri mp̆ulaş doloxendo menceli do didobate na mulun z̆iranoren. 28Ham dulyape ivert̆aşk̆ule edgitit do jindole eiʒ̆k̆edit. Hemuşeni ki, moşletinuşi ora mogixtanoren.”

Luğiş Memgapura

29Yesok hentepes ham memgapura dup̆aramitu: “Luğişi ncas do çkva mteli ncalepes mendoʒ̆k̆edit. 30Hantepe pavri na moğaman z̆iratşk̆ule mapxala na mulun koxoʒ̆onamt. 31Hemuşi ndğeni, ham dulyape na iven z̆iratşk̆ule giçkit̆an ki Ğormotişi Mapoba xolos ren. 32Mtinala muşi giʒ̆umert, ham dulyape var ivaşakis, ham nesli var golaxtasen. 33Ʒa do dixa gondunasen, mara çkimi nenape çkarte var gondunasen.”

Çvit!

34“Ti tkvani çvit. Sefate, sarxoşobate do ham skidalaşi derdepete guri mot gamonk̆anert̆an. Hem ndğak ragisteri umeşvenu mot mek̆ç̆opumt̆an. 35Hem ndğa mteli dixas na skidun iri-xolos muxtasen. 36E do irote toli gonʒ̆k̆imeri giğurt̆an do tis na mogixtanen mteli hantepeşen moşletinu do K̆oçişskiriş ʒ̆oxle goʒ̆adginuşeni ixvamit.”

37Yeso ndğaleri Oxvames doguramt̆u, serepes noğaşen gamulurt̆u do Zeytinişi Golas dodgiturt̆u. 38Mteli xalk̆i hemus osiminuşeni, ç̆umanişe ordo-xolo Oxvameşa mulurt̆es.

Currently Selected:

Luk̆a 21: LZZ

Highlight

Copy