Luk̆a 20

Yesoşi Xeʒala

1Ar ndğas Yesok Oxvames xalk̆is doguramt̆u do K̆ai Ambai ognapamt̆uşi, P̆ap̆aşumçanepe do Maç̆aralepe tişinerepe k̆ala komoxtes. 2Hemus, “Miʒ̆vit, si hantepe nam xeʒalate ikom? Si ham xeʒala mik mekçu?”-ya do k̆itxes.

3-4Yesok hentepes haşo uʒ̆u: “Mati tkva dok̆k̆itxat. Miʒ̆vit, Yanis vaft̆izişi xeʒala Ğormotişen uğurt̆ui varna k̆oçepeşen?”

5Ti mutepe k̆ala haşo ok̆ip̆aramites: “ ‘Ğormotişen’ doptkvatna, ‘Hem oras hemus mot var ucerit?’-ya tkvasen, 6Var, ‘K̆oçişen’ doptkvatna, mteli xalk̆ik kvate momidgitanoren; hemuşeni ki, hentepes Yanişi ambayocoba acerenan.”

7E do, “Soşen uğun var miçkinan”-ya uʒ̆ves.

8Yesokti hentepes, “Mati hantepe nam xeʒalate bikom var giʒ̆umert”-ya uʒ̆u.

Mabinexepeşi Memgapura

9Yesok xalk̆is ham memgapura dup̆aramitu: “Ar k̆oçik binexepe kodorgu. Ham binexona mabinexepes kiras komeçu do mendra ar gzas igzalu. 10Urz̆enoba moxtuşi ar ç̆k̆ori muşi hemus na anç̆en eç̆opinuşeni mabinexepeşa mendocğonu. Mara mabinexepek ç̆k̆ori muşi dobaxes do mutu umeçamu goktines. 11K̆oçik arçkva ç̆k̆ori mendocğonu. Mabinexepek heati dobaxes do mutu umeçamu goktines. 12K̆oçik masumani ç̆k̆oriti mendocğonu. Mabinexepek heati doragades do get̆k̆oçes.

13Binexonaşi mancek, ‘Ma mu p̆a?-ya, opodrage bere çkimi mendoboşkva beki hea doşinaman.’

14Mara mabinexepek hea koz̆iresşi artikartis haşo uʒ̆ves: ‘Binexona ham k̆oçis duskidasen; haya doboğurinat do mirasi çku kodomoskidan.’ 15Hea binexonaşen get̆k̆oçes do doʒ̆ames. P̆a binexonaşi mancek haʒ̆i mu vasen? 16Moxtasen do mabinexepe oğurinasen, binexonati çkva mitxapes meçasen.”

Xalk̆ik ham memgapura ognuşi “Heşo var iven!”-ya tkves.

17Yesok, hentepes tolis doluʒ̆k̆edu do: “Heşo renna p̆a haşo mot nç̆arun:

‘Mk̆odulepek na elat̆k̆oçes kvak

Haʒ̆i k̆oda okaçams.’

18Hem kvas na gyat̆en iri-xolo t̆roxasen, kvati mitxas gyat̆uk̆on hea mezasen do mkveristeri obğasen.”

19Maç̆aralepek do P̆ap̆aşumçanepek koxoʒ̆ones ki Yesok ham memgapura mutepeşeni imeselu. Hem oras Yeso oç̆opinu guris daves, mara xalk̆işen aşkurines.

K̆aysarişi na Ren K̆aysaris

20Maç̆aralepek do P̆ap̆aşumçanepek Yesos uxosart̆es. Hentepek Yesoşa muç̆o ʒ̆ori k̆oçepe rt̆essteri muxbirepe mendoşkves. Yeso muşi nenate meç̆opumu unt̆es. Uk̆açxe hea valişi xeʒala do xukmis meçanert̆u. 21Muxbirepek hemus: “Mamgurapale çkuni, si isa na zop̆on do na domoguramt komiçkinan, si miti var gamak̆atum. Ğormotişi gza isa domoguramt. 22K̆aysaris vergi na mepçamt, ʒ̆ori reni varna var?”-ya do k̆itxes.

23-24Yesok hentepes ragi koxuʒ̆onu do, “Ma ar dinari moʒ̆irit, hem paras mişi resmi gexen do mişi ç̆ara ç̆arun?”-ya.

Hentepekti, “K̆aysarişi”-ya uʒ̆ves.

25Yesok, “Moro, K̆aysarişi na ren K̆aysaris, Ğormotişi na ren Ğormotis meçit!”-ya uʒ̆u.

26Yeso, xalk̆iş ʒ̆oxle nenate var naç̆opines, hemuşi nenate goişaşes do dostibes.

Ğuraşen Edgitinuşeni

27-28Ğuraşen edgitinus na var iceran Sadukepeşen mitxanepe Yesoşa komoxtes do haşo k̆itxes: “Mamgurapale, Mosek haşo miç̆ares: ‘Ar k̆oçis çileri cuma ubereli duğurasna, na ğuru cuma muşişi çili k̆ala diçilas do cuma muşişi soi nuonas.’ 29Şkvit cuma kort̆es, maartani diçilu, mara ubereli doğuru. 30-31Majuraniti, masumaniti ham oxorca k̆ala diçiles; haşote cumalepeşi şkviti-xolo ubereli doğures. 32Soğunis oxorcati doğuru. 33Haşo renna, oxorca, ğuraşen edgitinuşi ndğas namuşi çili ivasen? Hemuşeni ki, şkvit cumati hemu k̆ala uçilapurt̆es.”

34Yesok hentepes haşo uʒ̆u: “Ham skidalaşi k̆oçepe içilenan, ikomocenan; 35mara hem kianas na edgitanen goşaonerepe var içilenan, var ikomocenan. 36Arçkva varti ğuranoren. Hemuşeni ki, melaikepes konangapenan. Ğuraşen na edgitesşeni hentepe Ğormotişi berepe renan. 37Mosek “tamlişi p̆aramitis” ğurelepek na edgitanen memognapes. Manceşeni ‘Avraamişi Ğormoti, İsaak̆işi Ğormoti do Yak̆ovişi Ğormoti’-ya ucoxams. 38Hea, ğurelepeşi var, na skidunanpeşi Ğormoti ren, p̆a hemuşeni mteli-xolo skidun.”

39Maç̆aralepeşen mitxanepek: “Mamgurapale, si isa tkvi”-ya uʒ̆ves.

40Guris na var gyuz̆it̆esşeni Yesos mutu var ak̆itxes.

Xrist̆e Mişi Skiri Ren?

41Yesok hentepes haşo uʒ̆u: “Xrist̆e Davidiskiri ren-ya do muç̆o zop̆onan?

42-43Davidik Psalmonişi kitabis haşo zop̆ons:

‘Mancek Mance çkimis uʒ̆u ki;

Ma duşmanepe skani goʒ̆ogisvaraşakis, marz̆gvani k̆ele elemixedi.’

44Davidik hemus ‘Mance’ ucoxamsna, muç̆o hemuşi skiri ivast̆u?”

45Mteli xalk̆ik uci meçamt̆uşi Yesok mamguralepe muşis haşo uʒ̆u: 46“Maç̆aralepeşen mendra dodgitit. Hentepes, libade dolokuneri goxtimu k̆ai uʒ̆onunan, meydanepes selami na meçanenti, sinagogepes ʒ̆oxleni svas do ç̆andapes k̆ai svas golaxunuti k̆ai uʒ̆onunan. 47Şira oxorcalepeşi oxorepe geişkuman do ti mutepeşi omʒkuşeni gunz̆e gunz̆e ixvamaman. Ham k̆oçepes Ğormotik irişen monk̆a ceza meçasen.”

Currently Selected:

Luk̆a 20: LZZ

Highlight

Copy