လံာ်စီၤပီလူးကွဲးန့ၢ်ပှၤကရံၣ်သူးဖိအခီၣ်ထံးတဘ့ၣ်. ၁၁
၁၁
1ကွၢ်လိယၤ, ဒ်ယကွၢ်လိယဲစ့ၢ်ကီးခရံာ်အသိးန့ၣ်တ က့ၢ်. 2ပုၢ်သ့ၣ်ဝဲၢ်သ့ၣ်ဧၢ,ယစံးထီၣ်ပတြၢၤသုလၢသု သ့ၣ်ညါနီၣ်ထီၣ်က့ၤယၤလၢတၢ်ခဲလၢာ်, ဒီးတိၢ်န့ၢ်တၢ် မၤလိာ်တဖၣ်,ဒ်ယဟ့ၣ်လီၤသုအသိးအဃိန့ၣ်လီၤ.
3ဘၣ်ဆၣ်ဒီးယသးအိၣ်လၢသုကသ့ၣ်ညါလၢ ကယဲၢ် ပိာ်ခွါတဂၤလၢ်လၢ်အခိၣ်မ့ၢ်ခရံာ်, ဒီးပိာ်မုၣ်အခိၣ်မ့ၢ် ပိာ်ခွါ, ဒီးခရံာ်အခိၣ်မ့ၢ်ယွၤလီၤ. 4ကယဲၢ်ပိာ်ခွါလၢအ ဘါထုကဖၣ်တၢ်မ့ၢ်ဂ့ၤ, ကတိၤတၢ်လၢဝံအကျိာ်မ့ၢ် ဂ့ၤ, မ့ၢ်ကျၢၢ်ဘၢအခိၣ်ဒီး,မ့ၢ်အမၤဟးဂီၤအခိၣ်အလၤ အကပီၤလီၤ. 5မ့မ့ၢ်ကယဲၢ်ပိာ်မုၣ်လၢအဘါထုကဖၣ် တၢ်မ့ၢ်ဂ့ၤ, ကတိၤတၢ်လၢဝံကျိာ်မ့ၢ်ဂ့ၤ,မ့ၢ်တကျၢၢ်ဘၢ ဘၣ်အခိၣ်ဒီး, မ့ၢ်အမၤဟးဂီၤ အခိၣ်အလၤအကပီၤ လီၤ.အဂ့ၢ်ဒ်အံၤ,မ့ၢ်ဒ်သိးသိးဒီးတၢ်လူၤအခိၣ်လီၤ. 6အ ဂ့ၢ်ဒ်အံၤ, ပိာ်မုၣ်မ့ၢ်တကျၢၢ်ဘၢဘၣ်အသးဒီး,မ်အလူၤ အခိၣ်တက့ၢ်. ဘၣ်ဆၣ်ဒီးတံာ်အခိၣ်မ့ၢ်ဂ့ၤ,လူၤအခိၣ် မ့ၢ်ဂ့ၤ, မ့မ့ၢ်တၢ်မဲာ်ဆှးလၢပိာ်မုၣ်ဒီး,မ်အကျၢၢ်ဘၢအ သးတက့ၢ်. 7အဂ့ၢ်ဒ်အံၤ,ပိာ်ခွါမ့ၢ်ယွၤအက့ၢ်အဂီၤဒီး အလၤကပီၤသတးဒီး, တဂ့ၤကျၢၢ်ဘၢဘၣ်အခိၣ်ဘၣ်. မ့မ့ၢ်ပိာ်မုၣ်မ့ၢ်ပိာ်ခွါအလၤအကပီၤလီၤ. 8အဂ့ၢ်ဒ်အံၤ, တမ့ၢ်ဘၣ်ပိာ်ခွါအိၣ်ထီၣ်လၢပိာ်မုၣ်ဘၣ်. မ့ၢ်ပိာ်မုၣ် အိၣ်ထီၣ်လၢပိာ်ခွါလီၤ. 9အဂ့ၢ်ဒ်အံၤ,တမ့ၢ်စ့ၢ်ကီးဘၣ် ပိာ်ခွါဘၣ်တ့အသးလၢပိာ်မုၣ်အဂီၢ်ဘၣ်. မ့ၢ်ပိာ်မုၣ် ဘၣ်တ့အသးလၢပိာ်ခွါအဂီၢ်လီၤ. 10မၤသးဒ်န့ၣ်ဒီးပိာ် မုၣ်ဂ့ၤအိၣ်ဒီးအစိအကမီၤလၢအခိၣ်အဖီခိၣ်, လၢက လူးတဖၣ်အဃိလီၤ.
11ဘၣ်ဆၣ်ဒီးလၢကစၢ်အပူၤ, ပိာ်ခွါတအိၣ်ဘၣ်ဒီးပိာ် မုၣ်တမ့ၢ်ဘၣ်, ဒီးပိာ်မုၣ်တအိၣ်ဘၣ် ဒီးပိာ်ခွါတမ့ၢ် ဘၣ်. 12အဂ့ၢ်ဒ်အံၤ,ဒ်ပိာ်မုၣ်အိၣ်ထီၣ်လၢပိာ်ခွါအသိး, ဒ်န့ၣ်အသိးပိာ်ခွါအိၣ်ထီၣ်လၢ ပိာ်မုၣ်စ့ၢ်ကီး, ဒီးတၢ် ခဲလၢာ်အိၣ်ထီၣ်လၢယွၤလီၤ. 13စံၣ်ညီၣ်သုဝဲတက့ၢ်, ပိာ်မုၣ်တကျၢၢ်ဘၢဘၣ်အခိၣ်, ဒီးဘါထုကဖၣ်တၢ်လၢ ယွၤ, ဂ့ၤစ့ၢ်ကီးဧါ. 14ပိာ်ခွါအိၣ်ဒီးခိၣ်သူထီန့ၣ်တၢ်အ အလုၢ်အလၢ်လၢအအိၣ်ဒၣ်တၢ်ဒၣ်လဲာ်န့ၣ်, သိၣ်လိ သုလၢအမ့ၢ်တၢ်မဲာ်ဆှးတမ့ၢ်ဘၣ်ဧါ. 15ဘၣ်ဆၣ်ဒီးပိာ် မုၣ်မ့ၢ်အိၣ်ဒီးအခိၣ်သူထီန့ၣ်, မ့ၢ်အဝဲဒၣ်အလၤအက ပီၤ,တမ့ၢ်ဘၣ်ဧါ. အဂ့ၢ်ဒ်အံၤ, တၢ်ဟ့ၣ်အခိၣ်သူလၢ တၢ်ကျၢၢ်ဘၢအဂီၢ်လီၤ. 16ဘၣ်ဆၣ်ဒီးပှၤတဂၤဂၤမ့ၢ်ပာ် အသးလၢ အကဂ့ၢ်လိာ်ဘှီလိာ်ဒီး, ပဝဲဒၣ်မ့ၢ်ဂ့ၤ,ယွၤ အတၢ်အိၣ်ဖှိၣ်တဖၣ်မ့ၢ်ဂ့ၤ, အလုၢ်အလၢ်ဒ်န့ၣ်တအိၣ် ဘၣ်.
17ဒီးတၢ်လၢယစံးဖျါထီၣ်အံၤ, ယတစံးထီၣ်ပတြၢၤ ဘၣ်သုဘၣ်. အဂ့ၢ်ဒ်အံၤ, သုအိၣ်ဖှိၣ်ရိဖှိၣ်တမ့ၢ်ဘၣ် လၢတၢ်ဂ့ၤထီၣ်အဂီၢ်ဘၣ်. မ့ၢ်လၢတၢ်အၢလီၤအဂီၢ် လီၤ. 18အဂ့ၢ်ဒ်အံၤ,အခီၣ်ထံးအဂ့ၢ်န့ၣ်,တုၤသုအိၣ်ဖှိၣ် ရိဖှိၣ်လၢတၢ်အိၣ်ဖှိၣ်လၢတၢ်အိၣ်ဖှိၣ်အပူၤဒီး, ယနၢ် ဟူလၢသုလီၤဖးလိာ်သုသး, ဒီးယနာ်စ့ၢ်ကီးတနီၤ လီၤ 19အဂ့ၢ်ဒ်အံၤ,ဒ်သိးပှၤအဂ့ၤလၢသုကျါကအိၣ်ဖျါ ထီၣ်ဒီး, တၢ်စုတလီၤဃုာ်ဘၣ်တဖၣ်,ဘၣ်အိၣ်ထီၣ်စ့ၢ် ကီးလၢသုကျါလီၤ.
20မၤသးဒ်န့ၣ်ဒီးတုၤသုအိၣ်ဖှိၣ်ရိဖှိၣ်တပူၤဃီဒီး, တမ့ၢ် ဘၣ်သုအီၣ်ကစၢ်အတၢ်အီၣ်လၢဟါအီၣ်ဘၣ်. 21အဂ့ၢ် ဒ်အံၤ, လၢသုအီၣ်တၢ်န့ၣ်ပှၤဟံးန့ၢ်ဆိအတၢ်အီၣ်လၢ ဟါအီၣ်ဒၣ်ဝဲကိးဂၤဒဲး, ဒီးပှၤတဂၤတၢ်သၣ်ဝံၤအသး, ဒီးပှၤတဂၤအီၣ်လုၣ်ကိတၢ်လီၤ. 22မ့ၢ်ဒ်လဲၣ်. သုအီၣ် တၢ်ဒီးအီတၢ်န့ၣ်သုဟံၣ်တအိၣ်ဘၣ်ဧါ. မ့တမ့ၢ်ဘၣ် ဒီး,မ့ၢ်သုတပးကဲဘၣ် ယွၤအတၢ်အိၣ်ဖှိၣ်,ဒီးမၤမဲာ်ဆှး ပှၤလၢအတၢ်တအိၣ်ဘၣ်န့ၣ်ဧါ. မ့ၢ်ယဘၣ်စံးဘၣ်သု ဒ်လဲၣ်. မ့ၢ်ယကစံးထီၣ်ပတြၢၤသုလၢတၢ်န့ၣ်အဃိဧါ. ယတစံးထီၣ်ပတြၢၤဘၣ်သုဘၣ်.
23အဂ့ၢ်ဒ်အံၤ, တၢ်လၢယဒိးန့ၢ်လၢကစၢ်အအိၣ်, ယ ဟ့ၣ်လီၤစ့ၢ်ကီးသု, လၢကစၢ်ယ့ၣ်ရှူး,လၢမုၢ်နၤလၢတၢ် ဟ့ၣ်လီၤကွံာ်အီၤန့ၣ်,ဟံးန့ၢ်ကိၣ်, 24ဒီးစံးထီၣ်ပတြၢၤ တၢ်အဘျုးအဖှိၣ်,ဒီးစိၢ်ဘျဲးဝဲ, ဒီးစံးဝဲဒၣ်,အအံၤမ့ၢ်ယ နီၢ်ခိလၢသုဂီၢ်လီၤ. မၤတၢ်အံၤလၢတၢ်သ့ၣ်နီၣ်ထီၣ်က့ၤ ယၤအဂီၢ်န့ၣ်တက့ၢ်. 25ဒ်န့ၣ်အသိးစ့ၢ်ကီး,အီၣ်တၢ်အီၣ် လၢဟါအီၣ်ဝံၤဒီး, ဟံးန့ၢ်လီခီဒီးစံးဝဲဒၣ်,လီခီအံၤမ့ၢ် တၢ်အၢၣ်လီၤအီလီၤအသီလၢ ယသွံၣ်န့ၣ်လီၤ. ဖဲဒၣ် သုအီတၢ်အံၤတစုစုဒီး, မၤလၢတၢ်သ့ၣ်နီၣ်ထီၣ်ယၤ အဂီၢ်န့ၣ်တက့ၢ်. 26အဂ့ၢ်ဒ်အံၤ,ဖဲသုအီၣ်ကိၣ်အံၤ, ဒီး အီလီခီအံၤတစုစုန့ၣ်, သုဒုးနဲၣ်ဖျါထီၣ်ကစၢ်အဒိးသံ အသး,တုၤအဟဲန့ၣ်လီၤ.
27မၤသးဒ်န့ၣ်ဒီး, ဖဲဒၣ်ပှၤလၢအအီၣ်ကိၣ်မ့ၢ်ဂ့ၤ,ဒီးအီ ကစၢ်အလီခီမ့ၢ်ဂ့ၤ, တဂ့ၤတဘၣ်ဘၣ်တဂၤဂၤန့ၣ်,တၢ် ဒဲးဘးလၢအမၤကမၣ်ဘၣ်ကစၢ်အနီၢ်ခိဒီး အသွံၣ်န့ၣ်, ဂ့ၤဘၣ်အီၤလီၤ. 28ဘၣ်ဆၣ်ဒီးမ်ပှၤသံကွၢ်သံဒိးလီၤအ သး,ဒီးအီၣ်ကိၣ်, ဒီးအီလီခီဒ်န့ၣ်အသိးတက့ၢ်. 29အ ဂ့ၢ်အံၤ, ပှၤလၢအအီၣ်ဝဲဒီးအီဝဲဒီးတဆိကမိၣ်နီၤဖးဘၣ် ကစၢ်အနီၢ်ခိအဂ့ၢ်ဒီး, အီၣ်ဝဲဒီးအီဝဲလၢတၢ်စံၣ်ညီၣ် ဃၣ်လၢအဂီၢ်ဒၣ်ဝဲလီၤ.
30လၢတၢ်အံၤအဃိဒီး, ပှၤအိၣ်လၢသုကျါလၢအဂံၢ်စၢ် ဘါစၢ်ဒီးဘၣ်တၢ်ဆူးတၢ်ဆါအါဂၤ, ဒီးပှၤမံသပ့ၤတ စှၤဂၤဘၣ်လီၤ. 31အဂ့ၢ်ဒ်အံၤ,ပမ့ၢ်စံၣ်ညီၣ်လီၤပသးဒီး, တၢ်တစံၣ်ညီၣ်ဘၣ်ပှၤဘၣ်. 32မ့မ့ၢ်တုၤပဘၣ်တၢ်စံၣ် ညီၣ်ပှၤဒီး, ကစၢ်သိၣ်ဃီၣ်ပှၤဒ်သိးပသုတဘၣ်တၢ်စံၣ် ညီၣ်ဃၣ်ဒီးဟီၣ်ခိၣ်န့ၣ်တဂ့ၤလီၤ.
33မၤသးဒ်န့ၣ်ဒီး, ယပုၢ်သ့ၣ်ဝဲၢ်သ့ၣ်ဧၢ,တုၤသုအိၣ်ဖှိၣ် ရိဖှိၣ်အီၣ်တၢ်ဒီး, ဆူလၢ်ဟူလိာ်သုသးသကိးသကိး တက့ၢ်. 34ဒီးဒ်သိးသုသုတအိၣ်ဖှိၣ်ရိဖှိၣ်လၢ တၢ်စံၣ် ညီၣ်ဃၣ်အဂီၢ်တဂ့ၤဒီး, ပှၤတဂၤဂၤ,တၢ်မ့ၢ်သၣ်ဝံၤအ သးဒီး, မ်အအီၣ်တၢ်လၢအဟံၣ်ပူၤတက့ၢ်. ဒီးတၢ် အိၣ်လီၤတဲာ်တဖၣ်န့ၣ်, တုၤယဟဲတုၤဒီး, ယကစံၣ် ညီၣ်ကတီၤအီၤလီၤ.
Currently Selected:
လံာ်စီၤပီလူးကွဲးန့ၢ်ပှၤကရံၣ်သူးဖိအခီၣ်ထံးတဘ့ၣ်. ၁၁: KSWM
Highlight
Share
Copy
Want to have your highlights saved across all your devices? Sign up or sign in
Sgaw Mason Bible © Bible Society of Myanmar, 1853.