प्रस्थान 32

माराए क्ल्‍या भारा

(व्यवस्था ९:६-२९)

1मोशा कोंउँइँले युब क्हैन् लब म्रोंसि इस्राएलीमैं हारून ङाँर खागु तसि “ङिलाइ मिश्र ह्‍युलउँइँले तेइ पखबै मोशालाइ तो तइ ङिइ आसे। छतसि रेद्, ङिए ओंसों-ओंसों घ्याँ तेंबर देवता घ्रि बनेमिंन्,” बिबर होंइ।#चिब्मैं ७:४०

2छबिमा हारूनइ चमैंने बिइ, “क्हेमैंए म्रिं नेरो च्ह-च्हमिंमैंइ न्हप्हेर खिबै माराए रिंङमैं प्लिसि ङ ङाँर पखो।” 3छबिमा ताँन् म्हिमैंइ ह्रों-ह्रोंसए न्हर्बै माराए रिंङमैं प्लिसि हारून ङाँर पखइ। 4हारूनइ म्हिमैंउँइँले मारा किंसि मिर गाल्दिइ, धै कोप्दिसि क्ल्या भारा घ्रि बनेइ।

छाब् म्रोंसि म्हिमैंइ बिइ, “ओ इस्राएलीमैं! क्हेमैंलाइ मिश्रउँइँले तेइ पखबै क्हेमैंए देवता चुन् ग!” बिइ।#१ म्रुँ १२:२८; चिब्मैं ७:४१

5छतसि हारूनइ माराए क्ल्या भाराए ओंसों ख्रो पिंबै क्ल्ह्‍यो घ्रि बनेसि बिइ, “प्हन्हाँग याहवेहए मिंर चाड घ्रि म्हाँदिब्मुँ।” 6प्हँन्हाँग्धों म्हिमैं न्हाँकर्न रेसि मिर ख्रोंसि पिंबै खेदोमैं नेरो क्ह्रिमिंबै भेटिमैं बोसि ख्रो पिंइ। झाइले चमैं चब् थुँब् लसि मोज लबर होंइ।#१ कोर १०:७

7छलब् म्रोंसि याहवेहजी मोशाने बिइ, “क्हि युनन् क्युरु ह्‍याद्, तलेबिस्याँ क्हिइ मिश्रउँइँले तेइ पखबै क्हिए म्हिमैंइ पाप लसि ङलाइ म्हाँदिब पिवाइमुँ। 8ङइ प्रबर ल्हैदिबै घ्याँ चमैंइ च्हौ युनन् पिवासि अर्कोन् घ्याँ प्रइमुँ। चमैंइ ह्रोंसए ल्हागिर क्ल्या भाराए कु बनेसि चलाइन म्हाँदिसि ख्रो पिंसि, ‘ओ इस्राएलीमैं, क्हेमैंलाइ मिश्र ह्‍युलउँइँले तेइ पखबै क्हेमैंए देवता चुन् ग’ बिइमुँ।”

9याहवेहजी मोशाने बिइ, “चु म्हिमैं बेल्‍ले आच्योब्मैं मुँन बिसि ङइ म्रोंइ। 10तारे ङने तोइ आबिद्, ङ चमैंने बेल्‍ले ह्रिस खइमुँ। तारे ङइ चमैं नास लवाब्मुँ। धै क्हि ङाँइँलेन् ङइ थेबै ह्रें घ्रि बनेब्मुँ।”

11दिलेया मोशाइ ह्रोंसए याहवेह परमेश्‍वरने यो छ्युँ लसि “ओ याहवेह!” बिइ। “क्हिइ ह्रोंसए थेबै भों मुँबै योइ मिश्रउँइँले तेइ पखबै ह्रोंसए म्हिमैंए फिर तले च्हौ थेबै ह्रिस खल? 12क्हिइ ह्रोंसए म्हिमैंलाइ कोंर सैबै सैं लसि पखब् ग बिसि मिश्रीमैंलाइ तले बिल् पिंमुँ? छतसि क्हि ह्रिस आखद्, सैं एसि ह्रोंसए म्हिमैंलाइ नास तल् आपिंन्। 13ह्रोंसए केब्छैंमैं अब्राहाम, इसहाक नेरो याकूबलाइ मैंन्दि। चमैंने बालु क्हिजी ह्रोंसए मिंर कसम चसि ‘ङइ क्हेमैंए सन्तान मुर्बै सारमैं धोंले ल्हें लमिंब्मुँ। ङइ क्हेमैंए खेमैंलाइ पिंम् बिसि बाछा फैबै चु ताँन् ह्‍युल क्हेमैंए सन्तानलाइ पिंब्मुँ, धै क्हेमैंए सन्तानमैंइ च क्ल्ह्‍योर खोंयोंन् बिलै क्ल्हे लब्मुँ’ बिसि बिल।”#उत २२:१६-१७; १७:८

14छबिमा याहवेहजी ह्रोंसए म्हिमैंलाइ नास लवाब्मुँ बिलेया खीजी सैं एसि चमैंलाइ जोगेमिंइ।#गन्ती १४:१३-१९

15झाइले परमेश्‍वरजी लद् बिबै ताँमैं हार ङ्हिर्न प्ह्रिबै युँमाए प्लना ङ्हिं योर किंसि मोशा कोंउँइँले तयुइ। 16परमेश्‍वर खीजीन च युँमाए पलानमैं बनेसि खीजी लद् बिबै ताँमैं चर प्ह्रिथेंल।

17म्हिमैं कै तेब् थेसि यहोशूइ मोशाने “ब्यारेक न्होंर म्हिमै प्होंब् धों तबै कै थेइमुँ,” बिइ।

18दिलेया मोशाइ बिइ, “चु कैम् लडइ ट्होब्मैंलै या आङिं, हार्दिब्मैंलै या आङि। ङइमि क्वे प्रिंबै कै ग थेइमुँ दि।”

19झाइले मोशा ब्यारेक चेंदों खरिमा माराए क्ल्या भाराए उँइँर म्हिमैं सेरिब् म्रोंइ। छतमा मोशा बेल्‍ले ह्रिस खसि च युँमाए प्लनामैं कोंए जरर भ्योंवामा च तियाइ। 20छलेन चमैंइ बनेबै माराए क्ल्या भारा मिर त्हुला भुँले ख्रोंवासि क्युर कोंवाँइ, धै च क्यु इस्राएलीमैंलाइ थुँबर ल्हैदिइ। 21च लिउँइँ मोशाइ हारूनने बिइ, “चु म्हिमैंइ क्हिलाइ तो लइ? क्हिइ चुमैंलाइ तले च्हौ थेबै पाप के लबर ल्हैदिब?”

22हारूनइ बिइ, “ओ चिब, क्हि ङने ह्रिस आखमिंन्। चु म्हिमैं खैतब् मुँ बिसि क्हिइ सेइमुँ। चुमैं खोंयोंन् बिलै आछ्याँबै के लदा ङ्हाँइमुँ। 23चमैंइ ङने, ‘ङि मिश्रउँइँले तेइ पखबै मोशालाइ तो तगे ङिइ आसे। छतसि ङिए ओंसों-ओंसों घ्याँ तेंबै ल्हागिर देवता बनेमिन्’ बिसि बिइ। 24छबिमा ङइ चमैंने ‘माराए घानामैं खिब्मैंइ घानामैं प्लिसि ङ ङाँर पखो,’ बिइ, झाइले चमैंइ घानामैं ङने पिंइ। धै ङइ च घानामैं मिर झोंवामा क्ल्या भारा तयाइ!”

25हारूनइ म्हिमैंलाइ तो लदा ङ्हाँम् लल् पिंबइले म्हिमैंइ ह्रोंसए सैंर तो मैंमुँ चन् लसि शत्तुरमैं निस्युबै के तल् पिंना बिसि मोशाइ था सेइ। 26छतसि मोशा ब्यारेकए म्रा ङाँर रासि, “याहवेहलाइ म्हाँदिब्मैं ङ ङाँइ खो!” बिमा ताँन् लेबीमैं च ङाँर खागु तखइ। 27धै मोशाइ लेबीमैंने बिइ, “‘क्हेमैं ताँनइ ह्रों-ह्रोंसए सेलाँ किंसि ब्यारेकर्बै चु म्राउँइँले अर्को म्रा समा ह्‍यासि ह्रोंसए अलिमैं, थुमैं नेरो ङ्‍हेब् ट्हुब्मैं सैद्!’ बिसि इस्राएलर्बै याहवेह परमेश्‍वरजी ल्हैदिइमुँ।” 28मोशाइ बिब् धोंलेन् लेबीमैं लइ, च त्हिंइर हजार सों म्हिमैं सैवाइ।

29झाइले मोशाइ लेबीमैंने बिइ, “तिंयाँ क्हेमैंइ ह्रों-ह्रोंसए च्ह नेरो अलिमैं सैसि याहवेहए ल्हागिर स्यो लइमुँ। छतसि याहवेहजी क्हेमैंए फिर आशिक पिंइमुँ।”

30प्हँन्हाँग्धों मोशाइ म्हिमैंने बिइ, “क्हेमैंइ थेबै पाप लइमुँ। क्हेमैंइ लबै पापए क्षमा ह्रिबर तारे ङ याहवेह ङाँर ह्‍यामुँ।” 31च लिउँइँ मोशा याहवेह ङाँर ह्‍यासि बिइ, “चु म्हिमैंइ थेबै पाप लइमुँ! चमैंइ माराए कु बनेसि फ्योइमुँ। 32दिलेया चमैंए पाप क्हिइ क्षमा लमिंन्। क्षमा आलमिंस्याँ क्हिजी ह्रोंसए म्हिमैंए मिं प्ह्रिबै कितबउँइँले ङए मिं मेटिमिन्।”#भज ६९:२८; दर्शन ३:५

33याहवेहजी मोशाने बिइ, “ङए बिरोधर पाप लबै म्हिलाइन ह्रोंसए कितबउँइँले ङ मेटिमिंब्मुँ। 34तारे ह्‍याद्! ङइ बिबै क्ल्ह्‍योर म्हिमैंलाइ घ्याँ तेंसि बोद्। ङए दूतमैं क्हिए ओंसों-ओंसों ह्‍याब्मुँ। दिलेया चमैंलाइ सजैं पिंबै त्हे खबै लिउँइँ चमैंए पापए दण्ड ङ पिंब्मुँ।”

35झाइले हारूनइ बनेबै माराए क्ल्या भारा चमैंइ फ्योबइले याहवेहजी रूढि कुलसि म्हिमैं सैवाइ।

Currently Selected:

प्रस्थान 32: GCMB

Highlight

Copy