လံာ်စကၤရယၤ 8
8
ယွၤအၢၣ်လီၤလၢကပာ်ကဒါက့ၤ ဝ့ၢ်ယရူၤၡလ့ၣ်လၢအလီၢ်
1သ့တၢ်လၢာ်အယွၤဟ့ၣ်လီၤတၢ်ကစီၣ်အံၤဆူစီၤစကၤရယၤလီၤ. 2“ယသးအိၣ်တ့ၢ်လၢယကမၤစၢၤဝ့ၢ်ယရူၤၡလ့ၣ်မ့ၢ် လၢယအဲၣ်ဘၣ်အပှၤဂီၢ်မုၢ်အဃိလီၤ. ယတၢ်အဲၣ်အံၤ, မ့ၢ်တၢ်အဲၣ်တမံၤလၢအဒိၣ်ဝဲတုၤဒၣ်လဲာ်, ယသးဒိၣ်ထီၣ်ဘၣ်အဒုၣ်အဒါတဖၣ်န့ၣ်လီၤ. 3ယကဟဲက့ၤကဒါက့ၤဆူဝ့ၢ်ယရူၤၡလ့ၣ်, ယဝ့ၢ်စီဆှံ, ဒီးအိၣ်ဆိးဖဲန့ၣ်လီၤ. ကဘၣ်တၢ်သ့ၣ်ညါအီၤဒ်ဝ့ၢ်လၢအသူၣ်တီ သးရၤ, ဒီးသ့တၢ်လၢာ်ယွၤအကစၢၢ်ကဘၣ်တၢ်ကိးအီၤလၢကစၢၢ်စီဆှံန့ၣ် လီၤ. 4မၤကဒီးတစု, ပိာ်ခွါသးပှၢ်တဖၣ်ဒီးပိာ်မုၣ်သးပှၢ်တဖၣ်လၢအသးပှၢ် တုၤဒၣ်လဲာ်ဘၣ်သူနီၣ်ထိးဘိဖဲအဝဲသ့ၣ်ဟးဝဲအခါန့ၣ်, ကဆ့ၣ်နီၤလၢဝ့ၢ်အတၢ်လီၢ်လီၤပျီတဖၣ်အပူၤန့ၣ်လီၤ. 5ဒီးဝ့ၢ်အကျဲဘိတဖၣ်န့ၣ်ကပှဲၤကဒီးဝဲဒီးဖိသၣ်ပိာ်ခွါ, ဒီးဖိသၣ်ပိာ်မုၣ်လၢအလိာ်ကွဲဝဲတဖၣ်န့ၣ်လီၤ.
6လၢပှၤကလုာ်လၢအအိၣ်လီၤတဲာ်တ့ၢ်ခဲအံၤတဖၣ် အဂီၢ်န့ၣ်တၢ်အံၤကမ့ၢ်တၢ်လၢအမၤအသးတသ့ဘၣ်လီၤ. ဘၣ်ဆၣ်ဒီးတၢ်တသ့ဘၣ်န့ၣ်တအိၣ်ဒီးယၤဘၣ်. 7ယကမၤပူၤမၤဖျဲးယပှၤဂီၢ်မုၢ်လၢကီၢ်တဖၣ်လၢ အဝဲသ့ၣ်ဘၣ်တၢ်လဲၤစိာ်ကွံာ်အီၤ, 8ဒီးဟဲစိာ်ကဒါက့ၤအဝဲသ့ၣ်လၢမုၢ်ထီၣ် ဒီးလၢမုၢ်နုာ်ဒ်သိးကအိၣ်ကဆိးဝဲလၢဝ့ၢ်ယရူၤၡလ့ၣ်အပူၤလီၤ. ဒီးအဝဲသ့ၣ်ကကဲထီၣ်ယပှၤဂီၢ်မုၢ်, ဒီးယကကဲထီၣ်အဝဲသ့ၣ်အကစၢ်ယွၤဒီးပၢအဝဲသ့ၣ်လၢတၢ်သူၣ်တီသး ရၤဒီးတၢ်စံၣ်ညီၣ်တီအပူၤန့ၣ်လီၤ.
9အိၣ်ဒီးတၢ်သူၣ်ဒူသးဒူတက့ၢ်. ခဲအံၤသုနၢ်ဟူဘၣ်တၢ်ကတိၤတမံၤဃီဒ်သိးဒီးတၢ်ကတိၤလၢဝံ တဖၣ်ကတိၤတ့ၢ်ဝဲဖဲတၢ်ပာ်လီၤတၢ်ခီၣ်ထံးလၢတၢ်ကဘှီထီၣ် ကဒါက့ၤယတၢ်လုၢ်ဟံၣ်အဆၢကတီၢ်န့ၣ်လီၤ. 10တချုးတၢ်ဆၢကတီၢ်အဝဲန့ၣ်ဒံးဘၣ်န့ၣ်, ပှၤဒိးလဲပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤတန့ၢ်နီတဂၤ, ဒီးပှၤတပူၤဖျဲးဘၣ်လၢအဒုၣ်အဒါတဖၣ်နီတဂၤဘၣ်. ယထိၣ်ဂဲၤပှၤဂီၢ်မုၢ်လၢကထီဒါလိာ်အသးတဂၤဒီးတဂၤလီၤ. 11မ့မ့ၢ်ခဲကနံၣ်အံၤ, ပှၤကလုာ်အံၤအပှၤအိၣ်လီၤတဲာ်တဖၣ်, ယတမၤအီၤဒ်လၢညါအသိးဘၣ်. 12အဝဲသ့ၣ်ကဖှံလီၤအတၢ်ချံတဖၣ်လၢအတၢ်မုာ်တၢ်ခုၣ်အပူၤလီၤ. အဝဲသ့ၣ်အစပံးမုၢ်တဖၣ်ကသၣ်ထီၣ်စပံးသၣ်တဖၣ်, ဟီၣ်ခိၣ်ကဟ့ၣ်ထီၣ်တၤသူတၤသၣ်တဖၣ်, ဒီးတၢ်စူၤထံကအိၣ်ဝဲ အါမးလီၤ. ယကဟ့ၣ်လီၤတၢ်ဆိၣ်ဂ့ၤတဖၣ်ခဲလၢာ်အံၤဆူ ယပှၤကလုာ်အပှၤဂီၢ်မုၢ်လၢအအိၣ်လီၤတဲာ်တ့ၢ်တဖၣ်လီၤ. 13ကီၢ်ယူဒၤဒီးကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, လၢအပူၤကွံာ်န့ၣ်, ပှၤတခီဘီမုၢ်ဖိတဖၣ်တဂၤဒီးတဂၤစံးဝဲလၢမ်တၢ်တတၢးတနါ တမံၤဃီလၢအလီၤဘၣ်လၢကီၢ်ယူဒၤဒီးကီၢ်အံၣ်စရ့လးအလိၤ ကလီၤဘၣ်နၤတက့ၢ်, ဖဲအဆိၣ်အၢလိာ်အသးန့ၣ်လီၤ. မ့မ့ၢ်ခဲအံၤယကအုၣ်က့ၤခီၣ်က့ၤသုလီၤ. အန့ၣ်ဒီးပှၤတခီဘီမုၢ်ဖိတဖၣ်ကစံးလိာ်အသးတဂၤဒီးတဂၤ, မ်သုကဒိးန့ၢ်တၢ်ဆိၣ်ဂ့ၤတမံၤဃီလၢအဘၣ်ကီၢ် ယူဒၤဒီးကီၢ်အံၣ်စရ့လးတက့ၢ်န့ၣ်လီၤ. လၢတၢ်န့ၣ်အဃိ, အိၣ်ဒီးတၢ်သးဒူတက့ၢ်.”
14“ပျံၤတၢ်တဂ့ၤ.” ယွၤစံးဝဲဒၣ်, “ဖဲသုမိၢ်ပၢ်ဖံဖုလၢပျၢၤတဖၣ်မၤသးဒိၣ်ထီၣ်ယၤန့ၣ်, ယကူၣ်ကျဲၤတ့ၢ်တၢ်တတၢးတနါလၢအဝဲသ့ၣ်အဂီၢ်, ဒီးယတလဲလိာ်ယသးဘၣ်ဒီး, မၤထွဲယတၢ်ကူၣ်ကျဲၤတဖၣ်န့ၣ်လီၤ. 15မ့မ့ၢ်ခဲကနံၣ်အံၤ, ယကူၣ်ကျဲၤလၢယကဆိၣ်ဂ့ၤဝ့ၢ်ယရူၤရှလ့ၣ်ဒီးကီၢ်ယူဒၤအပှၤဂီၢ်မုၢ်န့ၣ်လီၤ. လၢတၢ်န့ၣ်အဃိဒီးပျံၤတၢ်တဂ့ၤ. 16အအံၤမ့ၢ်တၢ်တဖၣ်လၢသုကဘၣ်မၤန့ၣ်လီၤ. ကတိၤလိာ်သုသးတဂၤဒီးတဂၤလၢတၢ်မ့ၢ်တၢ်တီတက့ၢ်. လၢကွီၢ်ဘျီၣ်တဖၣ်အပူၤန့ၣ်, မၤတၢ်စံၣ်ညီၣ်တီနီၢ်နီၢ်တကလုာ်လၢအဟဲစိာ်တၢ်ဃူတၢ်ဖိးန့ၣ်တ က့ၢ်. 17ကူၣ်ကျဲၤတၢ်မၤဆါလိာ်သးတဂၤဒီးတဂၤအကျဲတဖၣ်တဂ့ၤ. ဟ့ၣ်တၢ်အုၣ်သးကဘျံးကဘျၣ်လၢတၢ်ဆိၣ်လီၤသုသးအပူၤတဂ့ၤ, ယသးဟ့တၢ်လီတၢ်ဝ့ၤ, တၢ်စံၣ်ညီၣ်တီ, ဒီးတၢ်စုဆူၣ်ခီၣ်တကးန့ၣ်လီၤ.”
18သ့တၢ်လၢာ်ယွၤဟ့ၣ်လီၤတၢ်ကစီၣ်အံၤဆူစီၤစကၤရယၤလီၤ. 19“တၢ်ဒုၣ်တၢ်အီၣ်တၢ်အီတဖၣ်လၢအဘၣ်တၢ်မၤအီၤလၢလါလွံၢ်လါ တလါ, လါယဲၢ်လါတလါ, လါနွံလါတလါ, ဒီးလါဆံဆဲၣ်လါတလါန့ၣ်ကကဲထီၣ်တၢ်သူၣ်ဖှံသးညီဒီး တၢ်သူၣ်ခုသးခုအဘူၣ်တဖၣ်လၢကီၢ်ယူဒၤအပှၤဂီၢ်မုၢ်အဂီၢ်လီၤ. ဒီးသုကဘၣ်အဲၣ်တၢ်မ့ၢ်တၢ်တီဒီးတၢ်ဃူတၢ်ဖိးန့ၣ်လီၤ.”
20သ့တၢ်လၢာ်အယွၤစံးဝဲဒၣ်, “တၢ်ဆၢကတီၢ်ကဟဲတုၤဝဲဖဲ ပှၤဂီၢ်မုၢ်လၢဝ့ၢ်အါဝ့ၢ်ကဟဲဝဲဒၣ်ဆူဝ့ၢ်ယရူၤၡလ့ၣ်န့ၣ်လီၤ. 21ပှၤတဖၣ်လၢအဟဲလၢဝ့ၢ်တဝ့ၢ်ကစံးဘၣ်ပှၤတဖၣ်လၢ အဟဲလၢဝ့ၢ်အဂၤတဝ့ၢ်, ပကဘၣ်ဘူၣ်ထီၣ်ဘါထီၣ်သ့တၢ်လၢာ်ယွၤဒီးဃ့ထုကဖၣ်လၢအတၢ်ဆိၣ် ဂ့ၤအဂီၢ်လီၤ. ဟဲသကိးဒီးပှၤတက့ၢ်. 22ပှၤဂီၢ်မုၢ်ဖးဒိၣ်တဖၣ်, ဒီးပှၤကလုာ်လၢအဂံၢ်ဆူၣ်ဘါဆူၣ်တဖၣ်, ကဟဲဆူဝ့ၢ်ယရူၤရှလ့ၣ်လၢကဘူၣ်ထီၣ်ဘါထီၣ်သ့တၢ်လၢာ်ယွၤ, ဒီးဃ့ဘါထုကဖၣ်လၢအတၢ်ဆိၣ်ဂ့ၤအဂီၢ်လီၤ. 23လၢမုၢ်နံၤတဖၣ်အပူၤန့ၣ်, တခီဘီမုၢ်ဖိအဂၤတဆံကဟဲဆူပှၤယူဒၤဖိတဂၤအအိၣ်ဒီးစံး, ပအဲၣ်ဒိးလဲၤသကိးဃုာ်တၢ်ဒီးသု, ဆူတၢ်လီၢ်လၢသုကလဲၤတုၤဃီၤသပှၢ်ကတၢၢ်, မ့ၢ်လၢပနၢ်ဟူတ့ၢ်လၢကစၢ်ယွၤအိၣ်ဒီးသုအဃိန့ၣ်လီၤ.”
Currently Selected:
လံာ်စကၤရယၤ 8: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
