လံာ်စကၤရယၤ 12
12
ဝ့ၢ်ယရူၤၡလ့ၣ်အတၢ်ထူၣ်ဖျဲးလၢခါဆူညါ
1အအံၤမ့ၢ်တၢ်ကစီၣ်တမံၤဘၣ်ဃးဒီးကီၢ်အံၣ်စရ့လး, လၢအဟဲလၢယွၤအအိၣ်, ယွၤလၢအသလၣ်ထီၣ်မူကပိာ်လိၤ, တ့လီၤပာ်လီၤဟီၣ်ခိၣ်, ဒီးဟ့ၣ်တၢ်မူဆူပှၤကညီန့ၣ်လီၤ. အဝဲစံးဝဲဒၣ်, 2“ယကမၤဝ့ၢ်ယရူၤၡလ့ၣ်ဒ်စပံးထံတခွးအသိး, ဒီးပှၤကလုာ်တဖၣ်လၢအအိၣ်ဝးတရံးအီၤန့ၣ်ကအီအီၤဒီး ကလဲၤကနုၤကပၤဒ်ပှၤအီမူၤသံးတဖၣ်အသိးန့ၣ်လီၤ. ဒီးဖဲအဝဲသ့ၣ်ကဝီၤဃာ်ဝ့ၢ်ယရူၤၡလ့ၣ်အခါန့ၣ်ကီၢ်ယူဒၤအ ဝ့ၢ်လၢအအိၣ်တ့ၢ်တဖၣ်ကဘၣ်တၢ်ကဝီၤဃာ်အီၤစ့ၢ်ကီးန့ၣ်လီၤ. 3ဘၣ်ဆၣ်ဒီးဖဲအဆၢကတီၢ်အဝဲန့ၣ်တုၤဃီၤဒီး, ယကဒုးကဲထီၣ်ဝ့ၢ်ယရူၤၡလ့ၣ်ဒ်လၢၢ်အဃၢတဖျၢၣ်အသိး, ဒီးကယဲၢ်ပှၤတကလုာ်ဂ့ၤတကလုာ်ဂ့ၤလၢအကျဲးစၢးစိာ်ထီၣ်အီၤန့ၣ် ကဘၣ်ဒိဘၣ်ထံးဝဲဒၣ်လီၤ. ပှၤကလုာ်ခဲလၢာ်လၢဟီၣ်ခိၣ်ချၢကပာ်ဖှိၣ်ထီၣ်အသုးမုၢ်သံၣ်ဘိ တဖၣ်ဒီးကဒုးတၢ်ထီဒါအီၤလီၤ. 4ဖဲအဆၢကတီၢ်အဝဲန့ၣ်, ယကမၤပျံၤအဝဲသ့ၣ်အကသ့ၣ်ခဲလၢာ်ဒီးမၤပျုၢ်အပှၤဒိးကသ့ၣ်တဖၣ် လီၤ. ဒီးယကအံးလီၤကွၢ်လီၤကီၢ်ယူဒၤအပှၤဂီၢ်မုၢ်, အဝဲသ့ၣ်အဒုၣ်အဒါတဖၣ်အကသ့ၣ်န့ၣ်, ယကမၤဘျီၣ်ကွံာ်အမဲာ်လီၤ. 5အန့ၣ်ဒီးကီၢ်ယူဒၤအဒူၣ်ထၢတဖၣ်ကစံးလိာ်အသးတဂၤဒီးတဂၤ, ယွၤ, သ့တၢ်လၢာ်ကစၢ်ယွၤဟ့ၣ်လီၤအပှၤဂီၢ်မုၢ်လၢအအိၣ်လၢဝ့ၢ်ယရူၤ ၡလ့ၣ်အပူၤတဖၣ်လၢတၢ်ဂံၢ်တၢ်ဘါလံ.
6ဖဲအဆၢကတီၢ်အဝဲန့ၣ်, ယကဒုးကဲထီၣ်ကီၢ်ယူဒၤ အဒူၣ်ထၢတဖၣ်ဒ်မ့ၣ်အူလၢပှၢ်တပှၢ်အပူၤအသိး, မ့တမ့ၢ်ဒ်, ဘုလၢအမံထီၣ်အစံာ်ပျီပူၤတပူၤအသိး, ဒီးအဝဲသ့ၣ်ကမၤဟးဂီၤကွံာ်ပှၤကလုာ်အိၣ်ဝးတရံးအီၤခဲလၢာ်လီၤ. ဝ့ၢ်ယရူၤၡလ့ၣ်အပှၤဂီၢ်မုၢ်ကအိၣ်တ့ၢ်ပူၤဖျဲးဝဲလၢဝ့ၢ်အပူၤန့ၣ်လီၤ.
7ယၤ, ယွၤအံၤယကဟ့ၣ်တၢ်မၤနၢၤအဆိကတၢၢ်ဆူကီၢ်ယူဒၤ အသုးမုၢ်တဖၣ်, ဒ်သိးဒီးတၢ်လၤကပီၤလၢစီၤဒၤဝံးအစၢၤအသွဲၣ် တဖၣ်ဒီးဝ့ၢ်ယရူၤၡလ့ၣ်အပှၤဂီၢ်မုၢ်ကဒိးန့ၢ်ဝဲန့ၣ်သုတဒိၣ် န့ၢ်ဒံးပှၤအဂၤလၢကီၢ်ယူဒၤအပူၤကဖၣ်တဂ့ၤအဂီၢ်န့ၣ်လီၤ. 8ဖဲအဆၢကတီၢ်အဝဲန့ၣ်, ယွၤကဒီဒၣ်အိၣ်ပှိၤပှၤလၢအအိၣ်လၢဝ့ၢ်ယရူၤၡလ့ၣ်အပူၤ, ဒီးပှၤလၢအဂံၢ်စၢ်ဘါစၢ်ကတၢၢ်လၢအဝဲသ့ၣ်အကျါတဖၣ်ဒၣ်လဲာ် န့ၣ်ကကဲထီၣ်ပှၤလၢအဂံၢ်ဆူၣ်ဘါဆူၣ်ဒ်စီၤဒၤဝံးမ့ၢ်တ့ၢ်အသိး န့ၣ်လီၤ. ဒီးစီၤဒၤဝံးအစၢၤအသွဲၣ်တဖၣ်ကဆှၢအဝဲသ့ၣ်ဒ်ယွၤ အကလူးအသိး, ဒီးဒ်ကစၢ်ယွၤအနီၢ်ကစၢ်ဒၣ်ဝဲအသိးန့ၣ်လီၤ. 9ဖဲအဆၢကတီၢ်အဝဲန့ၣ်, ယကမၤဟးဂီၤပှၤကလုာ်ခဲလၢာ်လၢအကျဲးစၢးဟဲဒုးထီ ဒါဝ့ၢ်ယရူၤၡလ့ၣ်န့ၣ်လီၤ.
10ဒီးယကမၤပှဲၤစီၤဒၤဝံးအစၢၤအသွဲၣ်တဖၣ်ဒီးဝ့ၢ် ယရူၤၡလ့ၣ်အပှၤဂီၢ်မုၢ်ဒီးသးလၢအသးကညီၤတၢ်ဒီး သးလၢအအိၣ်ဒီးတၢ်ထုကဖၣ်န့ၣ်လီၤ. အဝဲသ့ၣ်ကကွၢ်ဃီၤတၢ်ဆူပှၤတဂၤလၢအဝဲသ့ၣ်ဆဲးသံကွံာ်ဝဲ, ဒီးအဝဲသ့ၣ်ကဟီၣ်ဝဲယၢၤဝဲလၢအဃိဒ်ပှၤတဖၣ်လၢအဟီၣ်ဝဲယၢၤဝဲ လၢအဖိခွါတဂၤဃီအဃိအသိးန့ၣ်လီၤ. အဝဲသ့ၣ်ကဟီၣ်ဝဲနးနးကလဲာ်ဒ်ပှၤတဖၣ်လၢအဟီၣ်ဝဲယၢၤဝဲလၢ အဖိခွါဝဲၢ်ကိလီၤမၢ်ကွံာ်အဃိအသိးန့ၣ်လီၤ. 11ဖဲအဆၢကတီၢ်အဝဲန့ၣ်တၢ်ဟီၣ်တၢ်ယၢၤလၢယရူၤၡလ့ၣ် အပူၤန့ၣ်ကအိၣ်ဝဲဒိၣ်ထဲသိးဒီးတၢ်ဟီၣ်တၢ်ယၢၤလၢဟၤ ဒးရံးမိၢ်အဃိလၢအအိၣ်ဝဲဒၣ်လၢတၢ်ပၢၤခိၣ်မကံးဒိၤအသိးန့ၣ်လီၤ. 12ဒီးပှၤတဒူၣ်ဘၣ်တဒူၣ်လၢကီၢ်ပူၤကဟီၣ်ယၢၤဒၣ်အတၢ်ဒၣ်ဝဲ စုာ်စုာ်န့ၣ်လီၤ. စီၤဒၤဝံးအဟံၣ်ဒူၣ်ဃီထၢလၢအလီၢ်တပူၤဒီး စီၤနၤသၣ်အဟံၣ်ဒူၣ်ဃီထၢဖိလၢတၢ်လီၢ်တပူၤဒၣ်လီၤ. 13စီၤလ့ၤဝံအဟံၣ်ဒူၣ်ဃီထၢဖိလၢအလီၢ်တပူၤဒီးစီၤၡံမံၤ အဟံၣ်ဒူၣ်ဃီထၢဖိလၢတၢ်လီၢ်တပူၤဒၣ်လီၤ. 14ဒီးကယဲၢ်ဟံၣ်ဒူၣ်ထၢအဂၤတဖၣ်လၢအအိၣ်လီၤတဲာ်န့ၣ်တဒူၣ်ဘၣ်တဒူၣ် ကဟီၣ်ကယၢၤဒၣ်အတၢ်ဒၣ်ဝဲစုာ်စုာ်, ဒီးပိာ်ခွါတဖၣ်လၢဟံၣ်ဒူၣ်ဃီထၢစုာ်စုာ်အပူၤန့ၣ်, ကဟီၣ်တၢ်ယၢၤတၢ်လၢတၢ်လီၢ်လီၤဆီလိာ်အသးဒီးပိာ်မုၣ် တဖၣ်လီၤ.”
Currently Selected:
လံာ်စကၤရယၤ 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
