လံာ်စကၤရယၤ 11
11
ပှၤပၢတၢ်အၢအၢသီသီဖဲအသးတဖၣ် အတၢ်ဟးဂီၤ
1ကီၢ်လဘၤနိၣ်ဧၢ, အိးထီၣ်နတြဲၤတဖၣ်ဒ်သိးမ့ၣ်အူကအီၣ်ကွံာ်နသ့ၣ်ဆှိအ့ရ့း တဖၣ်တက့ၢ်.
2သ့ၣ်ဆှိသ့ၣ်ဧၢ, ဟီၣ်တၢ်ယၢၤတၢ်ဒီးဟီၣ်ပသူဟီၣ်ပသီတက့ၢ်.
အဂ့ၢ်ဒ်အံၤ, သ့ၣ်ဆှိအ့ရ့းတဖၣ်လီၤဃံၤလံ
ဒီးသ့ၣ်လၢအအိၣ်ဒီးအလၤကပီၤတဖၣ်န့ၣ် ဘၣ်တၢ်မၤဟးဂီၤကွံာ်အီၤလံ.
ကီၢ်ဘၤၡၣ်အသ့ထိးဖၣ်သ့ၣ်ဧၢ, ဟီၣ်တၢ်ယၢၤတၢ်ဒီးဟီၣ်ပသူ ဟီၣ်ပသီတက့ၢ်.
အဂ့ၢ်ဒ်အံၤ, သ့ၣ်ပှၢ်လၢအတီၣ်ဘၣ်တၢ်ကူာ်လီၤကွံာ်အီၤလံ.
3ပှၤပၢတၢ်တဖၣ်ဟီၣ်ပသူထီၣ်လၢတၢ်သးအုးအပူၤလီၤ.
အဂ့ၢ်ဒ်အံၤ, အဝဲသ့ၣ်အလၤကပီၤလီၤမၢ်ကွံာ်လံ.
ဒိကနၣ်ခ့ယုၢ်တဖၣ်အတၢ်ကညီၤထီၣ်န့ၣ်တက့ၢ်.
အဂ့ၢ်ဒ်အံၤ, အဝဲသ့ၣ်အိၣ်ဆိးအလီၢ်လၢအအိၣ်ဝဲဖဲထံကျိ ယၣ်ဒ့ၣ်အသရ့ၤန့ၣ်ဘၣ်တၢ်မၤဟးဂီၤအီၤလံ.
ပှၤကွၢ်သိခံဂၤ
4ယွၤ, ကစၢ်ယွၤစံးဘၣ်ယၤ, “မၤပှၤကွၢ်သိအတၢ်မၤလၢသိတဖၣ်လၢတၢ်ကမၤသံဒီးဆါအီၣ်အီၤ အဂီၢ်န့ၣ်တက့ၢ်. 5အဝဲသ့ၣ်အကစၢ်တဖၣ်မၤသံအဝဲသ့ၣ်, ဒီးတဘၣ်တၢ်စံၣ်ညီၣ်အီၤဘၣ်. အဝဲသ့ၣ်ဆါကွံာ်တၢ်ညၣ်ဒီးစံးဝဲ, စံးထီၣ်ပတြၢၤယွၤတက့ၢ်. ပထူးထီၣ်တီၤထီၣ်လံ. အပှၤကွၢ်သိတဖၣ်ဒၣ်လဲာ်တသးကညီၤဘၣ်အဝဲသ့ၣ်ဘၣ်.”
6(ယွၤစံးဝဲဒၣ်, “ယတသးကညီၤလၢၤဘၣ်ပှၤနီတဂၤလၢဟီၣ်ခိၣ်အံၤဘၣ်. ယကစၢ်ဒၣ်ယဲယကပာ်ပှၤဂီၢ်မုၢ်ခဲလၢာ်လၢအပှၤပၢတၢ်တဖၣ်အတၢ်စိတၢ် ကမီၤအပူၤလီၤ. ပှၤပၢတၢ်တဖၣ်န့ၣ်ကမၤဟးဂီၤကွံာ်ဟီၣ်ခိၣ်ဒိၣ်ဒိၣ်မုၢ်မုၢ်, ဒီးယတအုၣ်က့ၤခီၣ်က့ၤဘၣ်အီၤလၢအဝဲသ့ၣ်အတၢ်စိတၢ်ကမီၤအပူၤ ဘၣ်.”)
7ပှၤလၢအပှ့ၤဒီးဆါသိတဖၣ်, ဒိးလဲယၤဒီးယကဲထီၣ်ပှၤကွၢ်သိလၢ သိလၢကဘၣ်တၢ်မၤသံဆါအီၣ်အညၣ်တဖၣ်အဂီၢ်လီၤ. ဒီးယဟံးန့ၢ်နီၣ်ထိးဘိခံဘိ, တဘိန့ၣ်ယကိးအီၤလၢ “တၢ်ဘျုးတၢ်ဖှိၣ်,” ဒီးအဂၤတဘိန့ၣ်ယကိးအီၤလၢ “တၢ်ဃူတၢ်ဖိး,” ဒီးယကွၢ်သိတဖုန့ၣ်လီၤ. 8ပှၤကွၢ်သိအဂၤသၢဂၤလၢအသးဟ့ယၤန့ၣ်, ယဝံသးစူၤအီၤတကဲဘၣ်ဒီးလၢတလါဃီဧိၤအတီၢ်ပူၤ ယဒီၣ်တဲာ်ကွံာ်အဝဲသ့ၣ်လီၤ. 9အန့ၣ်ဝံၤဒီး, ယစံးဘၣ်သိတဖုန့ၣ်, “ယတမ့ၢ်သုပှၤကွၢ်သိ လၢၤဘၣ်. မ်ပှၤလၢအကသံန့ၣ်ကသံဒၣ်ဝဲတက့ၢ်. မ်ပှၤလၢအကဘၣ်တၢ်မၤဟးဂီၤကွံာ်အီၤန့ၣ် ကဘၣ်တၢ်မၤဟးဂီၤကွံာ်အီၤတက့ၢ်. ဒီးပှၤလၢအအိၣ်လီၤတဲာ်တ့ၢ်တဖၣ်န့ၣ်ကမၤဟးဂီၤလိာ်အသးတဂၤ ဒီးတဂၤလီၤ.” 10ဒီးယဟံးန့ၢ်နီၣ်ထိးဘိလၢအဘၣ်တၢ်ကိးအီၤလၢတၢ်ဘျုး တၢ်ဖှိၣ်ဒီးယမၤကၢ်ကွံာ်အီၤဒ်သိးယကတြူာ်ကွံာ်တၢ်အၢၣ်လီၤ အီလီၤလၢယွၤမၤတ့ၢ်ဝဲဒီးပှၤကလုာ်ခဲလၢာ်န့ၣ်လီၤ. 11လၢတၢ်န့ၣ်အဃိတၢ်အၢၣ်လီၤအီလီၤဘၣ်တၢ်တြူာ်ကွံာ်အီၤဖဲမုၢ် တနံၤန့ၣ်လီၤ. ဒီးပှၤလၢအပှ့ၤဒီးဆါသိတဖၣ်န့ၣ်ကွၢ်ယၤ, ဒီးအဝဲသ့ၣ်သ့ၣ်ညါဝဲလၢယွၤကတိၤတၢ်ခီဖျိတၢ်လၢယမၤတ့ၢ်န့ၣ်လီၤ. 12ယစံးဘၣ်အဝဲသ့ၣ်, “သုသးမ့ၢ်အိၣ်ဒီးဟ့ၣ်ယၤယဘူးယလဲတက့ၢ်. ဘၣ်ဆၣ်သုသးမ့ၢ်တအိၣ်န့ၣ်, တဘၣ်ဟ့ၣ်ယၤတဂ့ၤ.” လၢတၢ်န့ၣ်အဃိအဝဲသ့ၣ်ဟ့ၣ်ယၤလၢစ့အဘ့ၣ်သၢဆံဒ်ယဘူးယလဲအသိး န့ၣ်လီၤ.
13ယွၤစံးဘၣ်ယၤ, “ဒၢနုာ်အီၤလၢတၢ်လုၢ်ဟံၣ်စ့ပာ်ဖှိၣ်အလီၢ်တက့ၢ်.” ဒီးယဟံးန့ၢ်စ့လီၤဘီလီၤမုၢ်အဘ့ၣ်သၢဆံလၢအဝဲသ့ၣ် ဆိကမိၣ်ဝဲဒ်အမ့ၢ်ယတၢ်ယကၢပှ့ၤကၢကလံၤန့ၣ်ဒီးဒၢနုာ် အီၤဆူတၢ်လုၢ်ဟံၣ်အစ့ပာ်ဖှိၣ်အလီၢ်လီၤ. 14အန့ၣ်ဝံၤဒီးယမၤကၢ်ကွံာ်နီၣ်ထိး ဘိခံဘိတဘိလၢအဘၣ်တၢ်ကိးအီၤလၢတၢ်ဃူတၢ်ဖိးလီၤ. ဒီးကီၢ်ယူဒၤဒီးကီၢ်အံၣ်စရ့လးအတၢ်ဃူတၢ်ဖိးန့ၣ်ဟးဂီၤ ကွံာ်ဝဲဒၣ်န့ၣ်လီၤ.
15ဒီးယွၤစံးဘၣ်ယၤ, “အအံၤတစုမၤပှၤကွၢ်သိလၢအတဂီာ်တသီၣ်တဂၤအတၢ်မၤတက့ၢ်. 16ယပာ်လီၤတ့ၢ်ပှၤကွၢ်သိတဂၤလၢကကွၢ်ယသိတဖၣ်လီၤ. ဘၣ်ဆၣ်အဝဲတမၤစၢၤသိလၢအဘၣ်တၢ်မၤပျံၤ အီၤလၢတၢ်ဟးဂီၤမ့ၢ်ဂ့ၤ, တဃုက့ၤသိလၢအဟါမၢ်မ့ၢ်ဂ့ၤ, တမၤဘျါက့ၤသိလၢအဘၣ်ဒိဘၣ်ထံးမ့ၢ်ဂ့ၤ, တဒုးအီၣ်သိလၢအအိၣ်ဆူၣ်အိၣ်ချ့အဆၣ်မ့ၢ်ဂ့ၤန့ၣ်ဘၣ်. အခိၣ်တလိာ်, အဝဲအီၣ်ကွံာ်သိလၢအဘီၣ်ကတၢၢ်အညၣ်ဒီးဖှီယာ်ကွံာ်အဝဲသ့ၣ် အခီၣ်မ့ၣ်တဖၣ်လီၤ. 17ပှၤကွၢ်သိလၢအတဂိာ်တသီၣ်အံၤဘၣ်တၢ်စံၣ်ညီၣ်ဃါမနၤလီၤ. အဝဲဒၣ်လဲၤသဒၣ်ကွံာ်အသိတဖုလီၤ. တၢ်ဒုးတၢ်ယၤကမၤဟးဂီၤကွံာ်အတၢ်စိတၢ်ကမီၤလီၤ. အစုဒုၣ်ကသံတခီပၤ, ဒီးအမဲာ်ချံထွဲကဘျီၣ်ကွံာ်ဝဲဒၣ်န့ၣ်လီၤ.”
Currently Selected:
လံာ်စကၤရယၤ 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
