စံးထီၣ်ပတြၢၤ 94
94
ကစၢ်ယွၤလၢအစံၣ်ညီၣ်ပှၤခဲလၢာ်
1ယွၤဧၢ, နမ့ၢ်ကစၢ်ယွၤလၢအသိၣ်ဃီၣ်တၢ်လီၤ.
ပာ်ဖျါထီၣ်နတၢ်သးထီၣ်တက့ၢ်.
2နမ့ၢ်ပှၤခဲလၢာ်အပှၤစံၣ်ညီၣ်ကွီၢ်လီၤ.
ဂဲၤထၢၣ်ဒီးဟ့ၣ်ပှၤပာ်ထီၣ်ထီအသး
လၢတၢ်လၢအကြၢးဒိးန့ၢ်ဘၣ်ဝဲဒၣ်န့ၣ်တက့ၢ်.
3ပှၤတတီတလိၤကသူၣ်ဖှံသးညီယံာ်ထီၣ် ဒံးဆံးယံာ်လဲၣ်.
ယွၤဧၢ, ဆံးယံာ်ဒံးလဲၣ်.
4ပှၤမၤကမၣ်တၢ်တဖၣ်အံၤ ကပာ်ထီၣ်ထီအသးဒီး
ပာ်ကဖၢလၢအသးလၢ အတၢ်မၤကမၣ်တဖၣ်အဃိန့ၣ်ဆံးယံာ်ဒံးလဲၣ်.
5ယွၤဧၢ, အဝဲသ့ၣ်မၤအၢမၤသီနပှၤဂီၢ်မုၢ်,
ဒီးအဝဲသ့ၣ်မၤနးမၤဖှီၣ်ပှၤလၢ
အဘၣ်ဃးဒီးနၤတဖၣ်န့ၣ်လီၤ.
6အဝဲသ့ၣ်မၤသံကွံာ် ပှၤမုၣ်ကမဲတဖၣ် ပှၤဖိၣ်ဃဲတဖၣ်
ဒီးမၤသံပှၤတခီဘီမုၢ်လၢ
အအိၣ်ဆိးလၢ ပထံပကီၢ်အပူၤန့ၣ်လီၤ.
7အဝဲသ့ၣ်စံးဝဲ “ယွၤတထံၣ်ပှၤဘၣ်,
အံၣ်စရ့လးအကစၢ်ယွၤတပာ်သူၣ်ပာ်သး
လၢပှၤဘၣ်.”
8ယပှၤဂီၢ်မုၢ်ဧၢ,
သုကဲထီၣ်ပှၤဟးဂီၤဖိထဲသိးန့ၣ်ဧါ.
သ့ဒ်လဲၣ်.
သုကမၤလိန့ၢ်တၢ်အခါဖဲလဲၣ်.
9ကစၢ်ယွၤလၢအတ့လီၤပနၢ်တဂၤန့ၣ်, တနၢ်ဟူတၢ်ဘၣ်ဧါ.
ကစၢ်ယွၤလၢအတ့လီၤပမဲာ်ချံတဂၤန့ၣ်
တထံၣ်တၢ်ဘၣ်ဧါ.
10ပှၤလၢအသိၣ်က့ၤသီက့ၤပှၤကလုာ်တဖၣ်န့ၣ်,
မ့ၢ်တစံၣ်ညီၣ်အဝဲသ့ၣ်ဘၣ်ဧါ.
ပှၤလၢအသိၣ်လိပှၤကညီတဂၤ, န့ၣ်အတၢ်သ့ၣ်ညါတအိၣ်နီတမံၤဘၣ်ဧါ.
11ယွၤသ့ၣ်ညါပှၤကညီအတၢ်ဆိကမိၣ်တဖၣ်,
ဒီးသ့ၣ်ညါဝဲပှၤကညီအတၢ်ကူၢ်တၢ်ဆးန့ၣ်မ့ၢ်တၢ်ကလီကလီလီၤ.
12ယွၤဧၢ, ပှၤလၢနသိၣ်ဃီၣ်အီၤ,
ဒီးလၢနသိၣ်လိအီၤလၢနတၢ်သိၣ်တၢ်သီန့ၣ်ဘၣ်ဆိၣ်ဂ့ၤဝဲလီၤ.
13နဟ့ၣ်အီၤတၢ်အိၣ်ဘှံး
လၢတၢ်ကိၢ်တၢ်ဂီၤအမုၢ်နံၤတဖၣ်အပူၤန့ၣ်
နဒုးအိၣ်ဘှံးအီၤ, တုၤလီၤလၢတၢ်ပူၤတပူၤဘၣ်တၢ်ခူၣ်အီၤလၢ
တၢ်ကဖီၣ်န့ၢ်ပှၤတတီတလိၤအဂီၢ်န့ၣ်လီၤ.
14အဂ့ၢ်ဒ်အံၤ, ယွၤတညိကွံာ်ဘၣ်အပှၤဂီၢ်မုၢ်ဘၣ်,
ဒီးတလဲၤသဒၣ်ဘၣ်အတၢ်န့ၢ်သါဘၣ်.
15တၢ်စံၣ်ညီၣ်တီကအိၣ်က့ၤကဒီးလၢ ကွီၢ်ဘျီၣ်တဖၣ်အပူၤ
ဒီးပှၤတီပှၤလိတဖၣ် ကဆီၣ်ထွဲမၤစၢၤအီၤလီၤ.
16မ့ၢ်မတၤကဆၢထၢၣ်လၢယဂီၢ်ထီဒါ
ပှၤတတီတလိၤန့ၣ်လဲၣ်.
မ့ၢ်မတၤကမၤစၢၤယၤ
ထီဒါပှၤမၤတၢ်အၢတဖၣ်န့ၣ်လဲၣ်
17ယွၤမ့ၢ်တမၤစၢၤယၤဘၣ်န့ၣ်ဒီး,
ယကလဲၤတ့ၢ်ယဲချ့သဒံးဆူ
တၢ်အိၣ်ဘှီၣ်ကလာ်အလီၢ်န့ၣ်လီၤ.
18ဖဲယစံး, “ယလီၤဃံၤလံ” န့ၣ်,
ယွၤဧၢ, နတၢ်အဲၣ်ဂၢၢ်ကျၤန့ၣ်, ဒုးဆၢထၢၣ်ကျၢၤယၤလီၤ.
19ဖဲယဘၣ်ယိၣ်ဘၣ်ဘီတၢ်ဒီးယသူၣ်ကိၢ်သးဂီၤအခါန့ၣ်,
နမၤမုာ်ယၤဒီးမၤသးခုယၤလီၤ.
20စံၣ်ညီၣ်ကွီၢ်လၢအတတီတလိၤတဖၣ်န့ၣ်,
ရ့လိာ်အသးဒီးနၤဘၣ်ကသ့ဝဲဧါ.
ပှၤလၢအကူၣ်မၤနၢၤတၢ်န့ၣ်
ဘၣ်တၢ်မၤတံာ်တာ်အီၤလၢတၢ်သိၣ်တၢ်သီလီၤ.
21အဝဲသ့ၣ်ကူၣ်ထီဒါသကိးပှၤတီပှၤလိၤ
ဒီးစံၣ်ညီၣ်ပှၤလၢ
အတၢ်ဒဲးဘးတအိၣ်ဘၣ်လၢတၢ်သံန့ၣ်လီၤ.
22မ့မ့ၢ်ယွၤဒီသဒၢယၤ,
ဒီးယကစၢ်ယွၤကဟုဘံၣ်ကယာ်ဘၢယၤလီၤ.
23ယွၤကသိၣ်ဃီၣ်အဝဲသ့ၣ်လၢအတၢ်တတီတလိၤအဃိ
ဒီးကမၤဟးဂီၤအဝဲသ့ၣ်လၢ
အတၢ်ဒဲးဘးတဖၣ်အဃိန့ၣ်လီၤ.
ယွၤပကစၢ်ယွၤကမၤဟးဂီၤအဝဲသ့ၣ်လီၤ.
Currently Selected:
စံးထီၣ်ပတြၢၤ 94: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
