စံးထီၣ်ပတြၢၤ 90
90
ကစၢ်ယွၤဒီးပှၤကညီ
1ယွၤဧၢ, နမ့ၢ်တ့ၢ်နဲပတၢ်အိၣ်တၢ်ဆိးအလီၢ်
အစိၤစိၤအဃၣ်ဃၣ်လီၤ.
2တချုးလၢကစၢၢ်ကလိအိၣ်ထီၣ်ဒံးဘၣ်,
မ့တမ့ၢ်တချုးလၢနဒုးအိၣ်ထီၣ်ဟီၣ်ခိၣ်ဒံးဘၣ်န့ၣ်,
နမ့ၢ်ကစၢ်ယွၤအစိၤစိၤအဃၣ်ဃၣ်ဒီး နကမ့ၢ်ဒံးနဲလီၤစိၤထီလီၤ.
3နဒုးဃၣ်က့ၤပှၤကညီဆူဖၣ်ဆါ,
ဒီးစံး, “ပှၤကညီဖိသ့ၣ်ဧၢ,
က့ၤက့ၤဆူလီၢ်ခံန့ၣ်တက့ၢ်.”
4လၢနဂီၢ်အံၤအနံၣ်တကထိလီၤဂာ်ဒ်မုၢ်တနံၤအသိး,
ဒ်မဟါတနံၤလၢအလဲၤပူၤကွံာ်တ့ၢ်လံဝဲ,
ဒီးဒ်တၢ်ခိးအကတီၢ်တကတီၢ်လၢ
မုၢ်နၤအသိးန့ၣ်လီၤ.
5နစိာ်ကွံာ်ပှၤဒ်ထံလုၣ်ဘၢတၢ်အသိး,
ဒီးပတၢ်အိၣ်မူမၤအသးဒ်တၢ်မံမီၢ်အသိး,
ဒီးဒ်တပံၢ်လၢအမဲထီၣ်လၢမုၢ်ဂီၤအသိး,
6လၢအဒိၣ်ထီၣ်ဒီးဖးထီၣ်ဖီထီၣ်,
ဒီးလၢခံက့ၤဃ့ထီဒီးသံကွံာ်ဝဲလၢ
မုၢ်ဟါအသိးန့ၣ်လီၤ.
7ပဘၣ်တၢ်မၤဟးဂီၤတ့ၢ်လံပှၤလၢနတၢ်သးထီၣ်
ဒီးပဘၣ်တၢ်မၤပျံၤမၤဖုးပှၤလၢနတၢ်သးဒိၣ်လီၤ.
8နပာ်လီၤပတၢ်ဒဲးဘးတဖၣ်လၢနမဲာ်ညါ,
ပတၢ်ဒဲးဘးခူသူၣ်တဖၣ်လၢတၢ်လီၢ်ဖဲ
နထံၣ်သ့ဝဲအလီၢ်န့ၣ်လီၤ.
9အဂ့ၢ်ဒ်အံၤ, ပမုၢ်နံၤမုၢ်သီခဲလၢာ်
လဲၤပူၤကွံာ်ဝဲလၢနတၢ်သးထီၣ်အပူၤ,
ဒီးပနံၣ်ပလါကတၢၢ်ကွံာ်ဝဲလီၤဂာ်ဒ်
တၢ်ကအုကစွါအသိးန့ၣ်လီၤ.
10ပနံၣ်တဖၣ်အမုၢ်နံၤန့ၣ်မ့ၢ်အနံၣ်နွံဆံလီၤ.
ဒီးလၢတၢ်ဂံၢ်တၢ်ဘါအဃိန့ၣ်
မ့ၢ်အိၣ်ဝဲဃိးဆံဘၣ်ဆၣ်ဒီး,
ဟဲစိာ်န့ၢ်ဒၣ်ပှၤတၢ်ကိၢ်တၢ်ဂီၤ
ဒီးတၢ်သူၣ်အုးသးအုးန့ၣ်လီၤ.
တၢ်အိၣ်မူအံၤတစိၢ်ဖိဒီးလဲၤပူၤကွံာ်ဝဲ,
ဒီးပယူၤထီၣ်ကွံာ်လီၤ.
11မ့ၢ်မတၤဆိကမိၣ်ထီၣ်နတၢ်သးထီၣ်အစိအကမီၤ
ဒီးသ့ၣ်ညါတၢ်ပျံၤလၢနတၢ်သးကဲၤထီၣ်
ဟဲစိာ်ဝဲသ့န့ၣ်တဂၤလဲၣ်.
12အဃိဒီး, သိၣ်လိပှၤဒ်သိးပကဂံၢ်ပမုၢ်နံၤတဖၣ်,
ဒီးပကန့ၢ်ဘၣ်
သးအတၢ်ကူၣ်ဘၣ်ကူၣ်သ့န့ၣ်တက့ၢ်.
13နတၢ်သးထီၣ်ကယံာ်ဒံးဝဲဆံးယံာ်လဲၣ်.
ယွၤဧၢ, သူၣ်ကညီၤသးကညီၤလၢ်
နခ့နပှၤတဖၣ်န့ၣ်တက့ၢ်.
14မၤပှဲၤပှၤလၢနတၢ်အဲၣ်ဂၢၢ်ကျၢၤကိးမုၢ်ဂီၤဒဲး,
ဒ်သိးပကသးဝံၣ်ထီၣ်တၢ်ဒီးသးခုလၢ
ပတၢ်အိၣ်မူတစိၤဒၣ်ပှၤန့ၣ်တက့ၢ်.
15ဟ့ၣ်လၢ်ပှၤတၢ်သူၣ်ခုသးခုဒိၣ်ဒိၣ်အါအါခဲအံၤ,
ဒ်နဟ့ၣ်တ့ၢ်ပှၤတၢ်သူၣ်အုးသးအုး
လၢတၢ်သူၣ်ကိၢ်သးဂီၤအနံၣ်အလါ
တဖၣ်အပူၤအသိးန့ၣ်တက့ၢ်.
16မ်နခ့နပှၤတဖၣ်ထံၣ်ဘၣ်နတၢ်ဖံးတၢ်မၤအဒိၣ်အမုၢ်တဖၣ်,
မ်ပစၢၤပသွဲၣ်တဖၣ် ထံၣ်ဘၣ်
နတၢ်လၤကပီၤဖးဒိၣ်တက့ၢ်.
17ယွၤ, ပကစၢ်ဧၢ,
မ်နတၢ်ဆိၣ်ဂ့ၤဆိၣ်ဝါတဖၣ်အိၣ်ဒီးပှၤတက့ၢ်.
ဟ့ၣ်လီၤလၢ်ပှၤတၢ်မၤနၢၤလၢ
ပစုအတၢ်မၤခဲလၢာ်အပူၤန့ၣ်တက့ၢ်.
မ့ၢ်မးပစုအတၢ်မၤန့ၣ်,
ဒုးအိၣ်ဂၢၢ်ဆိးကျၢၤအီၤတက့ၢ်.
Currently Selected:
စံးထီၣ်ပတြၢၤ 90: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
