စံးထီၣ်ပတြၢၤ 88
88
တၢ်ကိးထီၣ်လၢတၢ်မၤစၢၤအဂီၢ်
1ကစၢ်ယွၤ, တၢ်အုၣ်က့ၤခီၣ်က့ၤယၤကစၢ်ယွၤဧၢ,
လၢမုၢ်ဆါယကိးထီၣ်နၤလၢတၢ်မၤစၢၤအဂီၢ်,
ဒီးလၢမုၢ်နၤယကိးထီၣ်လၢနမဲာ်ညါလီၤ.
2မ်ယတၢ်ထုကဖၣ်ဟဲထီၣ်ဆူနမဲာ်ညါတက့ၢ်.
ဒိးနနၢ်လၢယတၢ်ကိးထီၣ်န့ၣ်တက့ၢ်.
3အဂ့ၢ်ဒ်အံၤ, ယသးပှဲၤဒီးတၢ်ကိၢ်တၢ်ဂီၤ
ဒီးယသးသမူအိၣ်ဘူးဒီးတၢ်သံန့ၣ်လီၤ.
4ယဘၣ်တၢ်ဂံၢ်ယၤလၢပှၤလဲၤလီၤဆူတၢ်သံအကီၢ်ပူၤ,
ဒီးယမ့ၢ်ပှၤကညီတဂၤလၢ
အဂံၢ်အဘါတအိၣ်ဘၣ်န့ၣ်လီၤ.
5ယဘၣ်တၢ်ညိကွံာ်တ့ၢ်လံယၤလၢ
ပှၤသံသ့ၣ်တဖၣ်အကျါ,
ယလီၤဂာ်ဒီးပှၤသံလၢအမံနီၤလၢတၢ်သွၣ်ခိၣ်အပူၤ,
ပှၤသ့ၣ်တဖၣ်လၢနသးပ့ၤနီၣ်တ့ၢ်လံအီၤလၢာ်လၢာ်ဆ့ဆ့,
ပှၤလၢနတၢ်မၤစၢၤတတုၤဆူအအိၣ်ဘၣ်န့ၣ်လီၤ.
6နတ့ၢ်လီၤယၤဆူတၢ်ပူၤအယိာ်ကတၢၢ်အပူၤ,
လၢတၢ်ခံးကျါဒီးတၢ်ယိာ်အပူၤန့ၣ်လီၤ.
7နတၢ်သးထီၣ်အိၣ်ဃၢလၢယလိၤ,
ဒီးနဒုးလုၣ်ဘၢယၤလၢကယဲၢ်နလပီခဲလၢာ်န့ၣ်လီၤ. စ့လၤ
8နမၢယတံၤသကိးသ့ၣ်တဖၣ်ညိကွံာ်ယၤ,
ဒီးယကဲထီၣ်တၢ်သး
ဘၣ်အၢလၢ အဝဲသ့ၣ်အဂီၢ်လီၤ.
ယဘၣ်တၢ်ကဝီၤဃာ်ယၤဒီး
ယထူၣ်ဖျဲးထီၣ်တသ့ဘၣ်.
9ယမဲာ်ချံတဖၣ်အဂံၢ်စၢ်ဘါစၢ်လၢတၢ်နးတၢ်ဖှီၣ်အဃိလီၤ. ယွၤဧၢ,
ယကိးထီၣ်နၤကိးမုၢ်နံၤမုၢ်နၤဒဲး,
ယယူာ်ထီၣ်ယစုဆူနအိၣ်လၢ တၢ်ထုကဖၣ်အပူၤလီၤ.
10မ့ၢ်နမၤတၢ်လီၤလးတဖၣ်လၢပှၤသံအဂီၢ်ဧါ.
မ့ၢ်အဝဲသ့ၣ်ဂဲၤဆၢထၢၣ်ဒီးစံးထီၣ်ပတြၢၤနၤဧါ. စ့လၤ
11မ့ၢ်နတၢ်အဲၣ်ဂၢၢ်ကျၢၤဘၣ်တၢ်စံးကတိၤအဂ့ၢ်လၢ
တၢ်သွၣ်ခိၣ်အပူၤ,
မ့တမ့ၢ်နတၢ်သူၣ်တီသးလိၤလၢ
တၢ်ဟးဂီၤအလီၢ်န့ၣ်ဧါ.
12မ့ၢ်နတၢ်လီၤလးတဖၣ်ဘၣ်တၢ်သ့ၣ်ညါအီၤလၢ
တၢ်ခံးတၢ်နၤအပူၤဧါ.
မ့တမ့ၢ်နတၢ်အုၣ်က့ၤခီၣ်က့ၤအတၢ်မၤစၢၤလၢ
တၢ်သးပ့ၤနီၣ်အကီၢ်ပူၤစ့ၢ်ကီးဧါ.
13ယွၤဧၢ, မ့မ့ၢ်ယဲဒၣ်အံၤယကိးထီၣ်နၤ,
ဒီးလၢမုၢ်ဂီၤန့ၣ်ယတၢ်ထုကဖၣ်ဟဲထီၣ်ဆူ
နမဲာ်ညါန့ၣ်လီၤ.
14ယွၤဧၢ, ဘၣ်မနုၤလၢနညိကွံာ်ယၤန့ၣ်လဲၣ်.
ဘၣ်မနုၤလၢနပာ်တဒၢနမဲာ်လၢယၤန့ၣ်လဲၣ်.
15လၢယဖိၣ်သၣ်ခွါထီၣ်လံၤလံၤဒၣ်လဲာ်, ယဘၣ်တ့ၢ်လံ
တၢ်နးတၢ်ဖှီၣ်ဒီးဘူးလၢယကသံန့ၣ်လီၤ.
ယလီၤဘှံးတ့ၢ်လံယဲလၢနတၢ်သိၣ်ဃီၣ်တဖၣ်
အတၢ်ဝံတၢ်ယိးအဃိန့ၣ်လီၤ.
16နတၢ်သးကဲၤထီၣ်မၤသဘှံးယၤ
နတၢ်ဒုးလၢ နးမးန့ၣ်မၤဟးဂီၤယၤလီၤ.
17အဝဲသ့ၣ်အိၣ်ဝးတရံးယၤဒ်ထံလုၣ်ဘၢတၢ်အသိး
သ့တနံၤကျၢၤ,
ကဝီၤဃာ်ယၤတပူၤဃီလီၤ.
18ယတံၤသကိးတဖၣ်လၢ အဘူးကတၢၢ်ဒီးဒၣ်လဲာ်န့ၣ်
နပျဲအညိကွံာ်ယၤလီၤ.
ဖဲယလဲၤတပူၤလၢ်လၢ်အလီၢ်န့ၣ်
အိၣ်ဒၣ်ထဲတၢ်ခံးတၢ်နၤန့ၣ်လီၤ.
Currently Selected:
စံးထီၣ်ပတြၢၤ 88: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
