လံာ်တၢ်ကူၣ်သ့အတၢ်ကတိၤ 8
8
တၢ်စံးထီၣ်ပတြၢၤတၢ်ကူၣ်သ့
1ဒိကနၣ်တက့ၢ်. တၢ်ကူၣ်သ့ကိးထီၣ်ဝဲ
ဒီးတၢ်ကူၣ်တၢ်ဆးမၤဟူထီၣ်အကလုၢ်ဒၣ်ဝဲလီၤ.
2လၢကျဲကပၤကစၢၢ်ဒီခိၣ်
ဒီးဖဲကျဲခီဂာ်လိာ်အသးတဖၣ်န့ၣ်, ဆၢထၢၣ်ဝဲလီၤ.
3ဖဲတၢ်လဲၤနုာ်ဃီၤဆူဝ့ၢ်ပူၤ
တြဲၤဖးဒိၣ်တဖၣ်အကပၤန့ၣ်, အဝဲကိးထီၣ်ဝဲ,
4“ယဃ့ကညးသု, ပှၤကညီသ့ၣ်ဧၢ,
ဒီးယကိးထီၣ်ဆူပှၤခဲလၢာ်လၢအအိၣ်လၢဟီၣ်ခိၣ်ချၢအံၤလီၤ.
5မ့ၢ်သုတဒိၣ်တုာ်ခိၣ်ပှဲၤဘၣ်ဧါ. မၤလိတၢ်ဒ်သိးသုကဒိၣ်တုာ် ခိၣ်ပှဲၤတက့ၢ်.
မ့ၢ်သုသူၣ်တထံသးတဆးဘၣ်ဧါ. မၤလိအိၣ်ဒီးတၢ်သူၣ်ထံ သးဆးတက့ၢ်.
6ဒိကနၣ်ယတၢ်ကတိၤလုၢ်ဒိၣ်ပှ့ၤဒိၣ်တဖၣ်တက့ၢ်.
တၢ်လၢယစံးဘၣ်တဲဘၣ်သုခဲလၢာ်ဘၣ်ဝဲတီဝဲလီၤ.
7တၢ်လၢယစံးန့ၣ်မ့ၢ်တၢ်မ့ၢ်တၢ်တီလီၤ.
ယသးဟ့တၢ်လီတၢ်ဝ့ၤခဲလၢာ်လီၤ.
8တၢ်လၢယစံးဘၣ်သုကိးထံၣ်ဒဲးမ့ၢ်ဝဲတီဝဲလီၤ.
တမ့ၢ်တၢ်ကဘျံးကဘျၣ်ဒီးတၢ်ဆှၢကမၣ်တၢ် နီတမံၤဘၣ်.
9လၢပှၤအိၣ်ဒီးတၢ်ထံၣ်တၢ်လၢသးအဂီၢ်, မ့ၢ်တၢ်အိၣ်ဖျါတြၢၢ် ကလာ်လီၤ.
ဒီးပှၤလၢအမၤလိဘၣ်တၢ်အါတဖၣ်အဂီၢ်, မ့ၢ်တၢ်အဘၣ်ခဲလၢာ်လီၤ.
10ဃုထၢယတၢ်သိၣ်က့ၤသီက့ၤလၢစ့အလီၢ်,
ဒီးဃုထၢတၢ်သ့ၣ်ညါနၢ်ပၢၢ်အါန့ၢ်ဒိၣ်န့ၢ်ထူစီတက့ၢ်.
11ယဲဒၣ်အံၤယမ့ၢ်တၢ်ကူၣ်သ့ဒီးယဂ့ၤန့ၢ်တၢ်မျၢ်ပလဲ တဖၣ်လီၤ.
တၢ်လၢသုသးလီန့ၣ်, သုထိၣ်သတြီၤဒီးယၤတသ့နီတမံၤဘၣ်.
12ယဲဒၣ်အံၤယမ့ၢ်တၢ်ကူၣ်သ့ဒီးယအိၣ်ဒီးတၢ်ထံၣ်တၢ်လၢသးန့ၣ်လီၤ.
ယအိၣ်ဒီးတၢ်သ့ၣ်ညါနၢ်ပၢၢ်ဒီးတၢ်စံၣ်ညီၣ်တီလီၤ.
13တၢ်ပျံၤယွၤန့ၣ်မ့ၢ်တၢ်သးဟ့တၢ်အၢတၢ်သီလီၤ.
ယသးဟ့တၢ်ပာ်ထီၣ်ထီသးဒီးတၢ်ပာ်ကဖၢလၢသး,
ကျဲအအၢအသီတဖၣ်ဒီးတၢ်ကတိၤလီတၢ်တဖၣ်လီၤ.
14ယအိၣ်ဒီးတၢ်တိာ်ပာ်တဖၣ်ဒီးမၤကဲထီၣ်အီၤလီၤ.
ယအိၣ်ဒီးတၢ်သ့ၣ်ညါနၢ်ပၢၢ်ဒီးယဂံၢ်ဆူၣ်ဘါဆူၣ်လီၤ.
15ယမၤစၢၤစီၤလိၣ်စီၤပၤတဖၣ်လၢကပၢတၢ်,
ဒီးပှၤပၢတၢ်တဖၣ်လၢကမၤအိၣ်ထီၣ်တၢ်သိၣ်တၢ်သီအဂ့ၤတဖၣ်လီၤ.
16ပှၤပၢတၢ်ခဲလၢာ်လၢဟီၣ်ခိၣ်ပၢတၢ်လၢယတၢ်မၤစၢၤ အပူၤ,
ပဒိၣ်ပပှၢ်တဖၣ်ဒီးပှၤတူၢ်ဒိၣ်ကီၤဒိၣ်တဖၣ်စ့ၢ်ကီးလီၤ.
17ယအဲၣ်ပှၤတဖၣ်လၢအအဲၣ်ယၤဒီးပှၤလၢအဃုယၤန့ၣ်, ကထံၣ်န့ၢ်ယၤလီၤ.
18ယအိၣ်ဒီးတၢ်ထူးတၢ်တီၤတဖၣ်ဒီးတၢ်လၤကပီၤလၢယဟ့ၣ်အီၤ,
တၢ်ဘီၣ်ထီၣ်ညီထီၣ်ဒီးတၢ်မၤန့ၢ်မၤနၢၤန့ၣ်လီၤ.
19တၢ်လၢသုဒိးန့ၢ်လၢယအိၣ်န့ၣ်ဂ့ၤဒိၣ်န့ၢ်ထူအစီ,
ဒီးဂ့ၤဒိၣ်န့ၢ်စ့အကဆှီကတၢၢ်တက့ၢ်န့ၣ်လီၤ.
20ယလဲၤတၢ်လၢကျဲတီကျဲလိၤအပူၤ
ဒီးယပိာ်ထွဲတၢ်စံၣ်ညီၣ်တီအကျဲတဖၣ်လီၤ.
21ယဟ့ၣ်လီၤတၢ်ထူးတၢ်တီၤဆူပှၤတဖၣ်လၢအအဲၣ်ယၤ
ဒီးမၤပှဲၤအဟံၣ်တဖၣ်လၢတၢ်လုၢ်ဒိၣ်ပှ့ၤဒိၣ်န့ၣ်လီၤ.
22ယွၤတ့လီၤယၤအဆိကတၢၢ်ဒီးလၢပျၢၤလၢကစၢၤယမ့ၢ်
တၢ်အဆိကတၢၢ်လၢအတၢ်မၤတဖၣ်အကျါန့ၣ်လီၤ.
23လၢဟီၣ်ခိၣ်တချုးကဲထီၣ်ဒံးဒၣ်လဲာ်, ယဘၣ်တၢ်ဒုးကဲထီၣ်ယၤအဆိကတၢၢ်လၢတၢ်အခီၣ်ထံးလံၤလံၤန့ၣ်လီၤ.
24ယအိၣ်ဖျဲၣ်ထီၣ်တ့ၢ်လၢပီၣ်လဲၣ်တဖၣ်အမဲာ်ညါ,
ဖဲထံမူထီၣ်ပၢၢ်တအိၣ်ဒံးဘၣ်ဒၣ်လဲာ်န့ၣ်လီၤ.
25ယအိၣ်ဖျဲၣ်ထီၣ်တ့ၢ်လၢကစၢၢ်ကလိတဖၣ်အမဲာ်ညါ,
တချုးဒံးဒၣ်လဲာ်လၢတၢ်လူၢ်ခိၣ်တဖၣ်ဆီလီၤအသးလၢအလီၢ်,
26တချုးလၢယွၤတ့လီၤဟီၣ်ခိၣ်ဒီးအပျီတဖၣ်မ့ၢ်ဂ့ၤ, ဟီၣ်ခိၣ်ကမူၣ်အဆိကတၢၢ်တစှီၤဒံးဒၣ်လဲာ်မ့ၢ်ဂ့ၤအဆၢကတီၢ်န့ၣ် လီၤ.
27ယအိၣ်လံဖဲန့ၣ်ဖဲယွၤပာ်လီၤမူခိၣ်လၢအလီၢ်ဒၣ်ဝဲ,
ဒီးဖဲအသလၣ်ထီၣ်မူထံးလၢပီၣ်လဲၣ်အထံဖံးခိၣ်,
28ဖဲအပာ်လီၤတ့ၢ်တၢ်အၢၣ်တဖၣ်လၢမူခိၣ်,
ဖဲအအိးထီၣ်တ့ၢ်ပီၣ်လဲၣ်အထံထီၣ်ပၢၢ်တဖၣ်,
29ဒီးဖဲအဟ့ၣ်လီၤတ့ၢ်အကလုၢ်လၢပီၣ်လဲၣ်အထံတဖၣ်အသုတဟဲ ထီၣ်အါန့ၢ်အစံးပာ်တ့ၢ်ဝဲတဂ့ၤအဂီၢ်န့ၣ်လီၤ.
ယအိၣ်လံဖဲန့ၣ်, ဖဲအဝဲပာ်လီၤဟီၣ်ခိၣ်အခီၣ်ထံးတဖၣ်န့ၣ်လီၤ.
30ယအိၣ်ဖဲအကပၤဒ်ပှၤသ့တ့တၢ်သူၣ်ထီၣ်တဂၤအသိး,
ယမ့ၢ်အတၢ်သးခုအဂံၢ်ထံးကိးနံၤဒဲး,
သးခုထီဘိလၢအမဲာ်ညါ,
31သးခုဃုာ်ဒီးဟီၣ်ခိၣ်ဒီဘ့ၣ်ဒီးသးမုာ်သးခုဒီးပှၤဟီၣ်ခိၣ် ဖိန့ၣ်လီၤ.
32ဒီးခဲကနံၣ်အံၤပှၤသးစၢ်သ့ၣ်ဧၢ, ကနၣ်ယကလုၢ်တက့ၢ်.
မၤဒ်ယစံးဘၣ်သုအသိးဒီးသုကဘၣ်ဆိၣ်ဂ့ၤလီၤ.
33ဒိတနၣ်တၢ်လၢတၢ်သိၣ်လိတ့ၢ်သုန့ၣ်တက့ၢ်.
ကွၢ်ကပာ်ကွံာ်အီၤတဂ့ၤ. ကဲထီၣ်ပှၤကူၣ်တၢ်သ့တက့ၢ်.
34ပှၤလၢအဒိကနၣ်ယၤ,
ပှၤလၢအအိၣ်လၢယတြဲၤကိးနံၤဒဲး
ဒီးခိးတၢ်လၢယဟံၣ်အကျဲစၢၤန့ၣ်ဘၣ်ဆိၣ်ဂ့ၤဝဲလီၤ.
35ပှၤလၢအထံၣ်န့ၢ်ယၤထံၣ်န့ၢ်တၢ်မူ
ဒီးယွၤကဘၣ်အသးလၢအီၤလီၤ.
36ပှၤလၢအတထံၣ်န့ၢ်ယၤန့ၣ်, မၤဆါလီၤဒၣ်အသးဒၣ်ဝဲန့ၣ်လီၤ.
ပှၤတဂၤလၢ်လၢ်လၢအသးဟ့ယၤန့ၣ်, အဲၣ်တၢ်သံလီၤ.”
Currently Selected:
လံာ်တၢ်ကူၣ်သ့အတၢ်ကတိၤ 8: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
