လံာ်တၢ်ကူၣ်သ့အတၢ်ကတိၤ 7
7
1ယဖိခွါဧၢ, သ့ၣ်နီၣ်ထီၣ်က့ၤတၢ်လၢယစံးဒီးတၢ်လၢ ယမၢနမၤန့ၣ်သးပ့ၤနီၣ်နီတစုတဂ့ၤ. 2မၤဒ်ယတဲနၤဒီးနကမူလီၤ. ဒီးပာ်သူၣ်ပာ်သးလၢနကမၤထွဲယတၢ် သိၣ်လိထဲသိးသိးဒီးနကဟုကယာ်နမဲာ်ပှၤဖိအသိးန့ၣ်တက့ၢ်. 3ဟံးဃာ်ယတၢ်သိၣ်လိဒီးနၤတထံၣ်ဃီဒီးကွဲးလီၤအီၤလၢနသး အလိၤတက့ၢ်. 4ပာ်တၢ်ကူၣ်သ့ဒ်နဒီပုၢ်ဝဲၢ်မုၣ်ဒီးတၢ်ထံၣ်တၢ်လၢသးအမဲာ်ဒ် နတံၤသကိးတံၢ်တံၢ်အသိးတက့ၢ်. 5အဝဲသ့ၣ်ကဟံးဃာ်နၤယံၤဒီးပှၤအမါတဖၣ်, ဒီးပိာ်မုၣ်တဖၣ်လၢအအိၣ်ဒီးတၢ်ကတိၤကလံာ်န့ၢ်တၢ်န့ၣ်လီၤ.
ပိာ်မုၣ်လၢအသကဲးပဝာ်ဟးဂီၤ
6တဘျီ, ယကွၢ်ဖျိတၢ်လၢယဟံၣ်အပဲတြီဆူတၢ်ချၢ,
7ဒီးယထံၣ်ဘၣ်တ့ၢ်ပှၤပိာ်ခွါသးစၢ်အါဂၤလၢအတၢ်လဲၤခီ ဖျိစှၤဝဲလီၤ. ဘၣ်ဆၣ်ဒီးယပာ်သူၣ်ပာ်သးဘၣ်လၢပှၤအမၢးလီၤဆီ တဂၤန့ၣ်လီၤ. 8အဝဲလဲၤပိာ်ကျဲဘူးဒီးတၢ်သနၢၣ်ဖဲပိာ်မုၣ်တဂၤအိၣ်ဝဲန့ၣ်လီၤ. အဝဲလဲၤတြူာ်ဘူးဒီးပိာ်မုၣ်အံၤအဟံၣ်, 9ဖဲမုၢ်ဟါလီၤတၢ်ခံးလီၤဝံၤအဆၢကတီၢ်န့ၣ်လီၤ.
10ဒီးပိာ်မုၣ်အံၤသဂၢၢ်တ့ၢ်အီၤ, ကူသိးတ့ၢ်တၢ်ဒ်ဃဲသဲမုၣ်တဂၤ အသိးဒီးမၤအတၢ်ကူၣ်တၢ်ကျဲၤတဖၣ်န့ၣ်လီၤ. 11အဝဲမ့ၢ်ပိာ်မုၣ်တဂၤလၢအမဲာ်ကဲၤဒီးတၢ်မဲာ်ဆှးတအိၣ်ဘၣ်, ထီဘိလဲၤဝ့ၤဝီၤတၢ်လၢကျဲမုၢ်တဖၣ်အဖီခိၣ်, 12မ့တမ့ၢ်ဆၢထၢၣ်ခိးတၢ်လၢတၢ်သနၢၣ်, တဘျီဘျီလၢကျဲခိၣ်, တဘျီဘျီလၢဖၠါပူၤလီၤ. 13ပိာ်မုၣ်အံၤဖိးဟုဃီၤပိာ်ခွါသးစၢ်န့ၣ်, နၢမူအီၤ, ကွၢ်အမဲာ်လိၤလိၤဒီးစံးဝဲ, 14“ယမၤတ့ၢ်ယတၢ်လုၢ်မၤဘူၣ်တဖၣ်တနံၤအံၤဒီးအိၣ်ဒီးတၢ်ညၣ်လၢ တၢ်လုၢ်တၢ်ပာ်တဖၣ်အဂီၢ်န့ၣ်လီၤ. 15အဃိဒီးယဟဲထီၣ်ကွၢ်ဃုနၤ, ယသးအိၣ်ထံၣ်နၤဒီးခဲအံၤယထံၣ် နၤလံ. 16ယဒါလီၤယလီၢ်မံလၢလီၢ်မံဒါတဖၣ်အိၣ်ဒီးအလွဲၢ်အကလုာ် ကလုာ်လၢအဟဲလၢကီၢ်အဲၤကူပတူးန့ၣ်လီၤ. 17ယမၤနၢမူအီၤလၢမူရၣ်, သ့ၣ်နၢမူအသိဒီးကဒါရါလီၤ. 18ဟဲဃီၤတက့ၢ်. မ်ပမံဃုာ်ဒီနၤညါဒီးမၤမုာ်လၤသးခုပသးလၢ တၢ်အဲၣ်တၢ်ကွံအပူၤတက့ၢ်. 19ယဝၤတအိၣ်လၢဟံၣ်ဘၣ်. အဝဲအိၣ်ဒီးတၢ်လဲၤတၢ်က့ၤဖးယံၤဖးကွ့ၤ လီၤ. 20အဝဲစိာ်ဃုာ်စ့ဒီးအီၤအါမးဒီးလၢခံနွံအတီၢ်ပူၤန့ၣ်တဟဲ က့ၤဝဲဘၣ်.” 21ဒီးပိာ်မုၣ်အံၤလ့ပစီအီၤလၢအတၢ်ဃံတၢ်လၤတဖၣ်, ဒီးအဝဲ ဟ့ၣ်လီၤကွံာ်အသးလၢတၢ်ကတိၤလၢအဘျ့မးအပူၤန့ၣ်လီၤ. 22တကီၢ်ခါအဝဲပိာ်ထီၣ်ပိာ်မုၣ်အံၤအခံဒ်ကျီၢ်တဒုဘၣ်တၢ်စိာ်အီၤ ဆူတၢ်မၤသံအလီၢ်အသိး, ဒီးဒ်တၤဟိတဒုစံၣ်နုာ်ဆူပျံၤသကွီၤ ပူၤအသိး, 23ဖဲပျၢ်တဘ့ၣ်ကဆဲးထူၣ်ဖျိအသးန့ၣ်လီၤ. အဝဲလီၤဂာ်ဒ်ထိၣ်တဘ့ၣ်လၢအလဲၤနုာ်ဆူပှာ်ဧိၤစၤဧိၤအအိၣ် အသိးလီၤ. အဝဲတသ့ၣ်ညါဝဲလၢအသးသမူအိၣ်လၢတၢ်လီၤဘၣ်ယိာ်ဘၣ်ဘီ အပူၤဘၣ်.
24ဒီးခဲကနံၣ်အံၤယဖိခွါသ့ၣ်ဧၢ, ဒိကနၣ်ယၤတက့ၢ်. ပာ်သူၣ်ပာ်သးသပှၢ်ပှၢ်လၢတၢ်လၢယစံးဘၣ်သုန့ၣ်တက့ၢ်. 25ပျဲပိာ်မုၣ်ဒ်န့ၣ်အသိးတဂၤမၤန့ၢ်မၤနၢၤသုသးတဂ့ၤ. လဲၤပိာ်ထွဲအခံတဂ့ၤ. 26အဝဲမ့ၢ်တ့ၢ်တၢ်ဟးဂီၤလၢပှၤပိာ်ခွါအါဂၤအဂီၢ်ဒီးမၤသံပှၤ တဘျုးဂၤလၢတၢ်ဂံၢ်အီၤတသ့ဘၣ်လီၤ. 27သုမ့ၢ်လဲၤဆူအဝဲအဟံၣ်ဒီး, သုအိၣ်လံလၢကျဲလဲၤဆူတၢ်သံ အကီၢ်ပူၤန့ၣ်လီၤ. မ့ၢ်ကျဲတဲာ်ဖုၣ်ဆူတၢ်သံန့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 7: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
