လံာ်တၢ်ကူၣ်သ့အတၢ်ကတိၤ 17
17
1တၢ်အီၣ်ကိၣ်အဃ့တမီလၢအတၢ်ဃူတၢ်ဖိးအပူၤန့ၣ်ဂ့ၤန့ၢ်တၢ်အီၣ် အမူးဖးဒိၣ်လၢဟံၣ်လၢအပှဲၤဒီးတၢ်ကီတၢ်ခဲန့ၣ်လီၤ.
2ကုၢ်လၢအအိၣ်ဒီးတၢ်ကူၣ်တၢ်ဆးတဂၤန့ၣ်ကမၤန့ၢ်တၢ်စိတၢ်ကမီၤ လၢအကစၢ်အဖိခွါလၢတဂိာ်တသီၣ်ဘၣ်တဂၤအဖီခိၣ်ဒီးဒိး န့ၢ်တၢ်န့ၢ်သါတနီၤလီၤ.
3ထူဒီးစ့ဘၣ်တၢ်မၤကွၢ်အီၤလၢမ့ၣ်အူဒီးပှၤကညီတဂၤအသးန့ၣ် ဘၣ်တၢ်မၤကွၢ်အီၤလၢယွၤလီၤ.
4ပှၤမၤတၢ်အၢဒိကနၣ်တၢ်ဆိကမိၣ်အအၢအသီတဖၣ်, ဒီးပှၤလီတၢ်တဖၣ်ဒိကနၣ်တၢ်လီတၢ်ဝ့ၤတဖၣ်လီၤ.
5နမ့ၢ်နံၤဘၣ်ဖၣ်လဲပှၤဖှီၣ်ဖိယာ်ဖိဒီးနဒုၣ်ဒွဲၣ်ကစၢ်ယွၤလၢ အတ့လီၤအဝဲသ့ၣ်လီၤ. နမ့ၢ်သးခုလၢပှၤအဂၤတဂၤအတၢ်ဟဲဝံတဂ့ၤတဘၣ်ဒီး, နကဘၣ်တၢ်စံၣ်ညီၣ်လီၤ.
6ပှၤသးပှၢ်တဖၣ်ပာ်ကဖၢလၢအသးလၢအလံၤတဖၣ်အဃိဒ်ဖိသၣ်ပိာ်ခွါ တဖၣ်ပာ်ကဖၢလၢအသးလၢအပၢ်တဖၣ်အဃိအသိးန့ၣ်လီၤ.
7ပှၤလၢတၢ်လီၤယူးယီၣ်ပာ်ကဲအီၤတဖၣ်တကတိၤတၢ်လီတၢ်ဝ့ၤတဖၣ် ဘၣ်. ဒီးပှၤဟးဂီၤဖိတဖၣ်တအိၣ်ဒီးတၢ်ကတိၤလၢအလုၢ်အပှ့ၤအိၣ် နီတမံၤဘၣ်.
8ပှၤတနီၤဆိကမိၣ်ဝဲလၢတၢ်ဟ့ၣ်ခိၣ်ဖးလာ်ဆှိးမၤတၢ်ဒ်တၢ်မၤ ကဒါပှၤမဲာ်တခါအသိး, ဒီးဆိကမိၣ်ဝဲလၢတၢ်အံၤမၤတၢ်သ့ခဲလၢာ်လီၤ.
9နမ့ၢ်အဲၣ်ဒိးပှၤဘၣ်အသးလၢနၤဒီးဖဲအမၤကမၣ်နၤန့ၣ်ပျၢ် အတၢ်ကမၣ်တက့ၢ်. တၢ်သ့ၣ်နီၣ်ထီၣ်တၢ်ကမၣ်တဖၣ်န့ၣ်, မၤလီၤဖးတၢ်ဒီတံၤဒီသကိးသ့ဝဲလီၤ.
10ပှၤသူၣ်ဆးသးဆးတဂၤမၤလိန့ၢ်တၢ်ခီဖျိတၢ်သိၣ်ဃီၣ်တထံၣ်ဒိၣ် န့ၣ်ဒံးပှၤဟးဂီၤဖိတဂၤမၤလိန့ၢ်တၢ်ခီဖျိတၢ်တီၢ်အီၤအဘီ တကယၤတက့ၢ်လီၤ.
11တၢ်သံကဟဲဝဲဒၣ်ဒ်ပှၤစိာ်တၢ်ကစီၣ်အအၢတဂၤအသိးဆူပှၤ တတီတလိၤတဖၣ်လၢအထိၣ်ဟူးထိၣ်ဂဲၤထီၣ်တၢ်ကီတၢ်ခဲ တဘိယူၢ်ဃီန့ၣ်လီၤ.
12တၢ်သဂၢၢ်ဘၣ်တၤသူမိၢ်တဒုလၢပှၤဟုၣ်န့ၢ်အဖိတဖၣ်န့ၣ်ဂ့ၤန့ၢ် ဒိၣ်န့ၢ်ဒံးတၢ်သဂၢၢ်ဘၣ်ပှၤဟးဂီၤဖိတနီၤလၢအတၢ်မၤအါဝဲဒၣ် လၢတၢ်မၤတဂိာ်တသီၣ်ဘၣ်တဖၣ်တက့ၢ်လီၤ.
13နမ့ၢ်ဟ့ၣ်ကၣ်တၢ်အၢလၢတၢ်ဂ့ၤအဂီၢ်န့ၣ်, နထုးထီၣ်ကွံာ်တၢ်အၢတၢ်သီလၢနဟံၣ်ပူၤတသ့နီတဘျီဘၣ်.
14တၢ်စးထီၣ်တၢ်ဂ့ၢ်လိာ်ဘှီလိာ်တမံၤန့ၣ်လီၤဂာ်ဒ်ထံတမၢၣ်တဘိ အတၢ်စးထီၣ်ကၢ်အသိးလီၤ. ဆိကတီၢ်အီၤတချုးလၢအလဲၤ ဆူညါန့ၣ်တက့ၢ်.
15တၢ်စံၣ်ညီၣ်ဃၣ်ပှၤလၢအတၢ်ကမၣ်တအိၣ်ဘၣ်ဒီးပျၢ်ဖျဲးပှၤတတီ တလိၤန့ၣ်, မ့ၢ်တၢ်လီၤသးဟ့လၢယွၤအမဲာ်ညါခံမံၤလိာ်လီၤ.
16ပှၤဟးဂီၤဖိမၤလၢာ်စ့လၢတၢ်မၤလိမၤဒိးအဂီၢ်န့ၣ်တမၤဂ့ၤ ဘၣ်အီၤဘၣ်. အဂ့ၢ်ဒ်အံၤ, အတၢ်ဆိကမိၣ်ကွၢ်ထံကွၢ်ဆးတအိၣ်ဘၣ်အဃိလီၤ.
17တံၤသကိးတဖၣ်ဒုးနဲၣ်အတၢ်အဲၣ်တၢ်ကွံထီဘိလီၤ. မ့တမ့ၢ်လၢတၢ်နီၤတူၢ်သကိးတၢ်ကီတၢ်ခဲဘၣ်ဒီးဒီပုၢ်ဝဲၢ်တဖၣ် အိၣ်လၢမနုၤအဂီၢ်လဲၣ်.
18ထဲဒၣ်ပှၤလၢအသးတဆးတဂၤဧိၤကအၢၣ်လီၤအီၤလီၤလၢကဟံးန့ၢ်မူ ဒါလၢပှၤအဂၤတဂၤအဒ့ၣ်ကမၣ်တဖၣ်အဂီၢ်လီၤ.
19တၢ်အဲၣ်တၢ်ဒဲးဘးန့ၣ်မ့ၢ်တၢ်အဲၣ်တၢ်မၤကီမၤခဲတၢ်လီၤ. နမ့ၢ်ကတိၤဒိၣ်နကိာ်ကိးဆၢကတီၢ်ဒဲးန့ၣ်, နဃုန့ၢ်တၢ်ကီတၢ်ခဲန့ၣ်လီၤ.
20ပှၤတဂၤလၢအဆိကမိၣ်ဒီးကတိၤတၢ်အၢတၢ်သီန့ၣ်, မုၢ်လၢ်ဝဲသ့ဒၣ်ထဲကထံၣ်န့ၢ်တၢ်နးတၢ်ဖှီၣ်ဒီးထံၣ်န့ၢ်တၢ် အဂ့ၤတသ့ဘၣ်နီတမံၤဘၣ်.
21လၢပၢ်တဂၤ, လၢအဖိခွါမၤတၢ်တဂိာ်တသီၣ်ဘၣ်တဖၣ်အဂီၢ်န့ၣ်, အိၣ်ဒၣ်ထဲတၢ်သူၣ်အုးသးအုးဒီးတၢ်အဂၤတအိၣ်ဘၣ်လၢအဂီၢ်နီ တမံၤဘၣ်.
22သးလၢအခုန့ၣ်ဒုးအိၣ်ဆူၣ်အိၣ်ချ့နၤလီၤ. မ့မ့ၢ်တၢ်မဲာ်လီၤသပှၢ်တဘိယူၢ်ဃီမ့ၢ်တၢ်သံကယီကယီလီၤ.
23စံၣ်ညီၣ်ကွီၢ်တတီတတြၢ်တဖၣ်တူၢ်လိာ်တၢ်ဟ့ၣ်ခူသူၣ်ခိၣ်ဖး လာ်ဆှိးလီၤ. အန့ၣ်ဒီးတၢ်စံၣ်ညီၣ်တီတမၤအသးဘၣ်.
24ပှၤလၢအသူၣ်ဆးသးဆးတဂၤန့ၣ်ကွၢ်စိဃီၤဆူတၢ်ကူၣ်သ့ အတၢ်မၤလီၤ. မ့မ့ၢ်ပှၤဟးဂီၤဖိတဂၤန့ၣ်စးထီၣ်လဲၤတၢ်လၢ တၢ်ပညိၣ်အါမံၤအပူၤလီၤ.
25ဖိခွါလၢအဟးဂီၤတဂၤဟဲစိာ်တၢ်သူၣ်အုးသးအုးဆူအပၢ် အအိၣ်ဒီးတၢ်သးဟးဂီၤအခၣ်တဖၣ်ဆူအမိၢ်အအိၣ်န့ၣ်လီၤ.
26တၢ်မၢပှၤလၢအတၢ်ကမၣ်တအိၣ်တဂၤလိးက့ၤစ့န့ၣ်တဘၣ်ဘၣ်. တၢ်စံၣ်ညီၣ်တီဘၣ်တၢ်ဘိးကဒါကွံာ်အီၤဖဲပှၤအဂ့ၤတဖၣ်ဘၣ်တၢ် စံၣ်ညီၣ်အီၤလီၤ.
27ပှၤလၢအနာ်လီၤအသးလီၤတံၢ်လီၤဆဲးတဂၤန့ၣ်တကတိၤတၢ်တပယူာ်ဃီ ဘၣ်. ဒီးပှၤလၢအပာ်အသးခုၣ်ခုၣ်မုာ်မုာ်န့ၣ်မ့ၢ်ပှၤတဂၤလၢအအိၣ်ဒီး တၢ်ထံၣ်တၢ်နီၢ်နီၢ်န့ၣ်လၢသးအမဲာ်န့ၣ်လီၤ.
28ပမ့ၢ်ဘၣ်စံးတၢ်အလၢာ်န့ၣ်ပှၤဟးဂီၤဖိတဂၤဒၣ်လဲာ်မ့ၢ်အိၣ်ဘှီၣ် ဒီးကးတံၢ်အထးခိၣ်န့ၣ်, တၢ်ကပာ်ဒီးဆိကမိၣ်အီၤလၢအမ့ၢ်ပှၤကူၣ်သ့ဒီးပှၤသူၣ်ဆးသးဆး တဂၤန့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 17: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
