လံာ်တၢ်ကူၣ်သ့အတၢ်ကတိၤ 14
14
1ဟံၣ်တဖၣ်ဘၣ်တၢ်မၤထီၣ်အီၤလၢပိာ်မုၣ်တဖၣ်အတၢ်ကူၣ်သ့, ဘၣ်ဆၣ်, ဘၣ်တၢ်မၤဟးဂီၤအီၤလၢတၢ်သူၣ်တဆးသးတဆးန့ၣ်လီၤ.
2တၢ်အိၣ်မူတီတီလိၤလိၤမ့ၢ်နတၢ်ပာ်ဖျါထီၣ်နအိၣ်ဒီးတၢ်ပျံၤ ယွၤလီၤ. တၢ်အိၣ်မူတတီတလိၤန့ၣ်မ့ၢ်နတၢ်ပာ်ဖျါထီၣ်လၢနတအိၣ် ဒီးတၢ်ပျံၤအီၤဘၣ်လီၤ.
3ပှၤဟးဂီၤဖိအတၢ်ပာ်ထီၣ်ထီအသးမၢအကတိၤတၢ်အါကဲာ်ဆိးလီၤ. ပှၤကူၣ်သ့တဂၤအတၢ်ကတိၤတဖၣ်ကဟုကယာ်က့ၤအီၤလီၤ.
4ကျီၢ်ဖါတဖၣ်မ့ၢ်တအိၣ်လၢထဲၣ်တၢ်အဂီၢ်ဘၣ်ဒီး, နသိၣ်နဖီ ကအိၣ်ကလီဝဲလီၤ. မ့မ့ၢ်, တၢ်မၤသကိးဃုာ်တၢ်ဒီးအဝဲ သ့ၣ်န့ၣ်, ကမၤပှဲၤနသိၣ်နဖီလၢဘုဧိၤဟုဧိၤလီၤ.
5ပှၤအုၣ်အသးလၢတၢ်နာ်န့ၢ်အီၤသ့တဲတၢ်မ့ၢ်တၢ်တီထီဘိလီၤ. မ့မ့ၢ်, ပှၤလၢတၢ်နာ်န့ၢ်အီၤတသ့ဘၣ်တဂၤတဲဒၣ်ထဲတၢ်လီတၢ်ဝ့ၤ တဖၣ်ဧိၤလီၤ.
6ပှၤလၢအပာ်ဒိၣ်ပာ်ဂ့ၤအသးတဖၣ်ကဲထီၣ်ပှၤကူၣ်သ့တန့ၢ်ဘၣ်နီ တဘျီဘၣ်. မ့မ့ၢ်, ပှၤလၢအအိၣ်ဒီးတၢ်သူၣ်ဆးသးဆးတဖၣ်မၤလိန့ၢ်တၢ်ညီကဒၣ်လီၤ.
7အိၣ်ယံၤဒီးပှၤဟးဂီၤဖိတဖၣ်တက့ၢ်. အဝဲသ့ၣ်ကသိၣ်လိနၤအဂီၢ် တၢ်တအိၣ်နီတမံၤဘၣ်.
8ဘၣ်မနုၤအဃိပှၤလၢအသူၣ်ပ့ၢ်သးဆှါတဂၤကူၣ်တၢ်သ့လဲၣ်. အဂ့ၢ်ဒ်အံၤ, သ့ၣ်ညါတၢ်လၢအဘၣ်မၤဝဲအဃိလီၤ. ဘၣ်မနုၤအဃိပှၤဟးဂီၤဖိတဂၤအသးတဆးလဲၣ်. အဂ့ၢ်ဒ်အံၤ, ဆိကမိၣ်ဝဲထဲအသ့ၣ်ညါတၢ်အဃိလီၤ.
9ပှၤဟးဂီၤဖိမ့ၢ်မၤဒဲးဘးတၢ်ဒၣ်လဲာ်တပာ်ဝဲလၢတၢ်နီတမံၤဘၣ်. မ့မ့ၢ်ပှၤအဂ့ၤအဲၣ်ဒိးဝဲလၢတၢ်ကပျၢ်အတၢ်ကမၣ်လီၤ.
10နတၢ်သးခုမ့ၢ်နတၢ်ဒၣ်နဲဒီးနတၢ်သးခၣ်မ့ၢ်နတၢ်ဒၣ်နဲလီၤ. ပှၤဒိးဃုာ်တၢ်ဒီးနၤတသ့ဘၣ်နီတဂၤဘၣ်.
11ပှၤအဂ့ၤတဂၤအဟံၣ်ကအိၣ်ဆၢထၢၣ်ဒံးဝဲဖဲပှၤအၢပှၤသီတဂၤ အဟံၣ်ဘၣ်တၢ်မၤလီၤပှီၢ်ကွံာ်အီၤန့ၣ်လီၤ.
12တၢ်လၢနဆိကမိၣ်မ့ၢ်ကျဲအဘၣ်န့ၣ်, ဆှၢနၤဆူတၢ်သံသ့ဝဲလီၤ.
13တၢ်နံၤတၢ်အ့ပာ်ခူသူၣ်တၢ်သူၣ်အုးသးအုးလီၤ. ဒီးဖဲတၢ်သူၣ်ခုသးခုလၢာ်ကွံာ်န့ၣ်, တၢ်သူၣ်အုးသးအုးအိၣ် ဖဲန့ၣ်ထီဘိလီၤ.
14ပှၤအၢပှၤသီတဖၣ်ကဒိးန့ၢ်တၢ်ကြၢးဒီးအီၤလီၤ. ပှၤဂ့ၤပှၤဝါတဖၣ်ကဘၣ်တၢ်ဟ့ၣ်ဘျုးအီၤလၢအတၢ်မၤတဖၣ်အဃိလီၤ.
15ပှၤဟးဂီၤဖိကနာ်တၢ်တမံၤဂ့ၤတမံၤဂ့ၤလီၤ. မ့မ့ၢ်, ပှၤလၢအသူၣ်ဆးသးဆးတဖၣ်ပလီၢ်ပဒီအသးလၢ အခီၣ်ကါန့ၣ်လီၤ.
16ပှၤသူၣ်ထံသးဆးတဖၣ်ပလီၢ်အသးလၢကအိၣ်ယံၤဒီးတၢ်အၢတၢ်သီ လီၤ. မ့မ့ၢ်, ပှၤအမၢးတဖၣ်တပလီၢ်အသးဘၣ်ဒီးမၤကြီတၢ်လီၤ.
17ပှၤလၢအသးထီၣ်ကဲၤတဖၣ်မၤပှၤဟးဂီၤဖိအတၢ်မၤလီၤ. ပှၤလၢအကူၣ်သ့ဒိၣ်ဒၣ်တၢ်တက့ၢ်တဖၣ်အိၣ်ဝဲခုၣ်ခုၣ်မုာ်မုာ်လီၤ.
18ပှၤလၢအတမၤလိမၤဒိးဘၣ်တၢ်တဖၣ်န့ၣ်ဒိးန့ၢ်တၢ်ကြၢးဒီး အတၢ်သူၣ်တထံသးတဆးန့ၣ်လီၤ. မ့မ့ၢ်ပှၤလၢအသူၣ်ပ့ၢ်သးဆှါတဖၣ်န့ၣ်ဘၣ်တၢ်ဟ့ၣ်ဘျုးအီၤလၢ တၢ်သ့ၣ်ညါန့ၣ်လီၤ.
19ပှၤအၢပှၤသီတဖၣ်ကဘၣ်သကူးလီၤအသးလၢပှၤတီပှၤလိၤ အမဲာ်ညါဒီးလၢတၢ်ဆီၣ်လီၤသးအပူၤဃ့ကညးအဝဲသ့ၣ် အတၢ်ကွၢ်မဲာ်န့ၣ်လီၤ.
20ပှၤဖှီၣ်ဖိယာ်ဖိန့ၣ်ဘၣ်တၢ်သးဟ့အီၤလၢပှၤလၢအဃၢၤ ဒၣ်လဲာ်လီၤ. မ့မ့ၢ်, ပှၤထူးပှၤတီၤအိၣ်ဒီးအတံၤသကိးအါဂၤလီၤ.
21နမ့ၢ်အဲၣ်ဒိးဘၣ်ဆိၣ်ဂ့ၤန့ၣ်, သးကညီၤပှၤဖှီၣ်ဖိယာ်ဖိတက့ၢ်. တၢ်သးဘၣ်အၢပှၤတဂၤလၢ်လၢ်န့ၣ်မ့ၢ်တၢ်ဒဲးဘးလီၤ.
22နမ့ၢ်မၤတၢ်လၢတၢ်ဂ့ၤအဂီၢ်ဒီးနကဒိးန့ၢ်ပှၤဂၤတဖၣ်အတၢ်နာ်ဒီး အတၢ်ပာ်ကဲန့ၣ်လီၤ. နမ့ၢ်မၤတၢ်လၢတၢ်အၢအဂီၢ်ဒီး, နမၤကမၣ်တၢ်တမံၤန့ၣ်လီၤ.
23မၤတၢ်တက့ၢ်. ဒီးနကလုၢ်အီၣ်နသးသမူလီၤ. နမ့ၢ်ဆ့ၣ်နီၤကတိၤထဲတၢ်ဒီးနကဖှီၣ်ကယာ်လီၤ.
24ပှၤကူၣ်သ့တဖၣ်ဘၣ်တၢ်ဟ့ၣ်ဘျုးအီၤလၢတၢ်ထူးတၢ်တီၤလီၤ. မ့မ့ၢ်ပှၤဟးဂီၤဖိတဖၣ်ဘၣ်တၢ်သ့ၣ်ညါအီၤလၢအတၢ်ဟးဂီၤဒၣ်ဝဲ န့ၣ်လီၤ.
25ပှၤအုၣ်အသးတဂၤလၢအကတိၤတၢ်မ့ၢ်တၢ်တီန့ၣ်, မၤပူၤဖျဲးသးသမူတဖၣ်လီၤ. မ့မ့ၢ်ပှၤကတိၤလီတၢ်တဂၤန့ၣ်, ဆါလီၤအီၣ်ကွံာ်ပှၤဂီၢ်မုၢ်လီၤ.
26တၢ်ယူးယီၣ်ယွၤန့ၣ်ဟ့ၣ်တၢ်နာ်အဂၢၢ်အကျၢၤဒီးတၢ်အိၣ်ဘံၣ်အိၣ်ဘၢ လၢပှၤတဂၤဒီးအဟံၣ်ဖိဃီဖိအဂီၢ်လီၤ.
27မ့ၢ်နအဲၣ်ဒိးပဒ့ၣ်ဟးဆှဲးတၢ်သံဧါ. တၢ်ယူးယီၣ်ယွၤန့ၣ်မ့ၢ် တၢ်မူအထံထီၣ်ပၢၢ်လီၤ.
28စီၤပၤတဂၤအတၢ်ဒိၣ်တၢ်မုၢ်န့ၣ်သန့ၤထီၣ်အသးလၢအပၢဘၣ်ပှၤပှံၤဂၤ လဲၣ်န့ၣ်လီၤ. ပှၤဂီၢ်မုၢ်တအိၣ်ဘၣ်ဒီးအဝဲတမ့ၢ်တၢ်နီတမံၤဘၣ် န့ၣ်လီၤ.
29နမ့ၢ်အိၣ်ခုၣ်ခုၣ်မုာ်မုာ်ဒီးနမ့ၢ်ပှၤကူၣ်သ့လီၤ. ဘၣ်ဆၣ်နမ့ၢ်အိၣ်ဒီးတၢ်သးထီၣ်ကဲၤန့ၣ်, နပာ်ဖျါထီၣ်ဒၣ်လၢနမ့ၢ် ပှၤအမၢးထဲလဲၣ်ထဲလဲၣ်န့ၣ်လီၤ.
30သးအတၢ်ဃူတၢ်ဖိးန့ၣ်, ဟ့ၣ်နီၢ်ခိအတၢ်အိၣ်ဆူၣ်အိၣ်ချ့လီၤ. မ့မ့ၢ်တၢ်သူၣ်က့ၣ်သးကါန့ၣ်မၤအသးဒ်တၢ်ဆါအုၣ်လီၤသပှီၤအသိး န့ၣ်လီၤ.
31နမ့ၢ်မၤအၢမၤနးပှၤဖှီၣ်ဖိယာ်ဖိန့ၣ်, နဒုၣ်ဒွဲၣ်ယွၤလၢအတ့ လီၤအီၤန့ၣ်လီၤ. မ့မ့ၢ်တၢ်ဒုးနဲၣ်တၢ်သးကညီၤဆူပှၤဖှီၣ်ဖိယာ်ဖိန့ၣ်, မ့ၢ်တၢ်ဘူၣ်ထီၣ်ဘါထီၣ်ယွၤအက့ၢ်အဂီၤတမံၤလီၤ.
32ပှၤအၢပှၤသီဟဲစိာ်အတၢ်လီၤပှီၢ်ဒၣ်ဝဲခီဖျိအတၢ်မၤအအၢအသီ တဖၣ်လီၤ. မ့မ့ၢ်ပှၤအဂ့ၤအဝါတဖၣ်န့ၣ်ဘၣ်တၢ်ဒီဒၣ်အီၤလၢအတၢ်လၢတၢ်ပှဲၤ အဃိလီၤ.
33တၢ်ကူၣ်သ့အိၣ်ဝဲလၢပှၤအသူၣ်ဆးသးဆးတဂၤအတၢ်ဆိကမိၣ်ခဲလၢာ် အပူၤလီၤ. ပှၤဟးဂီၤဖိတဖၣ်တသ့ၣ်ညါတၢ်ဘၣ်ဃးဒီးတၢ်ကူၣ်သ့နီတမံၤဘၣ်.
34တၢ်တီတၢ်လိၤန့ၣ်မၤဒိၣ်ထီၣ်ထီထီၣ်ပှၤတကလုာ်လီၤ. တၢ်ဒဲးဘးန့ၣ်မ့ၢ်တၢ်မဲာ်ဆှးတမံၤလၢပှၤတကလုာ်လၢ်လၢ်အဂီၢ်လီၤ.
35စီၤပၤတဖၣ်ဘၣ်အသးလၢအခ့အပှၤလၢအမၤတၢ်သ့မၤတၢ်ဘၣ် တဖၣ်လီၤ. မ့မ့ၢ်အဝဲသ့ၣ်စံၣ်ညီၣ်ပှၤတဖၣ်လၢအမၤမဲာ်ဆှးအီၤန့ၣ် လီၤ.
Currently Selected:
လံာ်တၢ်ကူၣ်သ့အတၢ်ကတိၤ 14: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
