လံာ်တၢ်ကူၣ်သ့အတၢ်ကတိၤ 15
15
1တၢ်စံးဆၢကပုာ်လုာ်တဘီန့ၣ်, မၤမုာ်မၤခုၣ်လီၤတၢ်သးဒိၣ်လီၤ. မ့မ့ၢ်တၢ်ကတိၤဆူၣ်ဆူၣ်ကိၤကိၤတဘီန့ၣ်ထိၣ်ဂဲၤထီၣ်တၢ်သးဒိၣ် လီၤ.
2ဖဲပှၤကူၣ်သ့ကတိၤတၢ်န့ၣ်, ဒုးကဲထီၣ်တၢ်သ့ၣ်ညါလၢတၢ်ထုးန့ၢ် ပှၤအသးလီၤ. မ့မ့ၢ်ပှၤဟးဂီၤဖိအထးခိၣ်ဖျိးထီၣ်လၢတၢ်တဂီာ်တသီၣ်ဘၣ်န့ၣ်လီၤ.
3ယွၤထံၣ်တၢ်မၤအသးလၢတၢ်အလီၢ်ကိးပူၤဒဲးလီၤ. ဒီးမ့ၢ်ပမၤတၢ်ဂ့ၤဧါ, တၢ်အၢဧါန့ၣ်, အဝဲခိးကွၢ်ပှၤန့ၣ်လီၤ.
4တၢ်ကတိၤအမုာ်တဖၣ်န့ၣ်ဟဲစိာ်တၢ်မူလီၤ. မ့မ့ၢ်တၢ်ကတိၤအအၢအသီတဖၣ်မၤသဘှံးနသးလီၤ.
5တၢ်တပာ်ကဲတၢ်လၢနပၢ်သိၣ်လိသီလိနၤန့ၣ်မ့ၢ်တၢ်ဟးဂီၤလီၤ. တၢ်တူၢ်လိာ်အတၢ်သိၣ်က့ၤသီက့ၤန့ၣ်မ့ၢ်တၢ်ကူၣ်သ့လီၤ.
6ပှၤအတီအလိၤတဖၣ်ပၢၤဃာ်အတၢ်ထူးတၢ်တီၤလီၤ. မ့မ့ၢ်ပှၤတတီတလိၤတဖၣ်မၤလီၤမၢ်ကွံာ်အတၢ်ထူးတၢ်တီၤဖဲ တၢ်ဆၢကတီၢ်အကီအခဲတဖၣ်ဟဲဝဲန့ၣ်လီၤ.
7တၢ်သ့ၣ်ညါန့ၣ်ဘၣ်တၢ်ရၤလီၤအီၤလၢပှၤလၢအကူၣ်တၢ်သ့တဖၣ်ဒီး တမ့ၢ်ဘၣ်လၢပှၤဟးဂီၤဖိတဖၣ်န့ၣ်ဘၣ်.
8ဖဲပှၤအဂ့ၤတဖၣ်ဘါထုကဖၣ်တၢ်န့ၣ်ယွၤသးခုဝဲလီၤ. မ့မ့ၢ်ပှၤအၢပှၤသီတဖၣ်အတၢ်လုၢ်တၢ်ပာ်တဖၣ်လၢအဟဲစိာ်ဝဲန့ၣ်, ယွၤသးဟ့အီၤလီၤ.
9ယွၤသးဟ့ပှၤအအၢအသီတဖၣ်အကျဲတဖၣ်လီၤ. မ့မ့ၢ်အဲၣ်ပှၤတဖၣ်လၢအမၤတၢ်အဘၣ်န့ၣ်လီၤ.
10နမ့ၢ်မၤတၢ်လၢအကမၣ်ဒီး, နကဘၣ်တၢ်စံၣ်ညီၣ်နၤဆါဆါကလဲာ်လီၤ. နမ့ၢ်တပျဲတၢ်သိၣ်က့ၤသီက့ၤနၤဘၣ်ဒီး, နကသံလီၤ.
11တၢ်သံအကီၢ်ဒီးလရာ်န့ၣ်အိၣ်အိးထီၣ်အသးလၢယွၤအမဲာ်ညါလီၤ. မၤသးဒ်န့ၣ်ဒီးပှၤကညီပာ်ခူသူၣ်အတၢ်ဆိကမိၣ်တဖၣ်လၢယွၤအမဲာ်ညါ ကသ့ဒ်လဲၣ်.
12ပှၤလၢအပာ်ထီၣ်ထီအသးတဖၣ်န့ၣ်တအဲၣ်ဒိးတၢ်သိၣ်က့ၤသီက့ၤ အီၤဘၣ်. အဝဲသ့ၣ်တဃ့တၢ်ဟ့ၣ်ကူၣ်ဟ့ၣ်ဖးလၢပှၤကူၣ်တၢ်သ့ န့ၢ်အီၤ, နီတဘျီဘၣ်.
13ဖဲပှၤသးခုန့ၣ်အဝဲသ့ၣ်နံၤကမှံဝဲလီၤ. မ့မ့ၢ်ဖဲအဝဲသ့ၣ် သးအုးန့ၣ်အဝဲသ့ၣ်ဖျါသူၣ်ကၢ်သးလီၤဝဲလီၤ.
14ပှၤလၢအအိၣ်ဒီးတၢ်သူၣ်ဆးသးဆးန့ၣ်သးအိၣ်မၤလိတၢ်လီၤ. မ့မ့ၢ်ပှၤလၢအသးတဆးတဖၣ်န့ၣ်သးမံဒၣ်ဝဲလၢအတၢ်တမၤလိ မၤဒိးတၢ်အပူၤန့ၣ်လီၤ.
15ပှၤဖှီၣ်ဖိယာ်ဖိအတၢ်အိၣ်မူန့ၣ်မ့ၢ်တၢ်ဘၣ်ဂဲၤပျုၢ်တထံၣ်ဃီလီၤ. မ့မ့ၢ်ပှၤလၢသူၣ်ဖှံသးညီတဖၣ်မုာ်လၤသးခုလၢအတၢ်အိၣ်မူ ထီဘိလီၤ.
16ဂ့ၤတက့ၢ်လၢပဖှီၣ်ဒီးပျံၤယွၤဒိၣ်န့ၢ်ပထူးပတီၤဒီးအိၣ်လၢ တၢ်ကီတၢ်ခဲအပူၤန့ၣ်လီၤ.
17ဂ့ၤတက့ၢ်လၢတၢ်အီၣ်တၢ်ဒိးတၢ်လၣ်တဖၣ်ဃုာ်ဒီးပှၤလၢနအဲၣ်အီၤ တဖၣ်ဒိၣ်န့ၢ်တၢ်အီၣ်တၢ်ဖံးတၢ်ညၣ်အဂ့ၤကတၢၢ်ဖဲတၢ်သးဟ့အိၣ်ဝဲ န့ၣ်လီၤ.
18တၢ်သးကဲၤထီၣ်ဒုးအိၣ်ထီၣ်တၢ်ဂ့ၢ်လိာ်ဘှီလိာ်တဖၣ်လီၤ. မ့မ့ၢ်, တၢ်ဝံသးစူၤဟဲစိာ်တၢ်ဃူတၢ်ဖိးလီၤ.
19နမ့ၢ်ကၢၣ်ဒီးနကထံၣ်လိာ်တၢ်ကီတၢ်ခဲလၢတၢ်လီၢ်ကိးပူၤဒဲးလီၤ. ဘၣ်ဆၣ်နမ့ၢ်တီမ့ၢ်လိၤဒီးတၢ်ကီတၢ်ခဲတအိၣ်လၢနဂီၢ်ဘၣ်.
20ဖိခွါလၢအကူၣ်သ့န့ၣ်ဒုးသးခုအပၢ်အသးလီၤ. မ့မ့ၢ်ထဲဒၣ်ပှၤဟးဂီၤဖိတဂၤန့ၣ်တပာ်ကဲဘၣ်အမိၢ်ဘၣ်.
21ပှၤဟးဂီၤဖိသးခုဝဲလၢအတၢ်မၢးအပူၤလီၤ. မ့မ့ၢ်ပှၤကူၣ်သ့န့ၣ်ကမၤတၢ်လၢအဘၣ်န့ၣ်လီၤ.
22မၤန့ၢ်ကယဲၢ်တၢ်ဟ့ၣ်ကူၣ်ဟ့ၣ်ဖးခဲလၢာ်လၢနမၤန့ၢ်အီၤသ့ဒီး နတၢ်မၤကကဲထီၣ်လိၣ်ထီၣ်လီၤ. တၢ်အံၤမ့ၢ်တအိၣ်ဒီးနတၢ်မၤကဟးဂုာ်ဟးဂီၤလီၤ.
23တၢ်ကတိၤအဘၣ်လၢတၢ်ဆၢဂ့ၤကတီၢ်ဘၣ်အပူၤန့ၣ်မ့ၢ်တၢ်သးခု ဆံးဒိၣ်လဲၣ်.
24ပှၤကူၣ်သ့တဖၣ်ပိာ်ကျဲတဘိလၢအဆှၢထီၣ်တၢ်ဆူထးဆူတၢ်မူလီၤ. တမ့ၢ်ဘၣ်ကျဲလၢအဆှၢလီၤတၢ်ဆူလာ်ဆူတၢ်သံန့ၣ်ဘၣ်.
25ယွၤကမၤဟးဂီၤပှၤပာ်ထီၣ်ထီအသးတဖၣ်အဟံၣ်လီၤ. မ့မ့ၢ်ပှၤမုၣ်ကမဲတဂၤအစုလီၢ်ခီၣ်ခိၣ်န့ၣ်ကဒီဒၣ်အိၣ်ပှိၤဝဲလီၤ.
26ယွၤသးဟ့တၢ်ဆိကမိၣ်အအၢအသီတဖၣ်လီၤ. မ့မ့ၢ်အဝဲဘၣ်အသးလၢတၢ်ဒီသိၣ်ဒီမှံၤအတၢ်ကတိၤအမုာ်တဖၣ်လီၤ.
27နမ့ၢ်ကျဲးစၢးမၤန့ၢ်တၢ်ဘၣ်ဘျုးလၢတၢ်တတီတလိၤအပူၤန့ၣ် နကဆှၢနဟံၣ်ဖိဃီဖိဆူတၢ်ကီတၢ်ခဲအပူၤလီၤ. ဟံးန့ၢ်ခိၣ်ဖးလာ်ဆှိးတဖၣ်တဂ့ၤ. ဒီးနကအိၣ်မူယံာ်ယံာ်လီၤ.
28ပှၤအဂ့ၤအဝါတဖၣ်န့ၣ်တချုးလၢအစံးဆၢတၢ်ဒီးဆိကမိၣ်တၢ်လီၤ. မ့မ့ၢ်ပှၤအအၢအသီတဖၣ်န့ၣ်အိၣ်ဒီးတၢ်စံးဆၢလၢအချ့မးဘၣ်ဆၣ် ဒီး, ဒုးအိၣ်ထီၣ်တၢ်ကီတၢ်ခဲလီၤ.
29ဖဲပှၤအဂ့ၤတဖၣ်ဘါထုကဖၣ်တၢ်န့ၣ်ယွၤဒိကနၣ်ဝဲလီၤ. မ့မ့ၢ်ယွၤတကနာ်ဃုာ်ဘၣ်ပှၤအအၢအသီတဖၣ်ဘၣ်.
30မဲာ်နံၤကမှံတဖၣ်မၤသးခုနသးလီၤ. ဒီးတၢ်ကစီၣ်လၢအဂ့ၤတဖၣ် မၤမုာ်နသးအါထီၣ်လီၤ.
31နမ့ၢ်ဒိကနၣ်တၢ်သပှၢ်ပှၢ်ဖဲနဘၣ်တၢ်သိၣ်က့ၤသီက့ၤနၤဒီး, နမ့ၢ်ပှၤအကူၣ်သ့လီၤ.
32နမ့ၢ်တအဲၣ်ဒိးမၤလိမၤဒိးတၢ်ဘၣ်ဒီး, နမၤဘၣ်ဒိဆါလီၤနသးဒၣ်နဲလီၤ. နမ့ၢ်တူၢ်လိာ်တၢ်သိၣ်က့ၤသီက့ၤနၤဒီး, နကကဲထီၣ်ပှၤကူၣ်သ့ဂ့ၤန့ၣ်အလီၢ်တက့ၢ်လီၤ.
33လၢတၢ်ယူးယီၣ်ယွၤအပူၤန့ၣ်တၢ်မၤလိမၤဒိးအိၣ်ဝဲဒၣ်လီၤ. ဒီးတၢ်ဆီၣ်လီၤသးလဲၤလၢတၢ်လၤကပီၤအမဲာ်ညါလီၤ.
Currently Selected:
လံာ်တၢ်ကူၣ်သ့အတၢ်ကတိၤ 15: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
