လံာ်တၢ်ကူၣ်သ့အတၢ်ကတိၤ 11
11
1ယွၤသးဟ့ပှၤလၢအသူစီၤပီၢ်လီတၢ်တဖၣ်လီၤ. မ့မ့ၢ်စီၤပီၢ်သၣ်အတီတဖၣ်န့ၣ်, မ့ၢ်အတၢ်သးခုလီၤ.
2ပှၤလၢအပာ်ထီၣ်ထီအသးတဖၣ်န့ၣ်တယံာ်ဘၣ်ဒီးကဘၣ်တၢ်မၤမဲာ်ဆှး အီၤလီၤ. မ့မ့ၢ်တၢ်ပာ်သးဖဲအဘၣ်အဘၣ်န့ၣ်မ့ၢ်ဝဲတၢ်ကူၣ်သ့ဒိၣ် တက့ၢ်လီၤ.
3ပှၤအဂ့ၤဘၣ်တၢ်ပၢဆှၢအီၤလၢအတၢ်တီတၢ်လိၤဒၣ်ဝဲလီၤ. ပှၤလၢတၢ်နာ်န့ၢ်အီၤတသ့ဘၣ်တဖၣ်န့ၣ်ဟးဂီၤကွံာ်လၢအတၢ်တတီ တလိၤဒၣ်ဝဲအဃိလီၤ.
4မုၢ်တနံၤဖဲနကွၢ်ဆၢၣ်မဲာ်တၢ်သံန့ၣ်, တၢ်ထူးတၢ်တီၤတဖၣ်တမၤ ဂ့ၤနၤဘၣ်. မ့မ့ၢ်, တၢ်တီတၢ်လိၤမၤပူၤဖျဲးနသးသမူသ့ဝဲလီၤ.
5တၢ်တီတၢ်လိၤန့ၣ်မၤဖှံထီၣ်ညီထီၣ်ပှၤအဂ့ၤတဂၤအတၢ်အိၣ်မူ လီၤ. မ့မ့ၢ်, ပှၤတတီတလိၤတဂၤန့ၣ်ဒုးအိၣ်ထီၣ်အတၢ်လီၤပှီၢ်ဒၣ်ဝဲ န့ၣ်လီၤ.
6တၢ်တီတၢ်လိၤမၤပူၤဖျဲးပှၤအတီအလိၤတဂၤန့ၣ်လီၤ. မ့မ့ၢ်ပှၤတဂၤဂၤလၢတၢ်နာ်န့ၢ်အီၤတသ့ဘၣ်န့ၣ်, ဘၣ်က့ၤလၢအတၢ်သူၣ်လီသးကွံဒၣ်ဝဲအထုန့ၣ်လီၤ.
7ဖဲပှၤတတီတလိၤတဂၤသံဝဲန့ၣ်, အတၢ်မုၢ်လၢ်သံဃုာ်ဒီးအီၤလီၤ. တၢ်စူၢ်တၢ်နာ်အိၣ်သူၣ်လီၤအသးလၢတၢ်ထူးတၢ်တီၤတဖၣ်အပူၤန့ၣ် ကတၢၢ်ဝဲလၢတၢ်ကလီကလီလီၤ.
8ပှၤတီပှၤလိၤတဖၣ်ဘၣ်တၢ်မၤပူၤဖျဲးအီၤလၢတၢ်ကီတၢ်ခဲဒီးလၢ အလီၢ်န့ၣ်, တၢ်ကီတၢ်ခဲလီၤဘၣ်ဆူပှၤတတီတလိၤတခီန့ၣ်လီၤ.
9နဘၣ်တၢ်မၤဟးဂီၤနၤလၢပှၤလုၢ်အၢလၢ်သီတဖၣ်အတၢ်ကတိၤသ့ဝဲ လီၤ. ဘၣ်ဆၣ်ဒီးပှၤတီပှၤလိၤအတၢ်ကူၣ်သ့အုၣ်က့ၤခီၣ်က့ၤနၤသ့ဝဲ လီၤ.
10ဝ့ၢ်တဝ့ၢ်သးခုဝဲဖဲပှၤအတီအလိၤတဖၣ်ဘီၣ်ထီၣ်ညီထီၣ်န့ၣ်လီၤ. ဒီးတၢ်သးခုအတၢ်ကိးပသူထီၣ်တဖၣ်အိၣ်ဝဲဖဲပှၤတတီတလိၤတဖၣ် သံဝဲန့ၣ်လီၤ.
11ဝ့ၢ်တဝ့ၢ်ဒိၣ်ထီၣ်ထီထီၣ်ဝဲဖဲပှၤတီပှၤလိၤတဖၣ်ဟ့ၣ်အီၤအတၢ် ဆိၣ်ဂ့ၤ, မ့မ့ၢ်ကလီၤပှီၢ်ဝဲလၢပှၤအၢပှၤသီတဖၣ်အတၢ်ကတိၤတဖၣ် အဃိလီၤ.
12တၢ်ကတိၤဒုၣ်ဒွဲၣ်ပှၤအဂၤတဖၣ်န့ၣ်မ့ၢ်တၢ်သူၣ်တထံသးတဆးလီၤ. နမ့မ့ၢ်ပှၤလၢအအိၣ်ဒီးတၢ်သ့ၣ်ညါနၢ်ပၢၢ်န့ၣ်, နကအိၣ်ဘှီၣ်လီၤ.
13ပှၤတဂၤဂ့ၤတဂၤဂ့ၤလၢအသီၣ်ဝံသဲကလၤန့ၣ်, နနာ်န့ၢ်အီၤလၢတၢ်ခူသူၣ်အဂ့ၢ်တမံၤတသ့ဘၣ်. မ့မ့ၢ်နပာ်တၢ်နာ်န့ၢ်လၢပှၤလၢအလီၤနာ်တဂၤသ့ဝဲလီၤ.
14ဖဲတၢ်ပၢဆှၢတအိၣ်ဘၣ်နီတမံၤန့ၣ်, ထံကီၢ်တဘ့ၣ်ကလီၤပှီၢ်ဝဲ လီၤ. မ့မ့ၢ်ပှၤဟ့ၣ်ကူၣ်ဟ့ၣ်ဖးတၢ်အါဂၤဒုးနဲၣ်ဖျါထီၣ်တၢ်ပူၤ ဖျဲးလီၤ.
15နမ့ၢ်အၢၣ်လီၤအီလီၤလၢနကလိးတူာ်ပှၤလၢနတသ့ၣ်ညါတဂၤအဒ့ၣ် ကမၣ်ဒီး, နကဘၣ်သးအုးလၢတၢ်န့ၣ်အဂ့ၢ်လီၤ. ဂ့ၤဒိၣ်တက့ၢ်လၢနဂီၢ်ဖဲနတမၤဃုာ်အီၤဘၣ်န့ၣ်လီၤ.
16ပိာ်မုၣ်အိၣ်ဒီးအလၤကပီၤတဂၤန့ၣ်ဘၣ်တၢ်ပာ်ကဲအီၤလီၤ. မ့မ့ၢ်ပိာ်မုၣ်တဂၤလၢအလုၢ်ဂ့ၤလၢ်ဝါတအိၣ်ဘၣ်န့ၣ်, မ့ၢ်တၢ်လီၤမဲာ်ဆှးတမံၤလီၤ.
ပှၤအကၢၣ်တဂၤအကျိၣ်အစ့တအိၣ်ဘၣ်နီတဘျီဘၣ်. မ့မ့ၢ်ပှၤလၢအမၤအသးဆူၣ်ဆူၣ်ကိၢ်ကိၢ်တဂၤန့ၣ်ကထူးထီၣ်တီၤ ထီၣ်ဝဲလီၤ.
17ဖဲနသးကညီၤတၢ်န့ၣ်, နမၤဘျုးမၤဖှိၣ်လီၤနသးတမံၤလီၤ. နမ့မ့ၢ်ပှၤအၢဝဲသီဝဲဒီး, နမၤဘၣ်ဒိဘၣ်ထံးလီၤနသးဒၣ်နဲန့ၣ်လီၤ.
18ပှၤတတီတလိၤတဖၣ်န့ၣ်တမၤန့ၣ်စဲဃဲၤတၢ်နီတမံၤဘၣ်. ဘၣ်ဆၣ်ဒီးနမ့ၢ်မၤတၢ်အဘၣ်န့ၣ်, နကဘၣ်ဘျုးဘၣ်ဖှိၣ်သ ပှၢ်ကတၢၢ်လီၤ.
19ပှၤတဂၤလၢ်လၢ်လၢအပာ်လီၤအသးဒ်သိးကမၤတၢ်လၢအဘၣ်န့ၣ်ကမူဝဲ လီၤ. မ့မ့ၢ်, ပှၤတဂၤလၢ်လၢ်လၢအပာ်အသးဆၢဆူၣ်ဆၢမနၤလၢကမၤ အၢတၢ်န့ၣ်ကသံဝဲလီၤ.
20ယွၤသးဟ့ပှၤလၢအပာ်အသးအၢအၢသီသီတဖၣ်ဒီးအဲၣ်ပှၤတဖၣ် လၢအမၤတၢ်အဘၣ်လီၤ.
21နာ်သပှၢ်ကတၢၢ်လၢပှၤအၢပှၤသီကဘၣ်တၢ်စံၣ်ညီၣ်အီၤတက့ၢ်. မ့မ့ၢ်, ပှၤတီပှၤလိၤတဖၣ်န့ၣ်ကပူၤဖျဲးဝဲလီၤ.
22ပိာ်မုၣ်လၢတၢ်စံၣ်ညီၣ်နီၤဖးအဂ့ၤအဘၣ်တအိၣ်ဒီးအီၤတဂၤအတၢ် ဃံတၢ်လၤန့ၣ်, လီၤဂာ်ဒ်ကွီၤထူတကွီၤလၢထိးတဒု အနါဒ့အလိၤအသိးန့ၣ်လီၤ.
23တၢ်လၢပှၤတီပှၤလိၤတဖၣ်ဆၢန့ၢ်ဝဲန့ၣ်, အိၣ်ဒီးအတၢ်ကဲ ထီၣ်လိၣ်ထီၣ်အဂ့ၤတဘိယူၢ်ဃီလီၤ. ဖဲပှၤတတီတလိၤမၤန့ၢ်တၢ်လၢ အသးလီဝဲန့ၣ်, ပှၤကိးဂၤဒဲးသးဒိၣ်ထီၣ်ဝဲလီၤ.
24ပှၤတနီၤနီၤသူကျိၣ်သူစ့ကြီကြီဒၣ်လဲာ်ထူးတီၤအါထီၣ်ဒံး ဝဲလီၤ. အဂၤတနီၤ, ပလီၢ်ပဒီအသးဒၣ်လဲာ်ဖှီၣ်လီၤယာ်လီၤအါထီၣ်ဝဲ လီၤ.
25ဟ့ၣ်ညီတၢ်တက့ၢ်, ဒီးနကထူးတီၤထီၣ်လီၤ. မၤစၢၤပှၤဂၤတက့ၢ်, ဒီးနကဘၣ်တၢ်မၤစၢၤနၤလီၤ.
26ပှၤဂီၢ်မုၢ်ဆိၣ်အၢပှၤတဂၤလၢအပာ်ကီၤဘုဧိၤဟုဧိၤဒီးခိးဝဲ လၢတၢ်အပှ့ၤကအါထီၣ်တစုစုအဂီၢ်န့ၣ်လီၤ. မ့မ့ၢ်အဝဲသ့ၣ်စံးထီၣ်ပတြၢၤပှၤတဂၤလၢအထုးထီၣ်ဆါအဘုအဟု န့ၣ်လီၤ.
27နတၢ်ကွၢ်စိတဖၣ်မ့ၢ်ဂ့ၤဒီးနကဘၣ်တၢ်ပာ်ကဲနၤလီၤ. ဘၣ်ဆၣ်, နမ့ၢ်ကွၢ်ဃုတၢ်ကီတၢ်ခဲဒီးတၢ်န့ၣ်ကမ့ၢ်တၢ်လၢနဒိးန့ၢ်ဘၣ်အီၤလီၤ.
28ပှၤတဖၣ်လၢအသန့ၤအသးလၢတၢ်ထူးတၢ်တီၤန့ၣ်ကလီၤဃံၤဝဲဒ်သ့ၣ်လၣ် လီၤဆှု လၢတၢ်ကိၢ်ထီၣ်သီအကတီၢ်အသိးန့ၣ်လီၤ. မ့မ့ၢ်ပှၤအတီအလိၤန့ၣ်ကဘီၣ်ထီၣ်ညီထီၣ်ဝဲဒ်သ့ၣ်လၣ်တဖၣ်ဒိးစၢ် ထီၣ်ဖဲတၢ်စူၤလီၤသီအကတီၢ်အသိးန့ၣ်လီၤ.
29ပှၤလၢအမၤကိၢ်မၤဂီၤအဟံၣ်ဖိဃီဖိန့ၣ်, လၢခံကတၢၢ်အတၢ်တအိၣ်ဒီးအီၤနီတမံၤလၢၤဘၣ်.
ပှၤသူၣ်တထံသးတဆးတဖၣ်ကကဲထီၣ်တၢ်အကုၢ်အပှၤ တဖၣ်လၢပှၤကူၣ်သ့အဂီၢ်ထီဘိလီၤ.
30တၢ်တီတၢ်လိၤဟ့ၣ်တၢ်မူ, မ့မ့ၢ်တၢ်မၤတၢ်လၢတၢ်စုဆူၣ်ခီၣ်တကး အပူၤဟံးထီၣ်ကွံာ်အီၤလီၤ.
31ပှၤလၢအဂ့ၤတဖၣ်ဘၣ်တၢ်ဟ့ၣ်ဘျုးအီၤဖဲအံၤလၢဟီၣ်ခိၣ်ချၢလီၤ. မၤသးဒ်န့ၣ်ဒီးနာ်သပှၢ်တၢၢ်လၢပှၤတတီတလိၤဒီးပှၤတၢ်ဒဲးဘးဖိ တဖၣ်ကဘၣ်တၢ်စံၣ်ညီၣ်အီၤန့ၣ်တက့ၢ်.
Currently Selected:
လံာ်တၢ်ကူၣ်သ့အတၢ်ကတိၤ 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
