လံာ်တၢ်ကူၣ်သ့အတၢ်ကတိၤ 10
10
စီၤၡလိၤမိၤအတၢ်ကူၣ်သ့အတၢ်ကတိၤတဖၣ်
1အအံၤမ့ၢ်စီၤၡလိၤမိၤအတၢ်ကူၣ်သ့အတၢ်ကတိၤတဖၣ်လီၤ. ဖိခွါလၢအကူၣ်သ့တဂၤန့ၣ်, အပၢ်ဒိးဘၣ်တၢ်လၤကပီၤလၢအဃိလီၤ. မ့မ့ၢ်, ပှၤဟးဂီၤဖိတဂၤန့ၣ်, ဟဲစိာ်တၢ်သးအုးလၢအမိၢ်အဂီၢ်လီၤ.
2တၢ်ထူးတၢ်တီၤလၢနမၤန့ၢ်လၢတၢ်တတီတလိၤအပူၤတမၤဂ့ၤနၤဘၣ်. မ့မ့ၢ်တၢ်တီတၢ်လိၤန့ၣ်, ကမၤပူၤဖျဲးနသးသမူလီၤ.
3ယွၤတပျဲပှၤအဂ့ၤတဖၣ်ကသၣ်ဝံၤလီၤဒိဘၣ်. မ့မ့ၢ်, ကတြီပှၤတတီတလိၤတဖၣ်လၢအတၢ်သူၣ်လီသးကွံ န့ၣ်လီၤ.
4တၢ်အိၣ်ကၢၣ်အိၣ်ကျူန့ၣ်, ကမၤဖှီၣ်လီၤယာ်လီၤနၤလီၤ. မ့မ့ၢ်, တၢ်မၤတၢ်ဆူၣ်ဆူၣ်န့ၣ်ကဒုးထူးထီၣ်တီၤထီၣ်နၤလီၤ.
5ပှၤလၢအထၢဖှိၣ်တၢ်လၢတၢ်ကိၢ်ခါအကတီၢ်န့ၣ်, မ့ၢ်ဖိခွါလၢအကူၣ်တၢ်သ့လီၤ. မ့မ့ၢ်, ပှၤလၢအမံဝဲလၢကူးဘု အကတီၢ်န့ၣ်, မ့ၢ်ဖိခွါလၢဟဲစိာ်တၢ်မဲာ်ဆှးန့ၣ်လီၤ.
6ပှၤအဂ့ၤတဂၤကဒိးန့ၢ်တၢ်ဆိၣ်ဂ့ၤတဖၣ်လီၤ. မ့မ့ၢ်, ပှၤတတီတလိၤတဂၤအတၢ်ကတိၤတဖၣ်ပာ်ခူသူၣ်အတၢ်စုဆူၣ် ခီၣ်တကးအန့ဆၢၣ်တမံၤန့ၣ်လီၤ.
7ပှၤအဂ့ၤတဖၣ်န့ၣ်ကဘၣ်တၢ်သ့ၣ်နီၣ်ထီၣ်က့ၤအီၤဒ်တၢ်ဆိၣ်ဂ့ၤတမံၤ အသိးလီၤ. မ့မ့ၢ်ပှၤအၢပှၤသီတဂၤန့ၣ်တယံာ်ဘၣ်ဒီးကဘၣ် တၢ်သးပ့ၤနီၣ်ကွံာ်အီၤလီၤ.
8ပှၤလၢအသူၣ်ဖးသးဆးန့ၣ်တူၢ်လိာ်တၢ်ဟ့ၣ်ကူၣ်အဂ့ၤလီၤ. ပှၤလၢအကတိၤတၢ်လၢတၢ်သူၣ်တထံသးတဆးအပူၤတဖၣ်န့ၣ်, ကတုၤလၢတၢ်ဟးဂီၤလီၤ.
9ပှၤအတီအလိၤတဖၣ်လဲၤတၢ်ဂၢၢ်ဂၢၢ်ကျၢၤကျၢၤလီၤ. မ့မ့ၢ်ပှၤလၢအမၤဒၢက့ၣ်ဒၢကူအကျဲတဖၣ်န့ၣ်, ကဘၣ်တၢ်ဖီၣ်န့ၢ်အီၤလီၤ.
10ပှၤတဂၤလၢအပာ်ခူသူၣ်တၢ်မ့ၢ်တၢ်တီန့ၣ်, ဒုးအိၣ်ထီၣ်တၢ်ကီ တၢ်ခဲလီၤ. မ့မ့ၢ်, ပှၤတဂၤလၢအကတိၤဘှီက့ၤတၢ်ဖျါဖျါန့ၣ်, မၤတၢ်လၢတၢ်ဃူတၢ်ဖိးအဂီၢ်လီၤ.
11ပှၤအဂ့ၤတဂၤအတၢ်ကတိၤတဖၣ်မ့ၢ်တၢ်မူအထံထီၣ်ပၢၢ်လီၤ. မ့မ့ၢ်ပှၤအအၢအသီတဂၤအတၢ်ကတိၤတဖၣ်ပာ်ခူသူၣ်တၢ်စု ဆူၣ်ခီၣ်တကးအန့ဆၢၣ်တမံၤန့ၣ်လီၤ.
12တၢ်သးဟ့န့ၣ်ထိၣ်ဂဲၤထီၣ်တၢ်အ့ၣ်လိာ်ဆိးက့လိာ်လီၤ. မ့မ့ၢ်, တၢ်အဲၣ်တၢ်ကွံကွၢ်ကပာ်ကွံာ်တၢ်မၤကမၣ်ခဲလၢာ်လီၤ.
13ပှၤလၢအအိၣ်ဒီးတၢ်ကူၣ်တၢ်ဆးန့ၣ်, ကတိၤတၢ်ကူၣ်သ့အတၢ်ကတိၤ လီၤ. မ့မ့ၢ်, ပှၤလၢအသူၣ်တထံအသးတဆးန့ၣ်, ကြၢးဘၣ်တၢ်စံၣ်ညီၣ်အီၤလီၤ.
14ပှၤကူၣ်သ့န့ၣ်, ဂုာ်မၤန့ၢ်တၢ်သ့ၣ်ညါနၢ်ပၢၢ်ခဲလၢာ်လီၤ. မ့မ့ၢ်, ဖဲပှၤဟးဂီၤဖိကတိၤတၢ်န့ၣ်, တၢ်ကီတၢ်ခဲအိၣ်တယံၤဘၣ် န့ၣ်လီၤ.
15တၢ်ထူးတၢ်တီၤန့ၣ်အိၣ်ပှိၤပှၤထူးပှၤတီၤလီၤ. မ့မ့ၢ်တၢ်ဖှီၣ်တၢ်ယာ်မၤဟးဂီၤပှၤဖှီၣ်ဖိယာ်ဖိလီၤ.
16တၢ်မၤဂ့ၤတၢ်အဘူးအလဲမ့ၢ်တၢ်မူလီၤ. မ့မ့ၢ်, တၢ်ဒဲးဘးဆှၢတၢ်ဆူတၢ်မၤအါထီၣ်တၢ်ဒဲးဘးန့ၣ်လီၤ.
17ပှၤလၢအဒိကနၣ်တၢ်ဖဲအဘၣ်တၢ်သိၣ်က့ၤသီက့ၤအီၤန့ၣ်ကမူဝဲ လီၤ. မ့မ့ၢ်ပှၤလၢအတတူၢ်လိာ်ဘၣ်ဝဲလၢအတၢ်ကမၣ်လံ န့ၣ်အိၣ်လၢတၢ်လီၤဘၣ်ယိာ်အပူၤလီၤ.
18ပှၤတဂၤလၢအပာ်ခူသူၣ်အတၢ်သူၣ်ဟ့သးဟ့န့ၣ်မ့ၢ်ပှၤလီတၢ် တဂၤလီၤ. ပှၤတဂၤဂ့ၤတဂၤဂ့ၤလၢအသီၣ်ဝံသဲကလၤန့ၣ်, မ့ၢ်ပှၤဟးဂီၤဖိလီၤ.
19နတၢ်ကတိၤဒံးအါ, နမၤဒဲးဘးတၢ်ကဒံးအါတက့ၢ်လီၤ. နမ့မ့ၢ်ပှၤလၢအကူၣ်တၢ်သ့ဒီးနကအိၣ်ဘှ့ၣ်အိၣ်ဘှီၣ်န့ၣ်လီၤ.
20ပှၤအဂ့ၤတဂၤအတၢ်ကတိၤတဖၣ်လီၤဂာ်ဒီးစ့လၢအကဆှီန့ၣ်လီၤ. ပှၤအအၢအသီတဂၤအတၢ်ဆိကမိၣ်တဖၣ်အလုၢ်အပှ့ၤတအိၣ်ဘၣ်.
21ပှၤအဂ့ၤတဂၤအတၢ်ကတိၤတဖၣ်ဒုးဘၣ်ဘျုးပှၤအါဂၤလီၤ. ဘၣ်ဆၣ်ဒီးနမၤသံလီၤနသးလၢတၢ်သူၣ်တထံသးတဆးသ့ဝဲလီၤ.
22ယွၤအတၢ်ဆိၣ်ဂ့ၤန့ၣ်, ဒုးထူးတီၤထီၣ်နၤလီၤ. ဒီးအဝဲတပာ်ဖှိၣ်တၢ်သူၣ်အုးသးအုးဆူနတၢ်ထူးတၢ်တီၤန့ၣ်ဘၣ်.
23ပှၤဟးဂီၤဖိသးခုလၢအမၤတၢ်ဒဲးဘးအပူၤလီၤ. ပှၤလၢအအိၣ်ဒီးတၢ်ကူၣ်တၢ်ဆးန့ၣ်, မုာ်လၤဝဲလၢတၢ်ကူၣ်သ့အပူၤ လီၤ.
24ပှၤတီပှၤလိၤမၤန့ၢ်တၢ်လၢအဆၢန့ၢ်ဘၣ်ဝဲလီၤ. မ့မ့ၢ်, ပှၤတတီတလိၤကဒိးန့ၢ်ဘၣ်တၢ်လၢအပျံၤဝဲအဒိၣ်ကတၢၢ်န့ၣ် လီၤ.
25ကလံၤသီၣ်ဂီၤဟဲလီၤဝဲဒီးပှၤတတီတလိၤတဖၣ်ဒံကွံာ်ဒံဖျိး ကွံာ်ဝဲလီၤ. မ့မ့ၢ်, ပှၤအတီအလိၤတဖၣ်အိၣ်ဂၢၢ်ဆိးကျၢၤဝဲတဘိ ယူာ်ဃီလီၤ.
26မၢပှၤအကၢၣ်တဂၤမၤတၢ်တမံၤမံၤလၢနဂီၢ်နီတစုတဂ့ၤ. အဝဲကမၤအ့န့နသးဒ်တၤဆံၣ်ထံလၢနမဲအဖီခိၣ်ဒီးမ့ၣ်အူလုၢ် လၢနမဲာ်ချံပူၤအသိးန့ၣ်လီၤ.
27တၢ်ပျံၤယွၤန့ၣ်ဒုးထီထီၣ်တၢ်အိၣ်မူလီၤ. မ့မ့ၢ်, ပှၤတတီတလိၤအနံၣ်အလါကဖုၣ်ဝဲလီၤ.
28ပှၤအဂ့ၤတဖၣ်အတၢ်မုၢ်လၢ်န့ၣ်, ဆှၢအီၤဆူတၢ်သးခုလီၤ. မ့မ့ၢ်, ပှၤအၢပှၤသီတဖၣ်န့ၣ်ကွၢ်စိတၢ်ဆူညါတသ့နီတမံၤဘၣ်.
29ယွၤကဟုကယာ်ပှၤအတီအလိၤတဖၣ်လီၤ. မ့မ့ၢ်, မၤဟးဂီၤကွံာ်ပှၤမၤကမၣ်တၢ်ခဲလၢာ်လီၤ.
30ပှၤအတီအလိၤကအိၣ်ဂၢၢ်ဆိးကျၢၤတဘိယူၢ်ဃီလီၤ. မ့မ့ၢ်, ပှၤတတီတလိၤန့ၣ်တအိၣ်ဘၣ်ဝဲလၢထံဧိၤကီၢ်ဧိၤအပူၤဘၣ်.
31ပှၤအတီအလိၤကတိၤတၢ်ကူၣ်သ့လီၤ. မ့မ့ၢ်, ပျ့ၤလၢအကတိၤတၢ်အၢ တၢ်သီန့ၣ်ကဘၣ်တၢ်ဒီၣ်တဲာ်ကွံာ်အီၤလီၤ.
32ပှၤအတီအလိၤသ့ၣ်ညါတၢ်အဂ့ၤလၢကဘၣ်စံးကတိၤဝဲလီၤ. မ့မ့ၢ်, ပှၤတတီတလိၤကတိၤတၢ်တဖၣ်လၢအမၤဘၣ်ဒိဘၣ်ထံးတၢ်ထီဘိလီၤ.
Currently Selected:
လံာ်တၢ်ကူၣ်သ့အတၢ်ကတိၤ 10: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
