လံာ်စီၤယိၤဘး 5
5
1စီၤယိၤဘးဧၢ, ကိးထီၣ်ခဲအံၤတက့ၢ်. ပှၤလၢကစံးဆၢနၤ ကအိၣ်တဂၤဂၤဧါ. မ့ၢ်ကလူးကအိၣ်ဝဲတဂၤဂၤဒ်သိးနကွၢ် ထီၣ်လၢတၢ်မၤစၢၤအဂီၢ်ကသ့န့ၣ်ဧါ.
2တၢ်မၤကိၢ်မၤဂီၤလီၤနသးတုၤနသံလၢတၢ်သူၣ်ဒိၣ်သးဖျိး အဃိန့ၣ်ကမ့ၢ်တၢ်မၢးဒီးတၢ်သးတဆးအတၢ်မၤလီၤ.
3ယထံၣ်ဘၣ်တ့ၢ်လံပှၤဟးဂီၤဖိတဖၣ်ဖျါအိၣ်ဂၢၢ်ဆိးကျၢၤ ဝဲဘၣ်ဆၣ်ယဆိၣ်အၢတ့ၢ်အတၢ်အိၣ်တၢ်ဆိးအလီၢ်တဘျီဃီလီၤ.
4အဖိခွါတဖၣ်ထံၣ်န့ၢ်တၢ်ပူၤဖျဲးအလီၢ်တသ့နီတပူၤဘၣ်. လၢကွီၢ်ဘျီၣ်အပူၤန့ၣ်ပှၤကဆၢထၢၣ်အိၣ်ပှိၤအီၤတအိၣ် ဘၣ်နီတဂၤဘၣ်.
5ပှၤသူၣ်ဝံၤသးစ့ၤတဖၣ်ကအီၣ်ကွံာ်ပှၤဟးဂီၤဖိအဘုဧိၤဟုဧိၤ, တုၤလၢဘုဧိၤဟုဧိၤလၢအမဲထီၣ်လၢတၤဆှုၣ်တၤမဲအကျါ ဒၣ်လဲာ်န့ၣ်လီၤ. ဒီးပှၤလၢတၢ်သူအသးသ့ၣ်တဖၣ်ကသူၣ်က့ၣ် သးကါအဝဲအတၢ်ထူးတၢ်တီၤန့ၣ်လီၤ.
6တၢ်အၢတၢ်သီတဟဲထီၣ်ဘၣ်လၢဟီၣ်ခိၣ်ကမူၣ်အပူၤမ့ၢ်ဂ့ၤ, တၢ်ကိၢ်တၢ်ဂီၤတမဲထီၣ်ဘၣ်လၢဟီၣ်ခိၣ်အပူၤမ့ၢ်ဂ့ၤန့ၣ်ဘၣ်.
7မ့မ့ၢ်ပှၤကညီဒုးအိၣ်ထီၣ်တၢ်ကိၢ်တၢ်ဂီၤလၢအဂီၢ်ဒၣ်ဝဲ, မၤသးသပှၢ်တၢၢ်ဒ်မ့ၣ်အူဖီလၢအဒံကွံာ်ဆူထးဟဲလၢ မ့ၣ်အူအသိးန့ၣ်လီၤ.
8ယမ့မ့ၢ်နၤန့ၣ်ယကကွၢ်ထီၣ်ဆူကစၢ်ယွၤအအိၣ်ဒီးတဲဘၣ်အီၤ လၢယတၢ်ဂ့ၢ်တၢ်ကျိၤလီၤ.
9တၢ်မၤအဒိၣ်အမုၢ်လၢကစၢ်ယွၤမၤဝဲတဖၣ်န့ၣ်ပသ့ၣ်ညါနၢ်ပၢၢ် အီၤတသ့ဘၣ်. ဒီးအတၢ်လီၤလိၢ်လီၤလးတဖၣ်န့ၣ်တၢ်ဂံၢ်အီၤ တလၢာ်ဘၣ်.
10ကစၢ်ယွၤဒုးဟဲစူၤလီၤတၢ်လၢဟီၣ်ခိၣ်ချၢဒီးဒုးဘၣ်စီၣ်ပျီ တဖၣ်န့ၣ်လီၤ.
11မ့ၢ်မးကစၢ်ယွၤပာ်ထီၣ်ထီပှၤလၢအဆီၣ်လီၤအသးဒီးဟ့ၣ် တၢ်သူၣ်ခုသးခုဆူပှၤလၢအသူၣ်ကၢ်အသးလီၤတဖၣ်န့ၣ်လီၤ.
12အဝဲမၤဟးဂီၤပှၤလီတၢ်ဖိတဖၣ်အတၢ်ကူၣ်တၢ်ဖးဒ်သိးအမၤ တၢ်တမံၤလၢ်လၢ်အသုတကဲထီၣ်လိၣ်ထီၣ်တဂ့ၤအဂီၢ်န့ၣ်လီၤ. 13ကစၢ်ယွၤဖီၣ်န့ၢ်ပှၤလီတၢ်ဖိလၢအဝဲသ့ၣ်အတၢ်ကူၣ်လီတၢ်အကျဲ ဒၣ်ဝဲဒီးပှၤလီတၢ်အတၢ်ကူၣ်တၢ်ကျဲၤတဖၣ်န့ၣ်မၤကတၢၢ်ကွံာ် ဝဲချ့သဒံးန့ၣ်လီၤ.
14လၢမုၢ်ထူၣ်အကတီၢ်ဒၣ်လဲာ်န့ၣ်အဝဲသ့ၣ်ဃုကလၢၢ်တၢ်ဒ်လၢ မုၢ်နၤအသိးန့ၣ်လီၤ.
15ဘၣ်ဆၣ်ဒီးကစၢ်ယွၤအုၣ်က့ၤခီၣ်က့ၤပှၤဖှီၣ်ဖိယာ်ဖိလၢတၢ်သံ ဒီးအုၣ်က့ၤခီၣ်က့ၤပှၤဂံၢ်စၢ်လၢတၢ်မၤအၢမၤနးအပူၤန့ၣ်လီၤ.
16အဝဲဟ့ၣ်တၢ်မုၢ်လၢ်ဆူပှၤဖှီၣ်ဖိယာ်ဖိသ့ၣ်တဖၣ်ဒီးကးတံာ်ပှၤ တတီတလိၤအထးခိၣ်န့ၣ်လီၤ.
17ပှၤလၢကစၢ်ယွၤသိၣ်က့ၤသီက့ၤအီၤန့ၣ်ဘၣ်ဆိၣ်ဂ့ၤဝဲလီၤ. ဒီးတုၤသ့တၢ်လၢာ်ကစၢ်ယွၤသိၣ်ဃီၣ်နၤန့ၣ်သူၣ်ဒိၣ်သးဖျိးတ ဂ့ၤ.
18ကစၢ်ယွၤဘိၣ်ဘံထီၣ်တၢ်ပူၤလီၢ်လၢအတီၢ်ဝဲတဖၣ်လီၤ. အစုမၤဆါတၢ်ဒီးအစုမၤဘျါတၢ်လီၤ.
19တဘျီဘၣ်တဘျီ, အဝဲကမၤပူၤဖျဲးနၤလၢတၢ်မၤဆါန့ၣ်လီၤ.
20တုၤတၢ်သၣ်ဝံၤလီၤဒိဟဲဝဲန့ၣ်ဒီးအဝဲကပာ်မူနၤဒီး, လၢတၢ်ဒုးတၢ်ယၤအပူၤကဟုဘံၣ်ကယာ်ဘၢနၤလၢတၢ်သံန့ၣ်လီၤ.
21ကစၢ်ယွၤကခိးတြီဃာ်န့ၢ်နၤလၢတၢ်ကတိၤခဲၣ်သူခဲၣ်ဂီၤဒီးက အုၣ်က့ၤခီၣ်က့ၤနၤဖဲတၢ်ဟးဂူာ်ဟးဂီၤဟဲဝဲဒၣ်န့ၣ်လီၤ.
22နကနံၤဘၣ်ဖၣ်လဲတၢ်ဟးဂူာ်ဟးဂီၤဒီးတၢ်သၣ်ဝံၤလီၤဒိဒီး နတပျံၤဘၣ်ဆၣ်ဖိကီၢ်ဖိအအၢဘၣ်.
23ပျီလၢနထူစံၣ်ထူပှဲၤကပူၤဖျဲးဒီးလၢၢ်ဧိၤလ့ဧိၤဒီးဆၣ်ဖိ ကီၢ်ဖိအအၢတဖၣ်တထီဒါနၤနီတစုဘၣ်.
24တုၤနုၤတစုနကအိၣ်မုာ်ဆိးပၢၤလၢနဒဲပူၤဒီးဖဲနကွၢ်နသိတဖၣ် ဒီးနကထံၣ်န့ၢ်လၢအပူၤဖျဲးဝဲလီၤ.
25ဒီးနကအိၣ်ဒီးနချံနသၣ်အါအါဂီၢ်ဂီၢ်ဒ်နီၣ်ဧိၤမံၤဧိၤလၢ အီၣ်ဆၣ်အလီၢ်အသိးန့ၣ်လီၤ.
26ဒ်ဘုလၢအဂီၤထီၣ်ဝဲတုၤလၢကူးဘုအကတီၢ်အသိးန့ၣ်, နကအိၣ်ကၢအိၣ်ခိးတုၤနမှံၤတုာ်ပှၢ်တီၤအကတီၢ်န့ၣ်လီၤ.
27စီၤယိၤဘးဧၢ, ပမၤလိတ့ၢ်တၢ်အံၤအါတ့ၢ်မးလံ. တၢ်အံၤမ့ၢ်တၢ်မ့ၢ်တၢ်တီသတးဒီးတူၢ်လိာ်အီၤခဲကနံၣ်အံၤ တက့ၢ်.
Currently Selected:
လံာ်စီၤယိၤဘး 5: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
