လံာ်စီၤယိၤဘး 3
3
စီၤယိၤဘးအတၢ်ကဒူးကဒ့ၣ်ဆူကစၢ်ယွၤ
1တၢ်မၤအသးဒ်န့ၣ်အလီၢ်ခံဝံၤစီၤယိၤဘးအဲးထီၣ်အထးခိၣ် ဒီးဆိၣ်အၢမုၢ်နံၤလၢအအိၣ်ဖျဲၣ်ထီၣ်ဝဲဒၣ်န့ၣ်လီၤ. 2-3ဒီးစီၤယိၤဘးစံးဝဲဒၣ်, “ကစၢ်ယွၤဧၢ, ဆိၣ်အၢမုၢ်တနံၤလၢယအိၣ်ဖျဲၣ်ထီၣ်လၢ အပူၤဒီးမုၢ်တနၤလၢယဘၣ်တၢ်ဒၢထီၣ်ယၤန့ၣ်တက့ၢ်.” 4မုၢ်တနံၤလၢယအိၣ်ဖျဲၣ်ထီၣ်လၢအပူၤန့ၣ်မ်အကဲထီၣ်တၢ်ခံးတၢ် နၤတက့ၢ်. သ့ၣ်နီၣ်ထီၣ်က့ၤမုၢ်တနံၤန့ၣ်နီတစုလၢၤတဂ့ၤ. မ်တၢ်ကပီၤအသုတလီၤဘၣ်လၢၤအီၤနီတစုတဂ့ၤ.
5ဒုးကဲထီၣ်အီၤလၢတၢ်ခံးဒီးတၢ်ခံးယိာ်အမုၢ်တနံၤန့ၣ်တက့ၢ်. မ်တၢ်အၢၣ်ကျၢၢ်ဘၢအီၤ, မ်မုၢ်အတၢ်ကပီၤသုတလီၤ ဘၣ်လၢအလိၤတဂ့ၤ.
6ထုးထီၣ်ကွံာ်မုၢ်တနၤန့ၣ်လၢနံၣ်ဧိၤလါဧိၤအပူၤတက့ၢ်. မ်အသုတဘၣ်တၢ်ဂံၢ်ကဒီးအီၤနီတစုတဂ့ၤ.
7ဒုးကဲထီၣ်အီၤလၢမုၢ်နၤလၢအအိၣ်သယုၢ်ဒီးတၢ်သူၣ်ဖှံ သးညီအသီၣ်သုတဟူထီၣ်တဂ့ၤ.
8တဲဘၣ်ပှၤတဖၣ်လၢအဆိၣ်အၢမုၢ်နံၤဒီးသ့ထိၣ်ဂဲၤသမၣ်ပယိၤ န့ၣ်လၢအကဆိၣ်အၢမုၢ်တနံၤအံၤန့ၣ်တက့ၢ်.
9မ်ဆၣ်တူၢ်ဂီၤခံးလီၤတက့ၢ်. မ်အသုတဟ့ၣ်မုၢ်တနၤန့ၣ်လၢမုၢ် ကဆ့ၣ်ထီၣ်အတၢ်မုၢ်လၢ်န့ၣ်တဂ့ၤ.
10ဆိၣ်အၢမုၢ်တနၤန့ၣ်လၢအပျဲယကအိၣ်ဖျဲၣ်ထီၣ်အဃိဒီးလၢအ ဒုးဘၣ်သဂၢၢ်ယၤလၢတၢ်ကီတၢ်ခဲဒီးတၢ်သးအုးအဃိန့ၣ် တက့ၢ်.
11ယဆၢလၢယကသံတ့ၢ်လၢယမိၢ်အဒၢလီၢ်ပူၤလံၤလံၤမ့တမ့ၢ် ယကသံဖဲယအိၣ်ဖျဲၣ်ထီၣ်အကတီၢ်န့ၣ်လီၤ.
12ဘၣ်မနုၤလၢယမိၢ်စိာ်ယၤလၢအခီၣ်လ့ၣ်ခိၣ်အလိၤန့ၣ်လဲၣ်. ဘၣ်မနုၤလၢအဝဲဒုးအီနူၢ်ယၤန့ၣ်လဲၣ်. 13ယမ့ၢ်သံယဲဖဲန့ၣ်လံၤလံၤန့ၣ်ဒီးခဲအံၤယကအိၣ်ဘှံးဘၣ်ယဲလံ န့ၣ်လီၤ.
14ဒီးယကမံယဲလီၤဂာ်ဒ်စီၤပၤတဖၣ်ဒီးပဒိၣ်တဖၣ်လၢအသူၣ်ထီၣ် က့ၤတ့ၢ်နီလၢပျၢၤတဖၣ်အသိးန့ၣ်လီၤ.
15အန့ၣ်ဒီးယကမံယဲဒ်စီၤပၤအဖိတဖၣ်လၢအမၤပှဲၤအဟံၣ်လၢ ထူဧိၤစ့ဧိၤ,
16မ့တမ့ၢ်ဘၣ်ဒီးယကမံယဲဒ်ဖိသၣ်လၢအအိၣ်ဖျဲၣ်သံအသိးန့ၣ်လီၤ.
17ဒီးဖဲပျူၤပူၤန့ၣ်ပှၤတတီတလိၤဆိကတီၢ်ကွံာ်အတၢ်အၢတၢ်သီ ဒီးပှၤလၢဝံတၢ်ယိးတၢ်ဃၢတဖၣ်န့ၣ်အိၣ်ဘှံးဝဲဒၣ်လီၤ.
18ဖဲန့ၣ်ပှၤဘၣ်တၢ်စၢဃာ်ဖိတဖၣ်ဒၣ်လဲာ်အိၣ်မုာ်အိၣ်ခုၣ်တပူၤဃီ, တနၢ်ဟူဘၣ်တၢ်မၤကိၢ်မၤဂီၤအသီၣ်လၢၤဘၣ်.
19ပှၤအဒိၣ်ဒီးပှၤအဆံးအိၣ်ဖဲန့ၣ်, ဒီးပှၤကဲကုၢ်ထူၣ်ဖျဲးထီၣ် ကွံာ်လၢအကစၢ်န့ၣ်လီၤ.
20တၢ်ကပီၤဘၣ်တၢ်ဟ့ၣ်လီၤဆူပှၤလၢအအိၣ်လၢတၢ်သူၣ်ကိၢ် သးဂီၤအပူၤ, ဒီးတၢ်မူဆှၢပှၤလၢအသူၣ်ခၣ်အသးခၣ်န့ၣ်မ့ၢ် အဘၣ်မနုၤလဲၣ်.
21အဝဲသ့ၣ်ဆၢသံဘၣ်ဆၣ်တၢ်သံတဟဲတုၤအိၣ်အီၤဘၣ်. ဒီးဘၣ်ဃုဝဲတၢ်သွၣ်ခိၣ်ဒ်တၢ်လုၢ်ဒိၣ်ပှ့ၤဒိၣ်လၢအဘၣ်တၢ်ပာ် ခူသူၣ်အီၤအသိးန့ၣ်လီၤ.
22အဝဲသ့ၣ်အသးအုးတုၤအကတီၢ်လၢအသံဒီးဘၣ်တၢ်ခူၣ်လီၤ ကွံာ်အီၤန့ၣ်လီၤ.
23အဝဲသ့ၣ်အတၢ်အိၣ်မူခါဆူညါန့ၣ်ကစၢ်ယွၤပာ်တဒၢဒီးတြီဃာ် အီၤကိးကပၤဒဲးန့ၣ်လီၤ.
24အဂ့ၢ်ဒ်အံၤယတၢ်သါသဖှိဟဲဝဲဒ်ယတၢ်အီၣ်အသိးဒီးယတၢ် ကအုကစွါလူလီၤအသးဒ်ထံဧိၤနိဧိၤအသိးန့ၣ်လီၤ.
25အဂ့ၢ်ဒ်အံၤတၢ်လၢယဘၣ်ယိာ်န့ၣ်ဟဲဘၣ်ယၤဒီးတၢ်ပျံၤတၢ်ဖုး လီၤဘၣ်လၢယလိၤလီၤ.
26တၢ်ဃူတၢ်ဖိးမ့ၢ်ဂ့ၤ, တၢ်အိၣ်ဘှံးအိၣ်သါမ့ၢ်ဂ့ၤ, လၢယဂီၢ် တအိၣ်ဘၣ်. ဒီးယဘၣ်တၢ်ကိၢ်တၢ်ဂီၤတဖၣ်အကတၢၢ်တအိၣ်ဘၣ်.
Currently Selected:
လံာ်စီၤယိၤဘး 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
