လံာ်ယိၤဟၣ် 12
12
တၢ်ဖှူယ့ၣ်ၡူးလၢသိနၢမူဖဲသဝီဘ့ၤသနံ
(မး. ၂၆:၆-၁၃; မၢ်. ၁၄:၃-၉)
1ဘူၣ်လဲၤကပာ်တချုးဘၣ်ဃုသီန့ၣ်, ယ့ၣ်ၡူးလဲၤဆူသဝီဘ့ၤသနံဖဲ စီၤလါစရူးလၢအဝဲဒုးဂဲၤဆၢထၢၣ်သမူထီၣ်က့ၤတဂၤအိၣ်ဝဲ အလီၢ်န့ၣ်လီၤ. 2ဖဲန့ၣ်, အဝဲသ့ၣ်ကတဲာ်ကတီၤဟါတၢ်အီၣ်လၢယ့ၣ်ၡူးအဂီၢ် ဒီးနီၢ်မၢ်သၤမၤစၢၤတၢ်လၢတၢ်လုၢ်အီၣ်လုၢ်အီဒီးစီၤလါစရူးမ့ၢ် ပှၤအီၣ်သကိးဃုာ်တၢ်ဒီးယ့ၣ်ၡူးအကျါတဂၤန့ၣ်လီၤ. 3နီၢ်မၤရံဟံးန့ၢ်သိနၢမူလုၢ်ဒိၣ်ပှ့ၤဒိၣ်လၢတၢ်မၤန့ၢ်အီၤလၢနၢ်ဒူး အဂံၢ်ဒီပလီညါဒီးလူလီၤဝဲလၢယ့ၣ်ၡူးအခီၣ်အလိၤဒီး ထွါကွံာ်ဝဲလၢအခိၣ်သူလီၤ. သိနၢမူအံၤနၢမူထီၣ်ဝဲပှဲၤဟံၣ်ဒီ ဖျၢၣ်ညါန့ၣ်လီၤ. 4ယ့ၣ်ၡူးအပျဲၢ်အဘီၣ်အကျါ, စီၤယူဒၤအံၣ်စကၤရံၤအိာ်လၢ အကဟ့ၣ်လီၤကွံာ်အီၤတဂၤစံးဝဲ, 5“ဘၣ်မနုၤအဃိတၢ်တဆါသိနၢမူအံၤလၢစ့ဒန့ၤရံသၢကယၤ ဒီးဟ့ၣ်လီၤမၤစၢၤပှၤဖှီၣ်ဖိယာ်ဖိန့ၣ်လဲၣ်.” 6စီၤယူဒၤအံၣ်စကၤရံၤအိာ်ကတိၤတၢ်အံၤတမ့ၢ်လၢအဝဲအသးအိၣ် ပှၤဖှီၣ်ဖိယာ်ဖိအဃိဘၣ်. မ့ၢ်လၢအဝဲမ့ၢ်တၢ်ဘျၣ်တဂၤအဃိလီၤ. အဂ့ၢ်ဒ်လဲၣ်န့ၣ်, အဝဲစိာ်စ့ထၢၣ်ဒီးဟုၣ်န့ၢ်စ့လၢစ့ထၢၣ်ပူၤန့ၣ်လီၤ.
7ဘၣ်ဆၣ်ယ့ၣ်ၡူးစံးဝဲဒၣ်, “မၤတံာ်တာ်ပိာ်မုၣ်အံၤတဂ့ၤ. ပျဲအဝဲပာ်ဃာ်တၢ်အံၤလၢတၢ်ခူၣ်လီၤယၤအမုၢ်တနံၤ အဂီၢ်န့ၣ်တက့ၢ်. 8ပှၤဖှီၣ်ဖိယာ်ဖိတဖၣ်ကအိၣ်ဒီးသုထီဘိတထံၣ်ဃီလီၤ. မ့မ့ၢ်ယဲဒၣ်အံၤ, ယတအိၣ်ဒီးသုထီဘိတထံၣ်ဃီဘၣ်.”
တၢ်ကူၣ်အၢထီဒါစီၤလါစရူး
9ပှၤယူဒၤဖိဂီၢ်မုၢ်ဖးဒိၣ်နၢ်ဟူဝဲလၢယ့ၣ်ၡူးအိၣ်ဝဲလၢသဝီဘ့ၤသနံ သတးဒီးအဝဲသ့ၣ်လဲၤဖဲန့ၣ်, တမ့ၢ်ထဲလၢယ့ၣ်ၡူးအိၣ်ဖဲန့ၣ်အဃိ ဘၣ်. မ့မ့ၢ်လဲၤဝဲဒ်သိးကထံၣ်ဘၣ်စီၤလါစရူးလၢယ့ၣ်ၡူးဒုးဂဲၤဆၢထၢၣ် သမူထီၣ်က့ၤလၢတၢ်သံတဂၤအဂီၢ်စ့ၢ်ကီးလီၤ. 10လၢတၢ်န့ၣ်အဃိ, ပှၤလုၢ်တၢ်အခိၣ်အဒိၣ်တဖၣ်ကူၣ်ထီၣ်ဝဲဒၣ်လၢ အကမၤသံစီၤလါစရူးစ့ၢ်ကီးလီၤ. 11အဂ့ၢ်ဒ်အံၤ, ခီဖျိလၢတၢ်မၤအသးဒီးစီၤလါစရူးအံၤန့ၣ်, ပှၤယူဒၤဖိအါဂၤတတူၢ်လိာ်လၢၤအဝဲသ့ၣ်ဘၣ်ဒီးစူၢ်က့ၤနာ်က့ၤ ယ့ၣ်ၡူးန့ၣ်လီၤ.
တၢ်မၤနၢၤအတၢ်လဲၤနုာ်ဆူဝ့ၢ်ယရူၤၡလ့ၣ်အပူၤ
(မး. ၂၁:၁-၁၁; မၢ်. ၁၁:၁-၁၁; လူၤ. ၁၉:၂၈-၄၀)
12လၢခံတနံၤ, ပှၤဂီၢ်မုၢ်ဖးဒိၣ်လၢအဟဲဆူဘူၣ်လဲၤကပာ် တဖၣ်နၢ်ဟူလၢယ့ၣ်ၡူးဟဲဝဲဆူဝ့ၢ်ယရူၤၡလ့ၣ်န့ၣ်လီၤ. 13လၢတၢ်န့ၣ်အဃိ, အဝဲသ့ၣ်ဟံးန့ၢ်လိၣ်ဒၢအဒ့တဖၣ်ဒီးလဲၤထီၣ် သဂၢၢ်အီၤဒီးကိးပသူထီၣ်ဝဲ, “အုၣ်က့ၤခီၣ်က့ၤပှၤတက့ၢ်. မ်ကစၢ်ယွၤဆိၣ်ဂ့ၤပှၤလၢအဟဲလၢကစၢ်အမံၤတဂၤတက့ၢ်. မ်ကစၢ်ယွၤဆိၣ်ဂ့ၤအံၣ်စရ့လးအစီၤပၤတက့ၢ်.”
14ယ့ၣ်ၡူးထံၣ်န့ၢ်ကသ့ၣ်ယီၤဖိတဒုဒီးဒိးထီၣ်အီၤဒ်တၢ်ကွဲး အသးစံးဝဲ,
15“ပျံၤတၢ်တဂ့ၤ, ဝ့ၢ်စံယိၣ်ဧၢ,
ကွၢ်ကွၢ်, နစီၤပၤ
ဟဲဒိးဝဲကသ့ၣ်ယီၤဖိတဒုဆူနအိၣ်လီၤ”
(ကၤ. ၉:၉).
16အကတီၢ်ဖဲန့ၣ်, အပျဲၢ်အဘီၣ်တဖၣ်တနၢ်ပၢၢ်တၢ်အံၤဘၣ်. ဘၣ်ဆၣ်တုၤယ့ၣ်ၡူးဘၣ်တၢ်ဒုးဂဲၤဆၢထၢၣ်က့ၤအီၤအိၣ်ဒီး အလၤကပီၤန့ၣ်, အဝဲသ့ၣ်သ့ၣ်နီၣ်ထီၣ်က့ၤဝဲလၢတၢ်ကွဲးအသး စံးတ့ၢ်လၢတၢ်အံၤအဂ့ၢ်ဘၣ်ထွဲဒီးယ့ၣ်ၡူးဒီးလၢအဝဲသ့ၣ် မၤတ့ၢ်လံဝဲတၢ်အံၤလၢယ့ၣ်ၡူးအဂီၢ်န့ၣ်လီၤ.
17ပှၤဂီၢ်မုၢ်တဖၣ်လၢအအိၣ်တ့ၢ်ဒီးယ့ၣ်ၡူးအကတီၢ်ဖဲအဝဲကိးထီၣ် စီၤလါစရူးလၢတၢ်သွၣ်ခိၣ်အပူၤဒီးဒုးဂဲၤဆၢထၢၣ်က့ၤအီၤန့ၣ်, အုၣ်တ့ၢ်အသးလၢတၢ်မၤအသးအံၤအဂ့ၢ်လီၤ. 18မ့ၢ်လၢပှၤဂီၢ်မုၢ်နၢ်ဟူဝဲဒၣ်လၢယ့ၣ်ၡူးမၤတ့ၢ်တၢ်လီၤလးတမံၤအံၤ အဃိ, အဝဲသ့ၣ်ဟဲသဂၢၢ်အီၤလီၤ. 19တုၤနုၤတစု, ပှၤဖၤရံၤၡဲတဖၣ်ကတိၤလိာ်အသးတဂၤဒီးတဂၤ, “သုထံၣ်လံ. ပမၤတၢ်တကဲထီၣ်လိၣ်ထီၣ်နီတမံၤဘၣ်. ကွၢ်ကွၢ်, ပှၤခဲလၢာ်ပိာ်အခံလံ.”
ပှၤကြံးခ်ဖိ တနီၤဃုထံၣ်ယ့ၣ်ၡူး
20ပှၤတဖၣ်လၢအလဲၤထီၣ်ဆူဝ့ၢ်ယရူၤၡလ့ၣ်လၢတၢ်ဘူၣ်ထီၣ် ဘါထီၣ်တၢ်အဂီၢ်ဖဲဘူၣ်အဆၢကတီၢ်အံၤအကျါန့ၣ်, ပှၤကြံးခ်ဖိအိၣ်ဝဲဒၣ်တနီၤန့ၣ်လီၤ. 21အဝဲသ့ၣ်လဲၤဆူစီၤဖံလံးပူး (ပှၤဝ့ၢ်ဘ့ၤသစဲဒၤဖိလၢကီၢ်ကၤလံၤလါ) အအိၣ်ဒီးစံးဘၣ်အီၤ, “တၢ်ဒိၣ်ဧၢ, ပသးအိၣ်ထံၣ်ဘၣ်ယ့ၣ်ၡူးလီၤ.”
22စီၤဖံလံးပူးလဲၤတဲဘၣ်စီၤအၣ်ဒရ့း, ဒီးအဝဲသ့ၣ်ခံဂၤလိာ်လဲၤတဲဘၣ်ယ့ၣ်ၡူးလီၤ. 23ယ့ၣ်ၡူးစံးဆၢအဝဲသ့ၣ် “တၢ်ဆၢကတီၢ်နၣ်ရံၣ်ဘၣ်လံဝဲလၢ ယွၤကမၤလၤကပီၤပှၤကညီဖိခွါအဂီၢ်လီၤ. 24ယစံးဘၣ်တဲဘၣ်သုတၢ်မ့ၢ်တၢ်တီလီၤ. မ့တမ့ၢ်ဘၣ်လၢဘုချံတဖျၢၣ်ဘၣ်တၢ်တ့ၢ်လီၤကွံာ်အီၤဆူဟီၣ်ခိၣ် အလိၤဒီးအုၣ်သံကွံာ်ဘၣ်န့ၣ်, ဘုချံအံၤကအိၣ်ဒၣ်ထဲတဖျၢၣ်ဧိၤဒ်လီၢ်လီၢ်န့ၣ်လီၤ. မ့မ့ၢ်တုၤအအုၣ်သံကွံာ်ဒီးကမဲထီၣ်ဒီးသၣ်ထီၣ်ဝဲအါဖျၢၣ်လီၤ. 25ပှၤတဂၤလၢ်လၢ်လၢအအဲၣ်လီၤအသးသမူဒၣ်ဝဲန့ၣ်, အသးသမူကလီၤမၢ်န့ၢ်အီၤလီၤ. ဒီးပှၤတဂၤလၢ်လၢ်လၢ အတအဲၣ်လီၤအသးသမူဒၣ်ဝဲလၢဟီၣ်ခိၣ်အံၤန့ၣ်, ကဟံးဃာ်ပၢၤဃာ်ဝဲလၢတၢ်မူအထူအယိာ်အဂီၢ်လီၤ. 26ပှၤတဂၤလၢ်လၢ်လၢအသးအိၣ်မၤယတၢ်မၤန့ၣ်, ကဘၣ်ကဲထီၣ်ယပျဲၢ်ယဘီၣ်ဒ်သိးဖဲယအိၣ်အလီၢ်န့ၣ် ယခ့ယပှၤကအိၣ်စ့ၢ်ကီးဒီးယၤဖဲန့ၣ်လီၤ. ပှၤတဂၤဂ့ၤတဂၤဂ့ၤမ့ၢ်မၤယတၢ်မၤဒီး, ယပၢ်ကမၤလၤကပီၤအီၤလီၤ.
ယ့ၣ်ၡူးကတိၤတၢ်ဘၣ်ဃးအတၢ်သံအဂ့ၢ်
27ခဲအံၤယသးဘၣ်တံာ်တာ်ဒိၣ်မးဒီးယကဘၣ်စံးဒ်လဲၣ်. မ့ၢ်ယကဘၣ်စံး, ‘ပၢ်ဧၢ, တဘၣ်ပျဲတၢ်ဆၢကတီၢ်နၣ်ရံၣ်အဝဲအံၤဟဲတုၤအိၣ်ယၤတဂ့ၤ’ န့ၣ်ဧါ. ဘၣ်ဆၣ်ယဟဲယဲလၢယကလဲၤခီဖျိတၢ်နးတၢ်ဖှီၣ် အနၣ်ရံၣ်အံၤအဂီၢ်န့ၣ်လီၤ. 28ပၢ်ဧၢ, မၤလၤကပီၤနမံၤတက့ၢ်.” အန့ၣ်ဒီးတၢ်ကလုၢ်သီၣ်လီၤလၢ မူခိၣ်ဒီးစံးဝဲ, “ယမၤလၤကပီၤအီၤလံ. ဒီးယကမၤလၤကပီၤကဒီး အီၤန့ၣ်လီၤ.”
29ပှၤဂီၢ်မုၢ်အိၣ်ဆၢထၢၣ်ဖဲန့ၣ်တဖၣ်နၢ်ဟူတၢ်အံၤ, ဒီးအဝဲသ့ၣ်တနီၤစံးဝဲလၢအမ့ၢ်ဒၣ်လီသီၣ်လီၤ. အဂၤတနီၤစံးဝဲ, “မ့ၢ်ကလူးတဂၤကတိၤတၢ်ဒီးအီၤန့ၣ်လီၤ.”
30ဘၣ်ဆၣ်ဒီးယ့ၣ်ၡူးစံးဘၣ်အဝဲသ့ၣ်, “တၢ်ကလုၢ်အဝဲအံၤသီၣ်ထီၣ်တမ့ၢ်လၢယဂီၢ်ဘၣ်. မ့ၢ်ဒၣ်လၢသုဂီၢ်န့ၣ်လီၤ. 31ခဲကနံၣ်အံၤ, မ့ၢ်တၢ်ဆၢကတီၢ်လၢဟီၣ်ခိၣ်ကဘၣ်တၢ်စံၣ်ညီၣ်အီၤ အဂီၢ်လီၤ. ခဲကနံၣ်အံၤပှၤလၢအပၢဟီၣ်ခိၣ်တဂၤန့ၣ်, ကဘၣ်တၢ်တၢၤကွံာ်အီၤလၢစီၤပၤအလီၢ်လီၤ. 32ဖဲယဘၣ်တၢ်ယူာ်ထီၣ်ယၤလၢဟီၣ်ခိၣ်အံၤဒီး, ယကထုးဖှိၣ်ပှၤခဲလၢာ်ဆူယအိၣ်လီၤ. 33(ယ့ၣ်ၡူးစံးတၢ်ဒ်အံၤန့ၣ်, မ့ၢ်အဒုးနဲၣ်ဖျါထီၣ်ဝဲကဘၣ်တူၢ်တၢ်သံဒ်လဲၣ်တကလုာ်လဲၣ်န့ၣ်လီၤ.)
34ပှၤဂီၢ်မုၢ်စံးဆၢတၢ်ဒီးစံးဝဲ, “ပတၢ်သိၣ်တၢ်သီစံးဘၣ်ပှၤလၢ ခရံာ်ကမူဝဲလီၤစိၤလီၤထီလီၤ. မ့မ့ၢ်ဒ်န့ၣ်ဒီး, နစံးလၢပှၤကညီဖိခွါကဘၣ်တၢ်ယူာ်ထီၣ်အီၤန့ၣ်ကသ့ဒ်လဲၣ်. ပှၤကညီဖိခွါအံၤမ့ၢ်မတၤတဂၤလဲၣ်.”
35ယ့ၣ်ၡူးစံးဆၢတၢ်ဒီးစံးဝဲ, “တၢ်ကပီၤကအိၣ်ဒံးလၢသုကျါ တစိၢ်တလီၢ်လီၤ. ဖဲသုအိၣ်ဒံးဒီးတၢ်ကပီၤအဖၢမုၢ်အံၤ, တၢ်လဲၤလၢအအိၣ်ဒီးသုန့ၣ်လဲၤတက့ၢ်. မ့တမ့ၢ်ဘၣ်ဒီးတၢ်ခံး ကတုၤအိၣ်သုလီၤ. အဂ့ၢ်ဒ်အံၤ, ပှၤတဂၤလၢအဟးလၢ တၢ်ခံးကျါန့ၣ်, မ့ၢ်အလဲၤဝဲဆူလဲၣ်ဆူလဲၣ်န့ၣ်တသ့ၣ်ညါဝဲဘၣ်. 36လၢတၢ်န့ၣ်အဃိ, ဖဲသုအိၣ်ဒံးဒီးတၢ်ကပီၤန့ၣ်, စူၢ်က့ၤနာ်က့ၤတၢ် ကပီၤအံၤဒ်သိးသုကကဲထီၣ်ပှၤတၢ်ကပီၤဖိတဖၣ်အဂီၢ်န့ၣ်တက့ၢ်.
ပှၤယူဒၤဖိတနာ်ယ့ၣ်ၡူးအဂ့ၢ်
ယ့ၣ်ၡူးစံးတၢ်အံၤဝံၤဒီး, အဝဲဟးထီၣ်ကွံာ်ဒီးပာ်သဒၢကွံာ်အသးလၢအဝဲသ့ၣ်န့ၣ်လီၤ. 37ယ့ၣ်ၡူးမၤတၢ်လီၤလးတဖၣ်အံၤလၢအဝဲသ့ၣ်အမဲာ်ညါ ထဲထဲအံၤသနာ်က့, အဝဲသ့ၣ်တစူၢ်က့ၤနာ်က့ၤအီၤဘၣ်. 38တၢ်အံၤမ့ၢ်ဒ်သိးဒီးတၢ်လၢဝံယၡါယၤကတိၤတ့ၢ်ဝဲကလၢ ထီၣ်ပှဲၤထီၣ်အဂီၢ်လီၤ.
“ကစၢ်ဧၢ, မ့ၢ်မတၤနာ်တၢ်ကစီၣ်လၢ
ပစံးဘၣ်တဲဘၣ်တ့ၢ်လံန့ၣ်လဲၣ်.
ကစၢ်လီၣ်ဖျါထီၣ်တ့ၢ်အစိကမီၤလၢ
မတၤတဂၤန့ၣ်လဲၣ်” (ၡါ ၅၃:၁).
39လၢတၢ်န့ၣ်အဃိ, အဝဲသ့ၣ်စူၢ်က့ၤနာ်က့ၤတၢ်တသ့ဘၣ်. မ့ၢ်လၢဝံယၡါယၤစံးတ့ၢ်စ့ၢ်ကီးဝဲ,
40“ကစၢ်ယွၤမၤဘျီၣ်အဝဲသ့ၣ်အမဲာ်ချံတဖၣ်
ဒီးမၤကိၤထီၣ်အဝဲသ့ၣ်အသး,
ဒ်သိးအမဲာ်ချံတဖၣ်သုတထံၣ်တၢ်တဂ့ၤ
ဒီးအသးအသုတနၢ်ပၢၢ်တၢ်တဂ့ၤ,
ဒီးအဝဲသ့ၣ်အသုတဃၣ်အသးဆူအအိၣ်
လၢအကမၤဘျါက့ၤအဝဲသ့ၣ်အဂီၢ်တဂ့ၤန့ၣ်လီၤ” (ၡါ ၆:၁၀).
41ဝံယၡါယၤစံးတၢ်အံၤမ့ၢ်လၢအဝဲထံၣ်ဘၣ်ယ့ၣ်ၡူးအလၤကပီၤ အဃိစံးကတိၤဝဲအဂ့ၢ်အကျိၤန့ၣ်လီၤ.
42အန့ၣ်ဒၣ်လဲာ်, ပှၤယူဒၤဖိအခိၣ်အနၢ်အါဂၤစူၢ် က့ၤနာ်က့ၤယ့ၣ်ၡူးဘၣ်ဆၣ်ဒီးမ့ၢ်လၢအပျံၤဘၣ်ပှၤဖၤရံၤၡဲ တဖၣ်အဃိ, ဒ်သိးဒီးအဝဲသ့ၣ်အသုတဘၣ်တၢ်ဟီထီၣ်ကွံာ်အီၤလၢ ဘူၣ်ဘျီၣ်လၢအမ့ၢ်တၢ်ဘါလီၢ်တဂ့ၤဒီး, အဝဲသ့ၣ်တအၢၣ်လီၤ အီလီၤတၢ်စူၢ်တၢ်နာ်လၢပှၤဂၤအမဲာ်ညါဘၣ်. 43အဝဲသ့ၣ်အဲၣ်ဒိးပှၤကညီအတၢ်စံးထီၣ်ပတြၢၤဒိၣ်န့ၢ် ကစၢ်ယွၤအတၢ်စံးထီၣ်ပတြၢၤတက့ၢ်လီၤ.
ယ့ၣ်ၡူးအတၢ်ကတိၤတဖၣ်ကစံၣ်ညီၣ်တၢ်
44ယ့ၣ်ၡူးကတိၤတၢ်လၢအကလုၢ်ဖးဒိၣ်ဒီးစံးဝဲ “ပှၤတဂၤလၢ်လၢ်လၢအစူၢ်က့ၤနာ်က့ၤယၤန့ၣ်, တမ့ၢ်အစူၢ်က့ၤနာ်က့ၤထဲယၤတဂၤဧိၤဘၣ်. မ့ၢ်အစူၢ်က့ၤနာ်က့ၤစ့ၢ်ကီးပှၤလၢအမၢလီၤယၤန့ၣ်လီၤ. 45ပှၤလၢအထံၣ်ယၤန့ၣ်, ထံၣ်စ့ၢ်ကီးပှၤလၢအမၢလီၤယၤတဂၤ န့ၣ်လီၤ. 46ယဟဲနုာ်ဆူဟီၣ်ခိၣ်ချၢဒ်တၢ်ကပီၤအသိး, ဒ်သိးပှၤလၢအစူၢ်က့ၤနာ်က့ၤယၤတဂၤလၢ်လၢ်န့ၣ်, အသုတအိၣ်လၢၤလၢတၢ်ခံးကျါတဂ့ၤအဂီၢ်လီၤ. 47ပှၤတဂၤလၢ်လၢ်လၢအနၢ်ဟူယတၢ်ကစီၣ်ဒီးတစူၢ်ဝဲဘၣ်န့ၣ်, ယတစံၣ်ညီၣ်အီၤဘၣ်. ယဟဲဒ်သိးယကအုၣ်က့ၤခီၣ်က့ၤပှၤဟီၣ်ခိၣ်ဖိ ဒီးတမ့ၢ်ဘၣ်လၢယကစံၣ်ညီၣ်အီၤအဂီၢ်ဘၣ်. 48ပှၤတဂၤလၢ်လၢ်လၢအညိကွံာ်ယၤဒီးတတူၢ်လိာ်ယတၢ် ကစီၣ်ဘၣ်န့ၣ်, တၢ်လၢအကစံၣ်ညီၣ်အီၤအိၣ်ဝဲန့ၣ်လီၤ. တၢ်ကတိၤလၢယကတိၤတ့ၢ်လံတဖၣ်ကကဲထီၣ်တၢ်လၢ အကစံၣ်ညီၣ်အီၤလၢမုၢ်နံၤခံကတၢၢ်န့ၣ်လီၤ. 49အဝဲအံၤမ့ၢ်တၢ်မ့ၢ်တၢ်တီလီၤ. အဂ့ၢ်ဒ်လဲၣ်န့ၣ်, ယတကတိၤတၢ်ဖဲယသးဒၣ်ယဲန့ၣ်ဘၣ်. ပၢ်လၢအမၢလီၤယၤတဂၤမၤလိာ်တ့ၢ်ယၤတၢ်လၢ ယကဘၣ်စံးဒီးကတိၤတဖၣ်န့ၣ်လီၤ. 50ဒီးယသ့ၣ်ညါလၢအဝဲအတၢ်မၤလိာ်အံၤဟဲစိာ်တၢ်မူအထူ အယိာ်လီၤ. အဃိဒီး, တၢ်လၢယစံးကတိၤအီၤအံၤမ့ၢ်တၢ်လၢပၢ်မၢယစံး ကတိၤအီၤန့ၣ်လီၤ.”
Currently Selected:
လံာ်ယိၤဟၣ် 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
