လံာ်ယိၤဟၣ် 11
11
စီၤလါစရူးအတၢ်သံ
1ပှၤအိၣ်ဝဲတဂၤအမံၤမ့ၢ်စီၤလါစရူးလၢအအိၣ်လၢသဝီဘ့ၤ သနံဒီးအဝဲဆိးက့ဝဲန့ၣ်လီၤ. ဘ့ၤသနံမ့ၢ်သဝီလၢနီၢ်မၤရံဒီးအဒီပုၢ်ဝဲၢ်မုၣ်နီၢ်မၢ်သၤ အိၣ်ဝဲန့ၣ်လီၤ. 2(နီၢ်မၤရံအဝဲအံၤမ့ၢ်ပှၤတဂၤဃီလၢအလူလီၤအသိနၢမူလၢ ယ့ၣ်ၡူးအခီၣ်အလိၤဒီးတြူာ်ကွံာ်ဝဲအခီၣ်လၢအခိၣ်သူလီၤ. စီၤလါစရူးလၢအဆိးက့အံၤမ့ၢ်အဝဲအဒီပုၢ်ဝဲၢ်ခွါလီၤ.) 3ပှၤဒီပုၢ်ဝဲၢ်မုၣ်ခံဂၤအံၤဆှၢလီၤန့ၢ်ယ့ၣ်ၡူးအတၢ်ကစီၣ်လၢ အစံးဝဲ, “ကစၢ်ဧၢ, နတံၤသကိးလၢနအဲၣ်အီၤတဂၤဆိးက့ဝဲန့ၣ်လီၤ.”
4ဖဲယ့ၣ်ၡူးနၢ်ဟူတၢ်ကစီၣ်အံၤန့ၣ်အဝဲဒၣ်စံး, “တၢ်ဆူးတၢ်ဆါအံၤတမ့ၢ်တၢ်ဆါလၢအကဆှၢအီၤဆူတၢ်သံ န့ၣ်ဘၣ်. မ့မ့ၢ်လၢကစၢ်ယွၤအလၤကပီၤအဂီၢ်, ဒီးခီဖျိတၢ်အံၤန့ၣ်, ကစၢ်ယွၤအဖိခွါအလၤကပီၤကအိၣ်ဖျါထီၣ်ဝဲန့ၣ်လီၤ.”
5ယ့ၣ်ၡူးအဲၣ်ဘၣ်နီၢ်မၢ်သၤဒီးအဒီပုၢ်ဝဲၢ်မုၣ်ဒီးစီၤလါစရူးလီၤ. 6သနာ်က့, ဖဲအဝဲဒိးန့ၢ်တၢ်ကစီၣ်လၢစီၤလါစရူးဆိးက့ဝဲန့ၣ်, အဝဲအိၣ်အါထီၣ်ဒံးဝဲဖဲတၢ်လီၢ်န့ၣ်ခံသီညါလီၤ. 7အန့ၣ်ဝံၤဒီး, အဝဲစံးဘၣ်အပျဲၢ်အဘီၣ်တဖၣ်, “မ်ပက့ၤကဒါက့ၤဆူကီၢ်ယူဒၤတက့ၢ်.”
8အပျဲၢ်အဘီၣ်တဖၣ်စံးဆၢအီၤ, “သရၣ်ဧၢ, ဖဲအပူၤကွံာ်တယံာ်ဒံးဘၣ်ဒၣ်လဲာ်န့ၣ်, ပှၤယူဒၤဖိတဖၣ်သါကကွံာ်သံနၤလၢလၢၢ်, ဒီးခဲအံၤနကက့ၤကဒါက့ၤကဒီးဆူန့ၣ်ဧါ.”
9ယ့ၣ်ၡူးစံးဆၢဝဲဒၣ်, “မုၢ်နံၤတနံၤန့ၣ်အိၣ်တဆံခံနၣ်ရံၣ် တမ့ၢ်ဘၣ်ဧါ. လၢတၢ်န့ၣ်အဃိပှၤတဂၤဂ့ၤတဂၤဂ့ၤလၢ အဟးလၢမုၢ်ဆါခီန့ၣ်, အခီၣ်တဘၣ်တိၢ်ဘၣ်. မ့ၢ်လၢအဝဲထံၣ်ဘၣ်ဟီၣ်ခိၣ်အံၤအတၢ်ကပီၤအဃိလီၤ. 10ဘၣ်ဆၣ်အဝဲမ့ၢ်ဟးလၢမုၢ်နၤခီအဆၢကတီၢ်န့ၣ်, အခီၣ် ကဘၣ်တိၢ်ဘၣ်ထံး, မ့ၢ်လၢတၢ်ကပီၤတအိၣ်ဘၣ်လၢအပူၤဘၣ် အဃိလီၤ.” 11ယ့ၣ်ၡူးကတိၤတၢ်န့ၣ်တဖၣ်ဝံၤစံးကဒီးဝဲ, “ပတံၤသကိးစီၤလါစရူးတဂၤမံဘၣ်အသးလံ. ဘၣ်ဆၣ်ယကလဲၤဒီးထိၣ်ဂဲၤထၢၣ်အီၤန့ၣ်လီၤ.”
12အပျဲၢ်အဘီၣ်တဖၣ်စံးဆၢအီၤ, “ကစၢ်ဧၢ, အဝဲမ့ၢ်မံဘၣ်အသးဒီး, ကအိၣ်ဆူၣ်အိၣ်ချ့ထီၣ်က့ၤဝဲလီၤ.”
13ယ့ၣ်ၡူးစံးတၢ်အံၤအခီပညီမ့ၢ်ဝဲစီၤလါစရူးသံလံန့ၣ်လီၤ. ဘၣ်ဆၣ်အဝဲသ့ၣ်ဆိကမိၣ်ဝဲလၢယ့ၣ်ၡူးစံးဒၣ်ဝဲ စီၤလါစရူးမံဘၣ်အသးဒ်ညီနုၢ်မံဝဲအသိးန့ၣ်လီၤ. 14လၢတၢ်န့ၣ်အဃိ, ယ့ၣ်ၡူးစံးဘၣ်အဝဲသ့ၣ်လိၤလိၤ, “စီၤလါစရူးသံလံ. 15ဘၣ်ဆၣ်ဒီးလၢသုဂီၢ်န့ၣ်, ယသးခုလၢယတအိၣ်ဘၣ်ဒီးအီၤဖဲန့ၣ် အဃိလီၤ. ခီဖျိတၢ်အံၤ, သုကနာ်တၢ်လီၤ. မ်ပလဲၤသကိးဆူအအိၣ်တက့ၢ်.”
16စီၤသိၤမါ (အခီပညီမ့ၢ်ပှၤသဃံာ်) စံးဘၣ်အပျဲၢ်အဘီၣ်သကိး ဒီးအီၤတဖၣ်, “မ်ပဝဲခဲလၢာ်ပလဲၤသကိးဒီးသရၣ်, ဒ်သိးပကသံဃုာ်ဒီးအီၤအဂီၢ်တက့ၢ်.”
ယ့ၣ်ၡူးမ့ၢ်တၢ်ဂဲၤဆၢထၢၣ်သမူထီၣ်က့ၤ ဒီးတၢ်မူ
17ဖဲယ့ၣ်ၡူးလဲၤတုၤဝဲန့ၣ်, ထံၣ်ဘၣ်ဝဲလၢ စီၤလါစရူးဘၣ်တၢ်ခူၣ်လီၤတ့ၢ်လံအီၤအိၣ်လွံၢ်သီလံန့ၣ်လီၤ. 18သဝီဘ့ၤသနံအံၤအိၣ်စီၤစုၤယံၤဒီးဝ့ၢ်ယရူၤၡလ့ၣ်ခံမံးလး ဃၣ်ဃၣ်, 19ဒီးပှၤယူဒၤဖိအါဂၤဟဲဆူနီၢ်မၢ်သၤဒီးနီၢ်မၤရံအအိၣ် ဒ်သိးကကတိၤမုာ်ထီၣ်က့ၤအသးလၢအဝဲသ့ၣ်အဒီပုၢ်ဝဲၢ်သံ အဃိန့ၣ်လီၤ.
20တုၤနီၢ်မၢ်သၤနၢ်ဟူယ့ၣ်ၡူးဟဲဝဲလံဒီး, အဝဲဟးထီၣ်လဲၤသဂၢၢ် အီၤ, မ့မ့ၢ်နီၢ်မၤရံတဂၤဆ့ၣ်နီၤအိၣ်ဒၣ်လၢဟံၣ်ပူၤန့ၣ်လီၤ. 21နီၢ်မၢ်သၤစံးဘၣ်ယ့ၣ်ၡူး “ကစၢ်ဧၢ, နမ့ၢ်အိၣ်ဘၣ်ဖဲအံၤဒီး တမ့ၢ်လၢယဒီပုၢ်ဝဲၢ်ခွါတဂၤအံၤကသံဒံးဘၣ်. 22ဘၣ်ဆၣ်ယသ့ၣ်ညါလၢ, ခဲကနံၣ်အံၤဒၣ်လဲာ် ဖဲဒၣ်တၢ်လၢနဃ့လၢကစၢ်ယွၤတမံၤလၢ်လၢ်န့ၣ်, ကစၢ်ယွၤကဟ့ၣ်လီၤနၤလီၤ.”
23ယ့ၣ်ၡူးစံးဘၣ်အီၤ, “နဒီပုၢ်ဝဲၢ်ခွါကမူထီၣ်က့ၤဝဲလီၤ.”
24နီၢ်မၢ်သၤစံးဆၢအီၤ, “ယသ့ၣ်ညါလၢအဝဲကမူထီၣ်က့ၤလၢမုၢ်နံၤခံကတၢၢ်န့ၣ်လီၤ.”
25ယ့ၣ်ၡူးစံးဘၣ်အီၤ, “ယဲဒၣ်အံၤ ယမ့ၢ်တၢ်ဂဲၤဆၢထၢၣ်သမူထီၣ်က့ၤ ဒီးတၢ်မူန့ၣ်လီၤ. ပှၤလၢအစူၢ်က့ၤနာ်က့ၤယၤတဂၤလၢ်လၢ်န့ၣ်, မ့ၢ်သံဘၣ်ဆၣ်ဒီးကမူဝဲလီၤ. 26ဒီးပှၤတဂၤလၢ်လၢ်လၢအမူဝဲဒီးစူၢ်က့ၤနာ်က့ၤယၤန့ၣ်, တသံနီတဘျီလၢၤဘၣ်. နနာ်တၢ်အံၤစ့ၢ်ကီးဧါ.”
27နီၢ်မၢ်သၤစံးဆၢအီၤ, “မ့ၢ်ကစၢ်ဧၢ, ယနာ်လၢနမ့ၢ်ခရံာ်, ကစၢ်ယွၤအဖိခွါလၢအကဟဲလီၤဆူဟီၣ်ခိၣ်ချၢအံၤန့ၣ်လီၤ.”
ယ့ၣ်ၡူးအမဲာ်ထံလီၤဝဲ
28နီၢ်မၢ်သၤစံးတၢ်ဒ်အံၤဝံၤဒီး, အဝဲက့ၤကဒါက့ၤဒီးကိး အဒီပုၢ်ဝဲၢ်မုၣ်နီၢ်မၤရံကစုဒုဒီးစံးဘၣ်အီၤ, “သရၣ်ဟဲတုၤဖဲအံၤလံဒီးအဲၣ်ဒိးထံၣ်နၤလီၤ.” 29ဖဲနီၢ်မၤရံနၢ်ဟူတၢ်အံၤဒီး, ဂဲၤဆၢထၢၣ်ဒီးဟးထီၣ်ချ့သဒံးလၢကသဂၢၢ်အီၤ အဂီၢ်လီၤ. 30(ယ့ၣ်ၡူးဟဲတတုၤဒံးဆူသဝီပူၤဘၣ်. မ့မ့ၢ်အိၣ်ဒံးဒၣ်ဖဲနီၢ်မၢ်သၤဟဲသဂၢၢ်အီၤအလီၢ်န့ၣ်လီၤ.) 31ဖဲပှၤယူဒၤဖိလၢအကတိၤမုာ်ထီၣ်က့ၤအီၤဒီးအိၣ်ဒီးအီၤ လၢဟံၣ်ပူၤတဖၣ်ထံၣ်နီၢ်မၤရံဂဲၤဆၢထၢၣ်ချ့သဒံးန့ၣ်, အဝဲသ့ၣ်ပိာ်ထီၣ်အခံလီၤ. အဝဲသ့ၣ်ဆိကမိၣ်ဝဲလၢအဝဲ ကလဲၤဆူတၢ်သွၣ်ခိၣ်ဒ်သိးအကဟီၣ်ဝဲဖဲန့ၣ်လီၤ.
32နီၢ်မၤရံလဲၤတုၤဖဲယ့ၣ်ၡူးအိၣ်တၢ်အလီၢ်ဒီး တုၤအထံၣ်အီၤတဘျီဃီအဝဲထိၣ်လီၤပှီၤအသးဖဲယ့ၣ်ၡူး အခီၣ်ထံးဒီးစံးဝဲ, “ကစၢ်ဧၢ, နမ့ၢ်အိၣ်တ့ၢ်နဲဖဲအံၤဒီး ယဒီပုၢ်ဝဲၢ်ခွါတဂၤအံၤတမ့ၢ်လၢအကသံဒံးဘၣ်.”
33ယ့ၣ်ၡူးထံၣ်ဘၣ်နီၢ်မၤရံဟီၣ်, ဒီးပှၤယူဒၤဖိလၢအဟဲပိာ်အခံတဖၣ်ဟီၣ်စ့ၢ်ကီးအဃိ, အသးဘၣ်ဒိဘၣ်ထံးဒီးအသူၣ်လီၤအသးလီၤဝဲန့ၣ်လီၤ. 34အဝဲသံကွၢ်ပှၤတဖၣ်န့ၣ်, “သုလဲၤပာ်လီၤအီၤဖဲလဲၣ်.” အဝဲသ့ၣ်စံးဆၢအီၤ, “ကစၢ်ဧၢ, ဟဲဒီးကွၢ်တက့ၢ်.”
35ဒီးယ့ၣ်ၡူးအမဲာ်ထံလီၤဝဲလီၤ.
36ပှၤယူဒၤဖိတဖၣ်စံးဝဲ, “ကွၢ်တက့ၢ်. မ့ၢ်အအဲၣ်ဘၣ်အီၤထဲလဲၣ်န့ၣ်သုထံၣ်သ့ၣ်ညါသ့လီၤ.” 37လၢအဝဲသ့ၣ်အကျါတနီၤစံးဝဲ “အဝဲဒုးထံၣ်ထီၣ်က့ၤပှၤမဲာ်ဘျီၣ်တဂၤန့ၣ်တမ့ၢ်ဘၣ်ဧါ. ဒ်သိးစီၤလါစရူးအသုတသံတဂ့ၤဒီး, မၤဝဲတသ့ဘၣ်ဧါ.”
စီၤလါစရူးဘၣ်တၢ်မၤမူထီၣ်က့ၤအီၤ
38လၢတၢ်သူၣ်ဘၣ်ဒိသးဘၣ်ထံးအပူၤ, ယ့ၣ်ၡူးလဲၤဆူတၢ် သွၣ်ခိၣ်, လၢအမ့ၢ်လ့အပူၤလၢအခိၣ်ထိးဘၣ်တၢ်ကျၢၢ်ဘၢ အီၤလၢလၢၢ်န့ၣ်လီၤ. 39ယ့ၣ်ၡူးဟ့ၣ်လီၤအကလုၢ်ဒီးစံးဝဲ “သုးကွံာ်လၢၢ်န့ၣ် တက့ၢ်.” နီၢ်မၢ်သၤ, ပှၤလၢအသံတဂၤအဒီပုၢ်ဝဲၢ်မုၣ်စံးဆၢတၢ်ဒီး စံးဝဲ “ကစၢ်ဧၢ, ပှၤပာ်လီၤအီၤအိၣ်လွံၢ်သီလံအဃိကနၢအုၣ်လံလီၤ.”
40ယ့ၣ်ၡူးစံးဘၣ်အီၤ, “မ့ၢ်ယတတဲဘၣ်လံနၤလၢနမ့ၢ်နာ်တၢ်ဒီး နကထံၣ်ဘၣ်ကစၢ်ယွၤအလၤကပီၤန့ၣ်ဘၣ်ဧါ.” 41ပှၤသ့ၣ်တဖၣ်န့ၣ်သုးကွံာ်လၢၢ်န့ၣ်လီၤ. ယ့ၣ်ၡူးကွၢ်ထီၣ်တၢ်ဒီးစံးဝဲ, “ပၢ်ဧၢ, ယစံးဘျုးနၤလၢနဒိကနၣ်ယၤအဃိလီၤ. 42ယသ့ၣ်ညါလၢနဒိကနၣ်ယၤထီဘိတထံၣ်ဃီလီၤ. ဘၣ်ဆၣ်ယစံးတၢ်အံၤမ့ၢ်ဒၣ်ဒ်သိးဒီးပှၤဂီၢ်မုၢ်ဖဲအံၤတဖၣ် ကနာ်ဝဲလၢနမၢလီၤယၤအဂီၢ်န့ၣ်လီၤ.” 43အဝဲစံးတၢ်အံၤဝံၤဒီး, ကိးပသူထီၣ်ဝဲလၢအကလုၢ်ဖးဒိၣ်, “စီၤလါစရူးဧၢ, ဟဲက့ၤထီၣ်တက့ၢ်.” 44အဝဲဟဲက့ၤထီၣ်က့ၤဝဲ, အစုဒီးအခီၣ်တဖၣ်ဘၣ်ဘိၣ်ဘံဃာ်အသးလၢတၢ်ကံးယာ် လၢတၢ်ဘိၣ်ဘံပှၤအစိၣ်တဖၣ်ဒီးအမဲာ်ကျၢၢ်ဘၢအသး လၢတၢ်ကံးယာ်စ့ၢ်ကီးန့ၣ်လီၤ. ယ့ၣ်ၡူးစံးဘၣ်အဝဲသ့ၣ် “ဃ့ၣ်လီၤကွံာ်တၢ်ကံးယာ်ဒီးပျၢ်ကွံာ်အီၤတက့ၢ်.”
တၢ်ကူၣ်အၢထီဒါယ့ၣ်ၡူး
(မး. ၂၆:၁-၅; မၢ်. ၁၄:၁-၂; လူၤ. ၂၂:၁-၂)
45ပှၤယူဒၤဖိအါဂၤလၢအဟဲအိၣ်သကိးနီၢ်မၤရံ, ထံၣ်ဘၣ် ယ့ၣ်ၡူးမၤတ့ၢ်တၢ်အံၤဒီးအဝဲသ့ၣ်စူၢ်က့ၤနာ်က့ၤအီၤန့ၣ်လီၤ. 46ဘၣ်ဆၣ်လၢအဝဲသ့ၣ်အကျါတနီၤက့ၤကဒါက့ၤဆူပှၤဖၤရံၤၡဲ တဖၣ်အအိၣ်ဒီးစံးဘၣ်တဲဘၣ်အဝဲသ့ၣ်တၢ်လၢယ့ၣ်ၡူး မၤတ့ၢ်ဝဲတဖၣ်န့ၣ်လီၤ. 47အန့ၣ်သတးဒီး, ပှၤဖၤရံၤၡဲတဖၣ်ဒီးပှၤလုၢ်တၢ်အခိၣ်အဒိၣ် တဖၣ်ကိးကီၣ်ကးအတၢ်အိၣ်ဖှိၣ်ဒီးစံးဝဲ “ပကမၤဒ်လဲၣ်. အဂ့ၢ်ဒ်အံၤ, ပှၤတဂၤအံၤမၤတၢ်လီၤလးအါမးလီၤ. 48ပမ့ၢ်ပျဲအမၤတၢ်ဒ်အံၤတဖၣ်ဆူညါဒီး, ပှၤခဲလၢာ်ကစူၢ်က့ၤနာ်က့ၤအီၤဒီးပှၤရိမ့ၤဖိ အပဒိၣ်ပပှၢ်တဖၣ်ကဟဲဒီးမၤဟးဂီၤကွံာ် ပတၢ်လုၢ်ဟံၣ်ဒီးပပှၤဒီကလုာ်ညါန့ၣ်လီၤ.”
49ဒီးပှၤလၢအဝဲသ့ၣ်အကျါတဂၤလၢအမံၤမ့ၢ်ဝဲစီၤကၤယါဖၤ, လၢအမ့ၢ်ပှၤလုၢ်တၢ်အခိၣ်အဒိၣ်ကတၢၢ်တဂၤလၢနံၣ်အဝဲန့ၣ်အဂီၢ် စံးဝဲ, “သုတသ့ၣ်ညါနၢ်ပၢၢ်တၢ်နီတမံၤဘၣ်. 50မ့ၢ်သုတသ့ၣ်ညါလၢ, တၢ်ပျဲပှၤတဂၤတူၢ်သံအသးလၢပှၤခဲလၢာ် အဂီၢ်အံၤဂ့ၤဒိၣ်န့ၢ်ဒံးပှၤဒီကလုာ်ညါကဟးဂီၤကွံာ်တက့ၢ်န့ၣ်ဘၣ် ဧါ.” 51ဘၣ်ဆၣ်ဒီးတၢ်အံၤတမ့ၢ်စီၤကၤယါဖၤအတၢ်ကတိၤဒၣ်ဝဲဘၣ်. မ့ၢ်လၢအဝဲမ့ၢ်ပှၤလုၢ်တၢ်အခိၣ်အဒိၣ်ကတၢၢ်လၢနံၣ်အဝဲန့ၣ် အဂီၢ်အဃိ, အဝဲကတိၤဆိပာ်တၢ်ဒ်ဝံတဂၤအသိး လၢယ့ၣ်ၡူးကသံလၢပှၤယူဒၤဖိအဂီၢ်, 52ဒီးတမ့ၢ်ထဲပှၤတကလုာ်ဧိၤန့ၣ်အဂီၢ်ဘၣ်. မ့ၢ်စ့ၢ်ကီးလၢအကထုးဖှိၣ်ပာ်ဖှိၣ်က့ၤကစၢ်ယွၤအပှၤဂီၢ်မုၢ် လၢအလီၤပြံလီၤပြါတဖၣ်ဒ်သိးအကကဲထီၣ်က့ၤပှၤတဖုဃီ အဂီၢ်န့ၣ်လီၤ.
53စးထီၣ်လၢမုၢ်နံၤအဝဲန့ၣ်, ပှၤယူဒၤဖိအခိၣ်အနၢ်တဖၣ် ကူၣ်ထီၣ်ဖးလီၤလၢအကမၤသံယ့ၣ်ၡူးန့ၣ်လီၤ. 54လၢတၢ်န့ၣ်အဃိ, ယ့ၣ်ၡူးတဟးထီၣ်က့ၤလီၤလၢကီၢ်ယူဒၤ အပူၤဖျိဖျိဖျါဖျါလၢၤဘၣ်. မ့မ့ၢ်ဟးထီၣ်ကွံာ်ဝဲဖဲန့ၣ်ဒီးလဲၤဝဲဆူဝ့ၢ်ကိးဝဲအမံၤလၢအ့ဖရဲၣ်, လၢအအိၣ်ဘူးဒီးပှၢ်မုၢ်ကနၢဒီးအိၣ်ဝဲဆိးဝဲဒီးအပျဲၢ်အဘီၣ် တဖၣ်ဖဲန့ၣ်လီၤ.
55မ့ၢ်လၢပှၤယူဒၤဖိအဘူၣ်လဲၤကပာ်အဆၢကတီၢ်ဘူးထီၣ်လံ အဃိ, ပှၤအိၣ်လၢခိအါဒံအါဂၤလဲၤထီၣ်ဝဲဆူဝ့ၢ်ယရူၤၡလ့ၣ် ဒ်သိးကမၤထွဲတၢ်မၤကဆှီထီၣ်သးအလုၢ်အလၢ်တချုးဘူၣ် အဆၢကတီၢ်ဘၣ်ဒံးဝဲန့ၣ်လီၤ. 56အဝဲသ့ၣ်ဃုထံၣ်ယ့ၣ်ၡူးဒီးဖဲအဝဲသ့ၣ်ပာ်ဖှိၣ်အသးလၢတၢ်လုၢ်ဟံၣ် အပူၤန့ၣ်, သံကွၢ်လိာ်အသးတဂၤဒီးတဂၤ, “နဲနဆိကမိၣ်ဒ်လဲၣ်. အဝဲကဟဲဆူဘူၣ်အံၤဧါ, တဟဲဘၣ်ဧါ.” 57ပှၤလုၢ်တၢ်အခိၣ်အဒိၣ်တဖၣ်ဒီးပှၤဖၤရံၤၡဲတဖၣ်ဟ့ၣ်လီၤ အကလုၢ်လၢပှၤတဂၤလၢ်လၢ်လၢအသ့ၣ်ညါယ့ၣ်ၡူးအိၣ်တၢ် အလီၢ်န့ၣ်, ကဘၣ်ဒုးသ့ၣ်ညါအဝဲသ့ၣ်လၢတၢ်ကလဲၤ ဟံးဃာ်ဖီၣ်ဃာ်အီၤအဂီၢ်လီၤ.
Currently Selected:
လံာ်ယိၤဟၣ် 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
