လံာ်ယၡါယၤ 35
35
တၢ်စီတၢ်ဆှံအကျဲ
1မဲးမုၢ်ခိၣ်န့ၣ်ကသူၣ်ခုသးခု,
ဒီးဖီတဖၣ်ကဖီထီၣ်ဝဲလၢပှၢ်မုၢ်ကနၢအပူၤလီၤ.
2မဲးမုၢ်ခိၣ်ကသူၣ်ဝံၣ်သးဆၢဒီးကိးထီၣ်လၢတၢ်သးခုလီၤ. ကဖျါဃံဖျါလၤဒ်လဘၤနိၣ်အကစၢၢ်ကလိတဖၣ်အသိး,
ဒီးဟီၣ်ခိၣ်ညၣ်ထ့ၣ်ကဂ့ၤဝဲဒ်ကၢ်မ့ၤလးဒီးၡၤရိၣ်အပျီတဖၣ် အသိးလီၤ.
ပှၤကိးဂၤဒဲးကထံၣ်ဘၣ်ယွၤအတၢ်လီၤဘီလီၤမုၢ်, အတၢ်ဒိၣ်တၢ်မုၢ်ဒီးအစိကမီၤန့ၣ်လီၤ.
3စုတဖၣ်လၢအလီၤဘှံးလီၤတီၤဝဲ
ဒီးခီၣ်လ့ၣ်ခိၣ်တဖၣ်လၢအကနိးကစုာ်လၢတၢ်ဂံၢ်စၢ်ဘါစၢ်အဃိန့ၣ်, ဒုးဆူၣ်ဝဲလီၤ.
4တဲဘၣ်ပှၤလၢအသးဟးဂီၤတ့ၢ်ကိးဂၤဒဲးန့ၣ်,
“ပာ်ဆူၣ်သုသးဒီးပျံၤတၢ်တဂ့ၤ.
ကစၢ်ယွၤဟဲဝဲလၢသုတၢ်ပူၤဖျဲးအဂီၢ်
ဒီးလၢတၢ်စံၣ်ညီၣ်သုဒုၣ်သုဒါတဖၣ်အဂီၢ်လီၤ.”
5ပှၤမဲာ်ဘျီၣ်ကထံၣ်ထီၣ်က့ၤတၢ်
ဒီးပှၤနၢ်တအၢကနၢ်ဟူတၢ်လီၤ.
6ပှၤခီၣ်ဟးဂီၤကစံၣ်ထီၣ်ဒီးဂဲၤကလံၣ်
ဒီးပှၤအုးအးကတာ်ပျ့ၤတဖၣ် ကကိးထီၣ်ဝဲလၢတၢ်သးခုအပူၤလီၤ.
ထံကျိဖိအထံတဖၣ်ကယွၤလီၤဝဲခီဖျိမဲးမုၢ်ခိၣ်လီၤ.
7မဲးမုၢ်ကိၢ်ကကဲထီၣ်ကမါတခါ
ဒီးဟီၣ်ခိၣ်လၢအဃ့ထီန့ၣ်ကဘၣ်တၢ်မၤပှဲၤအီၤဒီးထံမူထီၣ်ပၢၢ် တဖၣ်လီၤ.
ဖဲထွံၣ်မံၤတဖၣ်အိၣ်ဆိးတ့ၢ်ဝဲအလီၢ်န့ၣ်,
တပိၢ်ဒီးဆှဲတဖၣ်ကမဲထီၣ်ဝဲလီၤ.
8ကျဲမုၢ်ဖးဒိၣ်တဘိလၢအဘၣ်တၢ်ကိးအီၤလၢ, “တၢ်စီဆှံအကျဲ” ကအိၣ်ထီၣ်ဝဲလီၤ.
ပှၤတၢ်ဒဲးဘးဖိတလဲၤတၢ်လၢကျဲအဝဲန့ၣ်နီတဂၤနီတစုဘၣ်. ပှၤဟးဂီၤဖိတဖၣ်လၢအကဆှၢကမၣ်ဘၣ်ပှၤတဖၣ်လၢအပိာ်ကျဲ အဝဲန့ၣ်တအိၣ်နီတဂၤဘၣ်.
9ခ့ယုၢ်တဖၣ်တအိၣ်ဖဲန့ၣ်နီတဒုဘၣ်.
ဆၣ်ဖိကီၢ်ဖိလၢအဒူအဃိၤတပိာ်ကျဲအဝဲန့ၣ် နီတဒုဘၣ်.
ပှၤလၢယွၤမၤပူၤဖျဲးတ့ၢ်အီၤတဖၣ်ကက့ၤဆူ အဟံၣ်လၢကျဲအဝဲန့ၣ်လီၤ.
10အဝဲသ့ၣ်ကလဲၤတုၤဆူဝ့ၢ်ယရူၤၡလ့ၣ် လၢတၢ်သူၣ်ဖှံသးညီ,
ကသူၣ်ဝံၣ်သးဆၢဒီးကကိးထီၣ်လၢအတၢ်သးခုဒိၣ်ဝဲအဃိလီၤ.
အဝဲသ့ၣ်ကသူၣ်ဖှံသးညီအစိၤစိၤအဃၣ်ဃၣ်,
အစိၤစိၤအဃၣ်ဃၣ်န့ၣ်ပူၤဖျဲးဝဲလၢတၢ်သူၣ်အုးသးအုးဒီး တၢ်ဘၣ်မိၣ်ဘၣ်မးလီၤ.
Currently Selected:
လံာ်ယၡါယၤ 35: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
