လံာ်ယၡါယၤ 34
34
ကစၢ်ယွၤကစံၣ်ညီၣ်အဒုၣ်အဒါတဖၣ်
1ဟဲ, ကယဲၢ်ပှၤကလုာ်ခဲလၢာ်အပှၤဂီၢ်မုၢ်သ့ၣ်ဧၢ, ပာ်ဖှိၣ်သုသးဒီးဒိတနၣ်တက့ၢ်. မ်ဟီၣ်ခိၣ်ဒီဘ့ၣ်ဒီးပှၤခဲ လၢာ်လၢအအိၣ်လၢအပူၤဟဲဖဲအံၤဒီးဒိကနၣ်တၢ်တက့ၢ်. 2ယွၤသးထီၣ်ဘၣ်ပှၤကလုာ်ခဲလၢာ်ဒီးအဝဲသ့ၣ်အသုး မုၢ်သံၣ်ဘိခဲလၢာ်လီၤ. အဝဲစံၣ်ညီၣ်ဃၣ်တ့ၢ်အဝဲသ့ၣ် ဆူတၢ်ဟးဂီၤအပူၤလံ. 3အဝဲသ့ၣ်အစိၣ်တဖၣ်တဘၣ်တၢ်ခူၣ်လီၤအီၤဘၣ်. ကအိၣ်ဒၣ်ဖဲန့ၣ်, အုၣ်သံကျၣ်သံနၢအုၣ်နၢပူး, ဒီးကစၢၢ်ကလိ တဖၣ်ကဂီၤဝဲဒီးတၢ်သွံၣ်လီၤ. 4မုၢ်, လါ, ဒီးဆၣ်တဖၣ်ကလီၤကလဲကွံာ်ဒီးကဲထီၣ်ဖၣ်ဆါန့ၣ် လီၤ. မူကပိာ်လိၤကလီၤမၢ်ကွံာ်ဒ်လံာ်ထူတထူဘၣ်တၢ်ထူထီၣ် အီၤအသိး, ဒီးဆၣ်တဖၣ်ကလီၤဆှု ဝဲဒ်သ့ၣ်လၣ်တဖၣ်လီၤဆှုကွံာ်လၢစပံးမုၢ်တမုၢ်, မ့တမ့ၢ်, ချၢၣ်ဒၢတထူၣ်အလိၤအသိး န့ၣ်လီၤ.
5ယွၤကတဲာ်ကတီၤတ့ၢ်အနးလၢမူခိၣ်, ဒီးခဲအံၤနးန့ၣ်ကကျီကွံာ်ကီၢ်အဒိၣ် အပှၤဂီၢ်မုၢ်လၢအစံၣ်ညီၣ်ဃၣ်တ့ၢ်ဝဲ ဆူတၢ်ဟးဂီၤအပူၤန့ၣ်လီၤ. 6အနးကဘၣ်အၢပှဲၤဒီးအဝဲသ့ၣ်အသွံၣ်ဒီးအသိ, ဒ်သိဖိဒီးမဲာ်တဲးလဲးတဖၣ်အသွံၣ်ဒီးအသိလၢတၢ်လုၢ်ထီၣ် အီၤအသိးလီၤ. ယွၤကလုၢ်ထီၣ်တၢ်လုၢ်အံၤလၢဝ့ၢ်ဘိးစရၤအပူၤလီၤ. အဝဲကဒုးကဲထီၣ်တၢ်အံၤလၢတၢ်မၤသံဖးဒိၣ်လၢကီၢ်အဒိၣ် အပူၤန့ၣ်လီၤ. 7ပှၤဂီၢ်မုၢ်တဖၣ်ကလီၤဃံၤသံဝဲဒ်ကျီၢ်ဖါမံၤတဖၣ်ဒီးဂီၤဖံးဖါဖိ တဖၣ်အသိး, ဒီးဟီၣ်ခိၣ်ကဂီၤဝဲဒီးတၢ်သွံၣ်ဒီးဘၣ်အၢပှဲၤဒီး တၢ်အသိလီၤ. 8ခဲအံၤကမ့ၢ်တၢ်ဆၢကတီၢ်လၢယွၤကအုၣ်က့ၤခီၣ်က့ၤဝ့ၢ်စံယိၣ် ဒီးဟ့ၣ်ကၣ်အဒုၣ်အဒါတဖၣ်န့ၣ်လီၤ.
9ကီၢ်အဒိၣ်အထံကျိတဖၣ်ကကဲထီၣ်ကျဲတံး, ဒီးဟီၣ်ခိၣ်ကကဲထီၣ်ကးလီၤ. ထံကီၢ်ဒီဘ့ၣ်ညါန့ၣ်မ့ၣ်အူကအီၣ် အီၤဒ်ကျဲတံးအသိးလီၤ. 10ကအီၣ်တၢ်မနၤနၤမဆါဆါ, ဒီးမ့ၣ်အူလုၣ်ကခုၣ်ထီၣ်ဝဲလီၤစိၤ လီၤထီလီၤ. ထံကီၢ်ကအိၣ်သယုၢ်တစိၤဝံၤတစိၤ, ဒီးပှၤတလဲၤတၢ်က့ၤတၢ်ခီဖျိကဒီးအီၤနီတစုနီတဂၤလၢၤဘၣ်န့ၣ်လီၤ. 11ဒိကအိဒီးစိးဝၣ်ဃးတဖၣ်ကအိၣ်ပှဲၤဝဲလၢထံကီၢ်ပူၤလီၤ. ယွၤကဒုးကဲထီၣ်အီၤလၢတၢ်အိၣ်သယုၢ်အိၣ်ကလီအလီၢ် ကဒီးတဘျီဒ်အမ့ၢ်တ့ၢ်ဝဲတချုးလၢတၢ်တ့လီၤပာ်လီၤတၢ် အကတီၢ်အသိးန့ၣ်လီၤ. 12စီၤပၤလၢကပၢထံကီၢ်န့ၣ်တအိၣ်ဘၣ်နီတဂၤဘၣ်, ဒီးပှၤခိၣ်ပှၤနၢ်တဖၣ်ကသံကွံာ်ခဲလၢာ်လီၤ. 13တၤဆှုၣ် တၤမဲတဖၣ်ကမဲထီၣ်ပှဲၤကယဲၢ်နူၢ်ဧိၤစီၤဧိၤအပူၤဒီးဝ့ၢ် အိၣ်ဒီးအခိၣ်ဒူတဖၣ်အပူၤ, ဒီးထွံၣ်ဟီၣ်ခိၣ်တဖၣ်ဒီးဒိကအိ တဖၣ်ကအိၣ်လၢအဝဲသ့ၣ်အပူၤန့ၣ်လီၤ. 14ဆၣ်ဖိကီၢ်ဖိအမံၤတဖၣ်ကကညီၤတၢ်ဖဲန့ၣ်ဒီးတၢ်ဝံတၢ်နါတဖၣ် ကကိးလိာ်အသးကဒဲကဒဲလီၤ. မုၢ်နၤခီအတၢ်မုၢ်ဃၢ်ကဟဲဖဲ န့ၣ်ဒ်သိးကဃုထံၣ်တၢ်အိၣ်ဘှံးအလီၢ်တပူၤလီၤ. 15ဒိကအိတဖၣ်ကမၤထီၣ်အသွံ, ဒံၣ်လီၤ, ဟုဖးထီၣ်အဖိ, ဒီးကဟုကယာ်အီၤဖဲန့ၣ်န့ၣ်လီၤ. လီတာ်တဖၣ်ကဟဲပာ်ဖှိၣ် အသးဖဲန့ၣ်တဘ့ၣ်ဝံၤတဘ့ၣ်န့ၣ်လီၤ.
16ဃုကွၢ်တၢ်လၢယွၤအလံာ်ပူၤဘၣ်ဃးဆၣ်ဖိကီၢ်ဖိ, တၢ်ဘၣ်တ့လၢအမူတဖၣ်ဒီးဖးတၢ်လၢအစံးဘၣ်သုန့ၣ်တက့ၢ်. ဆၣ်ဖိကီၢ်ဖိတဖၣ်အံၤတလီၤမၢ်ကွံာ်ဝဲဘၣ်, ကအိၣ်ဘၣ်ဒ်ဒီမိၢ်ဖါ အသိးစ့ၢ်ကီး, တအိၣ်ဝဲဘၣ်. ယွၤမၤလိာ်တ့ၢ်ဝဲဒ်န့ၣ်အသိး, ဒီးအကစၢ်ဒၣ်ဝဲကပာ်ဖှိၣ်အဝဲသ့ၣ်တပူၤဃီလီၤ. 17ပှၤလၢကနီၤဖးတၢ်အိၣ်တၢ်ဆိးအလီၢ်လၢအဝဲသ့ၣ်အဂီၢ်ဒီး ဟ့ၣ်လီၤအဝဲသ့ၣ်တဖုဘၣ်တဖုအတၢ်နီၤဟ့ၣ်န့ၣ်မ့ၢ်ယွၤလီၤ. အဝဲသ့ၣ်ကအိၣ်လၢထံကီၢ်န့ၣ်အပူၤတစိၤဝံၤတစိၤ, ဒီးကကဲထီၣ်အဝဲသ့ၣ်အတၢ်အစိၤစိၤအဃၣ်ဃၣ်လီၤ.
Currently Selected:
လံာ်ယၡါယၤ 34: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
