လံာ်ယၡါယၤ 32
32
စီၤပၤတဂၤလၢအအိၣ်ဒီးတၢ်မၤတီအကလုၢ်
1မုၢ်ကအိၣ်ဝဲတနံၤ, စီၤပၤတဂၤလၢ အပၢတၢ်လၢတၢ်မၤတီအကလုၢ်အပူၤ, ဒီးထံဖိကီၢ်ဖိခိၣ်နၢ်တဖၣ်လၢအပၢတၢ်လၢတၢ်စံၣ် ညီၣ်တီအပူၤန့ၣ်ကအိၣ်ထီၣ်ဝဲလီၤ. 2အဝဲသ့ၣ်တဂၤဘၣ်တဂၤကလီၤ ဂာ်ဒီးတၢ်အိၣ်ကဒုပူၤဖျဲးအလီၢ်တတီၤလၢကလံၤမုၢ်, ဒီးတၢ်လီၢ်တတီၤလၢတၢ်အိၣ်သဒၢပူၤဖျဲးဒီးကလံၤ မုၢ်တွၤတဖၣ်အဂီၢ်န့ၣ်လီၤ. အဝဲသ့ၣ်ကလီၤဂာ်ဒီး ထံဖိကျိတဖၣ်လၢအယွၤလီၤလၢမဲးမုၢ်ခိၣ်တတီၤ, ဒီးလၢၢ်မုၢ်ဖးဒိၣ်တဖျၢၣ်အကဒုလၢကီၢ်အိၣ်လီၤ ဃီတဘ့ၣ်အပူၤန့ၣ်လီၤ. 3အဝဲသ့ၣ်အမဲာ်ချံဒီးအနၢ်တဖၣ်ကအိးထီၣ်အသးလၢပှၤဂီၢ်မုၢ် အတၢ်လိၣ်တဖၣ်အဂီၢ်န့ၣ်လီၤ. 4အဝဲသ့ၣ်ကအိၣ်ဒီးတၢ်သးစူၤဒီးကမၤတၢ်လၢတၢ်နၢ်ပၢၢ် အပူၤဒီးကကတိၤတၢ်ဒ်တၢ်အိၣ်လၢအသးပူၤနီၢ်နီၢ်အသိး န့ၣ်လီၤ. 5ပှၤတဆိကမိၣ်နီတဂၤဘၣ်လၢပှၤအမၢးတဂၤမ့ၢ်ပှၤ အိၣ်ဒီးတၢ်လၤကပီၤမ့ၢ်ဂ့ၤ, စံးလၢပှၤတမူၢ်တနီၢ်တဂၤ တီဝဲလိၤဝဲမ့ၢ်ဂ့ၤန့ၣ်ဘၣ်. 6ပှၤအမၢးတဂၤကတိၤတၢ်လၢတၢ်သးတထံတဆးအပူၤ ဒီးဆိကမိၣ်ထီၣ်တၢ်အၢတၢ်သီတဖၣ်လၢကမၤဝဲလီၤ. တၢ်လၢအဝဲမၤဝဲဒီးတၢ်လၢအဝဲစံးဝဲတဖၣ်မ့ၢ်တၢ်ဒုၣ်ဒွဲၣ်ယွၤ, ဒီးအဝဲတလုၢ်အီၣ်ဘၣ်ပှၤလၢတၢ်သၣ်ဝံၤအသးမ့ၢ်ဂ့ၤ, တဟ့ၣ်အီဘၣ်ပှၤလၢတၢ်သူအသးတဖၣ်လၢတၢ်တမံၤမံၤလၢကအီ ဝဲအဂီၢ်မ့ၢ်ဂ့ၤန့ၣ်ဘၣ်. 7ပှၤဟးဂီၤဖိတဂၤအၢဝဲသီဝဲဒီးမၤတၢ်အၢတၢ်သီတဖၣ်လီၤ. အဝဲကူၣ်ကျဲၤဝဲဒ်သိးကမၤဟးဂီၤပှၤဖှီၣ်ဖိယာ်ဖိတဖၣ် လၢတၢ်လီတၢ်ဝ့ၤတဖၣ်ဒီးကတြီဃာ်အီၤလၢ ကမၤန့ၢ်တၢ်လၢအကြၢးဒိးန့ၢ်ဝဲတဖၣ်လီၤ. 8မ့မ့ၢ်, ပှၤလၢအအိၣ်ဒီးအလၤကပီၤတဂၤမၤတၢ်တီတီလိၤလိၤ ဒီးဆၢထၢၣ်ဂၢၢ်ကျၢၤလၢတၢ်အမ့ၢ်အတီအဂီၢ်န့ၣ်လီၤ.
တၢ်စံၣ်ညီၣ်ဒီးတၢ်ပာ်ထီၣ်ကဒါက့ၤလၢအလီၢ်
9သုဝဲပိာ်မုၣ်လၢအအိၣ်မံသူၣ်မုာ်သးဒၣ်သုဝဲဒီးတကိၢ် တဂီၤတၢ်နီတမံၤသ့ၣ်သုဧၢ, ဒိကနၣ်တၢ်လၢယ စံးယဲန့ၣ်တက့ၢ်. 10အခဲအံၤ, သုကသူၣ်မံသးမံကစီဒီန့ၣ်လီၤ. ဘၣ်ဆၣ်ခဲငါတနံၣ်အကတီၢ်ဒ်သိးအံၤန့ၣ်သုသး ကဟးဂီၤလီၤ. အဂ့ၢ်ဒ်အံၤ, စပံးသၣ်လၢသုက ထၢဖှိၣ်အီၤလၢသုဂီၢ်ဒၣ်ဝဲတအိၣ်ဘၣ်နီတစဲးဘၣ်. 11သုအိၣ်မူတ့ၢ်တၢ်အိၣ်မူမံသူၣ် မုာ်သးဒၣ်သုဝဲဒီးတကိၢ်တဂီၤ တၢ်နီတမံၤဘၣ်. မ့မ့ၢ်, အခဲအံၤ ကနိးကစုာ်လၢတၢ်ပျံၤတၢ်ဖုးအပူၤတက့ၢ်. ဘ့ၣ်လီၤကွံာ်သုဆ့ကၤတဖၣ်ဒီးစၢဃာ်တၢ် ယာ်ဖျ့တဖၣ်လၢသုယီၢ်ဒ့အလိၤန့ၣ်တက့ၢ်. 12ဒဲလီၤသုသးနါပှၢ်တဖၣ်လၢတၢ်သူၣ်အုးသးအုး အပူၤတက့ၢ်. အဂ့ၢ်ဒ်အံၤ, စံာ်ပျီလၢဟီၣ်ခိၣ် ညၣ်ထ့ၣ်ဂ့ၤဝဲဒီးစပံးမုၢ်အလီၢ်တဖၣ်ဘၣ်တၢ်မၤ ဟးဂီၤကွံာ်အီၤလံ. 13တၤဆှုၣ် တၤမဲအတပှီာ်တဖၣ်မဲထီၣ်ဝဲလၢယပှၤဂီၢ်မုၢ် အကီၢ်ပူၤလံ. ဟီၣ်တၢ်ယၢၤတၢ်လၢဟံၣ်ဃီခဲလၢာ်ဖဲ ပှၤဂီၢ်မုၢ်သူၣ်ဖှံသးညီတ့ၢ်ဝဲဒီးလၢဝ့ၢ်လၢအပှဲၤတ့ၢ်ဒီး တၢ်မူတၢ်ဂဲၤန့ၣ်အဂီၢ်တက့ၢ်. 14နူၢ်ဧိၤစီၤဧိၤဒၣ်လဲာ်န့ၣ်ကဘၣ်တၢ်ပာ်တ့ၢ်ကွံာ်အီၤဒီးဝ့ၢ်ခိၣ်န့ၣ် ဘၣ်တၢ်လဲၤသဒၣ်ကွံာ်အီၤလၢာ်လၢာ်ဆ့ဆ့လီၤ. ဟံၣ်ဒီးတိာ်တဖၣ်လၢအဒီဒၣ်အိၣ်ပှိၤအဝဲသ့ၣ်ကအိၣ်လၢတၢ်ဟးဂီၤ အပူၤလီၤစိၤလီၤထီလီၤ. ကသ့ၣ်ယီၤမံၤတဖၣ်ကဟးဝ့ၤဝီၤဖဲန့ၣ်, ဒီးသိတဖၣ်ကထံၣ်န့ၢ်အတၢ်အီၣ်ဆၣ်အလီၢ်ဖဲန့ၣ်လီၤ.
15ဘၣ်ဆၣ်ဒီးကစၢ်ယွၤကဟ့ၣ်လီၤပှၤလၢအသးအသီတဘျီ န့ၣ်လီၤ. ဟီၣ်ခိၣ်လီၤဃိကကဲထီၣ်က့ၤဟီၣ်ခိၣ်ညၣ်ထ့ၣ်, ဒီးစံာ်ပျီတဖၣ်ကဟ့ၣ်ထီၣ်တၤသူတၤသၣ်အါအါဂီၢ်ဂီၢ်လီၤ. 16တၢ်တီတၢ်လိၤဒီးတၢ်စံၣ်ညီၣ်တီကဘၣ်တၢ်မၤအီၤလၢထံကီၢ် အလီၢ်ကိးပူၤဒဲးန့ၣ်လီၤ. 17မ့ၢ်လၢပှၤကိးဂၤဒဲးကမၤတၢ်အမ့ၢ်အတီအဃိ, တၢ်ဃူတၢ်ဖိးဒီးတၢ်ပူၤဖျဲးကအိၣ်လီၤထူလီၤယိာ်လီၤ. 18ယွၤအပှၤဂီၢ်မုၢ်ကပူၤဖျဲးဒီးတၢ်ကိၢ်တၢ်ဂီၤတဖၣ်, ဒီးအဟံၣ်အဃီတဖၣ်ကမုာ်ဝဲခုၣ်ဝဲဒီးဘံၣ်ဝဲဘၢဝဲန့ၣ်လီၤ. 19(ဘၣ်ဆၣ်သူၣ်ကလီၤဝဲလၢသ့ၣ်ဒိၣ်ပှၢ်တီၣ်တဖၣ်အလိၤ, ဒီးဝ့ၢ်န့ၣ်ကဘၣ်တၢ်မၤလီၤပှီၢ်ကွံာ်အီၤန့ၣ်လီၤ.) 20မ့ၢ်လၢထံအါအါဂီၢ်ဂီၢ်အိၣ်ဝဲလၢတၢ်မုၢ်တၢ်ဘိတဖၣ်အဂီၢ်, ဒီးအီၣ်ဆၣ်အလီၢ်မုာ်အိၣ်ဝဲလၢတၢ်လီၢ်ကိးပူၤဒဲးလၢကသ့ၣ် ယီၤတဖၣ်ဒီးဂီၤဘုၣ်ဂီၤဖံးတဖၣ်အဂီၢ်အဃိန့ၣ်ပှၤကိးဂၤဒဲး ကသးခုဝဲထဲလဲၣ်.
Currently Selected:
လံာ်ယၡါယၤ 32: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
