လံာ်တၢ်ကဲထီၣ်အခီၣ်ထံး 37
37
စီၤယိၤသးဒီးအဒီပုၢ်ဝဲၢ်ခွါတဖၣ်
1စီၤယၤကိာ်အိၣ်ဆိးဒံးဝဲလၢကီၢ်ကနၤဧၣ်ဖဲအပၢ်စီၤအံၤစဲး အိၣ်ဆိးတ့ၢ်ဝဲအပူၤန့ၣ်လီၤ. 2ဒီးအအံၤမ့ၢ်တၢ်စံၣ်စိၤတဲစိၤဘၣ်ထွဲဒီးစီၤယၤကိာ်အဒူၣ်ဖိ ထၢဖိန့ၣ်လီၤ.
စီၤယိၤသး, ပှၤသးစၢ်လၢအသးအိၣ်တဆံနွံနံၣ်တဂၤဒီးအဒီပုၢ် ဝဲၢ်ခွါလၢအမ့ၢ်အပၢ်သံၣ်မါနီၢ်ဘံၤလဟၤဒီးနီၢ်စံလပၤအဖိ ခွါသ့ၣ်တဖၣ်န့ၣ်ကွၢ်ထွဲသိဒီးမဲာ်တဲးလဲးတဖၣ်န့ၣ်လီၤ. အဝဲဟဲက့ၤစိာ်တၢ်ကစီၣ်အအၢအသီလၢအဒီပုၢ်ဝဲၢ်ခွါတဖၣ်မၤတ့ၢ် ဝဲဆူအပၢ်အအိၣ်န့ၣ်လီၤ.
3စီၤယၤကိာ်အဲၣ်တ့ၢ်စီၤယိၤသးအါန့ၢ်အဖိခွါအဂၤခဲလၢာ်, မ့ၢ်လၢအဝဲအိၣ်ဖျဲၣ်ထီၣ်တ့ၢ်လၢအဝဲအဂီၢ်ဖဲအဝဲအသးပှၢ်အကတီၢ် အဃိန့ၣ်လီၤ. အဝဲမၤန့ၢ်တ့ၢ်ဆ့ကၤလီၤဆီတဘ့ၣ်လၢအဖိခွါစီၤယိၤသးအဂီၢ် န့ၣ်လီၤ. 4တုၤအဒီပုၢ်ဝဲၢ်ခွါတဖၣ်ထံၣ်ဝဲလၢအပၢ်စီၤယၤကိာ်အဲၣ်တ့ၢ်စီၤ ယိၤသးဒိၣ်န့ၢ်အအဲၣ်တ့ၢ်အဝဲသ့ၣ်န့ၣ်, အဝဲသ့ၣ်သးဟ့ တ့ၢ်အီၤနးမးတုၤဒၣ်လဲာ်တကတိၤတၢ်ဒီးအီၤမုာ်မုာ်ဘၣ်လီၤ.
5ဘၣ်တနၤစီၤယိၤသးအိၣ်ဒီးအတၢ်မံမီၢ်တမံၤ, ဒီးဖဲအတဲဘၣ်အဒီပုၢ်ဝဲၢ်ခွါသ့ၣ်တဖၣ်လၢတၢ်ဂ့ၢ်န့ၣ်, အဝဲသ့ၣ်သးဟ့အီၤအါန့ၢ်အလီၢ်လီၤ. 6စီၤယိၤသးစံးဝဲ, “ဝံသးစူၤဒိကနၣ်တၢ်မံမီၢ်လၢယမံမီၢ် တ့ၢ်တက့ၢ်. 7ပဝဲခဲလၢာ်ပအိၣ်လၢစံာ်ပျီပူၤဒီးစၢကဒိၣ်ထီၣ်ပဘုကၠူၣ်တ ဖၣ်, ဖဲယဘုကဒိၣ်ဝံၢ်ထီၣ်အသးအိၣ်ဆၢထၢၣ်ထူၣ်ကလာ်န့ၣ်လီၤ. သုဘုကဒိၣ်တဖၣ်ဟဲအိၣ်ဝးတရံးယဘုကဒိၣ်ဒီးသကုးလီၤအသးလၢ ယဘုကဒိၣ်အမဲာ်ညါလီၤ.”
8အဒီပုၢ်ဝဲၢ်ခွါတဖၣ်သံကွၢ်ဝဲ, “နဆိကမိၣ်လၢနကကဲထီၣ်စီၤ ပၤတဂၤဒီးပၢပှၤန့ၣ်ဧါ”. ဒီးအဝဲသ့ၣ်သးဟ့အီၤအါထီၣ်မ့ၢ်လၢအတၢ်မံမီၢ်တဖၣ်ဒီးတၢ်လၢ အဝဲစံးတ့ၢ်ဘၣ်ထွဲဒီးအဝဲသ့ၣ်အဂ့ၢ်အဃိလီၤ.
9ဒီးစီၤယိၤသးအိၣ်ဒီးအတၢ်မံမီၢ်တဂၤတမံၤဒီးတဲဘၣ်အဒီပုၢ် ဝဲၢ်ခွါသ့ၣ်တဖၣ်, “ယအိၣ်ဒီးတၢ်မံမီၢ်အဂၤတမံၤ, ဒီးလၢယတၢ်မံမီၢ်အပူၤန့ၣ်, ယထံၣ်မုၢ်, လါဒီးဆၣ်တဆံ တဖျၢၣ်သကူးလီၤအသးလၢယမဲာ်ညါန့ၣ်လီၤ.”
10အဝဲတဲဘၣ်စ့ၢ်ကီးအပၢ်လၢအတၢ်မံမီၢ်န့ၣ်ဒီးအပၢ်သိၣ်ဃီၣ်အီၤ န့ၣ်လီၤ. “နမံမီၢ်တၢ်မနုၤတကလုာ်လဲၣ်. မ့ၢ်နဆိကမိၣ်လၢနမိၢ်, နဒီပုၢ်ဝဲၢ်ခွါတဖၣ်ဒီးယၤ, ပကဟဲဒီးသကူးလီၤပသးလၢနမဲာ်ညါန့ၣ်ဧါ.” 11စီၤယိၤသးအဒီပုၢ်ဝဲၢ်ခွါတဖၣ်အသးက့ၣ်အီၤ, ဘၣ်ဆၣ်ဒီးအပၢ်ဆိကမိၣ်ထွဲဒံးတၢ်ဂ့ၢ်လၢအမၤအသးခဲလၢာ်န့ၣ် လီၤ.
စီၤယိၤသးဘၣ်တၢ်ဆါကွံာ်ဒီးစိာ်ကွံာ်အီၤ ဆူကီၢ်အဲၤကူပတူး
12ဘၣ်မုၢ်တနံၤ, စီၤယိၤသးအဒီပုၢ်ဝဲၢ်ခွါတဖၣ်လဲၤဆူဝ့ၢ်ၡက့ၣ် လၢကကွၢ်ထွဲအပၢ်အသိတဖၣ်အဂီၢ်န့ၣ်လီၤ. 13စီၤယၤကိာ်စံးဘၣ်စီၤယိၤသး, “ယအဲၣ်ဒိးလၢနကလဲၤဆူ ဝ့ၢ်ၡက့ၣ်ဖဲနဒီပုၢ်ဝဲၢ်ခွါသ့ၣ်တဖၣ်ကွၢ်ထွဲသိတဖၣ်အလီၢ်န့ၣ် လီၤ.”
စီၤယိၤသးစံးဆၢဝဲ, “မ့ၢ်, ယကလဲၤလီၤ.”
14အပၢ်စံးဘၣ်အီၤ, “လဲၤဒီးကွၢ်မ့ၢ်နဒီပုၢ်ဝဲၢ်ခွါသ့ၣ်တဖၣ် ဒီးသိတဖၣ်အိၣ်ဘၣ်မုာ်မုာ်ခုၣ်ခုၣ်ဂ့ၤဂ့ၤဘၣ်ဘၣ်ကစီဒီဧါ. ဒီးဟဲက့ၤတဲစံးယၤတက့ၢ်.” ဒီးအပၢ်ပျဲလီၤအီၤလၢအတၢ် လဲၤအကျဲလၢဝ့ၢ်ဃ့ဘြိၣ်အတြီၤပူၤန့ၣ်လီၤ.
စီၤယိၤသးလဲၤတုၤဝဲဆူၡက့ၣ်, 15ဒီးလဲၤဝ့ၤဝီၤတၢ်လၢထံလီၢ်ကီၢ်ပူၤန့ၣ်, ဖဲပှၤတဂၤထံၣ်အီၤဒီးသံကွၢ်အီၤ, “နဃုတၢ်မနုၤလဲၣ်.”
16အဝဲစံးဆၢဝဲ, “ယဃုယဒီပုၢ်ဝဲၢ်ခွါတဖၣ်လၢအကွၢ်ထွဲအသိ တဖၣ်န့ၣ်လီၤ. အဝဲသ့ၣ်အိၣ်ဖဲလဲၣ်န့ၣ်နတဲယၤသ့ဧါ.”
17ပှၤတဂၤန့ၣ်စံးဘၣ်အီၤ, “အဝဲသ့ၣ်ဟးထီၣ်ကွံာ်လံ. ယနၢ်ဟူအဝဲသ့ၣ်စံးဝဲဒၣ်လၢကလဲၤဝဲဆူဒိၤသၣ်န့ၣ်လီၤ.” လၢတၢ်န့ၣ်အဃိစီၤယိၤသးလဲၤပိာ်ထွဲအဒီပုၢ်ဝဲၢ်ခွါသ့ၣ်တဖၣ် အခံဒီးထံၣ်ဘၣ်အဝဲသ့ၣ်ဖဲဝ့ၢ်ဒိၤသၣ်န့ၣ်လီၤ.
18အဝဲသ့ၣ်ထံၣ်စိဃီၤစီၤယိၤသးလၢတၢ်လီၢ်အယံၤဒီးတချုးအဟဲ တုၤဒံးဘၣ်ဆူအဝဲသ့ၣ်အအိၣ်န့ၣ်, အဝဲသ့ၣ်ကူၣ်ထီၣ်တၢ်အၢထီဒါအီၤဒီးပာ်လီၤအသးလၢကမၤသံအီၤ န့ၣ်လီၤ. 19အဝဲသ့ၣ်စံးလိာ်အသး, “ပှၤမံမီၢ်တၢ်တဂၤဟဲလံ.
20ဟဲခဲအံၤ, မ်ပမၤသံအီၤဒီးတ့ၢ်လီၤအီၤဆူထံပူၤလၢထံလီၤ သံးကွံာ်တဖၣ်အကျါတပူၤန့ၣ်တက့ၢ်. ပစံးသ့လၢဆၣ်ဖိကီၢ်ဖိ အအၢတဒုမၤသံကွံာ်အီၤလံ. အန့ၣ်ဒီးအတၢ်မံမီၢ်တဖၣ်ကကဲ ထီၣ်ဒ်လဲၣ်န့ၣ်ပကထံၣ်ဘၣ်လီၤ.”
21စီၤရူၤဘ့ၣ်နၢ်ဟူအဝဲသ့ၣ်အတၢ်ကတိၤဒီးဂုာ်ကျဲးစၢးမၤပူၤ မၤဖျဲးစီၤယိၤသးန့ၣ်လီၤ. အဝဲစံးဝဲ, “မ်ပသုတမၤသံအီၤတဂ့ၤ.” 22“ထဲပကတ့ၢ်လီၤကွံာ်အီၤဆူထံပူၤလၢပှၢ်မုၢ်ကနၢအံၤအပူၤ, ဒီးတဘၣ်မၤဆါအီၤတဂ့ၤ.” အဝဲစံးတၢ်ဒ်အံၤ, မ့ၢ်လၢအဝဲကူၣ်ကျဲၤဒ်သိးအကမၤပူၤမၤဖျဲး အီၤလၢအဝဲသ့ၣ်အစုပူၤဒီးဆှၢကဒါက့ၤအီၤဆူအပၢ်အအိၣ်အဃိ န့ၣ်လီၤ. 23ဖဲစီၤယိၤသးဟဲတုၤဆူအဒီပုၢ်ဝဲၢ်ခွါသ့ၣ်တဖၣ်အအိၣ်န့ၣ်, အဝဲသ့ၣ်ဖှီယာ်ကွံာ်အဆ့ကၤလီၤဆီတဘ့ၣ်လၢအလိၤန့ၣ်လီၤ. 24ဒီးအဝဲသ့ၣ်ဖီၣ်န့ၢ်အီၤဒီးတ့ၢ်လီၤကွံာ်အီၤလၢထံပူၤလၢထံ လီၤသံးကွံာ်န့ၣ်လီၤ.
25ဖဲအဝဲသ့ၣ်အီၣ်တၢ်အခါန့ၣ်, သတူၢ်ကလာ်ထံၣ်ဃီၤပှၤယံးၡမၤဧ့လး ဖိတဖုလဲၤတၢ်လၢကီၢ်ကံးလဧးဆူကီၢ်အဲၤကူပတူးန့ၣ်လီၤ. အကီၤလၤအူးတဖၣ်ဘၣ်တၢ်ပဒၢးအီၤဒီးတၢ်နၢမူနၢဆှီတဖၣ်ဒီး စပံးသၣ်အဃ့တဖၣ်လီၤ. 26စီၤယူဒၤစံးဘၣ်အဒီပုၢ်ဝဲၢ်ခွါတဖၣ်, “ပမၤသံကွံာ်ပဒီ ပုၢ်ဝဲၢ်ခွါဒီးပာ်ခူသူၣ်မၤဘံၣ်မၤဘၢတၢ်မၤသံန့ၣ်, ပကန့ၢ်ဘျုးမနုၤလဲၣ်. 27မ်ပကဆါကွံာ်အီၤဆူပှၤယံးၡမၤဧ့လးဖိသ့ၣ်တဖၣ်အအိၣ်န့ၣ်တ က့ၢ်. အန့ၣ်ဒီးပတမၤဆါဘၣ်အီၤဘၣ်. နီၢ်နီၢ်တခီ, အဝဲမ့ၢ်ဒၣ်ပဒီပုၢ်ဝဲၢ်ခွါ, ပဖံးပညၣ်ဒီးပသွံၣ်ပထံဒၣ်ဝဲလီၤ.” အဒီပုၢ်ဝဲၢ်ခွါတဖၣ်ဘၣ်သူၣ်ဘၣ်သးဝဲ, 28ဒီးဖဲပှၤမံးဒယၣ်ဖိအပှၤကူၣ်တၢ်ကၤတၢ်တနီၤဟဲဘၣ်ကျဲန့ၣ်, စီၤယိၤသးအဒီပုၢ်ဝဲၢ်ခွါတဖၣ်ထုးထီၣ်အီၤလၢထံပူၤဒီးဆါ ကွံာ်အီၤလၢစ့ညၣ်အဘ့ၣ်ခံဆံ, ဆူပှၤယံးၡမၤဧ့လးဖိတဖၣ်အစုပူၤလၢအက့ၤစိာ်ကွံာ်အီၤဆူ ကီၢ်အဲၤကူပတူးအဂီၢ်န့ၣ်လီၤ.
29ဒီးဖဲစီၤရူၤဘ့ၣ်ဟဲက့ၤကဒါက့ၤဆူထံပူၤဒီးတထံၣ်ဘၣ်စီၤ ယိၤသးဖဲန့ၣ်ဘၣ်န့ၣ်အဝဲဖှီယာ်ကွံာ်အကူအသိးတဖၣ်လၢတၢ်သူၣ် အုးသးအုးအပူၤန့ၣ်လီၤ. 30အဝဲက့ၤကဒါက့ၤဆူအဒီပုၢ်ဝဲၢ်ခွါတဖၣ်အအိၣ်ဒီးစံးဝဲ, “ဖိသၣ်ပိာ်ခွါတအိၣ်ဖဲန့ၣ်လၢၤဘၣ်. ပကဘၣ်မၤတၢ်မနုၤလဲၣ်.”
31တုၤနုၤတစုအဝဲသ့ၣ်မၤသံကွံာ်မဲာ်တဲးလဲးတဒုဒီးစုၣ်လီၤ ဝဲစီၤယိၤသးအဆ့ကၤလၢအသွံၣ်အကျါလီၤ. 32အဝဲသ့ၣ်က့ၤစိာ်ဆ့ကၤန့ၣ်ဆူအပၢ်အအိၣ်ဒီးစံးဝဲ, “ပထံၣ်တၢ်အံၤလီၤ. မ့ၢ်အမ့ၢ်နဖိခွါအတၢ်ဧါ.”
33စီၤယၤကိာ်သ့ၣ်ညါနီၣ်တၢ်န့ၣ်ဒီးစံးဝဲ, “မ့ၢ်, မ့ၢ်အဝဲအတၢ် လီၤ. ဆၣ်ဖိကီၢ်ဖိအအၢအသီတနီၤမၤသံကွံာ်အီၤလံ. ယဖိခွါစီၤယိၤသးဘၣ်တၢ်အ့ၣ်ဖှီကွံာ်အီၤအက့က့အခီခီလံ မးလဲၣ်.” 34စီၤယၤကိာ်ဖှီကွံာ်အဆ့တဖၣ်လၢတၢ်သူၣ်အုးသးအုးအပူၤဒီးကၤ ထီၣ်ဝဲထၢၣ်တၢ်ကံးယာ်လီၤ. အဝဲသူၣ်အုးသးအုးလၢအဖိခွါအဃိအါနံၤအါသီန့ၣ်လီၤ. 35ကယဲၢ်အဖိခွါဒီးအဖိမုၣ်တဖၣ်ဟဲဝဲလၢကမၤမုာ်အီၤအဂီၢ်, ဘၣ်ဆၣ်ဒီးအဝဲဂ့ၢ်လိာ်ကွံာ်တၢ်မၤမုာ်အီၤဒီးစံးဝဲ, “ယကလဲၤလီၤဆူတၢ်သံအကီၢ်ပူၤ, အိၣ်ဒံးဒီးတၢ်သူၣ်အုးသး အုးလၢယဖိခွါအဃိန့ၣ်လီၤ.” အန့ၣ်ဒီးအဝဲဟီၣ်ယၢၤထွဲဒံးဝဲလၢအဖိခွါစီၤယိၤသးအဃိ န့ၣ်လီၤ.
36အကတီၢ်ဖဲန့ၣ်, လၢကီၢ်အဲၤကူပတူးအပူၤ, ပှၤမံးဒယၣ်ဖိတဖၣ်ဆါလီၤကွံာ်လံစီၤယိၤသးဆူစီၤပိၤတံၤ ဖၢ်, ပှၤပၢၤနီအခိၣ်တဂၤလၢအမ့ၢ်စီၤပၤအပဒိၣ်ပပှၢ်တဖၣ်အကျါတဂၤအစု ပူၤလီၤ.
Currently Selected:
လံာ်တၢ်ကဲထီၣ်အခီၣ်ထံး 37: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
