လံာ်တၢ်ကဲထီၣ်အခီၣ်ထံး 31
31
စီၤယၤကိာ်အတၢ်ဃ့ၢ်ကွံာ် လၢစီၤလၤဘၣ်အအိၣ်
1စီၤယၤကိာ်နၢ်ဟူဝဲလၢစီၤလၤဘၣ်အဖိခွါတဖၣ်စံးဝဲ, “စီၤယၤကိာ်ဟံးန့ၢ်လံတၢ်လၢအဘၣ်ဃးဒီးပပၢ်န့ၣ်လံ. ကယဲၢ်အတၢ်ထူးတၢ်တီၤခဲလၢာ်န့ၣ်ဟဲလၢတၢ်လၢအဘၣ်ဃးဒီးပပၢ် လီၤ.” 2ဒီးစီၤယၤကိာ်သ့ၣ်ညါနၢ်ပၢၢ်စ့ၢ်ကီးဝဲဒၣ်လၢစီၤလၤဘၣ်တသူၣ် အိၣ်သးအိၣ်အီၤဒ်လၢညါအသိးလၢၤဘၣ်န့ၣ်လီၤ. 3အန့ၣ်ဒီးယွၤစံးဘၣ်စီၤယၤကိာ်, “က့ၤကဒါက့ၤဆူနပၢ်ဒီး နဘူးနတံၢ်တဖၣ်အကီၢ်တက့ၢ်. ယကအိၣ်ဒီးနၤလီၤ.”
4မၤသးဒ်န့ၣ်ဒီးစီၤယၤကိာ်မၤလိာ်ဝဲလၢနီၢ်ရၤဃ့လးဒီးနီၢ် လ့ၤအၤကဟဲထံၣ်အီၤလၢပျီပူၤဖဲအဆၣ်ဖိကီၢ်ဖိတဖၣ်အိၣ်ဝဲ အလီၢ်န့ၣ်လီၤ. 5ဒီးစံးဘၣ်အဝဲသ့ၣ်, “ယပာ်သူၣ်ပာ်သးလၢသုပၢ်တသူၣ်အိၣ်သး အိၣ်ယၤဒ်အညီနုၢ်မၤဝဲအသိးဘၣ်. ဘၣ်ဆၣ်ဒီးယပၢ်အကစၢ်ယွၤအိၣ်ဒီးယၤလီၤ. 6ဒီးသုခံဂၤလိာ်သုသ့ၣ်ညါလၢယမၤတ့ၢ်လံတၢ်လၢသုပၢ်အဂီၢ် လၢာ်ဂံၢ်လၢာ်ဘါလီၤ. 7အန့ၣ်ဒၣ်လဲာ်အဝဲလီန့ၢ်ယၤဒီးလဲလိာ်ယဘူးယလဲအဘျီတဆံလီၤ. ဘၣ်ဆၣ်ဒီးကစၢ်ယွၤတပျဲအမၤဆါယၤဘၣ်. 8တဘျီလၢ်လၢ်ဖဲစီၤလၤဘၣ်စံးဝဲမဲာ်တဲးလဲးတဖၣ်လၢအကံၣ်စံၣ် ဘှဲန့ၣ်ကမ့ၢ်နဘူးနလဲ, ဒီးကယဲၢ်သိဧိၤမဲာ်တဲးလဲးဧိၤခဲလၢာ်ဖှံလီၤအကံၣ်စံၣ်ဘှဲ န့ၣ်လီၤ. ဒီးဖဲအစံးမဲာ်တဲးလဲးတဖၣ်လၢအတိၤပျ့ကမ့ၢ်နဘူးနလဲ, ဒီးကယဲၢ်သိဧိၤမဲာ်တဲးလဲးဧိၤခဲလၢာ်ဖှံလီၤတၢ်လၢအတိၤ ပျ့တဖၣ်လီၤ. 9ကစၢ်ယွၤဟံးထီၣ်ကွံာ်သိဧိၤမဲာ်တဲးလဲးဧိၤလၢသုပၢ်အအိၣ် ဒီးဟ့ၣ်လီၤတၢ်တဖၣ်န့ၣ်လၢယၤလံန့ၣ်လီၤ.
10ဖဲဆၣ်ဖိကီၢ်ဖိတဖၣ်လူၤလိာ်သးအဆၢကတီၢ်န့ၣ်, ယမံမီၢ်တၢ်တခါဒီးယထံၣ်မဲာ်တဲးလဲးအဖါတဖၣ်လၢအလူၤတၢ်န့ၣ် မ့ၢ်ဝဲအတိၤပျ့, အကံၣ်စံၣ်ဘှဲ, ဒီးအကံၣ်စံၣ်ပိၣ်န့ၣ်လီၤ. 11ကစၢ်ယွၤအကလူးစံးဘၣ်ယၤလၢတၢ်မံမီၢ်အပူၤဒီးစံးဝဲ, ‘စီၤယၤကိာ်ဧၢ,’ ဒီးယစံးဆၢအီၤ, ‘မ့ၢ်ယၤလီၤ.’ 12အဝဲဒၣ်စံးကဒီးဆူညါ, ‘ကွၢ်, ကယဲၢ်မဲာ်တဲးလဲးလၢအလူၤလိာ် အသးသ့ၣ်တဖၣ်အံၤမ့ၢ်ထဲအတိၤပျ့, အကံၣ်စံၣ်ဘှဲ, ဒီးအကံၣ်စံၣ်ပိၣ်တဖၣ်န့ၣ်လီၤ. ယဒုးကဲထီၣ်တၢ်အံၤမ့ၢ်လၢ ယထံၣ်ကယဲၢ်တၢ်လၢစီၤလၤဘၣ်မၤနၤသ့ၣ်တဖၣ်အဃိန့ၣ်လီၤ. 13ယမ့ၢ်ကစၢ်ယွၤလၢအလီၣ်ဖျါထီၣ်အသးဒီးနၤလၢဘ့ၤသ့လးဖဲနပာ် စီဆှံလၢၢ်တဖျၢၣ်လၢတၢ်သ့ၣ်နီၣ်အဂီၢ်ခီဖျိနလူလီၤသိလၢနမၤ တၢ်အၢၣ်လီၤအီလီၤတမံၤဒီးယၤန့ၣ်လီၤ. ခဲကနံၣ်အံၤ, ကတဲာ်ကတီၤနသးဒီးက့ၤဆူကီၢ်လၢနအိၣ်ဖျဲၣ်ထီၣ် န့ၣ်တက့ၢ်.’ ”
14ဒီးနီၢ်ရၤဃ့လးဒီးနီၢ်လ့ၤအၤစံးဆၢစီၤယၤကိာ်, “တၢ်လၢပကန့ၢ်သါလၢပပၢ်အအိၣ်န့ၣ်တအိၣ်တ့ၢ်လၢၤနီတမံၤလၢၤ ဘၣ်. 15အဝဲမၤပှၤဒ်ပှၤတခီဘီမုၢ်ဖိတဖၣ်အသိးလီၤ. အဝဲဆါလီၤကွံာ်ပှၤ, ဒီးခဲကနံၣ်အံၤသူကွံာ်စ့ခဲလၢာ်လၢအဘၣ်တၢ်ဟ့ၣ်အီၤလၢပဂီၢ် န့ၣ်လီၤ. 16ကယဲၢ်တၢ်ထူးတၢ်တီၤခဲလၢာ်အံၤလၢကစၢ်ယွၤဟံးထီၣ်ကွံာ်လၢပပၢ် အအိၣ်န့ၣ်, ဘၣ်ဃးဒီးပှၤဒီးပဖိပလံၤတဖၣ်လီၤ. မၤတၢ်တမံၤလၢ်လၢ်ဒ်ကစၢ်ယွၤစံးတ့ၢ်နၤအသိးတက့ၢ်.”
17မၤသးဒ်န့ၣ်ဒီးစီၤယၤကိာ်ကတဲာ်ကတီၤထီၣ်အသးဒီးပာ်ထီၣ်အဖိ သ့ၣ်တဖၣ်ဒီးအမါနီၤရၤဃ့လးဒီးနီၢ်လ့ၤအၤလၢကီၤလၤအူး တဖၣ်အလိၤ, 18ဒီးနီၣ်ထီၣ်အသိဧိၤမဲာ်တဲးလဲးဧိၤလၢအမဲာ်ညါဃုာ်ဒီးကယဲၢ် တၢ်လၢအဒိးန့ၢ်ဘၣ်ဝဲလၢကီၢ်မ့းစပတၤမံဒ်သိးကက့ၤဆူအပၢ် အအိၣ်လၢကီၢ်ကနၤဧၣ်အပူၤန့ၣ်လီၤ. 19ဖဲစီၤလၤဘၣ်လဲၤတံာ်အသိးအဆူၣ်န့ၣ်နီၢ်ရၤဃ့လးဟုၣ်န့ၢ်အပၢ် အတၢ်ဂီၤတရၤဖးတဖၣ်န့ၣ်လီၤ. 20စီၤယၤကိာ်လီန့ၢ်စီၤလၤဘၣ်ခီဖျိတၢ်တဒုးသ့ၣ်ညါအီၤလၢအတၢ် ဟးထီၣ်အဂ့ၢ်ဘၣ်န့ၣ်လီၤ. 21စီၤယၤကိာ်ဟံးန့ၢ်တၢ်လၢအဘၣ်ဃးဒီးအီၤခဲလၢာ်ဒီးဟးထီၣ် ကွံာ်ချ့သဒံးန့ၣ်လီၤ. ဒီးလဲၤခီဂာ်ထံကျိဖးဒိၣ်ဖရၤသးဒီးလဲၤဝဲဆူ ကီၢ်အိၣ်ဒီးတၢ်လူၢ်တၢ်တြီၤလၢကီၢ်ကံးလဧးန့ၣ်လီၤ.
စီၤလၤဘၣ်လူၤဖီၣ်စီၤယၤကိာ်
22သၢသီပူၤကွံာ်အလီၢ်ခံစီၤလၤဘၣ်ဘၣ်တၢ်တဲအီၤလၢစီၤယၤကိာ် ဃ့ၢ်ကွံာ်လံန့ၣ်လီၤ. 23စီၤလၤဘၣ်ကိးဃုာ်အပှၤဒီးလူၤဖီၣ်စီၤယၤကိာ်နွံသီဒီးချုး န့ၢ်အီၤဖဲ ကီၢ်အိၣ်ဒီးတၢ်လူၢ်တၢ်တြီၤဖဲကီၢ်ကံးလဧးအပူၤန့ၣ်လီၤ. 24လၢမုၢ်နၤအဝဲန့ၣ်လၢတၢ်မံမီၢ်အပူၤကစၢ်ယွၤဟဲဆူစီၤလၤဘၣ် အအိၣ်ဒီးစံးအီၤ, “ပလီၢ်နသးလၢနသုတမၤပျံၤမၤဖုးစီၤယၤကိာ်လၢကျဲနီတဘိတ ဂ့ၤ.” 25စီၤယၤကိာ်သူၣ်ထီၣ်အဒဲလၢကစၢၢ်တဖျၢၣ်အလိၤဒီးစီၤလၤဘၣ်သူၣ် ထီၣ်အဒဲဃုာ်ဒီးအဘူးအတံၢ်လၢကီၢ်အိၣ်ဒီးတၢ်လူၢ်တၢ်တြီၤဖဲ ကီၢ်ကံးလဧးအပူၤန့ၣ်လီၤ.
26ဒီးစီၤလၤဘၣ်စံးဘၣ်စီၤယၤကိာ်, “ဘၣ်မနုၤလၢနလီန့ၢ်ယၤ ဒီးစိာ်ထီၣ်ကွံာ်ယဖိမုၣ်တဖၣ်ဒ်ပိာ်မုၣ်တဖၣ်လၢတၢ်ဖီၣ်န့ၢ်အီၤ လၢတၢ်ဒုးတၢ်ယၤအပူၤအသိးန့ၣ်လဲၣ်. 27ဘၣ်မနုၤလၢနလီယၤဒီးဟးထီၣ်ကစုဒုဒီးတဒုးသ့ၣ်ညါယၤဘၣ် န့ၣ်လဲၣ်. နမ့ၢ်တဲယၤဒီးယကဆှၢနၤလၢတၢ်သူၣ်ခုသးခုအပူၤဒီးသးဝံၣ် တၢ်လၢဒၢဧိၤတြၤဧိၤဒီးတနၢ်သီတူၢ်လီၤ. 28နတပျဲယဆၢဂ့ၤဆၢဝါထွဲယလံၤတဖၣ်ဒီးယဖိမုၣ်တဖၣ်ဒၣ်လဲာ်ဘၣ်. တၢ်န့ၣ်မ့ၢ်ပှၤအမၢးအတၢ်မၤလီၤ. 29ယအိၣ်ဒီးတၢ်စိတၢ်ကမီၤလၢယကမၤဆါနၤလီၤ. ဘၣ်ဆၣ်ဒီးမုၢ်နၤကၢၣ်န့ၣ်နပၢ်အကစၢ်ယွၤဟ့ၣ်ပလီၢ်ယၤဒ်သိး ယသုတမၤပျံၤမၤဖုးနၤလၢကျဲနီတဘိတဂ့ၤအဂီၢ်န့ၣ်လီၤ. 30ယသ့ၣ်ညါလၢနအဲၣ်ဒိးက့ၤဆူနဟံၣ်ဒိၣ်မးလီၤ. ဘၣ်ဆၣ်ဒီးဘၣ်မနုၤလၢနဟုၣ်န့ၢ်ယပှၤဟံၣ်ဖိဃီဖိအကစၢ်တဖၣ်န့ၣ် လဲၣ်.”
31စီၤယၤကိာ်စံးဆၢဝဲ, “ယဘၣ်ယိၣ်လၢနကဟံးန့ၢ်က့ၤနဖိမုၣ် တဖၣ်လၢယအိၣ်န့ၣ်လီၤ. 32ဘၣ်ဆၣ်ဒီး, နမ့ၢ်ထံၣ်ပှၤဖဲအံၤတဂၤဂၤအိၣ်ဒီးနကစၢ်တဖၣ်န့ၣ် ကဘၣ်တၢ်မၤသံအီၤလီၤ. ပာ်, ယပှၤသ့ၣ်တဖၣ်အံၤဒ်ပှၤအုၣ်အသးအသိးဒီးဃုဒီးဟံးန့ၢ်က့ၤ တၢ်လၢအဘၣ်ဃးဒီးနၤန့ၣ်တက့ၢ်.” ဒီးစီၤယၤကိာ်တသ့ၣ်ညါဝဲဒၣ်လၢနီၢ်ရၤဃ့လးဟုၣ်န့ၢ်အပၢ် အကစၢ်တဖၣ်န့ၣ်ဘၣ်.
33စီၤလၤဘၣ်လဲၤဃုစီၤယၤကိာ်အဒဲ, ဝံၤဒီးလဲၤဆူနီၢ်လ့ၤအၤ အဒဲဒီးကုၢ်ပိာ်မုၣ်ခံဂၤအဒဲန့ၣ်လီၤ. ဘၣ်ဆၣ်ဒီး, တထံၣ်န့ၢ်အကစၢ်တဖၣ်န့ၣ်ဘၣ်. တုၤနုၤတစု, အဝဲလဲၤနုာ်ဆူနီၢ် ရၤဃ့လးအဒဲပူၤန့ၣ်လီၤ. 34နီၢ်ရၤဃ့လးဟံးန့ၢ်တၢ်ဂီၤတရၤဖးတဖၣ်ဒီးပာ်ဝဲလၢကီၤလၤ အူးအဂီၤကၢ်အထၢၣ်ပူၤဒီးဆ့ၣ်နီၤဝဲလၢအဖီခိၣ်န့ၣ်လီၤ. စီၤလၤဘၣ်ဃုဝဲလၢဒဲဒီတဖျၢၣ်အပူၤသနာ်က့တထံၣ်န့ၢ်ဝဲဒၣ် ဘၣ်. 35နီၢ်ရၤဃ့လးစံးဘၣ်အပၢ်, “တၢ်ဒိၣ်ဧၢ, တဘၣ်သးဒိၣ်တဂ့ၤ. မ့ၢ်လၢပိာ်မုၣ်အလုၢ်အလၢ်အိၣ်လၢယလိၤအဃိယတကြၢးဆၢထၢၣ်ဝဲလၢ နမဲာ်ညါဘၣ်.” စီၤလၤဘၣ်ဃုဝဲဘၣ်ဆၣ်ဒီးတထံၣ်န့ၢ်အကစၢ်တဖၣ်န့ၣ်ဘၣ်.
36တုၤနုၤတစု, စီၤယၤကိာ်အသးထီၣ်ဒီးသံကွၢ်ဝဲလၢတၢ်သးဒိၣ် အပူၤ, “ယလုၣ်သ့ၣ်ခါပတာ်တ့ၢ်တၢ်သိၣ်တၢ်သီမနုၤလဲၣ်. ယမၤဟးဂီၤတၢ်သိၣ်တၢ်သီမနုၤလၢအဟ့ၣ်နၤတၢ်ခွဲးတၢ်ယာ်ဒ်သိး နကလူၤဖီၣ်ယၤန့ၣ်လဲၣ်. 37ဒီးခဲကနံၣ်အံၤ, နဃုတ့ၢ်တၢ်ဘၣ်ဃးဒီးယၤခဲလၢာ်ဒီးနထံၣ်န့ၢ် နဟံၣ်နဃီအတၢ်ပီးတၢ်လီဘၣ်ဃးဒီးနၤမနုၤန့ၣ်လဲၣ်. ပာ်လီၤအီၤဖဲအံၤလၢနပှၤဒီးယပှၤအမဲာ်ညါဒီးပျဲအဝဲသ့ၣ်စံၣ် ညီၣ်တဲာ်တၢ်လၢနၤဒီးယၤမတၤအတၢ်ဘၣ်လဲၣ်န့ၣ်တက့ၢ်. 38ယအိၣ်တ့ၢ်ဒီးနၤတုၤခဲကနံၣ်အံၤထီၣ်ဘးအနံၣ်ခံဆံလံ. နသိဧိၤမဲာ်တဲးလဲးဧိၤတလီၤလူးနီတဘျီလၢကဖှံလီၤအဂီၢ် န့ၣ်ဘၣ်. ဒီးယတအီၣ်တ့ၢ်နသိဖါနီတဒုလၢနသိတဖၣ်အကျါန့ၣ်ဘၣ်. 39တဘျီဂ့ၤတဘျီဂ့ၤနသိမ့ၢ်ဘၣ်တၢ်မၤသံအီၤလၢဆၣ်ဖိကီၢ်ဖိ အမံၤန့ၣ်ယလိးက့ၤယဲလီၤ. ယတဟဲက့ၤစိာ်ဒီးဒုးနဲၣ်နၤလၢတၢ်န့ၣ်တမ့ၢ်ယတၢ်ကမၣ်န့ၣ်ဘၣ်. လၢမုၢ်ဆါခီမ့ၢ်ဂ့ၤမုၢ်နၤခီမ့ၢ်ဂ့ၤတၢ်တမံၤလၢ်လၢ်လၢအဘၣ် တၢ်ဟုၣ်အီၤန့ၣ်နအဲၣ်ဒိးလၢယကမၤပှဲၤထီၣ်က့ၤအီၤလီၤ. 40အါစုအါဘျီယတူၢ်ဘၣ်တၢ်ကိၢ်တၢ်ကဲၤလၢမုၢ်ဆါခီဒီးတၢ်ဂိၢ် တၢ်ခုၣ်လၢမုၢ်နၤခါလီၤ. ယမံဒၣ်လဲာ်တန့ၢ်ဘၣ်. 41တၢ်မၤအသးဒ်န့ၣ်အသိးဖဲယအိၣ်ဒီးနၤအနံၣ်ခံဆံန့ၣ်လီၤ. ဒ်သိးယကဒိးန့ၢ်နဖိမုၣ်ခံဂၤအဂီၢ်ယမၤနတၢ်တဆံလွံၢ်နံၣ်ဒီး လၢနဆၣ်ဖိကီၢ်ဖိအဂီၢ်ယမၤနတၢ်ဃုနံၣ်လီၤ. ဒီးလၢတၢ်အံၤအပူၤဒၣ်လဲာ်နလဲလိာ်ကဒံကဒါယဘူးယလဲ အဘျီတဆံလီၤ. 42ယပၢ်တဖၣ်အကစၢ်ယွၤ, စီၤအၤဘြၤဟၣ်ဒီးစီၤအံၤစဲးအက စၢ်ယွၤမ့ၢ်တအိၣ်ဒီးယၤဘၣ်ဒီးနကဆှၢဖျိးကွံာ်ယၤစုယၢ်ခီ န့ၣ်လီၤ. ဘၣ်ဆၣ်ကစၢ်ယွၤထံၣ်တ့ၢ်လံယတၢ်ကိၢ်တၢ်ဂီၤဒီးတၢ်လၢ ယမၤတ့ၢ်ယဲလီၤ. ဒီးဖဲမုၢ်နၤကၢၣ်န့ၣ်အဝဲစံၣ်ညီၣ်တီလံတၢ်လံ.”
တၢ်သးလီၤပလိာ်လၢစီၤယၤကိာ်ဒီးစီၤလၤဘၣ်အဘၢၣ်စၢၤ
43ဒီးစီၤလၤဘၣ်စံးဆၢဝဲ, “ပိာ်မုၣ်တဖၣ်အံၤမ့ၢ်ယဖိမုၣ်တ ဖၣ်, ဒီးအဖိတဖၣ်ဘၣ်ဃးဒီးယၤလီၤ. ဒီးဆၣ်ဖိကီၢ်ဖိတဖၣ်အံၤမ့ၢ် ယတၢ်လီၤ. နီၢ်နီၢ်န့ၣ်ကယဲၢ်တၢ်လၢနထံၣ်အီၤဖဲအံၤခဲလၢာ်ဒၣ်လဲာ်မ့ၢ်ယတၢ် လီၤ. ဘၣ်ဆၣ်မ့ၢ်လၢယမၤလၢၤတၢ်တသ့နီတမံၤဘၣ်လၢယကဟံးဃာ်ယဖိမုၣ် ဒီးအဖိသ့ၣ်တဖၣ်အဂီၢ်အဃိ, 44ယအိၣ်ကတဲာ်ကတီၤယသးလၢယကမၤတၢ်သးလီၤပလိာ်တမံၤဒီးနၤလီၤ. မ်ပပာ်ဖှိၣ်သကိးလၢၢ်ဒီးဒုးကဲထီၣ်ထူၣ်တထူၣ်လၢကဒုးသ့ၣ်နီၣ် ထီၣ်က့ၤပှၤပတၢ်သးလီၤပလိာ်န့ၣ်တက့ၢ်.”
45မၤသးဒ်န့ၣ်ဒီးစီၤယၤကိာ်ဟံးန့ၢ်လၢၢ်တဖျၢၣ်ဒီးပာ်ထီၣ်အီၤဒ် အမ့ၢ်တၢ်သ့ၣ်နီၣ်ထီၣ်အပနီၣ်န့ၣ်လီၤ. 46အဝဲစံးဘၣ်အခ့အပှၤတဖၣ်လၢကထၢထီၣ်လၢၢ်ဒီးပာ်ဖှိၣ်ထီၣ်အီၤ န့ၣ်လီၤ. ဒီးအဝဲသ့ၣ်အီၣ်သကိးတၢ်ဖဲလၢၢ်ပာ်ဖှိၣ်သးအထူၣ်အကပၤန့ၣ်လီၤ. 47စီၤလၤဘၣ်ကိးထူၣ်န့ၣ်အမံၤဝဲလၢယကၢ်စဃၤဒူသၤဒီးစီၤယၤ ကိာ်ကိးန့ၢ်ဝဲလၢကံးလဧးလီၤ. 48စီၤလၤဘၣ်စံးဘၣ်စီၤယၤကိာ်, “လၢၢ်ပာ်ဖှိၣ်အထူၣ်အံၤမ့ၢ်တၢ် အုၣ်သးလၢယၤဒီးနၤအဘၢၣ်စၢၤန့ၣ်လီၤ. လၢတၢ်န့ၣ်အဃိတၢ်လီၢ်ဝဲန့ၣ်ဘၣ်တၢ်ကိးအီၤလၢကံးလဧးလီၤ.” 49စီၤလၤဘၣ်စံးစ့ၢ်ကီးဝဲ, “မ်ယွၤအမဲာ်ကွၢ်လီၤပှၤဖဲပအိၣ် လီၤဖးလိာ်ပသးတဂၤဒီးတဂၤန့ၣ်တက့ၢ်.” လၢတၢ်န့ၣ်အဃိတၢ်လီၢ်အံၤဘၣ်တၢ်ကိးစ့ၢ်ကီးအီၤလၢမံးစပၤ လီၤ. 50ဒီးစီၤလၤစံးဘၣ်ကဒီးဝဲ, “နမ့ၢ်မၤအၢမၤသီယဖိမုၣ်တဖၣ် မ့ၢ်ဂ့ၤ, နမ့ၢ်ဟံးန့ၢ်ပှၤပိာ်မုၣ်အဂၤတဖၣ်မ့ၢ်ဂ့ၤ, ယမ့ၢ်တသ့ၣ်ညါနာ်သက့ သ့ၣ်နီၣ်ထီၣ်လၢကစၢ်ယွၤကွၢ်လီၤပှၤန့ၣ်တက့ၢ်. 51အအံၤမ့ၢ်လၢၢ်တဖၣ်လၢယပာ်ဖှိၣ်ထီၣ်လၢပဘၢၣ်စၢၤဒီးအအံၤမ့ၢ်တၢ် သ့ၣ်နီၣ်ထီၣ်အလၢၢ်ထူၣ်န့ၣ်လီၤ. 52လၢၢ်ပာ်ဖှိၣ်ထီၣ်အသးအံၤဒီးတၢ်သ့ၣ်နီၣ်အလၢၢ်ထူၣ်အံၤမ့ၢ်တၢ် မၤသ့ၣ်နီၣ်ထီၣ်ပှၤလီၤ. ယတလဲၤပူၤထီၣ်လၢၢ်ထူၣ်အံၤလၢယကထီဒါနၤအဂီၢ်နီတစုဘၣ်. ဒီးနဲစ့ၢ်ကီးနတဘၣ်လဲၤပူၤထီၣ်လၢၢ်ထူၣ်အံၤဒီးထီဒါယၤဘၣ်. 53စီၤအၤဘြၤဟၣ်အကစၢ်ယွၤဒီးစီၤနၤဃိာ်အကစၢ်ယွၤကစံၣ်ညီၣ်တၢ် လၢပဘၢၣ်စၢၤန့ၣ်လီၤ.” တုၤနုၤတစုစီၤယၤကိာ်မၤတၢ်အၢၣ်လီၤသညူးသပှၢ်လၢကပၢၤဃးဝဲ လၢကစၢ်ယွၤလၢအပၢ်စီၤအံၤစဲးဘူၣ်ထီၣ်ဘါထီၣ်ဝဲတဂၤအမံၤ အပူၤန့ၣ်လီၤ. 54စီၤယၤကိာ်မၤသံဆၣ်ဖိကီၢ်ဖိတဒုဒီးလုၢ်ထီၣ်ဝဲဒ်တၢ်လုၢ်ထီၣ် ပာ်ထီၣ်တမံၤအသိးလၢကစၢၢ်လိၤဒီးကွဲဃီၤဝဲအပှၤတဖၣ်လၢကဟဲ အီၣ်တၢ်န့ၣ်လီၤ. အဝဲသ့ၣ်အီၣ်တၢ်ဝံၤဒီးမံဝဲလၢကစၢၢ်လိၤန့ၣ်လီၤ. 55လၢခံတနံၤမုၢ်ဆ့ၣ်ထီၣ်ဂီၤဂီၤန့ၣ်စီၤလၤဘၣ်နၢမူဆိၣ်ဂ့ၤ အလံၤတဖၣ်ဒီးအဖိမုၣ်တဖၣ်ဝံၤက့ၤကဒါက့ၤဆူအဟံၣ်န့ၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 31: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
