လံာ်တၢ်ကဲထီၣ်အခီၣ်ထံး 30
30
1မ့မ့ၢ်နီၢ်ရၤဃ့လးန့ၣ်တဆံးစၢ်န့ၢ်အဖိနီတဂၤလၢစီၤယၤကိာ် အဂီၢ်ဘၣ်. ဒီးအသးက့ၣ်အဒီပုၢ်ဝဲၢ်မုၣ်နီၢ်လ့ၤအၤဒီးစံးဘၣ်စီၤယၤကိာ်, “ဟ့ၣ်ယၤလၢဖိတဖၣ်တက့ၢ်. မ့တမ့ၢ်ဘၣ်ဒီးယကသံလီၤ.”
2ဒီးစီၤယၤကိာ်အသးထီၣ်နီၢ်ရၤဃ့လးဒီးစံးဝဲဒၣ်, “ယဟံးန့ၢ်ယွၤအလီၢ်တသ့ဘၣ်. ယွၤမ့ၢ်ပှၤတဂၤလၢအတြီ ဃာ်နၤလၢတၢ်အိၣ်ဒံၣ်အိၣ်ဖိတဖၣ်န့ၣ်လီၤ.”
3ဒီးနီၢ်ရၤဃ့လးစံးဝဲ, “ယကုၢ်ပိာ်မုၣ်နီၢ်ဘံၤလဟၤအိၣ်ဖဲအံၤလီၤ. မံဒီးအီၤဒ်သိးအဖိကအိၣ်လၢယဂီၢ်န့ၣ်တက့ၢ်. လၢကျဲဒ်အံၤယကကဲထီၣ်မိၢ်တဂၤခီဖျိအီၤန့ၣ်လီၤ.” 4ဒီးလၢတၢ်န့ၣ်အဃိနီၢ်ရၤဃ့လးဟ့ၣ်ဝဲအကုၢ်ပိာ်မုၣ်နီၢ်ဘံၤလဟၤ လၢအဝၤစီၤယၤကိာ်န့ၣ်လီၤ. ဒီးစီၤယၤကိာ်မံဃုာ်ဂဲၤဃုာ်ဒီးအီၤန့ၣ်လီၤ. 5ဒီးနီၢ်ဘံၤလဟၤဒၢထီၣ်ဒီးဆံးစၢ်န့ၢ်အဖိခွါလၢစီၤယၤကိာ် အဂီၢ်န့ၣ်လီၤ. 6ဒီးနီၢ်ရၤဃ့လးစံးဝဲ, “ကစၢ်ယွၤစံၣ်ညီၣ်တီတၢ်လၢတၢ်ကွၢ် မဲာ်ယၤအပူၤလီၤ. အဝဲနၢ်ဟူတ့ၢ်လံယတၢ်ထုကဖၣ်ဒီးဟ့ၣ်ယၤလၢဖိခွါတဂၤလံ.” ဒီးယုၢ်ဝဲအမံၤလၢစီၤဒၣ်န့ၣ်လီၤ. 7ဒီးနီၢ်ဘံၤလဟၤဒၢထီၣ်ကဒီးဝဲဒီးဆံးစၢ်န့ၢ်အဖိခွါခံဂၤ လၢစီၤယၤကိာ်အဂီၢ်လီၤ. 8ဒီးနီၢ်ရၤဃ့လးစံးဝဲ, “ယဒုးတၢ်ဒုးလၢအဆူၣ်ဒီးယဒီပုၢ် ဝဲၢ်မုၣ်လီၤ. ဘၣ်ဆၣ်ယမၤနၢၤအီၤလံ.” ဒီးယုၢ်န့ၢ်ဝဲအမံၤလၢစီၤနးသၤလံလီၤ.
9ဒီးတုၤနီၢ်လ့ၤအၤသ့ၣ်ညါလၢတဆံးစၢ်န့ၢ်အဖိလၢၤဘၣ်န့ၣ်ဟ့ၣ် ဝဲအကုၢ်ပိာ်မုၣ်နီၢ်စံၤလပၤဆူစီၤယၤကိာ်ဒ်အမါအသိးန့ၣ်လီၤ. 10ဒီးနီၢ်စံၤလပၤဆံးစၢ်န့ၢ်အဖိလၢစီၤယၤကိာ်အဂီၢ်လီၤ. 11ဒီးနီၢ်လ့ၤအၤစံးဝဲဒၣ်, “ယဘူၣ်ယတီၤဂ့ၤဝဲလီၤ.” ဒီးယုၢ်ဝဲအမံၤလၢစီၤကးလီၤ. 12ဒီးနီၢ်စံၤလပၤဆံးစၢ်န့ၢ်အဖိလၢခံတဂၤလၢစီၤယၤကိာ်အဂီၢ် န့ၣ်လီၤ. 13ဒီးနီၢ်လ့ၤအၤစံးဝဲဒၣ်, “ယသးခုဆံးဒိၣ်လဲၣ်. ဒီးခဲကနံၣ်အံၤပှၤပိာ်မုၣ်တဖၣ်ကကိးယၤလၢတၢ်သးခုလီၤ.” ဒီးယုၢ်ဝဲအမံၤလၢစီၤအၤၡ့ၢ်လီၤ.
14ဒီးလၢတၢ်ကူးဘုကၠူၣ်အကတီၢ်န့ၣ်စီၤရူၤဘ့ၣ်လဲၤတၢ်လၢစံာ် ပျီပူၤဒီးထံၣ်န့ၢ်ဒူးဒးသၣ်ဒီးဟဲက့ၤစိာ်ဝဲဆူအမိၢ်နီၢ် လ့ၤအၤအအိၣ်န့ၣ်လီၤ. ဒီးနီၢ်ရၤဃ့လးစံးဘၣ်နီၢ်လ့ၤအၤ, “ဝံသးစူၤဟ့ၣ်ယၤလၢ နဖိခွါအဒူးဒးသၣ်တနီၤတက့ၢ်.”
15ဒီးနီၢ်လ့ၤအၤစံးဆၢဝဲ, “နဟံးန့ၢ်ကွံာ်ယဝၤန့ၣ်မ့ၢ်တလၢ ဒံးဘၣ်ဧါ. ဒီးခဲကနံၣ်အံၤဒၣ်လဲာ်နဂုာ်ကျဲးစၢးဟံးန့ၢ်ကွံာ်ယဖိခွါ အဒူးဒးသၣ်န့ၣ်လီၤ.”
ဒီးနီၢ်ရၤဃ့လးစံးဝဲဒၣ်, “နမ့ၢ်ဟ့ၣ်ယၤလၢနဖိခွါအဒူးဒးသၣ်န့ၣ်တနၤအံၤနမံလၢစီၤ ယၤကိာ်သ့လီၤ.”
16ဒီးတုၤမုၢ်ဟါလီၤန့ၣ်စီၤယၤကိာ်ဟဲက့ၤလၢစံာ်ပျီပူၤဒီး နီၢ်လ့ၤအၤလဲၤထီၣ်သဂၢၢ်အီၤဒီးစံးဝဲ, “တနၤအံၤနကဘၣ်မံလၢၤယၤမ့ၢ်လၢယဟ့ၣ်တ့ၢ်ယဖိခွါအဒူးဒးသၣ် လၢနဂီၢ်အဃိလီၤ.” ဒီးစီၤယၤကိာ်မံဃုာ်ဂဲၤဃုာ်ဒီးအီၤလၢမုၢ်တနၤန့ၣ်လီၤ.
17ဒီးကစၢ်ယွၤဒိကနၣ်နီၢ်လ့ၤအၤအတၢ်ထုကဖၣ်, ဒီးအဝဲဒၣ်ဒၢထီၣ်ဝဲဒီးဆံးစၢ်န့ၢ်အဖိခွါယဲၢ်ဂၤတဂၤလၢ စီၤယၤကိာ်အဂီၢ်န့ၣ်လီၤ. 18ဒီးနီၢ်လ့ၤအၤစံးဝဲ, “ကစၢ်ယွၤဟ့ၣ်လီၤယၤလၢယတၢ်န့ၢ်ဘျုး လီၤ. အဂ့ၢ်ဒ်အံၤ, ယဟ့ၣ်ယကုၢ်ပိာ်မုၣ်လၢယဝၤအဃိန့ၣ်လီၤ.” ဒီးယုၢ်ဝဲအမံၤလၢစီၤယံးစၣ်ကၢ်လီၤ. 19ဒီးနီၢ်လ့ၤအၤဒၢထီၣ်ကဒီး, ဒီးဆံးစၢ်န့ၢ်အဖိခွါဃုဂၤ တဂၤလၢစီၤယၤကိာ်အဂီၢ်န့ၣ်လီၤ. 20ဒီးနီၢ်လ့ၤအၤစံးဝဲ, “ကစၢ်ယွၤဟ့ၣ်ယၤတၢ်ဟ့ၣ်လၢအဂ့ၤလံ. ဒီးခဲကနံၣ်အံၤယဝၤကတူၢ်လိာ်ယၤမ့ၢ်လၢယဆံးစၢ်န့ၢ်အီၤဖိ ခွါဃုဂၤလၢအဂီၢ်အဃိလီၤ.” ဒီးယုၢ်ဝဲအမံၤလၢစီၤစဘူလိၣ်လီၤ. 21ဒီးလၢခံက့ၤဆံးစၢ်န့ၢ်အဖိမုၣ်တဂၤဒီးယုၢ်ဝဲအမံၤလၢနီၢ်ဒံနၤလီၤ.
22ဒီးကစၢ်ယွၤသ့ၣ်နီၣ်နီၢ်ရၤဃ့လး, ဒီးစံးဆၢအတၢ်ထုကဖၣ် လၢကအိၣ်ဒီးအဖိ အဂီၢ်လီၤ. 23ဒီးနီၢ်ရၤဃ့လးဒၢထီၣ်ဒီးဆံးစၢ်န့ၢ်အဖိခွါတဂၤလီၤ. ဒီးစံးဝဲ, “ကစၢ်ယွၤထုးထီၣ်ကွံာ်ယတၢ်ဘၣ်ဒုၣ်ဒွဲၣ်ခီဖျိ တၢ်ဟ့ၣ်ယၤဖိခွါတဂၤန့ၣ်လီၤ. 24မ်ယွၤဟ့ၣ်ယၤလၢဖိခွါအဂၤတဂၤတက့ၢ်.” ဒီးယုၢ်ဝဲအမံၤလၢစီၤယိၤသးလီၤ.
စီၤယၤကိာ်မၤတၢ်အၢၣ်လီၤလိာ်အသး ခံခီယၢ်ခီဒီးစီၤလၤဘၣ်
25ဒီးစီၤယိၤသးအိၣ်ဖျဲၣ်ဝံၤအလီၢ်ခံစီၤယၤကိာ်စံးဘၣ်စီၤလၤ ဘၣ်, “ပျၢ်ယၤဒ်သိးယကက့ၤကဒါက့ၤဆူယဟံၣ်တက့ၢ်. 26ဟ့ၣ်ယၤယမါတဖၣ်ဒီးယဖိတဖၣ်လၢယမၤန့ၢ်အီၤခီဖျိလၢယမၤနတၢ် လၢအဃိ, ဒီးယကဟးထီၣ်လီၤ. ယမၤတ့ၢ်တၢ်လၢနဂီၢ်ဂ့ၤဝဲအါဝဲဆံးဒိၣ်လဲၣ်န့ၣ်နသ့ၣ်ညါလီၤ.”
27စီၤလၤဘၣ်စံးဘၣ်အီၤ, “ပျဲယစံးတၢ်အံၤတက့ၢ်. ယမၤလိန့ၢ်တၢ်ခီဖျိတၢ်ဖးပှၤကညီအဘူၣ်အတီၤဒီးယနၢ်ပၢၢ်လၢ ယွၤဆိၣ်ဂ့ၤတ့ၢ်ယၤလၢနဃိလီၤ. 28တဲနတၢ်မၤအဘူးအလဲတက့ၢ်. ဒီးယကဟ့ၣ်နၤလီၤ.”
29ဒီးစီၤယၤကိာ်စံးဆၢဝဲ, “နသ့ၣ်ညါလၢယမၤတ့ၢ်တၢ်လၢနဂီၢ်ထဲ လဲၣ်ထဲလဲၣ်, ဒီးနသိအဖုအဂီၢ်တဖၣ်အါထီၣ်ဂီၢ်ထီၣ်လၢယတၢ်အံးထွဲကွၢ်ထွဲ အဖီလာ်န့ၣ်ဆံးအါဆံးအါန့ၣ်လီၤ. 30တၢ်ဆံးကိာ်ဖိလၢအအိၣ်ဒီးနၤဖဲတချုးယဟဲန့ၣ်, ဒိၣ်ထီၣ်အါထီၣ်ဒိၣ်ဒိၣ်ကလဲာ်လီၤ. ဒီးကစၢ်ယွၤဆိၣ်ဂ့ၤတ့ၢ်နၤ ဖဲယလဲၤတၢ်တပူၤလၢ်လၢ်န့ၣ်လီၤ. ဒီးခဲကနံၣ်အံၤတၢ်ဆၢကတီၢ်တုၤဝဲလၢယဂီၢ်လၢယကဃုယတၢ်ဘၣ် ဘျုးဘၣ်ဖှိၣ်ဒၣ်ယဲအဂီၢ်န့ၣ်လီၤ.”
31ဒီးစီၤလၤဘၣ်သံကွၢ်အီၤ, “ယကဘၣ်ဟ့ၣ်နၤတၢ်မနုၤလဲၣ်.”
ဒီးစီၤယၤကိာ်စံးဆၢ, “ယတသးလီတၢ်အဘူးအလဲနီတမံၤဘၣ်. နမ့ၢ်ဘၣ်နသးလၢတၢ်ဟ့ၣ်ကူၣ်အံၤတမံၤဒီးယကအံးထွဲကွၢ်ထွဲ နသိအဖုအဂီၢ်တဖၣ်ဆူညါ, ဆူညါန့ၣ်လီၤ. 32ပျဲယကွၢ်သမံသမိးနသိအဖုအဂီၢ်ခဲလၢာ်လၢမုၢ်မဆါတနံၤအံၤ ဒီးဟံးန့ၢ်ကယဲၢ်သိအသူအဃးခဲလၢာ်ဒီးမဲာ်တဲးလဲးသးစၢ်လၢ အကံၣ်စံၣ်ဘှဲမ့ၢ်ဂ့ၤကံၣ်ဖျၢၣ်သလၣ်မ့ၢ်ဂ့ၤန့ၣ်တက့ၢ်. တၢ်န့ၣ်မ့ၢ်တၢ်ဘူးတၢ်လဲလၢယသးလီအီၤန့ၣ်လီၤ. 33ခါဆူညါန့ၣ်, မ့ၢ်ယတီဒီးနၤကစီဒီဧါန့ၣ်နကထံၣ်ဘၣ်ညီကဒၣ် လီၤ. ဖဲနဟဲလၢနကသမံသမိးယတၢ်ဘူးတၢ်လဲန့ၣ်, နမ့ၢ်ထံၣ်လၢယအိၣ်ဒီးမဲာ်တဲးလဲးလၢအတကံၣ်စံၣ်ဘှဲမ့ၢ်ဂ့ၤ တကံၣ်ဖျၢၣ်သလၢၣ်မ့ၢ်ဂ့ၤ, သိလၢအတသူအတဃးမ့ၢ်ဂ့ၤန့ၣ်ဒီးနကသ့ၣ်ညါလၢအဘၣ်တၢ်ဟုၣ်န့ၢ် အီၤလံန့ၣ်လီၤ.”
34စီၤလၤဘၣ်စံးဆၢဝဲ, “ယဘၣ်ယသးလီၤ. ယကမၤဒ်နဟ့ၣ်ကူၣ်အသိး လီၤ.” 35ဘၣ်ဆၣ်ဒီး, လၢမုၢ်တနံၤန့ၣ်စီၤလၤဘၣ်သုးကွံာ်မဲာ်တဲးလဲး အဖါတဖၣ်လၢအကံၣ်တပလူာ်တပလူာ်ဒီးကံၣ်ဖျၢၣ်သလၢၣ်, ဒီးကယဲၢ်မဲာ်တဲးလဲးမိၢ်လၢအကံၣ်စံၣ်ဘှဲ, ဒီးကံၣ်ဖျၢၣ်သလၢၣ်ဒီးကယဲၢ်တၢ်လၢအအိၣ်ဒီးတၢ်အဝါလၢအလိၤ လီၤ. ဒီးအဝဲသုးကွံာ်စ့ၢ်ကီးသိအသူအဃးခဲလၢာ်န့ၣ်လီၤ. ဒီးမၢအဖိခွါတဖၣ်ကွၢ်ထွဲဝဲဒၣ်သိတဖၣ်န့ၣ်လီၤ. 36ဒီးဟးထီၣ်ကွံာ်ဃုာ်ဒီးအသိတဖုအံၤ, ယံၤဒီးစီၤယၤကိာ်တသ့ ဖဲအသ့တုၤအလဲၤဝဲသ့အယံၤကတၢၢ်လၢသၢသီကျဲန့ၣ်လီၤ. စီၤယၤကိာ်အံးထွဲကွၢ်ထွဲစီၤလၤဘၣ်အသိအဖုအဂီၢ်တဖၣ်လၢ အအိၣ်လီၤတဲာ်န့ၣ်လီၤ.
37စီၤယၤကိာ်ဟံးန့ၢ်သ့ၣ်အဒ့သံကစဲာ်လၢသ့ၣ်လံးဘန့ၤ, သ့ၣ်လူးစး, သ့ၣ်ဧၢ်မိၣ်ဒီးအုၣ်လီၤအဖံးတနီၤ ဒ်သိးလၢသ့ၣ်ဒ့ တဖၣ်န့ၣ် အလိၤတၢ်အလွဲၢ်အဝါကဖျါထီၣ်ဝဲန့ၣ်လီၤ. 38ဒီးပာ်လီၤဝဲသ့ၣ်ဒ့တဖၣ်အံၤလၢသိအဖုအဂီၢ်တဖၣ်အီထံအကျိး တဖၣ်အမဲာ်ညါန့ၣ်လီၤ. အဝဲပာ်လီၤဝဲတၢ်န့ၣ်တဖၣ်ဖဲန့ၣ်, မ့ၢ်လၢဆၣ်ဖိကီၢ်ဖိတဖၣ်လူၤလိာ်အသးဖဲအဝဲသ့ၣ်ဟဲလၢဒီးကအီ ထံအကတီၢ်န့ၣ်လီၤ. 39မၤသးဒ်န့ၣ်ဒီး, ဖဲမဲာ်တဲးလဲးတဖၣ်ဖှံလီၤလၢနီၣ်ဘိတဖၣ် အမဲာ်ညါန့ၣ်, ဒုးကဲထီၣ်မဲာ်တဲးလဲးဖိတဖၣ်လၢအကံၣ်တပလူာ်တပလူာ်, ကံၣ်စံၣ်ဘှဲဒီးကံၣ်ဖျၢၣ်သလၢၣ်လီၤ.
40ဒီးစီၤယၤကိာ်ပာ်လီၤဖးသိဖိတဖၣ်ယံၤဒီးမဲာ်တဲးလဲးသ့ၣ် တဖၣ်ဒီးမၢအဃၣ်အမဲာ်ဆူတၢ်လၢအကံၣ်တပလူာ်တပလူာ်ဒီးဆၣ်ဖိကီၢ် ဖိအသူအဃးတဖၣ်လၢစီၤလၤဘၣ်အသိတဖု အကျါလီၤ. ဒီးလၢကျဲဒ်အံၤန့ၣ်, စီၤယၤကိာ်ဒုးအိၣ်ထီၣ်အသိ အဖုအဂီၢ်ဒၣ်ဝဲဒီးပာ်လီၤဖးအီၤယံၤဒီးစီၤလၤဘၣ်အသိအဖု အဂီၢ်န့ၣ်လီၤ.
41ဒီးဖဲဆၣ်ဖိကီၢ်ဖိလၢအအိၣ်ဆူၣ်အိၣ်ချ့သ့ၣ်တဖၣ်လူၤလိာ်အသး အခါန့ၣ်စီၤယၤကိာ်ပာ်ဝဲသ့ၣ်တဖၣ်လၢအဝဲသ့ၣ်အိထံအကျိးတဖၣ် အမဲာ်ညါဒ်သိးကဒၢထီၣ်ဝဲလၢသ့ၣ်ဒ့တဖၣ်အကျါန့ၣ်လီၤ. 42ဘၣ်ဆၣ်တပာ်ဝဲသ့ၣ်အဒ့တဖၣ်လၢဆၣ်ဖိကီၢ်ဖိလၢအဂံၢ်စၢ်ဘါစၢ် တဖၣ်အမဲာ်ညါန့ၣ်ဘၣ်. တယံာ်ဘၣ်ဒီးစီၤလၤဘၣ်ဒိးန့ၢ်ဘၣ်ထဲ ဆၣ်ဖိကီၢ်ဖိလၢအဂံၢ်စၢ်အဘါစၢ်တဖၣ်ဒီးစီၤယၤကိာ်မၤန့ၢ် ကယဲၢ်တၢ်လၢအအိၣ်ဆူၣ်အိၣ်ချ့တဖၣ်လီၤ. 43လၢကျဲဒ်အံၤန့ၣ်, စီၤယၤကိာ်ထူးတီၤထီၣ်ဝဲအါအါကလဲာ်လီၤ. အဝဲအိၣ်ဒီးအသိအဖုတဖၣ်, အကုၢ်သ့ၣ်တဖၣ်, ကီၤလၤအူးတဖၣ်, ဒီးကသ့ၣ်ယီၤတဖၣ်န့ၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 30: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
