လံာ်တၢ်ကဲထီၣ်အခီၣ်ထံး 22
22
ကစၢ်ယွၤမၤလိာ်စီၤအၤဘြၤဟၣ်လၢကလုၢ်ထီၣ်စီၤအံၤစဲး
1တၢ်န့ၣ်တဖၣ်ဝံၤအလီၢ်ခံကစၢ်ယွၤမၤကွၢ်စီၤအၤဘြၤဟၣ်န့ၣ်လီၤ. ဒီးကစၢ်ယွၤကိးထီၣ်အီၤ, “စီၤအၤဘြၤဟၣ်ဧၢ,” ဒီးစီၤအၤဘြၤဟၣ်စံးဆၢအီၤ, “ကစၢ်ဧၢ, မ့ၢ်ယၤလီၤ.”
2ဒီးကစၢ်ယွၤစံးဘၣ်အီၤ, “ဟံးန့ၢ်နဖိခွါ, နဖိခွါထဲတဂၤဧိၤလၢအမ့ၢ်စီၤအံၤစဲးလၢနအဲၣ်အီၤဒိၣ်မးတ ဂၤ, ဒီးလဲၤဆူကီၢ်မိၤရံယၤန့ၣ်တက့ၢ်. ဒီးဖဲန့ၣ်လၢကစၢၢ် တဖျၢၣ်လၢယကဒုးနဲၣ်နၤအဒီခိၣ်န့ၣ်လုၢ်ထီၣ်အီၤဒ်တၢ်လုၢ်တၢ်ပာ် တမံၤဆူယအိၣ်န့ၣ်တက့ၢ်.”
3ဒီးလၢခံတနံၤဂီၤဂီၤန့ၣ်စီၤအၤဘြၤဟၣ်တိသ့ၣ်ဖးသ့ၣ်မုၣ် လၢကလုၢ်တၢ်ပာ်တၢ်အဂီၢ်ဒီးပဒၢးထီၣ်အီၤလၢအကသ့ၣ်ယီၤအလိၤဝံၤ ကိးဝဲစီၤအံၤစဲးဒီးအခ့အပှၤခံဂၤဃုာ်ဒီးအီၤန့ၣ်လီၤ. အဝဲသ့ၣ်စးထီၣ်လဲၤတၢ်ဆူတၢ်လီၢ်လၢကစၢ်ယွၤတဲတ့ၢ်အီၤန့ၣ်လီၤ. 4ဒီးလၢသၢသီတသီန့ၣ်စီၤအၤဘြၤဟၣ်ထံၣ်စိတၢ်လီၢ်န့ၣ်လၢအယံၤ လီၤ. 5တုၤနုၤတစုစီၤအၤဘြၤဟၣ်စံးဘၣ်အခ့အပှၤတဖၣ်န့ၣ်, “အိၣ်သုဝဲဖဲအံၤဃုာ်ဒီးကသ့ၣ်ယီၤတက့ၢ်. ဖိသၣ်ပိာ်ခွါဒီးယဲဒၣ်အံၤပကလဲၤဆူန့ၣ်, ဖဲန့ၣ်ဒီးဘူၣ်တၢ်ဘါတၢ်ဝံၤဒီးပကဟဲက့ၤဆူသုအိၣ်လီၤ.”
6စီၤအၤဘြၤဟၣ်ပာ်ထီၣ်သ့ၣ်မုၣ်လၢတၢ်လုၢ်တၢ်ပာ်အဂီၢ်န့ၣ်လၢစီၤ အံၤစဲးအလိၤဒီးအနီၢ်ကစၢ်ဒၣ်ဝဲစိာ်ဒီတဘ့ၣ်ဒီးမ့ၣ်အူအ့ၣ် လၢကစးထီၣ်မ့ၣ်အူအဂီၢ်န့ၣ်လီၤ. 7ဒီးဖဲအလဲၤသကိးတၢ်အခါန့ၣ်, စီၤအံၤစဲးစံးဝဲဒၣ်, “ပၢ်ဧၢ,”
ဒီးစီၤအၤဘြၤဟၣ်စံးဆၢဝဲ, “ဘၣ်မနုၤလဲၣ်ယ ဖိခွါဧၢ,”
ဒီးစီၤအံၤစဲးသံကွၢ်, “ယထံၣ်လၢနအိၣ်ဒီးမ့ၣ်အူအ့ၣ်ဒီး သ့ၣ်မုၣ်လီၤ. မ့မ့ၢ်သိဖိလၢတၢ်လုၢ်ထီၣ်ပာ်ထီၣ်အဂီၢ်အိၣ်ဖဲလဲၣ်.”
8စီၤအၤဘြၤဟၣ်စံးဆၢဝဲ, “ကစၢ်ယွၤအနီၢ်ကစၢ်ဒၣ်ဝဲ ကဟ့ၣ်လီၤသိဖိတဒုန့ၣ်လီၤ.” ဒီးအဝဲသ့ၣ်ခံဂၤလဲၤသကိးတၢ်ဆူညါလီၤ.
9အကတီၢ်ဖဲန့ၣ်အဝဲသ့ၣ်ဟဲတုၤတၢ်လီၢ်လၢကစၢ်ယွၤစံးဘၣ်တ့ၢ်အီၤ လၢအဂ့ၢ်န့ၣ်, စီၤအၤဘြၤဟၣ်မၤထီၣ်ဝဲတၢ်လုၢ်တခါဒီးကျဲၤလီၤသ့ၣ်မုၣ်လၢ အဖီခိၣ်န့ၣ်လီၤ. အဝဲစၢဃာ်အဖိခွါဒီးပာ်ထီၣ်ဝဲလၢတၢ်လုၢ်လီၢ်အဖီခိၣ်လၢသ့ၣ် မုၣ်အဖီခိၣ်လီၤ. 10အန့ၣ်ဝံၤဒီးအဝဲဟံးထီၣ်ဒီန့ၣ်ဒ်သိးအကမၤသံအီၤန့ၣ်လီၤ. 11ဘၣ်ဆၣ်ဒီးယွၤအကလူးကိးဃီၤအီၤလၢမူခိၣ်, “စီၤအၤဘြၤဟၣ်ဧၢ, စီၤအၤဘြၤဟၣ်ဧၢ,”
ဒီးစီၤအၤဘြၤဟၣ်စံးဆၢဝဲ, “ကစၢ်ဧၢ, မ့ၢ်ယၤလီၤ.”
12ဒီးကလူးန့ၣ်စံးဘၣ်အီၤ, “မၤဆါဖိသၣ်အံၤတဂ့ၤ. မၤအီၤတၢ်နီတမံၤတဂ့ၤ. ဒီးခဲကနံၣ်အံၤယသ့ၣ်ညါလၢနယူးယီၣ် ဒီးစူၢ်ကစၢ်ယွၤန့ၣ်လီၤ. အဂ့ၢ်ဒ်အံၤ, နဖိခွါထဲတဂၤဧိၤဒၣ်လဲာ်, နကလုၢ်ထီၣ်အီၤဆူယအိၣ် န့ၣ်နတလိးကီနဲဘၣ်.”
13ဒီးစီၤအၤဘြၤဟၣ်ကွၢ်တၢ်ဆူအခိၣ်အဃၢၤဒီးထံၣ်ဘၣ်သိဖါတဒု အနၢၤတဖၣ်ဘၣ်ဘျးလၢသ့ၣ်တပှီာ်တပှာ်အကျါဒီးအဝဲ လဲၤဖီၣ်န့ၢ်အီၤဒီးလုၢ်ထီၣ်အီၤဒ်တၢ်လုၢ်မ့ၣ်အူတမံၤအသိးလၢ အဖိခွါအလီၢ်န့ၣ်လီၤ. 14စီၤအၤဘြၤဟၣ်ယုၢ်တၢ်လီၢ်န့ၣ်အမံၤလၢ, “ယဟိဝၤယံၤရၤ” အခီပညီ, “ယွၤထံၣ်တၢ်ဟ့ၣ်တၢ်” လီၤ. ဒီးတုၤလီၤလၢမုၢ်မဆါတနံၤအံၤဒၣ်လဲာ်ပှၤဂီၢ်မုၢ်စံး, “လၢယွၤအကစၢၢ်ဒီခိၣ်န့ၣ်ယွၤအိၣ်ဖျါထီၣ်ဝဲလီၤ.”
15ယွၤအကလူးကိးဃီၤစီၤအၤဘြၤဟၣ်လၢမူခိၣ်ခံဘျီတဘျီဒီး 16ယွၤကတိၤတၢ်စံးဝဲ, “ယမၤတၢ်ဆိၣ်တမံၤလၢယမံၤဒၣ်ယဲ အပူၤလၢ, ယကဆိၣ်ဂ့ၤနၤထူးထူးတီၤတီၤလီၤ. အဂ့ၢ်ဒ်အံၤ, နမၤတၢ်အံၤဒီးနဖိခွါထဲတဂၤဧိၤဒၣ်လဲာ်န့ၣ် နကလုၢ်ထီၣ်အီၤဆူယအိၣ်န့ၣ်နတလိးကီအီၤဘၣ်. 17ယအၢၣ်လီၤလၢယကဟ့ၣ်လီၤနၤလၢနစၢၤနသွဲၣ်တဖၣ်အါဝဲဂီၢ်ဝဲဒ်ဆၣ် ဧိၤဖီဧိၤလၢမူခိၣ်အသိးမ့ၢ်ဂ့ၤ, ဒ်မဲးဧိၤဟီၣ်ဧိၤလၢပီၣ်လဲၣ်နံၤအသိးမ့ၢ်ဂ့ၤန့ၣ်လီၤ. နစၢၤနသွဲၣ်တဖၣ်ကမၤနၢၤအဒုၣ်အဒါတဖၣ်န့ၣ်လီၤ. 18ကယဲၢ်ပှၤကလုာ်တဖၣ်ခဲလၢာ်ကဃ့ယၤလၢယကဆိၣ်ဂ့ၤအဝဲသ့ၣ်ဒ်ယဆိၣ် ဂ့ၤတ့ၢ်နစၢၤနသွဲၣ်တဖၣ်အသိးလီၤ. တၢ်ခဲလၢာ်အံၤမ့ၢ်လၢနစူၢ်တ့ၢ်ယကလုၢ်အဃိန့ၣ်လီၤ.” 19ဒီးစီၤအၤဘြၤဟၣ်က့ၤကဒါက့ၤဆူအခ့အပှၤတဖၣ်အအိၣ်ဒီးအဝဲ သ့ၣ်က့ၤသကိးဝဲဆူဝ့ၢ်ဘ့ၢ်ၡဘၤဖဲစီၤအၤဘြၤဟၣ်သူၣ်လီၤဆီ လီၤအတၢ်အိၣ်တၢ်ဆိးအလီၢ်န့ၣ်လီၤ.
စီၤနၤဃိၢ်အစၢၤအသွဲၣ်တဖၣ်
20တၢ်န့ၣ်တဖၣ်ဝံၤအလီၢ်ခံစီၤအၤဘြၤဟၣ်သ့ၣ်ညါတ့ၢ်ဝဲဒၣ်လၢနီၢ် မံးလကၤဆံးစၢ်န့ၢ်အဖိဃိးဂၤလၢစီၤအၤဘြၤဟၣ်အဒီပုၢ်ဝဲၢ် ခွါစီၤနၤဃိၢ်အဂီၢ်န့ၣ်လီၤ. 21စီၤဧူစးမ့ၢ်အဖိဝဲၢ်ကိ, ဒီးအပုၢ်တဖၣ်မ့ၢ်ဝဲစီၤဘူစး, စီၤကမူၤအ့လးလၢအမ့ၢ်စီၤအရၣ်အပၢ်, 22စီၤက့ၤစ့းဒီးစီၤဃစိၤ, စီၤပံးလဒၣ်, စီၤယံးဒလာ်, ဒီးစီၤဘသူၤအ့လးလၢအမ့ၢ်နီၢ်ရံးဘကၤအပၢ်န့ၣ်လီၤ. 23နီၢ်မံးလကၤဆံးစၢ်န့ၢ်အဖိဃိးဂၤအံၤလၢစီၤအၤဘြၤဟၣ်အဒီ ပုၢ်ဝဲၢ်ခွါစီၤနၤဃိၢ်အဂီၢ်န့ၣ်လီၤ. 24ဒီးနီၢ်ရူမၤလၢအမ့ၢ်စီၤနၤဃိၢ်အသံၣ်မါဆံးစၢ်န့ၢ်အီၤလၢ အဖိခွါစီၤတ့ဘာ်, စီၤကဃၣ်, စီၤတဃာ်ဒီးစီၤမၤကၤတဖၣ်န့ၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 22: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
