လံာ်တၢ်ကဲထီၣ်အခီၣ်ထံး 21

စီၤအံၤစဲးအိၣ်ဖျဲၣ်ထီၣ်ဝဲ

1-2ဒီးယွၤဆိၣ်ဂ့ၤနီၢ်စၤရါဒ်အဝဲအၢၣ်လီၤတ့ၢ်လံဝဲအသိး, ဒီးနီၢ်စၤရါဒၢထီၣ်ဝဲ, ဒီးဆံးစၢ်န့ၢ်ဖိခွါတဂၤလၢစီၤအၤ ဘြၤဟၣ်အဂီၢ်ဖဲအသးပှၢ်တ့ၢ်လံဝဲအကတီၢ်န့ၣ်လီၤ. 3-4ဒီးစီၤအၤဘြၤဟၣ်ယုၢ်အမံၤလၢစီၤအံၤစဲးလီၤ. ဒီးဖဲစီၤအံၤစဲးအိၣ်ဝဲဃိးနံၤန့ၣ်စီၤအၤဘြၤဟၣ်ကူးတရံး အီၤဒ်ကစၢ်ယွၤမၤလိာ်တ့ၢ်ဝဲအသိးန့ၣ်လီၤ. 5ဒီးဖဲစီၤအံၤစဲးအိၣ်ဖျဲၣ်ထီၣ်ဝဲန့ၣ်စီၤအၤဘြၤဟၣ်အသးအိၣ် တ့ၢ်လံအနံၣ်တကယၤန့ၣ်လီၤ. 6ဒီးနီၢ်စၤရါစံးဝဲဒၣ်, “ကစၢ်ယွၤဟဲစိာ်န့ၢ်လံယၤတၢ်သးခုဒီးတၢ်နံၤလီၤ. ကယဲၢ်ပှၤလၢအနၢ်ဟူတၢ်အံၤကိးဂၤဒဲးန့ၣ်ကနံၤဃုာ်ဒီးယၤလီၤ.” 7ဒီးစံးအါထီၣ်ဝဲ, “မ့ၢ်မတၤကစံးဘၣ်စီၤအၤဘြၤဟၣ်လၢနီၢ်စၤ ရါကအံးထွဲကွၢ်ထွဲဖိသၣ်န့ၣ်လဲၣ်. အဂ့ၢ်ဒ်အံၤ, ယဆံးစၢ်န့ၢ်အဖိလၢအသးပှၢ်အကတီၢ်န့ၣ်လီၤ.”

8ဒီးဖိသၣ်ဒိၣ်ထီၣ်ဝဲ, ဒီးမုၢ်တနံၤလၢအဖှၣ်အမိၢ်အနုၢ်န့ၣ်စီၤ အၤဘြၤဟၣ်မၤတၢ်အီၣ်အမူးဖးဒိၣ်လီၤ.

နီၢ်ဟၤကၢ်ဒီးစီၤယံးၡမၤဧ့လး ဘၣ်တၢ်ဆှၢဖျိးကွံာ်အီၤ

9ဒီးဘၣ်မုၢ်တနံၤ, စီၤယံးၡမၤဧ့လးလၢအမ့ၢ်ဖိခွါလၢပှၤအဲၤ ကူပတူးဖိနီၢ်ဟၤကၢ်ဆံးစၢ်န့ၢ်လၢစီၤအၤဘြၤဟၣ်အဂီၢ်နံၤဘၣ်ဖၣ် လဲနီၢ်စၤရါအဖိခွါစီၤအံၤစဲးန့ၣ်လီၤ. 10နီၢ်စၤရါထံၣ်အဝဲသ့ၣ်ဒီးစံးဘၣ်စီၤအၤဘြၤဟၣ်, “ဆှၢဖျိး ကွံာ်ပိာ်မုၣ်ဒီးအဖိခွါန့ၣ်တက့ၢ်. ကုၢ်ပိာ်မုၣ်အံၤအဖိခွါတကြၢးဒိးန့ၢ်ဘၣ်ကယဲၢ်နတၢ်ထူးတၢ်တီၤ တမံၤမံၤလၢယဖိခွါစီၤအံၤစဲးကန့ၢ်ဘၣ်သါန့ၣ်ဘၣ်.” 11ဒီးတၢ်အံၤမၤကိၢ်မၤဂီၤစီၤအၤဘြၤဟၣ်ဒိၣ်မးလၢစီၤယံးၡမၤ ဧ့လးစ့ၢ်ကီးမ့ၢ်စီၤအၤဘြၤဟၣ်အဖိခွါအဃိန့ၣ်လီၤ. 12ဒီးကစၢ်ယွၤစံးဘၣ်စီၤအၤဘြၤဟၣ်, “တဘၣ်ဘၣ်ယိၣ်တၢ်လၢဖိသၣ်ပိာ် ခွါဒီးနကုၢ်ပိာ်မုၣ်နီၢ်ဟၤကၢ်အဂီၢ်တဂ့ၤ. မၤဒ်တၢ်လၢနီၢ်စၤရါတဲဘၣ်နၤန့ၣ်တက့ၢ်. အဂ့ၢ်ဒ်အံၤ, နကမၤန့ၢ်နစၢၤနသွဲၣ်ဒ်ယအၢၣ်လီၤတ့ၢ်နၤအသိးခီ ဖျိစီၤအံၤစဲးန့ၣ်လီၤ. 13ယကဟ့ၣ်စ့ၢ်ကီးကုၢ်ပိာ်မုၣ်အံၤအဖိခွါလၢအဖိတဖၣ်ဒ်သိးအဝဲ သ့ၣ်ကကဲထီၣ်ပှၤတကလုာ်န့ၣ်လီၤ. အဝဲစ့ၢ်ကီးမ့ၢ်နဖိခွါန့ၣ်လီၤ.”

14လၢခံတသီဂီၤဂီၤန့ၣ်, စီၤအၤဘြၤဟၣ်ဟ့ၣ်နီၢ်ဟၤကၢ်တၢ်အီၣ် တနီၤဒီးထံဒၢတၢ်ဖံးတထၢၣ်လၢအပှဲၤဒီးထံန့ၣ်လီၤ. ဒီးပာ်ထီၣ်ဝဲဖိသၣ်ပိာ်ခွါလၢအမိၢ်အဖံဘၣ်ခိၣ်လိၤဒီးဟီ ထီၣ်ကွံာ်အီၤန့ၣ်လီၤ. ဒီးနီၢ်ဟၤကၢ်ဟးထီၣ်ကွံာ်ဝဲဒီးလဲၤဝ့ၤဝီၤတၢ်လၢပှၢ်မုၢ် ကနၢဘ့ၢ်ၡဘၤအပူၤန့ၣ်လီၤ. 15ဒီးတုၤထံလၢာ်ကွံာ်ဝဲဒၣ်န့ၣ်ဒီးပာ်တီၢ်ဝဲဖိသၣ်လၢတပှီာ် တခိၣ်အဖီလာ်, 16ဒီးလဲၤဆ့ၣ်နီၤယံၤဒီးအီၤအပျၢ်ခံကယၤဘျဲၣ်လီၤ. ဒီးစံးလီၤက့ၤအသး, “ယကထံၣ်ယဖိသံန့ၣ်ယတူၢ်တပှဲၤဘၣ်.” ဒီးဖဲအဆ့ၣ်နီၤဝဲဖဲန့ၣ်အခါအမဲာ်ထံလီၤဝဲဒၣ်န့ၣ်လီၤ.

17ဒီးကစၢ်ယွၤနၢ်ဟူဖိသၣ်ပိာ်ခွါအံၤဟီၣ်ဝဲအကလုၢ်ဒီးလၢမူ ခိၣ်န့ၣ်ကစၢ်ယွၤအကလူးကတိၤတၢ်ဒီးနီၢ်ဟၤကၢ်စံးဝဲ, “နီၢ်ဟၤကၢ်ဧၢ, နကိၢ်တၢ်လၢမနုၤအဂီၢ်န့ၣ်လဲၣ်. ပျံၤတၢ်တဂ့ၤ. ကစၢ်ယွၤနၢ်ဟူလံဖိသၣ်ပိာ်ခွါအတၢ်ဟီၣ်တၢ်ယၢၤန့ၣ်လီၤ. 18ဂဲၤဆၢထၢၣ်. လဲၤဒီးစိာ်ထီၣ်အီၤဒီးမၤမုာ်ထီၣ်က့ၤအီၤန့ၣ်တက့ၢ်. ယကဒုးကဲထီၣ်အစၢၤအသွဲၣ်တဖၣ်လၢပှၤတကလုာ်ဖးဒိၣ်န့ၣ်လီၤ.” 19ဒီးကစၢ်ယွၤအိးထီၣ်နီၢ်ဟၤကၢ်အမဲာ်ချံဒီးထံၣ်ဝဲထံပူၤ တပူၤန့ၣ်လီၤ. အဝဲလဲၤဒီးမၤပှဲၤထံဒၢတၢ်ဖံးလၢထံဝံၤဟ့ၣ်ဒုးအီဝဲ ဖိသၣ်ပိာ်ခွါတနီၤန့ၣ်လီၤ. 20ကစၢ်ယွၤအိၣ်ဒီးဖိသၣ်ပိာ်ခွါဖဲအဒိၣ်ထီၣ်ဝဲအခါန့ၣ်လီၤ. အဝဲအိၣ်ဝဲဆိးဝဲလၢပၤရၣ်အပှၢ်မုၢ်ကနၢဒီးကဲထီၣ်ပှၤခးတၢ် သ့တဂၤန့ၣ်လီၤ. 21အမိၢ်ဃုထံၣ်န့ၢ်အီၤအဲၤကူပတူးမုၣ်တဂၤလၢကကဲထီၣ်အမါအဂီၢ် န့ၣ်လီၤ.

တၢ်အၢၣ်လီၤအီလီၤလၢစီၤအၤဘြၤဟၣ်ဒီး စီၤအဘံးမ့လ့းအဘၢၣ်စၢၤ

22လၢအကတီၢ်ဖဲန့ၣ်စီၤအဘံၤမ့လ့းလဲၤတၢ်ဒီးအသုးမုၢ်အခိၣ်, စီၤဖံကိးလးဒီးစံးဘၣ်စီၤအၤဘြၤဟၣ်, “ကစၢ်ယွၤအိၣ်ဒီးနၤလၢကယဲၢ်တၢ်လၢနမၤအီၤကိးမံၤဒဲးအပူၤ န့ၣ်လီၤ. 23လၢတၢ်န့ၣ်အဃိဆိၣ်လီၤနသးဖဲအံၤလၢကစၢ်ယွၤအမဲာ်ညါလၢနသု တလီန့ၢ်ယၤ, ယဖိတဖၣ်ဒီးယစၢၤယသွဲၣ်တဖၣ်န့ၣ်တဂ့ၤ. ယတီတ့ၢ်ဒီးနၤအဃိ အၢၣ်လီၤယၤလၢနကတီစ့ၢ်ကီးဒီးယၤဒီးထံကီၢ်အံၤလၢနအိၣ် နဆိးလၢအပူၤန့ၣ်တက့ၢ်.”

24စီၤအၤဘြၤဟၣ်စံးဘၣ်အီၤ, “ယအၢၣ်လီၤ” န့ၣ်လီၤ.

25ဒီးစီၤအၤဘြၤဟၣ်ကဒူးကဒ့ၣ်တၢ်လၢစီၤအဘံၤမ့လ့းအလိၤဘၣ်ဃး ထံပူၤတပူၤလၢစီၤအဘံးမ့လ့းအခ့အပှၤတဖၣ်ဂုာ်န့ၢ်ဆူၣ်အီၤ အဂ့ၢ်န့ၣ်လီၤ. 26စီၤအဘံးမ့လ့းစံးဝဲ, “ပှၤလၢအမၤတၢ်အံၤန့ၣ်ယတသ့ၣ်ညါဘၣ်. နတတဲယၤတၢ်မၤအသးအံၤန့ၣ်ဘၣ်. ဒီးတၢ်အံၤမ့ၢ်အဆိ ကတၢၢ်တဘျီလၢယနၢ်ဟူဘၣ်အီၤန့ၣ်လီၤ.” 27တုၤနုၤတစု, စီၤအၤဘြၤဟၣ်ဟ့ၣ်စီၤအဘံၤမ့လ့းလၢသိတနီၤ ဒီး, ဂီၤဖံးတနီၤ, ဒီးပှၤခံဂၤအံၤမၤသကိးတၢ်အၢၣ်လီၤအီလီၤ န့ၣ်လီၤ. 28စီၤအၤဘြၤဟၣ်နီၤဖးသိဖိမိၢ်နွံဒုလၢသိသ့ၣ်တဖၣ်အကျါ,

29ဒီးစီၤအဘံၤမ့လ့းသံကွၢ်အီၤ, “ဘၣ်မနုၤလၢနမၤတၢ်အံၤန့ၣ် လဲၣ်.”

30စီၤအၤဘြၤဟၣ်စံးဆၢအီၤ, “တူၢ်လိာ်သိဖိမိၢ်နွံဒုအံၤတ က့ၢ်. နမ့ၢ်မၤဒ်အံၤဒီးမ့ၢ်နအၢၣ်လီၤလၢယမ့ၢ်ပှၤတဂၤလၢအခူၣ်ထံပူၤ အဝဲအံၤန့ၣ်လီၤ.” 31လၢတၢ်န့ၣ်အဃိ, တၢ်လီၢ်အံၤဘၣ်တၢ်ကိးအီၤလၢဘ့ၢ်ၡဘၤ, မ့ၢ်လၢအဝဲသ့ၣ်ခံဂၤမၤတၢ်အၢၣ်လီၤအီလီၤဖဲန့ၣ်အဃိလီၤ.

32ဒီးတုၤအဝဲသ့ၣ်မၤတၢ်အၢၣ်လီၤအီလီၤဖဲဘ့ၢ်ၡဘၤဝံၤအလီၢ်ခံ ဒီး, စီၤအဘံၤမ့လ့းဒီးစီၤဖံကိးလးက့ၤကဒါက့ၤဆူပှၤဖလ့ၡသး ဖိအကီၢ်န့ၣ်လီၤ. 33အန့ၣ်ဒီးစီၤအၤဘြၤဟၣ်သူၣ်သ့ၣ်တဖုဖဲဘ့ၢ်ၡဘၤဒီးဘူၣ်ထီၣ်ဘါ ထီၣ်ယွၤ, ကစၢ်ယွၤလီၤထူလီၤယိာ်န့ၣ်လီၤ. 34စီၤအၤဘြၤဟၣ်အိၣ်ဝဲဆိးဝဲလၢပှၤဖလ့ၡသးဖိအကီၢ်ပူၤအါနံၣ်အါလါန့ၣ်လီၤ.

Currently Selected:

လံာ်တၢ်ကဲထီၣ်အခီၣ်ထံး 21: KSWC

Highlight

Copy