လံာ်နီၢ်အ့ၤစတၢ် 2
2
နီၢ်အ့ၤစတၢ်ကဲထီၣ်နီၢ်ပၤမုၣ်
1တၢ်န့ၣ်တဖၣ်ဝံၤအလီၢ်ခံတုၤစီၤပၤအတၢ်သးဒိၣ်စၢ်လီၤက့ၤန့ၣ်, အဝဲသ့ၣ်နီၣ်ထီၣ်က့ၤတၢ်လၢနီၢ်ပၤမုၣ်ဝးၡတံၤမၤဝဲဒီးအဝဲ အတၢ်မၤလိာ်လၢအထီဒါအီၤအဂ့ၢ်န့ၣ်လီၤ. 2လၢတၢ်န့ၣ်အဃိစီၤပၤအပှၤဟ့ၣ်ကူၣ်တၢ်လၢအဘူးဒီးအီၤတနီၤစံးဘၣ်အီၤ, “မ်ပှၤဃုန့ၢ်စီၤပၤလၢမုၣ်လိၤဘိလၢအက့ၢ်အဂီၤဂ့ၤတဖၣ်န့ၣ်တက့ၢ်. 3ဒီးမ်စီၤပၤဃုထၢပဒိၣ်ဖးဒိၣ်တဖၣ်လၢကီၢ် တဘ့ၣ်ဘၣ်တဘ့ၣ်လၢဘီမုၢ်အပူၤဒီးမၤလိာ်အဝဲသ့ၣ် ဒ်သိးကဟဲကိးမုၣ်လိၤဘိလၢအက့ၢ်အဂီၤဂ့ၤခဲလၢာ်ဆူပိာ်မုၣ် အဟံၣ်ဖဲဝ့ၢ်ခိၣ်ဝ့ၢ်ၡူၡၣ်အပူၤန့ၣ်တက့ၢ်. ပာ်အဝဲသ့ၣ်လၢပှၤဒ့ဒံၣ်ဖိ စီၤဟ့က့ၤလၢအကွၢ်ထွဲပှၤပိာ်မုၣ်တဖၣ်အစုပူၤ, ဒီးမ်ပှၤမၤဃံမၤလၤအီၤန့ၣ်တက့ၢ်. 4တုၤနုၤတစု, ဟံးန့ၢ်မုၣ်လိၤဘိလၢနဘၣ်သူၣ်ဘၣ်သးအဒိၣ်က တၢၢ်တဂၤ, ဒီးဒုးကဲထီၣ်အီၤလၢနီၢ်ပၤမုၣ်, လၢနီၢ်ဝးၡတံၤ အလီၢ်တက့ၢ်.”
စီၤပၤဆိကမိၣ်လၢတၢ်ဟ့ၣ်ကူၣ်အံၤမ့ၢ်တၢ်လၢအဂ့ၤသတးဒီးမၤ ထွဲဝဲဒၣ်န့ၣ်လီၤ.
5ဖဲန့ၣ်လၢဝ့ၢ်ၡူၡၣ်အပူၤန့ၣ်ပှၤယူဒၤဖိစီၤ ယၤအံၢ်အဖိခွါလၢအမံၤမ့ၢ်ဝဲစီၤမၢ်ဒကဲၤအိၣ်ဝဲဒၣ်န့ၣ်လီၤ. အဝဲမ့ၢ်ပှၤဘၣ်ဃးဒီးပှၤဘံၣ်ယၤမံၣ်ဖိအဒူၣ်လၢအဟဲလီၤစၢၤ လီၤသွဲၣ်လၢစီၤၡံမံၤဒီးစီၤကံၣ်န့ၣ်လီၤ. 6ဖဲကီၢ်ဘၤဘူၤလိၣ်အစီၤပၤနဘူးကးန့စၢ်ဟဲက့ၤစိာ်မၢကဲကုၢ်ကီၢ် ယူဒၤအစီၤပၤယဟိၤယါခံၣ် (အဝဲဒၣ်မ့ၢ်စီၤယံးကၤနံယၤ) လၢဝ့ၢ်ယရူၤၡလ့ၣ်န့ၣ်, ဟဲက့ၤကိးစ့ၢ်ကီးပှၤတဖုဒီးစီၤမၢ်ဒကဲၤအိၣ်ဝဲလၢအဝဲသ့ၣ်အကျါန့ၣ်လီၤ. 7အဝဲဒၣ်န့ၣ်အိၣ်ဒီးအတခွါမုၣ်တဂၤ, နီၢ်အ့ၤစတၢ်, လၢအမံၤလၢဧ့ၤဘြံၤ အကျိာ်မ့ၢ်ဝဲနီၢ်ဟဒးစၤဒီး မ့ၢ်မုၣ်လိၤဘိဃံလၤတဂၤန့ၣ်လီၤ. ဖဲအမိၢ်အပၢ်သံသဒၣ်ကွံာ်အီၤန့ၣ်, စီၤမၢ်ဒကဲၤလုၢ်ဖိက့ၤအီၤဒီးလုၢ်ဒိၣ်ထီၣ်အီၤဒ်အဖိမုၣ်ဒၣ်ဝဲ အသိးန့ၣ်လီၤ.
8တုၤစီၤပၤဟ့ၣ်လီၤအတၢ်မၤလိာ်အသီန့ၣ်မုၣ်လိၤဘိအါဂၤဘၣ် တၢ်ဟဲဆှၢအီၤဆူဝ့ၢ်ၡူၡၣ်ဒီးနီၢ်အ့ၤစတၢ်အိၣ်လၢအဝဲသ့ၣ်အကျါန့ၣ်လီၤ. အဝဲစ့ၢ်ကီးဘၣ်တၢ်ပာ်အီၤလၢစီၤပၤအနီပူၤ, လၢပှၤကွၢ်ထွဲပိာ်မုၣ်အဟံၣ်, စီၤဟ့က့ၤအတၢ်အံးထွဲကွၢ်ထွဲအပူၤန့ၣ်လီၤ. 9ဒီးစီၤဟ့က့ၤဘၣ်သူၣ်ဘၣ်သးနီၢ်အ့ၤစတၢ်ဒီးအဝဲကွၢ်မဲာ်အီၤန့ၣ်လီၤ. စီၤဟ့က့ၤတမၤယံာ်မၤနီၣ်အသးလၢတၢ်ကွၢ်ထွဲ နီၢ်အ့ၤစတၢ်ခီဖျိတၢ်မၤဃံမၤလၤအီၤဒီးဟ့ၣ်အီၤတၢ်အီၣ်တၢ်အီ လီၤဆီန့ၣ်ဘၣ်. အဝဲဟ့ၣ်အီၤလၢတၢ်လီၢ်အဂ့ၤကတၢၢ်လၢပှၤပိာ်မုၣ်အိၣ်ဟံၣ်အပူၤ ဒီးဃုထၢလီၤဆီပိာ်မုၣ်ဖိလၢစီၤပၤအနီပူၤနွံဂၤဒ်သိးကမၤန့ၢ်အတၢ်လီၤ.
10မ့ၢ်လၢစီၤမၢ်ဒကဲၤအတၢ်ဟ့ၣ်ကူၣ်အီၤအဃိ, နီၢ်အ့ၤစတၢ်ပာ်ခူ သူၣ်တၢ်ဂ့ၢ်လၢအဝဲမ့ၢ်ပှၤယူဒၤဖိတဂၤန့ၣ်လီၤ. 11ကိးမုၢ်နံၤဒဲးစီၤမၢ်ဒကဲၤဟးလ့ၢ်ထီၣ်လ့ၢ်လိၤလၢ ပှၤပိာ်မုၣ်တဖၣ်အိၣ်ဟံၣ်အဂၢၤအမဲာ်ညါဒ်သိးကသ့ၣ်ညါဘၣ် လၢမ့ၢ်နီၢ်အ့ၤစတၢ်အိၣ်မုာ်ဧါ, ဒီးတၢ်ကမၤအသးဒီးအီၤဒ်လဲၣ် အဂ့ၢ်န့ၣ်လီၤ.
12မုၣ်လိၤဘိတဖၣ်ဘၣ်တၢ်မၤဃံမၤလၤအီၤဒ်အညီနုၢ်အသိးယံာ် ဝဲတနံၣ်ဒ်အမ့ၢ်တၢ်ဖှူအီၤလၢမူရၣ်ဃုလါဒီးသိနၢမူအဂၤ ဃုလါန့ၣ်လီၤ. တၢ်န့ၣ်ဝံၤအလီၢ်ခံ, တၢ်ဆှၢအဝဲသ့ၣ်တဂၤဘၣ်တဂၤဆူစီၤပၤအဃၤ ၡဝ့ရိၣ်အအိၣ်လၢအကတီၢ်ဒၣ်ဝဲန့ၣ်လီၤ. 13ဖဲအဝဲသ့ၣ်တဂၤဘၣ်တဂၤဟးထီၣ်လၢပှၤပိာ်မုၣ်အိၣ်ဟံၣ်ဒီးလဲၤဆူနီန့ၣ်, အဝဲကူသိးတၢ်ဒ်အအဲၣ်ဒိးဝဲအသိးသ့ဝဲဒၣ်န့ၣ်လီၤ. 14အဝဲကဘၣ်လဲၤဖဲန့ၣ်လၢမုၢ်ဟါ, ဒီးလၢမုၢ်ဆ့ၣ်ထီၣ်တနံၤန့ၣ်ကဘၣ်တၢ်ဆှၢအီၤဆူပှၤ ပိာ်မုၣ်အိၣ်ဟံၣ်အဂၤတဖျၢၣ်ဒီးပာ်အီၤလၢ, ပှၤဒ့ဒံၣ်ဖိစီၤၡၤၡကးလၢအကွၢ်ထွဲစီၤပၤအသံၣ်မါတဖၣ်, အတၢ်အံးထွဲကွၢ်ထွဲအပူၤန့ၣ်လီၤ. မ့တမ့ၢ်ဘၣ်လၢစီၤပၤဘၣ်သူၣ်ဘၣ် သးအီၤဒီးကိးအီၤလၢအမံၤဘၣ်န့ၣ်, အဝဲတလဲၤဘၣ်ကဒီးဆူစီၤပၤ အအိၣ်ဘၣ်.
15ဒီးတၢ်ဆၢကတီၢ်ဘၣ်ဝဲလၢနီၢ်အ့ၤစတၢ်အဂီၢ်, လၢကလဲၤဆူစီၤပၤအအိၣ်လီၤ. နီၢ်အ့ၤစတၢ်မ့ၢ်, စီၤအဘံဃယ့းလးအဖိမုၣ်ဒီးစီၤမၢ်ဒကဲၤအတခွါမုၣ်လၢအ ကွၢ်လုၢ်ဖိက့ၤဝဲဒ်အဖိမုၣ်အသိးန့ၣ်လီၤ. ပှၤတဂၤလၢ်လၢ်လၢအထံၣ်ဘၣ်နီၢ်အ့ၤစတၢ်န့ၣ်, ဘၣ်သူၣ်ဘၣ်သးအီၤလီၤ. ဖဲအဝဲအကတီၢ်တုၤဃီၤန့ၣ်, အဝဲကူသိးဒၣ်တၢ်ဒ်ပှၤဒ့ဒံၣ်ဖိလၢအကွၢ်ထွဲပှၤပိာ်မုၣ်အိၣ်ဟံၣ်, စီၤဟ့က့ၤဟ့ၣ်ကူၣ်အီၤအသိးန့ၣ်လီၤ. 16လၢတၢ်န့ၣ်အဃိ, ဖဲစီၤပၤအဃၤၡဝ့ရိၣ်ကဲထီၣ်စီၤပၤနွံနံၣ်တနံၣ်, လၢလါတဆံလါတလါ, လါတ့ဘ့းအပူၤန့ၣ်, နီၢ်အ့ၤစတၢ်ဘၣ်တၢ်လဲၤဆှၢအီၤဆူစီၤပၤ အဃၤၡဝ့ရိၣ်အအိၣ်လၢစီၤပၤအနီပူၤန့ၣ်လီၤ. 17စီၤပၤဘၣ်သူၣ်ဘၣ်သး, ကွၢ်မဲာ်ဒီးအဲၣ်နီၢ်အ့ၤစတၢ်ဒိၣ်န့ၣ်ဒံး မုၣ်လိၤဘိအဂၤခဲလၢာ်လီၤ. ဒီးစီၤပၤပာ်ထီၣ်နီၢ်ပၤမုၣ်အခိၣ်သလုးလၢနီၢ်အ့ၤစတၢ်အခိၣ် လိၤဒီးဒုးကဲထီၣ်အီၤလၢနီၢ်ပၤမုၣ်လၢနီၢ်ဝးၡတံၤအလီၢ်န့ၣ်လီၤ. 18အန့ၣ်ဝံၤဒီး, စီၤပၤမၤတၢ်အီၣ်တၢ်အီအမူးဖးဒိၣ်တမူး လၢတၢ်မၤလၤကပီၤနီၢ်အ့ၤစတၢ်အဂီၢ်ဒီးကွဲမုာ်အပဒိၣ်တဖၣ်လီၤ. အဝဲဘိးဘၣ်သ့ၣ်ညါမုၢ်နံၤန့ၣ်ဒ်တၢ်အိၣ်ဘှံးအမုၢ်တနံၤ လၢကီၢ်ဒီဘ့ၣ်ညါအပူၤဒီး, နီၤလီၤတၢ်ဟ့ၣ်တဖၣ်ဒ်အကြၢးဝဲဒီးစီၤပၤတဂၤအသိးန့ၣ်လီၤ.
စီၤမၢ်ဒကဲၤမၤပူၤဖျဲးစီၤပၤအသးသမူ
19အကတီၢ်ဖဲန့ၣ်, စီၤမၢ်ဒကဲၤဘၣ်တၢ်ဃုထၢပာ်လီၤအီၤလၢစီၤပၤ, လၢတၢ်ပၢဆှၢတၢ်ဖံးတၢ်မၤအဂီၢ်လီၤ. 20မ့မ့ၢ်နီၢ်အ့ၤစတၢ်တဒုးသ့ၣ်ညါဒံးအသးလၢအမ့ၢ်ပှၤယူဒၤဖိဘၣ်. အအံၤမ့ၢ်စီၤမၢ်ဒကဲၤတဲဘၣ်အီၤလၢအသုတစံးဘၣ်ပှၤနီတဂၤတဂ့ၤ, ဒီးအဝဲဒိကနၣ်ဝဲ, ဒ်အဝဲဒိကနၣ်တ့ၢ်အီၤဖဲအမ့ၢ်ဒံးဖိသၣ်ပိာ် မုၣ်ဖိတဂၤလၢအအိၣ်လၢအတၢ်အံးထွဲကွၢ်ထွဲအဆၢ ကတီၢ်အခါအသိးန့ၣ်လီၤ.
21ဖဲစီၤမၢ်ဒကဲၤမၤတၢ်လၢနီပူၤအခါန့ၣ်, စီၤဘံးကသၤနၤဒီးစီၤ တ့ရ့ၣ်, လၢအမ့ၢ်ပှၤဒ့ဒံၣ်ဖိခံဂၤလၢစီၤပၤအနီပူၤလၢ အပၢၤစီၤပၤအဒၢးအကျဲစၢၤန့ၣ်, ကူၣ်ထီၣ်ဝဲဒၣ်လၢကမၤသံ စီၤပၤအဃၤၡဝ့ရိၣ်န့ၣ်လီၤ. 22စီၤမၢ်ဒကဲၤသ့ၣ်ညါတၢ်ကူၣ်အၢအံၤ, ဒီးတဲဘၣ်နီၢ်ပၤမုၣ်နီၢ် အ့ၤစတၢ်, ဒီးနီၢ်အ့ၤစတၢ်တဲဘၣ်စီၤပၤတၢ်လၢစီၤမၢ်စကဲၤ တဲဘၣ်အီၤန့ၣ်လီၤ. 23တၢ်လူၤဃုသ့ၣ်ညါတၢ်ဂ့ၢ်တမံၤအံၤ, ဒီးတၢ်ထံၣ်လၢအမ့ၢ်ဝဲတီဝဲ အဃိဒီးပှၤခံဂၤလိာ်အံၤဘၣ်တၢ်စၢသံကွံာ် အီၤလၢတၢ်စၢသံအလီၢ်န့ၣ်လီၤ. ဒီးစီၤပၤမၤလိာ်ဝဲဒၣ်လၢတၢ် မၤအသးတမံၤအံၤကဘၣ်တၢ်ကွဲးနီၣ်အီၤလၢဘီမုၢ်အလံာ် ကွဲးနီၣ်တၢ်အပူၤန့ၣ်လီၤ.
Currently Selected:
လံာ်နီၢ်အ့ၤစတၢ် 2: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
